Read tyap 1 A̱korontiyawa 12 Bible Online

1 A̱korontiyawa 12 - tyap bible

1 A̱korontiyawa 12

¹Ma̱ninika, nyin á̱niet khwi Yesu ba nang n chat a̱ni, da̱ a̱lyiat nang nyi lyip tazwa za̱náng chet nang A̱za̱za̱rak Ntswa wu ka̱u zi̱t a̱ni. N chat nyi fi̱k a̱lyiat za̱náng nchet nani shansham.

²Nyi lyen di̱n jen nang nyi ku ngyet á̱niet chyi A̱gwaza a̱ni, á̱ ku laai nyin á̱ tyei zan. Nyi si̱ kwok ntong a̱zaghyi nghwughwu a̱yaagwaza sang swuan ba̱ nwai lyiat a̱ni.

³Mat a̱nia, n chat nyi lyen nang á̱ mbyia̱ a̱tyu nang A̱za̱za̱rak Ntswa A̱gwaza na tyia̱ gu gu shyi Yesu a̱ni bah. A̱tyu a̱ na hyia̱ nang Yesu wa ngyet A̱tyoli wu a̱ni; nggu wa ma̱ nyin gu yet a̱tyu nang A̱za̱za̱rak Ntswa A̱gwaza wu shya̱ ndung ma̱ng a̱nggu a̱ni.

⁴Za̱náng chet A̱za̱za̱rak Ntswa nshya̱ ma̱ a̱di̱di̱t ji̱ vwuon a̱ni. A̱wot A̱za̱za̱rak Ntswa a̱nyiung wa ka̱u nji a̱mgba̱m.

⁵Nta̱m A̱gwaza nshya̱ ma̱ a̱di̱di̱t na̱ vwuon a̱ni. A̱wot A̱gwaza a̱nyiung wa nang zi̱ nyia̱ nggu kuzang tangka̱i nta̱m.

⁶A̱gwaza nyia̱ nta̱m di̱ nvak ma̱ a̱di̱di̱t. A̱wot ma̱ A̱gwaza a̱nyiung wa nyia̱ kuzang tangka̱i nta̱m mi̱ konyan ma̱ nzi̱t.

⁷Á̱ nang konyan ma̱ nzi̱t kuzang ntangka̱i za̱náng chet A̱za̱za̱rak Ntswa, da̱nian zi̱ ka mbeang á̱ghyang.

⁸A̱ghyang a̱niet, A̱za̱za̱rak Ntswa wu nang gu chet nang gu na nshei a̱lyiat A̱gwaza na ma̱ng a̱tsatsak mumwang[51] nang á̱ tyai nggu ndyo a̱ni. A̱ghyang a̱niet mameang, A̱za̱za̱rak Ntswa wu si̱ nang nggu chet nang gu na ndyiat nang a̱tyu lyen a̱lyiat A̱gwaza nang A̱za̱za̱rak Ntswa wu tyai nggu ndyo a̱ni.

⁹A̱ghyang a̱niet, A̱za̱za̱rak Ntswa wu si̱ nang nggu chet nang gu na nwuak fwuo gba̱mgbam, A̱gwaza a̱ tyai a̱tsatsak nchet nggu wu da̱ a̱nggu a̱tyu a̱ nwuak fwuo hu a̱ni.[52] A̱ghyang a̱niet meang, A̱za̱za̱rak Ntswa wu si̱ nang nggu chet kuzang jen a̱ choot kuzang tangka̱i nzwan.

¹⁰A̱ghyang a̱niet, A̱za̱za̱rak Ntswa wu si̱ nang nggu chet kuzang jen gu ni̱ nnyia̱ nta̱m a̱ga̱de njhyang ma̱ a̱di̱di̱t. A̱wot a̱ghyang a̱niet meang, á̱ si̱ nang nggu chet shei a̱lyiat A̱gwaza nang A̱za̱za̱rak Ntswa wu ni̱ tyai gu kpa̱sai[53] gu shei susot á̱niet khwi ji a̱ni. A̱ghyang a̱niet byia̱ chet khap A̱za̱za̱rak Ntswa ma̱ng a̱ka̱tuk ntswa a̱ni.[54] Ma a̱nia wa, a̱ghyang a̱niet á̱ nang nggu chet a̱ lyiat di̱ lilyem A̱za̱za̱rak Ntswa ma̱ a̱di̱di̱t nang á̱ghyang á̱niet chyi a̱ni.[55] A̱wot a̱ghyang a̱niet, á̱ si̱ nang nggu chet bwan a̱lyiat[56] neet di̱ lilyem A̱za̱za̱rak Ntswa nat ndyo di̱ swáng a̱lyiat lilyem susot á̱niet khwi.[57]

¹¹A̱mgba̱m za̱náng chet jini A̱za̱za̱rak Ntswa A̱gwaza wa ma̱nyin gu ka̱u njii. Nggu wa ma̱nyin gu bu khai za̱náng chet nang gu na nang konyan a̱ni.

¹²Vam a̱tyubishyi hu byia̱ nkap ma̱ a̱di̱di̱t. A̱wot a̱mgba̱m nkap a̱nia yet vam nyiung hwa. Ma a̱nia wa, nzi̱t zi̱ yet kidee vam Yesu Kristi hu a̱ni ndi.

¹³Á̱niet khwi á̱ghyang ma̱ nzi̱t yet A̱yahudawa bya. Á̱ghyang á̱niet si̱ yet Nnwap na̱ nwai yet A̱yahudawa a̱ni. Á̱ghyang si̱ yet á̱khwo bya. Á̱ghyang si̱ yet mman a̱li nia. A̱wot A̱za̱za̱rak Ntswa wu wa nyia̱ a̱mgba̱m nzi̱t ba̱ptisman ji, zi̱ si̱ yet vam nyiung. A̱wot a̱mgba̱m nzi̱t, zi̱ byia̱ A̱za̱za̱rak Ntswa a̱nyiung wa.[58]

¹⁴A̱tsak a̱lyiat, vam hu byia̱ nkap ma̱ a̱di̱di̱t, ku yet kap nyiung hwa bah.

¹⁵Ki̱ tak hu ku shya̱ mi̱ vam hu a̱ni nyia̱, “N gyet bwak bah. Mat a̱nia, n gyet kap vam bah.” Si̱ a̱hwa vwuong hu yet kap vam bah.

¹⁶Ma a̱nia wa, ki̱ fufwuo ma nyia̱, “Nung, ngyet tswa a̱li bah. Mat a̱nia, n gyet kap vam bah.” Si̱ a̱hwa na vwuong hu yet kap vam a?

¹⁷Ka̱ a̱mgba̱m vam hu wa yet tswa a̱li ja, si̱ yihwa zi̱ na nfwuong a̱vwuo na? Ma a̱nia wa, ka a̱mgba̱m vam hu wa yet fufwuo hwa, si̱ yihwa zi̱ na nfwuong swam nkyang hu?

¹⁸Mat a̱nia, nvam nzi̱t na byia̱ nkap ma̱ a̱di̱di̱t. A̱wot A̱gwaza si̱ tyia̱ kuzang kap di̱ tyan nang nggu n chat hu a̱ni.

¹⁹Ka̱ a̱mgba̱m vam hu wa yet kap nyiung hwa, si̱ ku li kang!

²⁰A̱tsak a̱lyiat, á̱ mbyia̱ nkap ma̱ a̱di̱di̱t. A̱mgba̱m ma̱ng a̱nia, vam hu yet nyiung hwa.

²¹Mat a̱nia, tswa a̱li si̱ mi̱n nyia̱ ma̱ng bwak, “N byia̱ a̱ka̱ta ma̱ng a̱nwan bah.” Ma a̱nia wa, ku a̱pyia̱ meang ka̱ nyia̱ ma̱ng a̱ti̱tak, “N byia̱ a̱ka̱ta ma̱ng a̱nyin bah.”

²²Mami a̱tsak a̱lyiat, nkap na nang á̱ nwuan na sang chet, á̱ si̱ bu kyiak na nang kyang a̱ni bah, na̱ yet kyang chat hwa mi̱ vam hu.

²³Ma a̱nia wa, nkap vam na na̱ shya̱ di̱ niat a̱ni, zi̱ ni̱ chok na a̱tsatsak chok. Zi̱ ni̱ ta̱bam zi̱ kup nkap na di̱ na̱ myim á̱ li a̱ni bah.

²⁴Ku nang a̱cha̱chet nkap wu n chat á̱ ta̱bam á̱ kup naa a̱ni bah. Huhwa mbyia̱ A̱gwaza ntung vam hu ndung, da̱nian á̱ bu mbeang shi hu. A̱wot á̱ kup nkap na̱ shya̱ di̱ niat a̱ni, ma̱ng a̱yaatoot.

²⁵Si̱ huni na tyia̱ nkap na na̱ mun á̱pyia̱ mi̱ vam hu, mat a̱mgba̱m nkap na na̱ ka beang jhyang.

²⁶Ki̱ kap nyiung swuo a̱bung, a̱mgba̱m á̱kum nkap ka na mun á̱ swuo a̱bung ka dundung ma̱ng a̱nhu. Ma a̱nia wa, ka̱ á̱ ma nwuak kap nyiung shi, a̱mgba̱m á̱kum nkap ka na gwai dundung ma̱ng a̱nhu.

²⁷Ma a̱nia wa, a̱mgba̱m nyin sot á̱niet khwi ji, nyi yet vam Kristi hwa. A̱wot konyan ma̱ nyin yet kap nyiung hwa mi̱ vam nggu hu.

²⁸A̱wot A̱gwaza si̱ khai á̱ghyang á̱niet mi̱ sot á̱niet khwi ji: a̱nyiung, a̱yaata̱m Yesu[59]; a̱feang, a̱yaata̱m a̱kwonu A̱gwaza; a̱tat, á̱niet tyiet; a̱wot ma̱ng á̱niet nyia̱ nkyang a̱ga̱de, ma̱ng á̱niet ba̱ byia̱ za̱náng chet choot á̱niet nzwán a̱ni; ma̱ng á̱niet ba̱ byia̱ za̱náng chet beang á̱ghyang a̱ni; ma̱ng á̱niet byia̱ za̱náng chet yet a̱yaakwak a̱son a̱ni; ma̱ng á̱niet ba̱ lyiat di̱ lilyem A̱za̱za̱rak Ntswa nang á̱ chyi a̱ni.

²⁹A̱mgba̱m á̱niet khwi ba yet a̱yaata̱m[60] Yesu byaa? A̱mgba̱m á̱niet khwi ba yet a̱yaata̱m a̱kwonu A̱gwaza bya mami susot á̱niet khwi ji a? A̱mgba̱m á̱niet khwi ba yet á̱niet tyiet byaa? Kee, a̱mgba̱m á̱niet khwi ba yet á̱niet nyia̱ nta̱m a̱ga̱de byaa?

³⁰A̱mgba̱m á̱niet khwi bibya byia̱ za̱náng chet choot á̱niet nzwán baa? A̱mgba̱m á̱niet khwi bibya byia̱ za̱náng chet lyiat di̱ lilyem A̱za̱za̱rak Ntswa ghyang nang á̱ chyi a̱ni a? Kee, a̱mgba̱m mba wa byia̱ za̱náng chet bwan lilyem A̱za̱za̱rak Ntswa ghyang hu? Kaai!

³¹Mat a̱nia, ku myim nyi byia̱ di̱dang za̱náng chet ji̱ na beang a̱ swak a̱ni. A̱wot a̱mgba̱m ma̱ng a̱nia, n na ntyai nyin vak ku yet a̱ swak a̱ni[61].