Read tyap 1 A̱korontiyawa 14 Bible Online

1 A̱korontiyawa 14 - tyap bible

1 A̱korontiyawa 14

¹Nyi tyia̱ a̱lyia̱ di̱ chat á̱ghyang. Nyi bu fwuong di̱dang za̱náng chet A̱za̱za̱rak Ntswa, a̱wot za̱náng chet ji̱ swak á̱kum ka a̱mgba̱m a̱ni, jija yet shei a̱lyiat da̱ a̱kwonu A̱gwaza nang A̱za̱za̱rak Ntswa wu tyai nggu ndyo a̱ni.

²Mat a̱tyu a̱ lyen lyiat di̱ lilyem A̱za̱za̱rak Ntswa ghyang nang á̱ chyi a̱ni, A̱gwaza wa nang gu lyiat ma̱ng a̱nggu. Á̱niet bya nang gu lyiat ma̱ng a̱mba bah. Mat á̱ mbyia̱ a̱tyu a̱ fi̱k a̱lyem ka nang gu lyiat a̱ni bah. Kyang ku mbyia̱ a̱ni, A̱za̱za̱rak Ntswa wa na nang gu chet a̱lyiat hu, a̱wot a̱ tyai a̱tsatsak a̱lyiat A̱gwaza a̱ shya̱ di̱ niat a̱ni.

³A̱wot di̱n vak ghyang, a̱tyu a̱ ni̱ shei á̱niet khwi ba a̱lyiat da̱ a̱kwonu A̱gwaza nang A̱za̱za̱rak Ntswa tyai nggu ndyo a̱ni; a̱ ni̱ tyei mba chet hwa. A̱ si̱ tyei mba gba̱gbak. A̱wot a̱ si̱ bu shyim mba nfwuo na.

⁴A̱tyu a̱ ni̱ lyiat di̱ lilyem A̱za̱za̱rak Ntswa ghyang a̱ni, a̱ ni̱ tyei nwuak a̱chuchuk nggu hu mban chet. A̱wot a̱tyu a̱ ni̱ shei a̱lyiat A̱gwaza na nang A̱za̱za̱rak Ntswa wu tyai nggu ndyo a̱ni; a̱ ni̱ tyei a̱mgba̱m nwuak a̱chuchuk á̱niet khwi hu ku mban chet.

⁵N chat a̱mgba̱m nyin nyi lyiat di̱ lilyem A̱za̱za̱rak Ntswa ghyang. A̱wot kyang hu n chat swak a̱ni, nyi shei a̱lyiat A̱gwaza nang A̱za̱za̱rak Ntswa tyai nyin dyo a̱ni. Mat shei a̱lyiat A̱gwaza nang A̱za̱za̱rak Ntswa tyai nyin dyo a̱ni; ku yet a̱ swak lyiat di̱ lilyem A̱za̱za̱rak Ntswa ghyang hu. Si̱ nang á̱ mbyia̱ a̱tyu a̱ na bwan á̱niet khwi ba a̱lyem A̱za̱za̱rak Ntswa ka nang a lyiat a̱ni; da̱nian á̱ ka tyei a̱mgba̱m nwuak a̱chuchuk á̱niet khwi hu ku mban chet.

⁶Mat a̱nia, nyin á̱niet khwi Yesu ba nang n chat a̱ni, ki̱ n bai n si̱ ndyiat ma̱ng a̱nyin da̱ a̱lyem A̱za̱za̱rak Ntswa ghyang nang nyi lyen a̱ni bah; zang kpangti̱n ja nyi na shya̱? A̱wot ki̱ n hyia̱ ma̱ng a̱nyin a̱tsatsak ta̱m wu nang A̱za̱za̱rak Ntswa tyai nung ndyo a̱ni, ku a̱tsatsak mumwang nang á̱ tyai nung dyo a̱ni; ku shei A̱lyiat A̱gwaza nang A̱za̱za̱rak Ntswa wu tyai nung dyo a̱ni, ku n tyiet nyin kyang, si̱ nani na beang nyin.

⁷Ma a̱nia wa, nkyang sang swuan nang a̱gwa ku zunzom a̱ni, ki̱ a̱nak mba ka ghwut shansham bah; á̱ na nyia̱ ni wa a̱yin a̱ nfi̱k a̱bwom nang ba̱ bwom a̱ni.

⁸Ka̱ á̱ tyiap a̱gwa ka shansham di̱ si̱sak ji nang a̱tyu nzwang na nfa̱k yorong hu a̱ni bah; a̱ na nyia̱ ni wa gu nda̱p vam da̱nian zwang ji?

⁹Ma a̱nia wa, ku ndi ma̱ng a̱nyin. Ki̱ nyi lyiat ma̱ng á̱niet ma̱ng swáng á̱lyiat da̱ a̱lyem nang ba̱ fi̱k a̱ni bah, ba̱ na nyia̱ ni wa ba̱ ndyen kyang hu nang nyi shei a̱ni? Nyi na gba̱ra̱m a̱lyiat na ma̱ tai wa.

¹⁰Á̱ mbyia̱ lilyem ma̱ a̱di̱di̱t ku vwuon mi̱ swanta hu a̱ni. A̱wot kuzang a̱lyem byia̱ swáng á̱lyiat ji fa kyang a̱ni.

¹¹Ki̱ n fi̱k a̱lyem a̱kya bah, n ngyet á̱nietchen wa da̱ a̱vwuo a̱tyu a̱ lyiat a̱lyem a̱kya a̱ni. Nggu a̱tyu lyiat wu meang, a̱ ma na yet á̱nietchen wa da̱ a̱vwuo nung.

¹²A̱nia wa ku ndi da̱ a̱vwuo nyin. Nang nyi mbyia̱ di̱dang shya̱ za̱náng chet A̱za̱za̱rak Ntswa A̱gwaza ji a̱ni; si̱ nyi chat za̱náng chet ji nang nyi na ntyei a̱mgba̱m á̱niet khwi ba, ba̱ mban chet di̱ khwi hu a̱ni.

¹³Mat a̱nia, konyan wa lyiat di̱ lilyem A̱za̱za̱rak Ntswa nang á̱ chyi a̱ni, si̱ gu naai A̱gwaza a̱ nang gu za̱nang chet ji gu na mbwuak a̱lyem ka nang gu lyiat a̱ni.

¹⁴Mat ki̱ n naai A̱gwaza di̱ lilyem A̱za̱za̱rak Ntswa ghyang, tswa nung jija naai. A̱wot nung, n si̱ mi̱n fi̱k kyang hu nang n dyiat mi̱ fwuo nung hu a̱ni bah.

¹⁵Ka̱ a̱nia wa, yihwa n na nyia̱? N na naai A̱gwaza mi̱ tswa nung ji. A̱wot n bu na naai A̱gwaza mi̱ fwuo nung ma̱ng swáng á̱lyiat nang n na nfi̱k a̱ni. N na bwom mi̱ tswa nung ji. A̱wot n bu na bwom mi̱ fwuo nung ma̱ng swáng á̱lyiat nang n na fi̱k a̱ni.

¹⁶Mat, ka̱ a dyep A̱gwaza wu mi̱ tswa ang ja ma̱nyin ji, á̱ na nyia̱ ni wa á̱niet ba di̱ ba̱ fi̱k swáng a̱lyiat nang a lyiat a̱ni bah, ba̱ ndyep A̱gwaza ndung ma̱ng a̱nwan? Ba̱ na nyia̱ ni wa ba̱ ngwai A̱gwaza wu ndung ma̱ng a̱nwan, ki̱ ba̱ fi̱k swáng a̱lyiat nang a lyiat a̱ni bah?

¹⁷A̱wot nwan ma̱ a̱pyia̱ ang a gwai A̱gwaza wu shansham. A̱wot a̱lyiat nang a lyiat a̱ni, na tyei á̱niet ba̱ fwuong ang a̱ni, ba̱ mban chet mi̱ khwi hu bah.

¹⁸N gwai A̱gwaza, nang n dyiat di̱ lilyem A̱za̱za̱rak Ntswa swak konyan ma̱ nyin.

¹⁹A̱mgba̱m ma̱ng a̱nia, ma̱ a̱tung sot á̱niet khwi, kyang hu n chat swak a̱ni, hu hwa yet; n dyiat swáng á̱lyiat tsuon nang konyan na fi̱k ji beang nggu a̱ni; ku lan nang n na ndyiat swáng a̱lyiat chyikwop swak da̱ a̱lyem A̱za̱za̱rak Ntswa a̱ghyang nang a̱yin chyi a̱ni.

²⁰Nyin á̱niet khwi Yesu ba nang n chat a̱ni, nyi yok nyia̱ a̱di̱dam nang mman a̱ni di̱ kyang nani bah. (Nyi yet á̱niet sang a̱bun nang a̱bachyuang a̱bamman a̱ni, di̱n vak a̱ka̱tuk). A̱wot nyi byia̱ a̱di̱dam tat a̱ghyi, nyi fi̱k ntangka̱i nkyang nani.

²¹Á̱ lyuut mami A̱lyiat A̱gwaza na nyia̱, “A̱gwaza wa hyia̱ nyia̱, ‘N na ndyiat ma̱ng á̱niet nung ba di̱ lilyem ghyáng ku yet fai a̱ni, a̱wot mami nunu á̱nietchen. A̱mgba̱m ma̱ng a̱nia, ba̱ na fa̱k nung bah.’ ”[63]

²²Mat a̱nia, za̱náng chet lyiat di̱ lilyem A̱za̱za̱rak Ntswa ghyang nang á̱ chyi a̱ni, ji̱ yet kyang a̱ga̱de ku na tak, nang á̱ nkhap á̱niet nwai khwi Yesu ba zan ma̱ng á̱niet khwi nggu ba a̱ni.[64] A̱wot za̱nang chet shei a̱lyiat A̱gwaza nang A̱za̱za̱rak Ntswa ni̱ tyai a̱ni, ji̱ yet kpangti̱n ji̱ na beang á̱niet khwi Yesu bya a̱ni, kang ma̱ng á̱niet nwai khwi nggu ba.

²³Mat a̱nia, ka̱ á̱niet ba̱ nwai yet á̱niet khwi Yesu a̱ni, ku á̱niet ba̱ nwai fi̱k nkyang nani a̱ni, bai ma̱ a̱tung sot nyin á̱niet khwi, a̱wot ba̱ si̱ fa̱k konyan lyiat da̱ a̱lyem da̱nang ba̱ fi̱k a̱ni bah; mee ba̱ na fa̱k nang nyi lyiat di̱ lilyem ma̱ tai, nang pyipyia̱ nyin hu bwuak wa a̱ni a?

²⁴A̱wot ka̱ a̱mgba̱m nyin sot á̱niet khwi Yesu shya̱ di̱ shei a̱lyiat A̱gwaza na nang A̱za̱za̱rak Ntswa tyai nyin ndyo a̱ni, a̱wot á̱niet nwai khwi Yesu, ku á̱niet ba̱ nwai fi̱k nkyang nani a̱ni, si̱ bai ma̱ a̱tung sot á̱niet khwi nyin ka; a̱lyiat A̱gwaza na na kpaat mbaa mi̱ nfwuo mba na mat a̱ka̱tuk nyia̱ mba wu. A̱wot na̱ nyia̱ mba shi̱ri̱ya mat kyang nang nyi shei a̱ni.

²⁵Nang ba̱ mmyiai a̱fufwuo á̱ fwuong a̱lyiat A̱gwaza na a̱ni, a̱di̱dam mi̱ nfwuo mba wu a̱ shya̱ di̱ niat a̱ni, á̱ na ghwut ma̱ng a̱di̱dam wu kpa̱sai. A̱wot ba̱ na kpaat a̱khwukhwut ba̱ kyuak ntong a̱zaghyi A̱gwaza, ba̱ nyia̱, “A̱tsatsak a̱lyiat, A̱gwaza shya̱ a̱ji mami nyin!”

²⁶Mat a̱nia, nyin á̱niet khwi Yesu ba nang n chat a̱ni, yihwa zi̱ na nyia̱? Ka̱ nyi ni̱ ntung ndung, a̱ghyang a̱niet na bwom. A̱ghyang a̱niet a̱ tyiet, a̱ghyang a̱niet na tak kpa̱sai a̱tsatsak ta̱m ji nang A̱gwaza tyai nggu ndyo a̱ni, a̱ghyang a̱niet na lyiat di̱ lilyem A̱za̱za̱rak Ntswa ghyang nang á̱ chyi a̱ni. A̱wot a̱ghyang a̱niet a̱ bwan lilyem A̱za̱za̱rak Ntswa nang á̱ lyiat a̱ni. Ku myim nyi nyia̱ kuzang kyang, da̱nian nyi ka tyei á̱ghyang nyin nyi mban chet mi̱ khwi hu.

²⁷Ka̱ á̱ghyang á̱niet na lyiat di̱ lilyem A̱za̱za̱rak Ntswa ghyang nang á̱ chyi a̱ni, ba̱ yok swak á̱niet a̱feang ku á̱niet a̱tat bah. Ku yet ta hwa, ba̱ lyiat a̱nyanyin. A̱wot nang a̱ghyang a̱niet ma̱ mba bwan a̱lyem nang ba̱ lyiat a̱ni.

²⁸A̱wot ka̱ á̱ ma mbyia̱ a̱tyu a̱ nshya̱ ma̱ a̱tung sot á̱niet khwi ka a̱ na bwan a̱lyem A̱za̱za̱rak Ntswa ka nang á̱ lyiat a̱ni bah; ku yet ta hwa konyan ma̱ mba a̱ swan nyonywang mami a̱tung sot á̱niet khwi nyin ka. A̱wot ba̱ lyiat ma̱ng A̱gwaza di̱ lilyem A̱za̱za̱rak Ntswa ghyang nang á̱ chyi hu a̱ni ma̱nyin mba.

²⁹Á̱niet shei a̱lyiat A̱gwaza nang A̱za̱za̱rak Ntswa tyai mba ndyo a̱ni meang, ba̱ yok swak á̱niet a̱feang ku á̱niet a̱tat bah. A̱wot ba̱ ghwon á̱ghyang á̱niet bya ba̱ mak a̱lyiat mba na.

³⁰A̱wot ka̱ a̱ghyang a̱niet shya̱ di̱ shei a̱lyiat A̱gwaza nang A̱za̱za̱rak Ntswa tyai nggu ndyo a̱ni, a̱wot a̱ghyang a̱niet si̱ san a̱tsatsak ta̱m nang A̱gwaza tyai nggu ndyo a̱ni; a̱tyu a̱ shya̱ di̱ shei a̱lyiat A̱gwaza na a̱ni, ku yet ta hwa, a̱ yok, a̱wot gu tyia̱ nywang.

³¹Ka̱ nyi nyia̱ a̱nia, a̱mgba̱m á̱niet ba ba̱ shei a̱lyiat A̱gwaza nang A̱za̱za̱rak Ntswa tyai mba ndyo a̱ni, na shya̱ a̱wat nang ba̱ na ndyiat a̱nyanyin a̱ni. Mat a̱nia, konyan ma̱ nyin a̱ ka myiam, a̱wot á̱ bu tyia̱ nggu a̱ mban chet di̱ khwi Yesu hu.

³²Nyi yok bwung bah; á̱niet ba ba̱ byia̱ za̱nang chet shei a̱lyiat A̱gwaza nang A̱za̱za̱rak Ntswa tyai mba ndyo a̱ni, ku myim ba̱ ta̱bat pyipyia̱ mba, a̱wot ba̱ lyiat a̱nyanyin.

³³Mat A̱gwaza wu yet A̱gwaza kyiai swat hwa bah. A̱wot a̱ yet A̱gwaza swat nyinyang wa. A̱nia ku ndi da̱ a̱vwuo a̱ka̱tung susot a̱mgba̱m á̱za̱za̱rak á̱niet khwi A̱gwaza ba.[65]

³⁴Ku yet ta hwa á̱nyiuk ba̱ swan nyonywang di̱n jen a̱ka̱tung á̱niet khwi ji. Mat á̱ shim mba ndyo ba̱ lyiat bah. Ku myim á̱nyiuk ba̱ tyei pyipyia̱ mba mbwak tyok á̱tyok mba ba ma̱ a̱ka̱tung susot á̱niet khwi; ma̱nang á̱ ndyuut mi̱ doka Musa ji a̱ni.

³⁵Ka̱ á̱nyiuk byia̱ kyang lyip, si̱ ba̱ lyip á̱tyok mba ba ma̱ a̱ka̱sa. Mat ku myim a̱byii̱k a̱ lyiat kpa̱sai ma̱ a̱ka̱tung susot á̱niet khwi bah.[66]

³⁶Kee nyin á̱niet khwi A̱korontiyawa ba, nyi fa a̱lyiat A̱gwaza na tsa neet da̱ a̱vwuo nyin kyaa? Kee ma̱ nyin bya nang á̱ nwuak nyin na ma̱nyin nyin?

³⁷Ka̱ a̱yin fa nyia̱ a̱ yet a̱tyu shei a̱lyiat a̱kwonu A̱gwaza wa, ku a̱ nyia̱ a̱di̱dam A̱za̱za̱rak Ntswa wa nang gu chet hu; ku myim gu shim a̱lyiat na nang n dyiat a̱ni. Na̱ yet kam hwa, ku neet da̱ a̱vwuo A̱tyoli Yesu ma̱ a̱pyia̱ nggu a̱ni.

³⁸A̱wot ka̱ a̱yin ma ndak shim kam huni, nggu meang A̱gwaza ma na lak shim nggu hu.[67]

³⁹Mat a̱nia, nyin á̱niet khwi Yesu ba nang n chat a̱ni, nyi tyia̱ fwuo di̱ shei a̱tsatsak a̱lyiat A̱gwaza nang A̱za̱za̱rak Ntswa tyai nyin dyo a̱ni. A̱wot nyi bu yok vwuong á̱niet khwi ba̱ lyiat di̱ lilyem A̱za̱za̱rak Ntswa ghyang nang á̱ chyi a̱ni bah.

⁴⁰A̱wot ku yet ta hwa, nyi nyia̱ kuzang kyang ku myim a̱ni a̱nyanyin, a̱wot nyi nyia̱ nhu shansham.