Read tyap A̱romawa 9 Bible Online

A̱romawa 9 - tyap bible

A̱romawa 9

¹N shei a̱tsak a̱lyiat di̱ mun á̱pyia̱ nung hu ma̱ng Kristi. N bwoi laa hwa bah. A̱za̱za̱rak Ntswa wu wa yet sheda a̱di̱dam mi̱ fwuo nung wu!

²N shya̱ ma̱ng byian fwuo za̱m ma̱ng a̱lyia̱ ya kuzang njen mi̱ fwuo nung hu, da̱nian á̱niet nung ba.

³A̱wot ku na lan nung, ka̱ A̱gwaza na shyi nung, a̱ bu ghai nung ma̱ng Kristi si̱ nat sang sangba̱p; da̱nian n ka san A̱yahudawa ba, ba̱ yet á̱na̱nyiuk nung ba, ba̱ neet mi̱ kwai nung ji a̱ni.

⁴Mba bya yet á̱niet Isi̱rela ba. Mba bya A̱gwaza kyiak ba̱ yet mman nggu na. A̱ si̱ tyai mba shi nggu hu. A̱ si̱ la̱p a̱li̱ka̱uli ma̱ng a̱mba. A̱ si̱ tyai mba doka nggu ji. A̱ si̱ tak mba á̱tsatsak nvak nang ba̱ na nkwok ntong a̱zaghyi A̱gwaza a̱ni. A̱ si̱ bu nyia̱ mba a̱tan a̱li̱ka̱uli ma̱ a̱di̱di̱t.

⁵Ba̱ yet á̱ka̱mbwon a̱yaatyia̱ a̱khwop mba bya Ibrahim, Ishaku, ma̱ng Yakubu. A̱wot di̱ yet a̱tyubishyi, Kristi wu meang neet mi̱ nkwai mba ja. Nggu wa[79] yet A̱gwaza, a̱ nyia̱ tyok di̱ kuzang nkyang a̱ni. Yok á̱ dyep guu, ba̱ng si̱ nat sang sangba̱p! Samba̱rka![80]

⁶A̱wot ku[81] fa A̱gwaza tyat a̱li̱ka̱uli nggu wu ma̱ng á̱niet Isi̱rela byaa? Kaai, mat a̱mgba̱m á̱niet nang á̱ tyei mi̱ kwai Isi̱rela ji a̱ni, ba̱ yet á̱niet nang A̱gwaza kyiak nang á̱tsatsak á̱niet nggu a̱ni bah.

⁷Mat nang ba̱ neet mi̱ kwai Ibrahim ja a̱ni, ku fa nyia̱ ba̱ yet á̱tsatsak mman Ibrahim bya bah. Da̱ a̱kwonu a̱kya, ku nang Ibrahim mbyia̱ mman á̱ghyang a̱ni, á̱ lyuut nyia̱, “Da̱ a̱vwuo Ishaku kya, a na nshya̱ kwai nang n nyia̱ ang a̱li̱ka̱uli wu a̱ni.”[82]

⁸A̱wot, ku fa nang á̱ka̱mbwon Ibrahim nang á̱ tyei di̱n vak vam a̱ni, a̱mgba̱m na wa yet á̱tsatsak mman A̱gwaza na bah. Da̱ a̱kwonu a̱kya, á̱ka̱mbwon na nang á̱ tyei di̱n vak nyia̱ a̱li̱ka̱uli a̱ni, ni̱nia yet á̱si̱ ba nang A̱gwaza kyiak nang á̱tsatsak mman nggu ba a̱ni.

⁹Kidee, A̱gwaza ma̱ a̱pyia̱ nggu nyia̱ a̱li̱ka̱uli ma̱ng Ibrahim nyia̱, “Jen a̱ni a̱ghyang a̱lyia̱, ka̱ n bwuok mbai, Sa̱ratu na byin nggwon.”[83]

¹⁰Nggwon kani, kikya yet Ishaku a̱ yet a̱tyia̱ a̱khwop nzi̱t wu a̱ni. Nang gu nshi a̱ni, a̱ si̱ bwuo Rifkatu[84], a̱ si̱ tyei nggu a̱ka̱hyaai.

¹¹A̱wot neet nang á̱ ka̱n tyei a̱ka̱hyaai a̱nia bah; nang ba̱ byia̱ a̱wat ba̱ nyia̱ a̱tan ku á̱ka̱tuk nta̱m bah, Rifkatu si̱ shya̱ ta̱m ji ji̱ tak nang A̱gwaza nkhai á̱niet á̱zanson di̱ si̱sak ku mmyim nggu a̱ni[85].

¹²Ta̱m jini fa, A̱gwaza khai á̱niet mat a̱tan nta̱m ku á̱ka̱tuk nta̱m mba wa bah. A̱ si̱ nyia̱ ma̱ng Rifkatu a̱ni, “A̱niet khwop nggwon ang wu, a̱ na yet a̱khwo a̱shushyuo wu.”[86]

¹³Ma̱nang á̱ ndyuut a̱ni nyia̱, “N chat Yakubu wa. A̱wot n si̱ ndak Isuwa.”[87]

¹⁴Ka̱ a̱nia wa, mi̱ yihwa zi̱ na hyia̱, zi̱ fa, ku tak nang A̱gwaza nyia̱ shansham baa? Kaai, ku ma̱ chunchwiit! A̱ nyia̱ shansham!

¹⁵Ma̱nang A̱gwaza nnyia̱ ma̱ng Musa, “A̱tyu n shim n fa̱k kunak gu a̱ni, nggu wa n na fa̱k kunak nggu hu. Ma a̱nia wa, a̱tyu n shim n fa̱k shok gu a̱ni, nggu wa n na fa̱k shok nggu ji.”[88]

¹⁶Mat a̱nia, ku tak nang A̱gwaza wa nkhai á̱niet a̱ fa̱k kunak mba. A̱tyubishyi maai a̱ khai a̱ nyia̱ ta̱m da̱nian A̱gwaza a̱ ka fa̱k kunak gu bah.

¹⁷Ma̱nang A̱gwaza ku ntak ma̱ng Fi̱ra̱una a̱ni, nyia̱, “N ku nkup ang tyok hu, da̱nian n ka tak chet nung hu da̱ a̱vwuo ang. N bu ntyia̱ á̱ lyen a̱lyoot nung ka koji mi̱ swanta hu.”[89]

¹⁸Si̱ huni tak nang A̱gwaza ni̱ nfa̱k kunak a̱tyu nang gu khai a̱ fa̱k kunak gu a̱ni. Ma a̱nia wa, a̱tyu gu ma nkhai a̱ tyia̱ nggu lak fwuong a̱ni, a̱ na tyia̱ nggu lak fwuong hu.

¹⁹Shimba, a̱yin ma̱ nyin na nyia̱, “Ka̱ a̱nia wa, yihwa mbyia̱ nang A̱gwaza ni̱ ntyei á̱niet a̱bun di̱ lak fwuong mba hu? Mat lak fwuong mba hu yet kyang hwa nang A̱gwaza wa ma̱ a̱pyia̱ nggu tyei mba a̱ni.[90]”

²⁰N na nwuak shim nyia̱, “Nwan a̱tyubishyi, nwan wa yet a̱nyan, nang a na ngya fwuang ma̱ng A̱gwaza? Ka̱ doot a̱la̱n nang á̱ nok ma̱ng lyem a̱ni, ka̱ nyia̱ ma̱ng a̱tyu a̱ nok ka a̱ni, ‘Yihwa mbyia̱ a nnok nung a̱nia a?’[91] ”

²¹A̱tyu a̱ nok li̱la̱n ma̱ng lyem a̱ni, a̱ byia̱ a̱wat za̱m gu na nnyia̱ ta̱m ma̱ng lyem hu di̱ si̱sak gu nchat a̱ni. Ka̱ a̱ shim gu kyiak a̱ kwang lyem a̱nyiung gu nnok li̱la̱n feang; da̱nian a̱nyiung ka̱ yet a̱si̱ weang nkyayak, a̱wot a̱nyiung ka, ka̱ ka yet a̱si̱ khwot a̱fi̱fi̱k kuzang jen.

²²Ma a̱nia wa ta̱m A̱gwaza hu ndi. Ku nang A̱gwaza mbyia̱ a̱wat a̱ tak mwai lyen ma̱ng chet nggu hu a̱ni, a̱ ni̱ nyeap fwuo nggu hu za̱m ma̱ng á̱niet nang gu nyia̱ a̱daat ba̱ na bwuk a̱ni mat mwai lyen nggu hu.

²³A̱nia wa gu si̱ bu chat gu tak á̱niet ba gu khai a̱ni a̱gba̱mgbam a̱kyenkyai shi nggu wu. Á̱niet bani bya nang ku mi̱ nfa̱k kunak ba a̱ si̱ mi̱ nkhai mba a̱ sak ba̱ ka nwuo a̱kyenkyai shi nggu wu.

²⁴Zi̱ mun shya̱ ma̱ á̱niet a̱bya, nzi̱t á̱niet A̱gwaza khai a̱ni; ma̱ A̱yahudawa bya ma̱nyin mba bah, a̱wot mbeang á̱niet ba̱ yet Nnwap na̱ nwai yet A̱yahudawa a̱ni.

²⁵Ma̱nang A̱gwaza ku ntak a̱bwonu Hosiya a̱ta̱m a̱kwonu A̱gwaza tazwa Nnwap na̱ nwai yet A̱yahudawa a̱ni, nyia̱, “Á̱niet ba̱ nwai yet á̱niet nung ba a̱ni, n na ngyei mba ‘á̱niet nung.’ Ma a̱nia wa, á̱niet ba nang n ku nchat a̱ni bah, n na ngyei mba, ‘á̱niet nang n chat a̱ni.’[92] ”

²⁶A̱wot Hosiya si̱ bu lyuut nyia̱, “Tyan ji á̱ ntak mba nyia̱, ‘Nyi yet á̱niet nung bya bah,’ mi̱ tyan a̱ja ja nang á̱ na ngyei mba, ‘Mman A̱gwaza a̱ shya̱ mi̱ swuan a̱ni.’[93] ”

²⁷A̱wot tazwa á̱niet Isi̱rela ba, Ishaya a̱ta̱m a̱kwonu A̱gwaza si̱ hyia̱ ma̱ng a̱gba̱ndang a̱nwuat nyia̱, “Ku nang á̱niet Isi̱rela ba nshi á̱kpa ka nang a̱ji̱jak di̱n khwong kyai a̱sa̱khwot a̱ni; a̱mgba̱m ma̱ng a̱nia, mi̱ a̱bada̱dei sot á̱niet kya na shya̱ san hu.

²⁸Mat A̱gwaza na nyia̱ a̱mgba̱m swanta hu shi̱ri̱ya ji ma a̱nggang. A̱wot a̱ tyak ji a̱mgba̱m.”[94]

²⁹Ma̱nang Ishaya ku ndyuut a̱ni nyia̱, “Ki̱ A̱tyoli Á̱niet Nzwang Ma A̱gwaza Tswazwa wa ku bwat zi̱t kwai bah, si̱ á̱ bwuk ma̱ng a̱nzi̱t nang á̱niet Sodom a̱ni. A̱wot á̱ si̱ lyang zi̱t nang á̱niet Goma̱ra a̱ni.”[95]

³⁰Yihwa nang si̱ huni fa? Ku fa ku nang Nnwap na̱ nwai yet A̱yahudawa a̱ni ndak kwan ba̱ yet á̱tsotswat a̱zaghyi A̱gwaza a̱ni; a̱wot mat nwuak fwuo mba hu di̱ Kristi hwa, nang A̱gwaza ntak kpa̱sai nang gu nkyiak ba ba̱ yet á̱tsotswat á̱niet ma̱ng sang a̱bun a̱zaghyi nggu.

³¹A̱wot á̱niet Isi̱rela ba, si̱ kwan ba̱t ba̱ yet á̱tsotswat a̱zaghyi A̱gwaza, mat nang ba̱ nkhwi doka mba ji a̱ni. Ba̱ si̱ shya̱ a̱wat a̱kya bah.

³²Yihwa ku mbyia̱ á̱niet Isi̱rela ba si̱ ndyin a̱wat a̱kya? Mat ba̱ ku ta̱yuk di̱ nyia̱ a̱tan nta̱m, da̱nian ba̱ ka yet á̱tsotswat á̱niet a̱zaghyi A̱gwaza, da̱ a̱kwonu ka nang ba̱ na nnwuak fwuo da̱ A̱gwaza a̱ni. Ba̱ si̱ tuk tak da̱ a̱fang ka, ka̱ tyei á̱niet ma̱ a̱di̱di̱t á̱ga̱u a̱ni.[96]

³³Ma̱nang á̱ ndyuut ma̱ A̱lyiat A̱gwaza na a̱ni, nyia̱, “N na kpaat a̱fang mi̱ Si̱hiyona; a̱fang ka̱ tyei á̱niet ma̱ a̱di̱di̱t ba̱ ga̱u a̱ni. A̱wot a̱fang kani na tyia̱ á̱niet ma̱ a̱di̱di̱t ba̱ kwa. A̱wot konyan a̱ nwuak fwuo da̱ nggu a̱ni, a̱tyu a̱wa na swuo nsum bah.”[97]