Read tyap 1 A̱korontiyawa 9 Bible Online

1 A̱korontiyawa 9 - tyap bible

1 A̱korontiyawa 9

¹Nung Bulut, n byia̱ sa̱t nang á̱ghyang á̱niet a̱ni baa? N gyet a̱ta̱m Yesu wa baa? N ku ndi Yesu A̱tyoli nzi̱t wu ma̱ng á̱ghyi nung ba baa? Mee ta̱m nung hu hwa mbyia̱ nang nyi ngyet á̱niet khwi Yesu baa?

²Ku nang á̱ghyang á̱niet nfa, n ngyet a̱ta̱m Yesu wa a̱ni bah, a̱tsatsak a̱lyiat n gyet a̱ta̱m Yesu wa da̱ a̱vwuo nyin. Nyin bya tak kpa̱sai nang n gyet a̱ta̱m A̱tyoli Yesu wu.

³Si̱ huni hwa yet shim nang n nwuat á̱niet ba̱ jhyuai tyok yet a̱ta̱m nung hu a̱ni.

⁴Nzi̱t a̱yaata̱m Yesu ba, zi̱ byia̱ sa̱t zi̱ swan a̱chi̱chen ma̱ a̱ka̱sa nyin na, a̱wot zi̱ bu ya kyayak dundung ma̱ng a̱nyin baa?

⁵Zi̱ byia̱ sa̱t zi̱ nyia̱ nyeang zi̱ chong ma̱ng á̱nyiuk nzi̱t ba, ba̱ yet á̱niet khwi ma̱nang a̱yaata̱m á̱ghyang ma̱ng á̱na̱nyiuk A̱tyoli nzi̱t ba, a̱wot ma̱nang Bitut[25] nnyia̱ a̱ni baa?

⁶Kee nyi li, ma̱ nung gwa ma̱ng Ba̱nabat ma̱nyin zi̱t, myim zi̱ nyia̱ ta̱m zi̱ mbeang pyipyia̱ nzi̱t a?

⁷A̱nyan wa yet a̱tyu nzwang a̱wot gu bu tan a̱pyia̱ nggu kurum nta̱m? A̱nyan wa na kap a̱byin a̱na̱p, a̱wot gu lyin a̱wat nang gu na nswuo sum a̱na̱p hu a̱ni? A̱nyan wa na chok a̱sorong nyak, a̱wot gu lyin a̱wat nang gu na nswuo a̱baan na a̱ni?

⁸N dyiat a̱ni di̱ tyok a̱tyubishyi hwaa? Kee di̱ doka Musa ji hyia̱ a̱nia wa la?

⁹Mat á̱ lyuut mi̱ doka Musa ji nyia̱, “Yok tyia̱ nyak khap swom di̱n jen nang ji̱ nshai yak a̱sunsong di̱ beang swuai hu a̱ni[26] bah.”[27] Nyak khap ja ma̱nyin ji nang A̱gwaza wu faa?

¹⁰Mee nzi̱t bya gu lyiat tazwa nzi̱t a? A̱tsak a̱lyiat, da̱nian nzi̱t kya nang á̱ ndyuut a̱lyiat nani, nyia̱ ku myim a̱tyu khap ma̱ng a̱tyu swuai yak, ba̱ ntyia̱ nfwuo shya̱ a̱kwonu mbaa, di̱ yak nang ba̱ kap a̱ni.

¹¹Nang zi̱ ka̱n chyui zwá A̱za̱za̱rak Ntswa mi̱ nfwuo nyin na a̱ni, mee ku myim zi̱ shya̱ kyayak swanta da̱ a̱vwuo nyin nang zi̱ na ya, a̱wot zi̱ swuo a̱ni a?

¹²Ka̱nang á̱ghyang á̱niet byia̱ a̱wat nang nyi na mbeang mba a̱ni, nzi̱t, ku myim nyi beang zi̱t swak a̱nia baa? A̱mgba̱m ma̱ng a̱nia, zi̱ nyia̱ ta̱m ma̱ng a̱wat a̱kya bah. Zi̱ li ku myim zi̱ gbang a̱lyia̱ ma̱ng kuzang kyang, kalak zi̱ du yet jat ji̱ na tyei dyem di̱ shei A̱sham Nkhang tazwa Kristi a̱ni.

¹³A̱wot nyi lyen nang á̱niet fwui za̱náng A̱mali Nwuat Za̱nang A̱gwaza ba nshyat nkyayak mba na mi̱ za̱nang nang á̱ chong ndyo Mali Nwuat Za̱nang A̱gwaza ka a̱ni baa? Ma a̱nia wa, á̱niet ba ba̱ nyia̱ ta̱m da̱ a̱tyii A̱gwaza wu a̱ni meang, nshyat a̱kwonu mbaa di̱ kyang nang á̱ nneap za̱nang ji a̱ni.[28]

¹⁴Ma a̱nia wa, A̱gwaza kam nyia̱, á̱niet ba ba̱ shei A̱sham Nkhang Yesu ka a̱ni, ku yet ta hwa ba̱ shya̱ beang da̱ a̱vwuo á̱niet nang ba̱ shei mba A̱sham Nkhang ka a̱ni.

¹⁵A̱wot ma̱ng a̱nia, n ka̱n mak nyia̱ ta̱m ma̱ng a̱wat a̱nyiung mami a̱ka̱wat nani bah. A̱wot n dyuut nyin a̱lyiat nani, da̱nian n chat á̱ nyia̱ nung ndyo a̱nia wa bah. A̱tsak a̱lyiat, ku na lan nung n khwu, nang á̱ na mvwuong nung n tam di̱ shei A̱sham Nkhang ka di̱ ma̱ á̱tan a̱ni.

¹⁶A̱mgba̱m ma̱ng a̱nia, ka̱ n shei A̱sham Nkhang ka, ku yet nung a̱wat nang n na ntam wa a̱ni bah. Mat ku yet nung ta hwa n nyia̱ ta̱m a̱hwa nang A̱gwaza tyia̱ nung a̱ni. Ku swan nung, ki̱ n dak nyia̱ ta̱m shei A̱sham Nkhang hu!

¹⁷Ka̱ nung gwa ma̱ a̱pyia̱ nung, wa khai ta̱m shei A̱sham Nkhang huni na nyia̱, si̱ ku myim á̱ tan nung zang. A̱wot di̱ si̱sak ku nnwai yet khai nung hwa a̱ni, A̱gwaza wa tyia̱ nung a̱za̱za̱rak ta̱m wuni mbwak.

¹⁸Ka̱ a̱nia wa, yihwa yet á̱tan nung ka? Á̱tan nung kikya yet shei A̱sham Nkhang ka, da̱nian n chat á̱ tan nung zang bah. Huhwa mbyia̱, n ni̱ ndak tyia̱ á̱ nwuak nung a̱tsatsak a̱ka̱wat di̱n jen nang n shei A̱sham Nkhang ka a̱ni.

¹⁹Ku da̱nang n gyet a̱khwo a̱yin a̱ni bah, n bwuak a̱pyia̱ nung ntyia̱ a̱khwo konyan, da̱nian n ka khwat á̱niet ma̱ a̱di̱di̱t n bai ndyo ba̱ nwuak fwuo di̱ Yesu.

²⁰Jen nang n ku nshya̱ ndung ma̱ng A̱yahudawa ba a̱ni, n ni̱ swan nang a̱tyu A̱yahudawa a̱ni, da̱nian n ka khwat A̱yahudawa ba bai ndyo da̱ a̱vwuo Kristi. A̱wot jen n ku nshya̱ ndung ma̱ng á̱niet ba̱ ku khwi doká A̱yahudawa ji a̱ni, nung meang, n ni̱ khwi doká Musa ji. Ku nang ku ngyet ta hwa n khwi doká ji a̱ni bah, n ni̱ khwi doká ji da̱nian n ka khwat á̱niet ba ba̱ khwi doká ji a̱ni, bai ndyo da̱ a̱vwuo Kristi.

²¹Ma a̱nia wa, jen nang n nshya̱ ndung ma̱ng nnwap na̱ nwai khwi doká Musa ji a̱ni, nung meang, n ni̱ khwi doká Musa ji bah, da̱nian n ka khwat ba bai ndyo da̱ a̱vwuo Kristi. A̱mgba̱m ma̱ng a̱nia, n ni̱ ndak khwi doká A̱gwaza ji bah. N ni̱ mun khwi doká Kristi ji.

²²Jen nang n shya̱ ma̱ng á̱niet ba̱ ni̱ but mi̱ fwuo di̱ nkyang nang á̱ shim ba ndyo[29] a̱ni, nung meang, n ni̱ ta̱bam n ba̱ng baa nang á̱niet ba̱ but mi̱ fwuo di̱ nkyang nang á̱ shim ba ndyo a̱ni.[30] Mat n chat n khwat ba mbai ndyo da̱ a̱vwuo Kristi. A̱tsak a̱lyiat, n ni̱ kwan n tai kuzang tangka̱i á̱niet, a̱wot n si̱ nyia̱ kuzang tangka̱i nkyang, da̱nian n ka nsan á̱ghyang á̱niet.

²³N ni̱ nyia̱ kuzang kyang, mat shei A̱sham Nkhang hwa, da̱nian n ka nshya̱ a̱kwonu nung mami a̱li̱ba̱rka shei nka hu.

²⁴A̱wot nyi lyen baa? Di̱n jen a̱yaaka̱nan tyong chung, a̱mgba̱m á̱niet tyong chung ba ni̱ kwan ba̱ tyong á̱ sweap á̱ghyang, a̱wot a̱tyo nyiung wa ni̱ ya zang ji ma̱nyin gu baa? Mat a̱nia, si̱ nyi tyong chung ji, da̱nian nyi ka ya zang ji!

²⁵A̱mgba̱m á̱niet tyong chung ba ni̱ gba á̱pyia̱ mba mi̱ kuzang kyang. Ba̱ ni̱ nyia̱ a̱nia da̱nian ba̱ ka shya̱ zang ji̱ na byian wa a̱ni. A̱wot nzi̱t, zi̱ tyong chung da̱nian zi̱ ka shya̱ zang sang sangba̱p ja.

²⁶Mat a̱nia, a̱tai chung wa nang n tyong bah. A̱wot a̱yaat ka nang n kwan a̱ni, ka̱ yet a̱si̱ tuu wun kya ma̱ tai bah.

²⁷Da̱ a̱kwonu a̱kya, n gba vam nung hu nang a̱tyu tyong chung a̱ni. N nyia̱ vam nung hu khwo, da̱nian ki̱ da̱ n du shei á̱ghyang á̱niet a̱lyiat A̱gwaza na, a̱wot nung ma̱ a̱pyia̱ nung, á̱ ba̱ kai nung á̱ ghwon n dyin nwuo mi̱ Tyok A̱gwaza hu.