Read tyap 2 A̱korontiyawa 10 Bible Online

2 A̱korontiyawa 10 - tyap bible

2 A̱korontiyawa 10

¹Ma̱ninika, nung Bulut, n naai nyin mami a̱lyoot Kristi, a̱ yet a̱shonshyon a̱ si̱ bu byia̱ shok a̱ni. Ku nang n dyen nyi kyiak nyia̱; n ni̱ ntyia̱ shi̱ri̱ng ki̱ n shya̱ da̱ a̱vwuo nyin a̱ni, a̱wot n ni̱ ngbang a̱lyia̱ ki̱ n shya̱ zan n dyuut nyin dyo.

²N naai nyin, nyi yok tyia̱ ki̱ n bai n gbang a̱lyia̱ n dyiat ma̱ng á̱niet ba ba̱ fa nyia̱ nta̱m swanta nia zi̱ nyia̱ a̱ni.

³Ku yet a̱tsak a̱lyiat wa, zi̱ yet á̱nietbishyi bya. A̱mgba̱m ma̱ng a̱nia, zi̱ kwan zwang nang á̱niet swanta ba a̱ni bah.

⁴Zi̱ byia̱ a̱cha̱chet nkyang nzwang na̱ yet si̱ A̱gwaza nia a̱ni. Na̱ yet á̱si̱ a̱tyubishyi nia bah. Ni̱nia nang zi̱ mbi̱ri̱m a̱ka̱nka̱ra̱ng mbat a̱di̱dam á̱nietbishyi. Zi̱ si̱ bu nseang ya fwuang bwoi a̱ka̱laa hu.

⁵Zi̱ bi̱ri̱m kuzang tangka̱i tyiet tsot fi̱ri̱ng, ku vwuong á̱niet ba nwuak fwuo da̱ A̱gwaza a̱ni. A̱wot zi̱ ta̱bat a̱di̱dam á̱nietbishyi wu gu nyia̱ na̱nvan ma̱ng A̱gwaza a̱ni. Zi̱ si̱ tyia̱ nggu mi̱ khwo. A̱wot zi̱ tyia̱ á̱nietbishyi ba̱ khwi Kristi.

⁶Nang a̱nyin a̱ni, ka̱nang nyi tak za̱m nang nyi ngyet á̱niet khwi a̱lyiat bya, zi̱ na nyep á̱niet ba̱ ya a̱son mi̱ lak fwuong a̱ni.

⁷Nyi nwuan a̱tsatsak a̱lyiat wu shansham, nyi lii![31] Ka̱ a̱yin ma̱ nyin kyiak nyia̱ a̱ yet a̱tsatsak a̱tyu khwi Kristi wa, ku yet ta hwa gu fi̱k nang nzi̱t meang, zi̱ ngyet á̱tsatsak á̱niet khwi Kristi bya.

⁸Shimba nyi na li á ngyei n tam ma̱ sa̱t tazwa tyok nang A̱tyoli Yesu nwuak zi̱t a̱ni. A̱mgba̱m ma̱ng a̱nia, tyok nzi̱t hu yet si̱ ku tyei nyin ya a̱son mi̱ chet mi̱ khwi Yesu hu hwa a̱ni. Ku yet si̱ ku na bwuok ma̱ng a̱nyin lilyim kya a̱ni bah. Mat a̱nia, n na fa̱k nsum di̱ nyia̱ ta̱m ma̱ng tyok nung hu bah.

⁹N chat n tyia̱ nyin a̱wun nia di̱ wusiká nang n dyuut nyin dyo a̱ni bah.

¹⁰A̱wot á̱ghyang á̱niet nyia̱, “Wusiká Bulut ji byia̱ chet, ji̱ si̱ bu vwuo a̱khwu. A̱wot ka̱ nggu ma̱ a̱pyia̱ nggu shya̱ dundung ma̱ng nzi̱t, vam nggu hu yet a̱bobwot, a̱lyiat nggu na si̱ yet a̱buk a̱lyiat wa!”

¹¹Tangka̱i á̱niet ba̱ lyiat a̱nia a̱ni, ku myim ba̱ fi̱k, ki̱ zi̱ bai ma̱ á̱pyia̱ nzi̱t, zi̱ na nyia̱ nta̱m nzi̱t na mi̱ chet cha̱chaat ma̱ng kyang nang zi̱ lyuut mba ndyo mi̱ wusiká nzi̱t ji, di̱n jen nang zi̱ nshya̱ gbang ma̱ng a̱mba a̱ni.

¹²A̱tsak a̱lyiat, ku li á ngyei di̱ zi̱ si̱ mi̱n mak tyan ku zi̱ kyiak á̱pyia̱ nzi̱t nang á̱ghyang á̱niet ba̱ shei nyia̱ ba̱ yet á̱tsatsak á̱niet a̱ni bah. A̱wot á̱niet bani ni̱ tyan á̱pyia̱ mba ma̱ng á̱ghyang mba bya. Ba̱ bu chat ba̱ mak pyipyia̱ mba ma̱ng á̱ghyang mba bya. A̱wot ba̱ yet a̱yaagbi̱ri̱ng á̱niet bya!

¹³A̱mgba̱m ma̱ng a̱nia, nzi̱t, zi̱ chat zi̱ tam swak gak tyok nang A̱gwaza nwuak nzi̱t a̱ni bah. Zi̱ na tam wa tazwa nta̱m nang A̱gwaza nwuak zi̱t a̱ni ma̱nyin na. Ni̱nia yet nta̱m nang zi̱ nyia̱ ma̱ nyin a̱ni.

¹⁴Zi̱ ka̱n swak gak tyok di̱n jen nang zi̱ nnyia̱ zi̱ byia̱ tyok tazwa nyin a̱ni bah. Ku li á ngyei da̱ zi̱ ka̱n bai da̱ a̱vwuo nyin bah. Mat nzi̱t bya ku tsa a̱chyet shei A̱sham Nkhang Kristi ka, zi̱ si̱ bai ma̱ng á̱na ma̱ a̱keang A̱korontiyawa ka.

¹⁵Zi̱ chat zi̱ tam á̱ bu chyin nzi̱t di̱ nta̱m nang á̱ghyang á̱niet ka̱n nyia̱ a̱ni bah. Da̱ a̱kwonu a̱kya, ba̱ng fwuo nzi̱t huhwa yet; nwuak fwuo nyin hu da̱ A̱gwaza na mban. Da̱nian a̱gi̱gak nta̱m nzi̱t ba ma̱ nyin ba̱ ka mbeang á̱kpai ka;

¹⁶da̱nian zi̱ ka shei A̱sham Nkhang Yesu ka mi̱ nfam bibyin na̱ shya̱ gbang ma̱ng a̱nyin nang á̱ghyang á̱niet ka̱n nwai nyia̱ ta̱m a̱ni. Huhwa mbyia̱, zi̱ si̱ mi̱n tam di̱ nta̱m nang á̱ghyang á̱niet ka̱n nyia̱ mi̱ nfam bibyin ghyang a̱ni bah.

¹⁷Ma̱nang á̱ ndyuut ma̱ A̱lyiat A̱gwaza na a̱ni, nyia̱, “Ka̱ a̱yin na tam, gu tam da̱ A̱gwaza wa ma̱nyin nggu.”[32]

¹⁸Mat, ka̱ a̱yin chyin a̱pyia̱ gu, si̱ a̱hwa yet a̱buk kyang wa. Kyang ku yet a̱ swak a̱ni, huhwa yet; A̱tyoli Yesu a̱ chyin ngguu.