Read tyap 1 A̱korontiyawa 15 Bible Online

1 A̱korontiyawa 15 - tyap bible

1 A̱korontiyawa 15

¹Ma̱ninika, nyin á̱niet khwi Yesu ba nang n chat a̱ni, nyi jhyung A̱sham Nkhang ka nang n ku nshei ma̱ng a̱nyin di̱n jen jhyang a̱ni. Nyi ku san ka mbwak nfeang di̱n jen a̱ja. A̱wot nyi ni̱ yong di̱ kuntyin a̱hwa mi̱ chet.

²Da̱ A̱sham Nkhang kani kya nang nyi na nshya̱ san hu da̱ a̱vwuo A̱gwaza; ka̱nang nyi ba̱ng ka mi̱ chet ma̱nang n ku ntak ma̱ng a̱nyin ka a̱ni. Kalak nwuak fwuo nyin hu da̱ nka di̱n tsa hu, ku yet a̱tsatsak wa bah.

³A̱sham Nkhang ka ka̱ yet a̱tsatsak nang n san a̱ni, kikya nang n shei nyin nyia̱: Kristi khwu da̱nian a̱ka̱tuk nyia̱ nzi̱t wu, ma̱nang á̱ ndyuut ma̱ A̱lyiat A̱gwaza na a̱ni.

⁴Á̱ ku niat gu, a̱wot a̱ si̱ doot ma̱ng swuan ma̱ á̱niet ba̱ ka̱n kwi a̱ni a̱tuk mam tat ka, ma̱nang á̱ ndyuut ma̱ A̱lyiat A̱gwaza na a̱ni.

⁵A̱ si̱ tyai a̱pyia̱ nggu kpa̱sai da̱ a̱vwuo Bitut[68] ma̱ng á̱kum mman ta̱m swak ma̱ a̱feang ka.

⁶A̱wot a̱ si̱ bu tyai a̱pyia̱ nggu di̱n jen jhyung da̱ a̱vwuo á̱niet khwi ba̱ swak chyi tsuon a̱ni. Á̱ghyang ma̱ a̱mba ni̱ shya̱ a̱chet, a̱wot á̱ghyang á̱niet ka̱n kwi.

⁷A̱jawa a̱ si̱ tyai a̱pyia̱ nggu kpa̱sai da̱ a̱vwuo Yakubu[69], a̱wot ma̱ng a̱mgba̱m á̱kum a̱yaata̱m nggu ba.

⁸Di̱ ngaan hu, a̱ si̱ tyai a̱pyia̱ nggu kpa̱sai da̱ a̱vwuo nung. N si̱ ndi nggu, ku nang á̱ nyia̱ á̱ ku byin nung ma̱ a̱bya̱bya̱ njen a̱ni.

⁹Mat, nung gwa ngyet a̱tsak a̱bada̱dei wu mami a̱mgba̱m a̱yaata̱m Yesu ba. N maai á̱ yei nung a̱ta̱m Yesu bah, mat n ku ya̱shuk á̱niet khwi Yesu ba, n si̱ nyia̱ mba a̱ka̱kpa̱t.

¹⁰A̱wot tangka̱i a̱ta̱m wu nang n gyet a̱fwun a̱ni, n gyet gu mat shok A̱gwaza ja. A̱wot shok nang A̱gwaza nyia̱ nung dyo a̱ni, ji̱ yet a̱buk kyang wa bah. Da̱ a̱kwonu a̱kya, n nyia̱ ta̱m shei a̱lyiat A̱gwaza hu swak á̱kum a̱yaata̱m Yesu ka. A̱mgba̱m ma̱ng a̱nia, chet shei a̱lyiat A̱gwaza a̱hwa yet si̱ nung hwa bah. A̱wot A̱gwaza wa nyia̱ ta̱m ma̱ng a̱nung mat shok nggu ji.

¹¹Mat a̱nia, ku nung gwa n shei a̱lyiat A̱gwaza na, ku a̱yaata̱m á̱ghyang bya ma nshei naa, ku shyak bah. Mat a̱mgba̱m nzi̱t, zi̱ shei A̱sham Nkhang a̱nyiung kya, nang nyi san nyi si̱ nwuak a̱chuchuk da̱ nka a̱ni.

¹²Ma̱ninika, ki̱ zi̱ shei a̱lyiat A̱gwaza na nyia̱ Kristi ku khwu, a̱ si̱ doot ma̱ng swuan ma̱ á̱niet ba̱ ka̱n kwi a̱ni; yihwa mbyia̱ nang á̱ghyang ma̱ nyin nnyia̱ di̱ á̱niet ba̱ ka̱n kwi a̱ni, na doot ma̱ng swuan bah?

¹³Mat ka̱ á̱ mbyia̱ doot ma̱ng swuan ma̱ á̱niet ba̱ ka̱n kwi a̱ni bah, a̱wot ku tak da̱nang Kristi meang ku ndoot ma̱ng swuan ma̱ á̱niet ba̱ ka̱n khwi a̱ni bah.

¹⁴A̱wot ki̱ Kristi ma ndoot ma̱ng swuan ma̱ á̱niet ba̱ ka̱n kwi a̱ni bah, a̱mgba̱m shei a̱lyiat A̱gwaza nzi̱t hu yet kyang bah, a̱wot nwuak fwuo nyin hu di̱ Kristi yet a̱buk kyang wa.

¹⁵A̱wot ka̱ a̱nia wa, nzi̱t a̱yaata̱m Yesu ba zi̱ bwoi A̱gwaza a̱ka̱laa nia. Mat zi̱ tak nang A̱gwaza ka̱n ta̱ngam Yesu ma̱ng swuan ma̱ á̱niet ba̱ ka̱n kwi a̱ni. A̱wot da̱ mba, á̱ ta̱ngam gu ma̱ng swuan ma̱ á̱niet ba̱ ka̱n kwi a̱ni bah. Ka̱ a̱nia wa ku ndi bah, á̱niet ba̱ ka̱n kwi a̱ni, ba̱ na doot ma̱ng swuan ma̱ á̱niet ba̱ ka̱n kwi a̱ni bah.

¹⁶A̱wot ka̱nang á̱niet ba̱ ka̱n kwi a̱ni, na doot ma̱ng swuan ma̱ á̱niet ba̱ ka̱n kwi a̱ni bah; ku tak da̱nang Kristi meang ndoot ma̱ng swuan ma̱ á̱niet ba̱ ka̱n kwi a̱ni bah.

¹⁷A̱wot ka̱ á̱ ma ta̱ngam Kristi ma̱ng swuan ma̱ á̱niet ba̱ ka̱n kwi a̱ni bah, nyi nwuak fwuo da̱ a̱buk kyang wa, a̱wot á̱ ka̱n chi a̱ka̱tuk nyia̱ nyin wu bah.

¹⁸Ka̱ ku li a̱nia, ku tak nang a̱mgba̱m á̱niet ba̱ nwuak fwuo di̱ Kristi a̱ni, ba̱ bwuk wa ba̱ng si̱ nat sang sangba̱p!

¹⁹Ma a̱nia wa, ki̱ zi̱ ba̱ng fwuo di̱ Kristi da̱nian swat mi̱ swanta huni hwa ma̱nyin hu, zi̱ yet á̱niet bya á̱ na fa̱k kunak ba swak konyan mi̱ swanta hu a̱ni!

²⁰A̱wot a̱tsatsak a̱lyiat wu wa yet, A̱gwaza ta̱ngam Yesu Kristi ma̱ng swuan ma̱ á̱niet ba̱ ka̱n kwi a̱ni. Nggu wa yet a̱son mami á̱kpa á̱niet ba̱ tai a̱gba̱ndang chak yak a̱mgba̱m á̱niet nang A̱gwaza na ta̱ngam ma̱ng swuan ma̱ á̱niet ba̱ ka̱n kwi a̱ni.

²¹Mat a̱nia, ma̱nang á̱niet swanta ba nkwi mat a̱ka̱tuk nyia̱ A̱da̱mu a̱ni; ma̱ a̱nia wa, á̱niet swanta ba na ndoot ma̱ng swuan ma̱ á̱niet ba̱ ka̱n kwi a̱ni mat Yesu Kristi.

²²Ma̱nang konyan nkwi mat a̱mgba̱m nzi̱t zi̱ mun á̱pyia̱ ma̱ng A̱da̱mu a̱ni; ma a̱nia wa, konyan wa mun á̱pyia̱ ma̱ng Kristi, á̱ na nang nggu swuan swai.

²³A̱jawa A̱gwaza na ta̱ngam á̱niet ba̱ ka̱n kwi a̱ni ma̱ng swuan, konyan mi̱ njen nggu: Kristi wa ku yet a̱son doot ma̱ng swuan mami á̱kpa á̱niet, ba̱ tai a̱gba̱ndang chak yak á̱niet ba̱ kan kwi a̱ni. A̱wot a̱mgba̱m á̱niet ba̱ khwi nggu a̱ni, á̱ na ta̱ngam mba ma̱ng swuan di̱n jen bwuok nggu ji.

²⁴Ki̱ si̱ a̱hwa swak, á̱ngaan swanta ka ka̱ sii bai. Di̱n jen a̱jaja nang Kristi na mbi̱ri̱m kuzang a̱kwak a̱son, tyok, ma̱ng chet. A̱wot a̱ sii bwuok ma̱ng Tyok hu a̱ nwuak A̱gwaza a̱ yet A̱tyia̱ wu a̱ni.

²⁵Mat ku yet ta hwa Kristi a̱ nyia̱ tyok, si̱ nang gu swuo chet a̱mgba̱m á̱niet lak li nggu ba, a̱ sii tyia̱ mba a̱tafa á̱tai a̱ti̱tak nggu ba.

²⁶A̱wot a̱tyu lak li ngaan wu nang á̱ na swuo chet guu á̱ tyak ma̱ng a̱nggu a̱ni, nggu wa yet a̱khwu.

²⁷Mat á̱ lyuut ma̱ A̱lyiat A̱gwaza na nyia̱, “A̱gwaza ka̱n tyia̱ a̱mgba̱m kuzang kyang mbwak tyok gu.”[70] (A̱wot nang á̱ nhyia̱ a̱ni, “A̱mgba̱m kuzang kyang shya̱ mbwak tyok gu,” ku tak kpa̱sai nang A̱gwaza ma̱ a̱pyia̱ nggu a̱ nwuak Kristi tyok hu a̱ni, mun a̱ shya̱ mbwak Kristi ka bah.)[71]

²⁸Mat a̱nia, jen nang A̱gwaza ntyia̱ a̱mgba̱m kuzang kyang mbwak tyok Kristi, a̱ yet Nggwon A̱gwaza ka a̱ni; a̱jawa Nggwon ka meang na tyia̱ a̱pyia̱ nka mbwak Tyok A̱gwaza hu. Da̱nian A̱gwaza, a̱ tyia̱ a̱mgba̱m kuzang kyang mbwak tyok Nggwon nggu ka a̱ni, a̱ ka yet a̱gba̱ndang a̱gwam tazwa a̱mgba̱m kuzang kyang mi̱ kuzang a̱vwuo.

²⁹Ka̱nang á̱ na ta̱ngam á̱niet ba̱ ka̱n kwi a̱ni ma̱ng swuan bah, yihwa mbyia̱ nang á̱ nyia̱ á̱ghyang á̱niet ba̱ ni̱ swuan a̱ni ba̱ptisman da̱ a̱kwonu á̱niet ba̱ ka̱n kwi a̱ni? Ka̱ á̱ na ta̱ngam á̱niet ba̱ ka̱n kwi a̱ni ma̱ng swuan bah, yihwa mbyia̱ nang á̱ nyia̱ á̱ghyang á̱niet ba̱ ni̱ swuan a̱ni ba̱ptisman ji, da̱ a̱kwonu mbaa?[72]

³⁰Ma a̱nia wa da̱ a̱vwuo nzi̱t, yihwa mbyia̱ nang zi̱ ntyei á̱pyia̱ nzi̱t di̱n vak a̱khwu kuzang jen?

³¹Nyin á̱niet khwi Yesu ba nang n chat a̱ni, ma̱nang n tam di̱ kyang nang Kristi Yesu A̱tyoli nzi̱t wu nyia̱ nyin dyo a̱ni; ma a̱nia wa, a̱tsak a̱lyiat n shyi, n nwuan a̱khwu kuzang a̱tuk.

³²A̱wot ka̱ á̱niet ba̱ ka̱n kwi a̱ni na doot ma̱ng swuan bah, zang kpangti̱n ja n na shya̱ da̱ a̱yaat nung ka ma̱ng nyam a̱yit ji; jija yet á̱niet A̱fisut[73] a̱bya? A̱wot ka̱nang á̱ na mbyia̱ doot ma̱ng swuan ma̱ á̱niet ba̱ ka̱n kwi a̱ni bah, si̱ zi̱ nyia̱, “Yok zi̱ ya tsa nswuo, mat a̱tson zi̱ wu kwi!”[74]

³³Nyi yok shim á̱niet ba̱ laai nyin ma̱ng tangka̱i a̱lyiat huni bah, mat á̱ ni̱ nyia̱, “Swat ma̱ng á̱ka̱tuk á̱niet ni̱ byian a̱tan swat.”

³⁴Nyi nyia̱ á̱tsatsak a̱di̱dam di̱ kyang ku yet a̱tan a̱ni. A̱wot nyi ghwon a̱ka̱tuk nyia̱. Mat á̱ghyang á̱niet ma̱ nyin lyen A̱gwaza bah, ku yet kyang nsum hwa.

³⁵A̱wot shimba a̱ghyang a̱niet na lyip nyia̱, “Á̱ na nyia̱ ni wa á̱ nta̱ngam á̱niet ba̱ ka̱n kwi a̱ni? Zang ntangka̱i nvam nia[75] nang á̱niet ba̱ ka̱n kwi a̱ni na ndoot ma̱ng swuan?”

³⁶Lyip huni yet si̱ mbwuon hwa! Ka a ti̱p zwá yak a̱byin, ji̱ si̱ mi̱n ta ji̱ laai bah, si̱ nang ji̱ bwui.

³⁷Zwa yak ji nang a ti̱p a̱ni, jija yet a̱dung ka ka̱ ni̱ tyia̱ tswá ji a̱ni bah, a̱wot mi̱ zwá a̱lka̱ma jija ma̱nyin ji, ku kuzang tangka̱i zwá yak nang a chyui a̱ni.

³⁸A̱wot A̱gwaza ni̱ nwuak zwá yak ji vam fai nang gu chat ji̱ byia̱ a̱ni. Kuzang tangka̱i zwá yak ji̱ ta a̱ni, ni̱ laai a̱ neet mi̱ kuzang tangka̱i zwá yak nang ji̱ yet a̱ni.

³⁹Ma a̱nia wa, kuzang tangka̱i vam vwuon; vam á̱nietbishyi vwuon, nam nyam si̱ vwuon, nam a̱ka̱man si̱ vwuon, a̱wot fa̱n si̱ vwuon nam nhuu.

⁴⁰Á̱ mbyia̱ ntangka̱i nvam na̱ yet si̱ kyai tswazwa a̱ni, ma̱ng ntangka̱i nvam na̱ yet si̱ swanta a̱ni. A̱kyenkyai shi nvam kyai tswazwa na vwuon ma̱ng shi nvam swanta na.

⁴¹A̱nu mam ka byia̱ tangka̱i a̱kyenkyai shi nka, ma a̱nia wa zwat ji ma̱ng á̱ta̱ngwat na mbyia̱ ntangka̱i a̱kyenkyai shi na. A̱wot a̱kyenkyai shi á̱ta̱ngwat na vwuon shyit hu ma̱ng á̱ghyang na.

⁴²Ma a̱nia wa ku ndi ma̱ng á̱niet ba̱ na doot ma̱ng swuan ma̱ á̱niet ba̱ ka̱n kwi a̱ni. Jen nang zi̱ na nkwi a̱ni: á̱ na tyia̱ nvam swanta nzi̱t na a̱byin na̱ bwui. A̱wot á̱ ta̱ngam na ma̱ng swuan si̱ nat sang sangba̱p.

⁴³Á̱ ni̱ niat nvam nzi̱t na nang á̱ jhyuai a̱ni. A̱wot á̱ ba̱ ta̱ngam na ma̱ng swuan mami shi. Á̱ ni̱ niat nvam nzi̱t na na̱ yet á̱bobwot a̱ni. A̱wot á̱ ta̱ngam na ma̱ng swuan mami chet.

⁴⁴Á̱ ni̱ niat nvam na nang nkwom á̱nietbishyi a̱ni. A̱wot á̱ na ta̱ngam na ma̱ng swuan nang nvam na̱ yet á̱si̱ Ma A̱gwaza tswazwa a̱ni. Ma̱nang á̱ mbyia̱ nvam á̱nietbishyi a̱ni, ma a̱nia wa á̱ mbyia̱ nvam na̱ yet si̱ Ma A̱gwaza tswazwa a̱ni.

⁴⁵Ma̱nang á̱ ndyuut ma̱ A̱lyiat A̱gwaza na a̱ni, nyia̱, “A̱da̱mu wa nang á̱ ku tsa mat mi̱ swanta hu. A̱ ku yet a̱tyu swuan nang á̱ ku nyia̱ ma̱ng mbyin a̱ni.” A̱wot A̱da̱mu a̱ngaan wu meang, nggu wa yet Yesu Kristi, a̱ si̱ yet tswa ja, ji̱ nwuat swuan a̱ni.[76]

⁴⁶A̱tyu a̱ tsa bai hu a̱ni, ku bai mi̱ vam mbyin hwa. A̱wot a̱tyu a̱ si̱ bai a̱ngaan a̱ni, a̱ ku bai mi̱ vam ku yet si̱ Ma A̱gwaza tswazwa a̱ni.

⁴⁷A̱da̱mu, a̱ ku yet a̱son ka a̱ni, yet mbyin nia. A̱wot Kristi, a̱ yet ngaan wu a̱ni, si̱ neet Ma A̱gwaza tswazwa kya.

⁴⁸Ma̱nang á̱ nyia̱ a̱tyubishyi ma̱ng nkyuo mbyin a̱ni; ma a̱nia wa, á̱si̱ ba ba̱ yet mbyin a̱ni na ndi. Ma̱nang a̱tyu a̱ neet Ma A̱gwaza tswazwa ka ndi a̱ni; ma a̱nia wa, á̱si̱ ba ba̱ yet á̱si̱ Ma A̱gwaza tswazwa ba a̱ni, na ndi.

⁴⁹Ma̱nang zi̱ ngyet ghwughwu a̱tyu nang á̱ nyia̱ ma̱ng mbyin a̱ni; ma a̱nia wa, zi̱ ngyet ghwughwu a̱tyu a̱ neet Ma A̱gwaza tswazwa ka a̱ni.

⁵⁰Nyin á̱niet khwi Yesu ba nang n chat a̱ni, kyang hu nang n shei nyin a̱ni, huhwa yet: nvam nzi̱t na na̱ yet nam ma̱ng a̱sok a̱ni, si̱ mi̱n shya̱ gado mi̱ Tyok A̱gwaza hu bah. Ma a̱nia wa, nvam nzi̱t na na̱ tyiai a̱ni, na̱ si̱ mi̱n shya̱ gado da̱ a̱vwuo a̱tyu nang vam hu nwai tyiai a̱ni bah.

⁵¹Nyi fa̱k la! Yok n tyai nyin kyang a̱ga̱de ku shya̱ di̱ niat a̱ni. A̱mgba̱m nzi̱t bya na kwi bah. A̱wot a̱mgba̱m nzi̱t á̱ na shyak nvam nzi̱t na, á̱ ka̱u nzi̱t nvam fai na̱ nwai kwi a̱ni!

⁵²Mi̱ da̱ ka̱ a̱nyiung, ma̱nang but á̱ghyi a̱ni, nang á̱ na ntyiap a̱gwa ngaan ka a̱ni. Mat jen nang á̱ na ntyiap a̱gwa ka a̱ni, á̱niet ba̱ ka̱n kwi a̱ni na doot, ba̱ swuan si̱ nat sang sangba̱p. A̱wot nzi̱t zi̱ shya̱ ma̱ng swuan di̱n jen a̱ja a̱ni, á̱ na kin shyak nvam nzi̱t na meang, mi̱ di̱ tyiap a̱gwa ngaan hu.

⁵³Mat ku yet ta hwa, á̱ shyak nvam nzi̱t na na̱ tyiai a̱ni, na̱ yet nvam na̱ nwai tyiai a̱ni. A̱wot ku yet ta hwa, á̱ shyak nvam nzi̱t na na̱ kwi a̱ni, na̱ bwuak á̱ tyia̱ nvam na̱ nwai kwi a̱ni.

⁵⁴Jen ji nang á̱ nshyak nvam nzi̱t na na̱ bwui na̱ si̱ tyia̱ nvam na̱ nwai bwui a̱ni; a̱jawa nang A̱lyiat A̱gwaza nang á̱ lyuut a̱ni, na mbai cha̱chaat da̱ a̱nu ka nyia̱, “Á̱ tyak ma̱ng a̱khwu, á̱ si̱ swuo chet nka.[77]

⁵⁵Nwan a̱khwu, chet ang hu shya̱ ji wa? Nwan a̱khwu, ta̱p a̱khwu nang a nchyui á̱niet ba a̱ni, ku shya̱ ji wa?[78]”

⁵⁶Mat a̱ka̱tuk nyia̱ wa yet ta̱p hu ku chong ma̱ng a̱khwu a̱ni. A̱wot doka ja nwuat a̱ka̱tuk nyia̱ chet.[79]

⁵⁷A̱wot zi̱ gwai A̱gwaza! A̱ nwuak zi̱t chet zi̱ swuo chet a̱ka̱tuk nyia̱ ma̱ng a̱khwu, mami a̱lyoot A̱tyoli nzi̱t wu Yesu Kristi.

⁵⁸Mat a̱nia, nyin á̱niet khwi Yesu ba nang n chat a̱ni, nyi yong mi̱ chet. Nyi yok shyei bah. Kuzang jen, nyi ni̱ mbyia̱ di̱dang nyia̱ nta̱m A̱gwaza na ma̱ng fwuo nyiung. Mat nyi lyen á̱ mbyia̱ ta̱m nang nyi nyia̱ da̱nian A̱gwaza, ku na yet a̱buk kyang a̱ni bah.