Read tyap 2 A̱korontiyawa 1 Bible Online

2 A̱korontiyawa 1 - tyap bible

2 A̱korontiyawa 1

¹Nung Bulut, n dyuut nyin wusika jini. Nung nang á̱ khai mami shim A̱gwaza n gyet a̱ta̱m Yesu Kristi. N shya̱ ndung ma̱ng a̱na̱nyiuk nzi̱t wu Timoti. N dyuut á̱niet khwi A̱gwaza ba̱ shya̱ ma̱ a̱keang Korinti a̱ni, mbeang a̱mgba̱m á̱za̱za̱rak á̱niet khwi A̱gwaza, ba̱ shya̱ mi̱ fam a̱byin A̱ka̱ya a̱ni.

²Yok A̱gwaza a̱ yet A̱tyia̱ nzi̱t wu a̱ni, ma̱ng A̱tyoli Yesu Kristi, ba̱ fa̱k shok nyin, ba̱ tyia̱ nyi swan swat nyinyang.

³Dyep a̱mgba̱m yet si̱ A̱gwaza a̱ yet A̱tyia̱ A̱tyoli nzi̱t wu Yesu Kristi a̱ni. A̱gwaza wa yet A̱tyia̱ a̱ fwuong kunak nzi̱t a̱ni, ma̱ng a̱tyu a̱ yet a̱tyin a̱mgba̱m shyim fwuo a̱ni.

⁴A̱gwaza wa yet a̱tyu shyim fwuo nzi̱t na mami a̱mgba̱m swuo a̱bung nzi̱t hu; da̱nian nzi̱t meang zi̱ ka shyim á̱ghyang á̱niet nfwuo. Jen nang á̱ghyang á̱niet nshya̱ di̱ byian nfwuo á̱ swuo a̱bung a̱ni, zi̱ na shya̱ chet nang zi̱ na ntyei mba shyim fwuo a̱ni; ma̱nang A̱gwaza ka̱n ntyei nzi̱t shyim fwuo a̱ni.

⁵Mat nang zi̱ nswuo a̱bung ba̱t da̱nian Kristi a̱ni, ma a̱nia wa A̱gwaza ma na nnwuak nzi̱t shyim fwuo gba̱mgbam di̱ mun á̱pyia̱ nzi̱t hu ma̱ng Kristi.

⁶Ku nang á̱ nyiak zi̱t ma̱ng swuo a̱bung, ku ni̱ yet da̱nian zi̱ ka tyia̱ nyin shyim fwuo nyi bu shya̱ san hwa mi̱ swanta hu. Jen ji nang zi̱ nshya̱ mi̱ shyim fwuo a̱ni, ku na yet nzi̱t ta hwa zi̱ tyia̱ nyin shyim fwuo mameang. Huhwa na mbyia̱, nyi na shya̱ chet nyi nyap nfwuo, nyi gbang a̱lyia̱ di̱ tangka̱i swuo a̱bung nang zi̱ swuo a̱ni.

⁷A̱wot zi̱ ba̱ng fwuo da̱ nyin, ma̱nang nyi nswuo a̱bung ndung ma̱ng a̱nzi̱t a̱ni, a̱wot ma a̱nia wa nyi bu na shya̱ shyim fwuo nang A̱gwaza nwuat nzi̱t a̱ni.

⁸Á̱na̱nyiuk nzi̱t ba mi̱ khwi Yesu nang zi̱ chat a̱ni, zi̱ chat nyi lyen tangka̱i swuo a̱bung hu nang zi̱ nswuo mi̱ fam a̱byin A̱siya hu a̱ni. Zi̱ ku swuo a̱bung ba̱t, ka̱ si̱ swak chet nzi̱t. Zi̱ si̱ lyin si̱sak zi̱ na ngbang a̱lyia̱ a̱ni. A̱wot zi̱ si̱ nti̱n fwuo, zi̱ si̱ ngyei di̱ zi̱ na swuan bah.

⁹A̱tsak a̱lyiat, zi̱ ku ngyei jen a̱khwu nzi̱t ja bai. A̱mgba̱m ma̱ng a̱nia, zi̱ si̱ ta̱yuk di̱n chet á̱pyia̱ nzi̱t bah. A̱wot zi̱ si̱ myiam zi̱ ta̱yuk da̱ A̱gwaza wa ma̱nyin nggu. Nggu wa ni̱ ta̱ngam á̱niet ba ba̱ ka nkwi a̱ni, ma̱ng swuan.

¹⁰A̱gwaza wu a̱ ku ti̱n zi̱t ma̱ a̱ka̱tuk a̱khwu wu mi̱ jen ji swak a̱ni, nggu wa bu na ti̱n nzi̱t mi̱ jen jhyang. Nggu wa zi̱ mba̱ng fwuo hu, a̱ na ya a̱son ma̱ng turung nzi̱t hu.

¹¹A̱wot nyin meang, si̱ nyi beang nzi̱t ma̱ng naai A̱gwaza, da̱nian A̱gwaza mat shok nggu ji, a̱ ka fa̱k naai nyin hu gu chok zi̱t. A̱wot á̱ghyang á̱niet ma̱ a̱di̱di̱t na gwai A̱gwaza da̱nian nzi̱t.

¹²Ka̱ zi̱ doot zi̱ gbang a̱lyia̱ zi̱ hyia̱ ma̱ng a̱di̱dam a̱ nwai kpaat zi̱t mi̱ fwuo a̱ni, nang zi̱ nswan a̱za̱za̱rak nswat nang A̱gwaza nwuat a̱ni. Zi̱ bu ni̱ nyia̱ a̱chuchuk mami a̱mgba̱m nkyang nang zi̱ nyia̱ a̱ni. Zi̱ ka̱n ta̱yuk di̱n shok A̱gwaza ja, kang ma̱ng mumwang a̱tyubishyi. A̱nia wa zi̱ ni̱ nswan a̱zaghyi á̱niet swanta ba, a̱wot a̱zaghyi nyin ma̱ á̱pyia̱ nyin.

¹³Mat, wusiká nang zi̱ lyuut nyin dyo a̱ni, á̱ mbyia̱ swáng á̱lyiat ji̱ shya̱ di̱ niat mami ji, ji̱ na kaat nyin fi̱k a̱ni bah. N ba̱ng fwuo á̱ghyang á̱tuk, nyi na fi̱k zi̱t shansham,

¹⁴ku nang nyi nwai fi̱k zi̱t ma̱nini a̱ni. A̱wot a̱tuk ka nang A̱tyoli Yesu na mbwuok a̱ bai a̱ni, nyi na tam da̱ nzi̱t ma̱nang nzi̱t meang ntam da̱ nyin a̱ni.

¹⁵Mat nang n nwuak a̱chuchuk di̱ si̱sak nang nyi nfi̱k a̱wot nyi si̱ nwuak fwuo da̱ nung a̱ni; n ku chat n tyia̱ nyin a̱li̱ba̱rka a̱ka̱feang di̱ bai byiat nyin hu a̱ka̱feang.

¹⁶Di̱ ntsa hu, n ku nchat n byiat nyin di̱n jen nang n naat fam a̱byin Ma̱kidoniya a̱ni. A̱wot n bu nchat n byiat nyin di̱n jen nang n na mbwuok neet a̱ja a̱ni. Di̱n jen a̱ja ja, n kyiak nyia̱ nyi na ntyia̱ nung a̱ta̱lyen ki̱ ndoot naat fam a̱byin Yahudiya hu.

¹⁷Shimba nyi ka̱n dyi̱ri̱m kyang hu ku mbyia̱ nang n shyak a̱di̱dam a̱chyet nung wu a̱ni. Nyi fa n nyia̱ a̱di̱dam chyet nung wu ma̱ tai a? Nyi fa nyia̱, n di nang á̱niet mi̱ swanta ba a̱ni a? Bibya ni̱ tyia̱, “Ii,” da̱ a̱cha̱chaat njen nang ba̱ nfa za̱m ba̱ tyia̱, “Kaai,” a̱ni.

¹⁸Ma̱nang A̱gwaza ngyet a̱tsotswat za̱m a̱ni, ma a̱nia wa a̱lyiat nang zi̱ shei nyin a̱ni, na̱ shai na̱ yet, “Ii,” ma̱ng “Kaai,” bah.

¹⁹Mat Yesu Kristi, a̱ yet Nggwon A̱gwaza ka a̱ni, a̱ ni̱ shai a̱ nyia̱, “Ii,” a̱wot da̱ a̱cha̱chaat njen a̱wa a̱ bu nyia̱, “Kaai,” bah. Nggu wa yet a̱tyu nang nzi̱t a̱tat, Sila, Timoti, mbeang nung nang zi̱ ku shei nyin a̱lyiat nggu na a̱ni. A̱wot nang nggu wa ngyet “Ii” A̱gwaza wu a̱ni, kuzang jen a̱ ni̱ nyia̱ kyang hu nang gu hyia̱ a̱ni.

²⁰Mat mun á̱pyia̱ ma̱ng Kristi hwa nang a̱mgba̱m a̱li̱ka̱uli A̱gwaza wu mbai da̱ a̱nu ka, ma̱ng shim “Ii!” A̱wot nang Kristi wa ngyet “Ii,” a̱ yet “Samba̱rka” nzi̱t wu a̱ni. Nggu wa nyeak a̱ nat da̱ a̱vwuo A̱gwaza mat a̱kyenkyai shi nggu wu.

²¹Ma̱ninika, A̱gwaza wa tyia̱ nang nzi̱t ma̱ng a̱nyin ngyong mi̱ chet da̱nian Kristi. Nggu wa khai nzi̱t. A̱ si̱ ta̱m zi̱t zi̱ nyia̱ ta̱m nggu hu.

²²A̱wot a̱ si̱ kpaat nzi̱t a̱timi nang zi̱ ngyet á̱niet guu a̱ni, mat nang gu nnang nzi̱t A̱za̱za̱rak Ntswa wu mi̱ nfwuo nzi̱t na a̱ni. A̱za̱za̱rak Ntswa wu wa yet a̱kwonu nang gu ntsa a̱ nwuat zi̱t a̱ni; ku tak nang nggu na nka̱u nzi̱t á̱kum nkyang nang gu la̱p a̱ sak nzi̱t ndyo a̱ni.

²³Ma̱ninika, n gyorong A̱gwaza, nggu wa yet sheda nung hu nang n shei a̱tsatsak a̱lyiat a̱ni. Kyang hu ku mbyia̱ nang n ku ndak bwuok bai Korinti a̱ni, huhwa yet; ki̱ di̱ n du ngai ma̱ng a̱nyin mi̱ chet.[1]

²⁴A̱wot si̱ a̱hwa fa zi̱ chat zi̱ nyia̱ nyin tyok di̱ tak ma̱ng a̱nyin si̱sak nyi na nnyia̱ nta̱m ma̱ng nwuak a̱chuchuk nyin hu a̱ni bah. Kaai, zi̱ chat zi̱ nyia̱ nta̱m na dundung ma̱ng a̱nyin, da̱nian nyi ka shya̱ nfwuo sai. Mat nwuak a̱chuchuk nyin hu hwa mbyia̱ nang nyi ngyong mi̱ chet.