Read tyap 1 A̱korontiyawa 8 Bible Online

1 A̱korontiyawa 8 - tyap bible

1 A̱korontiyawa 8

¹Ma̱ninika, tazwa lyip di̱ ya kyayak ku yet za̱nang nang á̱ neap nghwughwu a̱yaagwaza sang swuan a̱ni; a̱tsak a̱lyiat, zi̱ lyen nang á̱ ni̱ nyia̱, “A̱mgba̱m nzi̱t, zi̱ byia̱ mumwang” tazwa a̱lyiat nani. A̱wot nung, ku nang á̱ nyia̱ mumwang nzi̱t hu ntyei nzi̱t tam a̱ni, chat á̱ghyang hu hwa tyei á̱niet khwi ba gba̱gbak.

²A̱tyu a̱ fa nyia̱ a̱ lyen a̱mgba̱m kuzang kyang a̱ni, a̱tsak a̱lyiat, a̱tyu a̱wa lyen kyang shansham bah.

³A̱wot a̱tyu a̱ chat A̱gwaza a̱ni, nggu wa nang A̱gwaza wu lyen.[20]

⁴Ka̱ a̱nia wa, yihwa hwa nang ya kyayak ku yet za̱nang nang á̱ neap nghwughwu a̱yaagwaza sang swuan a̱ni fa? A̱tsak a̱lyiat, a̱mgba̱m zi̱t, zi̱ lyen nang nghwughwu a̱yaagwaza sang swuan na ngyet a̱tsatsak A̱gwaza wa bah. Ba̱ yet nghwughwu nia. A̱wot ma̱ A̱gwaza a̱nyiung wa nshya̱.

⁵Ku nang á̱ mbyia̱ nghwughwu a̱yaagwaza sang swuan tswazwa ma̱ng a̱byin a̱ni, a̱wot á̱ghyang á̱niet kwok ntong a̱zaghyi a̱yaagwaza sang swuan a̱bya, ma̱ng a̱yaatyoli ma̱ a̱di̱di̱t.

⁶A̱mgba̱m ma̱ng a̱nia, zi̱ lyen nang A̱gwaza a̱nyiung wa ma̱nyin gu nshya̱, a̱ yet A̱tyia̱ wu a̱ni. Nggu wa mat kuzang kyang mi̱ swanta hu. A̱wot zi̱ swuan da̱nian gu kya. A̱tyoli wu bu yet a̱nyiung wa, nggu wa yet Yesu Kristi. Mat nggu wa yet vak nang A̱gwaza mmat kuzang kyang a̱ni. A̱wot nggu wa bu yet vak nang A̱gwaza nnwuak nzi̱t swuan a̱ni.

⁷A̱mgba̱m ma̱ng a̱nia, á̱niet khwi bibya a̱mgba̱m fi̱k si̱ huni bah. Á̱ghyang á̱niet ma̱ mba fa nghwughwu a̱yaagwaza sang swuan na yet á̱tsatsak a̱yaagwaza bya. Mat a̱nia, ka̱ ba̱ ya kyayak ku yet za̱nang nang á̱ neap nghwughwu a̱yaagwaza sang swuan na a̱ni[21], ba̱ ni̱ kyiak nyia̱ ba̱ kwok ntong nia a̱zaghyi á̱tsatsak a̱yaagwaza. A̱wot ku si̱ vwuo mba a̱khwu ba̱ khai kyang ku yet a̱tan ma̱ng kyang ku yet a̱ka̱tuk a̱ni. Mat a̱nia, a̱di̱dam mba wu si̱ kpaat ba mi̱ fwuo mba na.

⁸A̱tsak a̱lyiat wa, nang á̱ nyia̱, “Ya kyayak zi̱t, si̱ mi̱n tyia̱ A̱gwaza a̱ chat zi̱t bah.” Ka̱ zi̱ ya kyayak bah, zi̱ na ghyuai bah. Ma a̱nia wa, ka̱ zi̱ ma ngya kyayak, ku na tyia̱ zi̱ mbeang kyang bah.

⁹A̱wot ku yet ta hwa, nyi ta̱bam kalak swat sa̱t nyin hu di̱ ya kyayak nang á̱ neap a̱yaagwaza sang swuan a̱ni, ku tyia̱ á̱niet khwi á̱ghyang nang a̱di̱dam mba wu ni̱ kpaat ba mi̱ fwuo a̱ni, ba̱ ga̱u di̱n vak khwi Yesu hu, ba̱ kwa.

¹⁰Mat a̱nia, ka̱ á̱niet khwi á̱ghyang li ang, nwan a̱tyu a̱ lyen kyang ba̱t da̱ nghwughwu a̱yaagwaza sang swuan, nang a swan ya kyayak mi̱ tutu nang á̱ nneap za̱nang nghwughwu a̱yaagwaza sang swuan a̱ni; a̱wot si̱ a̱hwa na tyia̱ mba meang, ba̱ ya kyayak mi̱ tutu nang á̱ nneap za̱nang a̱yaagwaza sang swuan a̱ni. Ka̱ ba̱ li a̱nia, ku na tyia̱ a̱di̱dam mba wu a̱ kpaat ba mi̱ fwuo, a̱wot ba̱ teap ba̱ ya kyayak mi̱ tutu nang á̱ nneap za̱nang a̱zaghyi nghwughwu a̱yaagwaza sang swuan a̱ni.[22]

¹¹Mat a̱nia, ya kyayak ang hu nang á̱ neap a̱yaagwaza sang swuan a̱ni, na tyia̱ a̱tyu khwi a̱ but mi̱ fwuo di̱ nkyang nang á̱ shim gu ndyo[23] a̱ni, gu ghwon khwi Yesu wu, a̱tyu a̱ ku khwu da̱nian gu a̱ni.

¹²A̱wot ka̱ nyi tyei á̱niet khwi Yesu á̱ghyang nyia̱ a̱ka̱tuk nyia̱ wu, di̱ tyei mba gba̱gbak ba̱ nyia̱ kyang nang ba̱ nwuak a̱chuchuk ku yet a̱ka̱tuk a̱ni, Kristi wa nang nyi nyia̱ nggu a̱ka̱tuk nyia̱ wu.

¹³Mat a̱nia, ki̱ kyayak nang n na ngya a̱ni, na tyia̱ a̱tyu khwi a̱ghyang a̱ nyia̱ a̱ka̱tuk, n bu na mak ngya ku nam mi̱ swat nung hu bah; kalak n du tyia̱ a̱tyu khwi a̱ghyang gu ga̱u gu kwa di̱ khwi Yesu hu[24].