Read tyap 2 A̱korontiyawa 12 Bible Online

2 A̱korontiyawa 12 - tyap bible

2 A̱korontiyawa 12

¹Ku li á ngyei ku yet nung ta hwa, n gya a̱son ma̱ng tam huni, ku nang ku na nnwuak a̱yin kpangti̱n a̱ni bah. N na ngya a̱son ma̱ng a̱lyiat tazwa a̱ma̱bwoi ma̱ng tá̱m ji̱ shya̱ di̱ niat ji̱ neet da̱ a̱vwuo A̱tyoli Yesu nang á̱ tyai a̱ni.

²Á̱ ku kyiak nung[34] á̱ nat ndyo Ma A̱gwaza tswazwa tsat[35] a̱lyia̱ swak ma̱naai kya ka. Ke á̱ ku kyiak nung á̱ nat ndyo Ma A̱gwaza tswazwa ma̱ng vam hwa oo, ke tswa nung jija ma̱nyin ji oo, n dyen bah. A̱gwaza wa ma̱nyin nggu lyen.

³A̱tsak a̱lyiat, ma̱ A̱gwaza wa ma̱nyin nggu lyen, kee á̱ ku kyiak nung á̱ nat ndyo Ma A̱gwaza tswazwa ma̱ng vam hwa oo, ke da̱ á̱ ma ku kyiak tswa nung jija ma̱nyin ji oo, n dyen bah. A̱wot mi̱ kyang nang n dyen a̱ni,

⁴huhwa yet; á̱ ku kyiak nung á̱ nat ndyo Ma A̱gwaza tswazwa. A̱wot n si̱ ndi nkyang na̱ yet si̱ a̱ga̱de nang a̱tyubishyi si̱ mi̱n gwa̱i a̱ni bah. A̱wot na̱ si̱ shya̱ di̱ niat ba̱t, nang a̱yin si̱ mi̱n mak shei a̱ni bah.

⁵Nkyang a̱nia nang n fa̱k a̱ni, na̱ maai nung n tam. A̱mgba̱m ma̱ng a̱nia, n na tam bah. N na tam tazwa lat nung huhwa.

⁶Ka̱ n wa chat tam hu, si̱ n na ngyet a̱bwuon di̱ tam hu bah, mat n na ntak a̱tsak a̱lyiat wa. A̱wot n na tam bah, mat n chat a̱yin a̱ chyin nung a̱ swak kyang nang gu li mi̱ swat nung huu, ma̱ng a̱lyiat A̱gwaza nang gu fa̱k nang n shei a̱ni bah;

⁷ku nang n ka̱n san tá̱m ji̱ shya̱ di̱ niat nang á̱ tyai a̱ni. Da̱nian á̱ ka vwuong nung tam hu, á̱ si̱ ta̱m ma̱ng a̱ta̱m a̱ neet da̱ a̱vwuo A̱ta̱nyeang[36] a̱ni, a̱ si̱ tyia̱ nung sa̱kan mi̱ vam[37], ji̱ chyui nung ba̱t a̱ni. A̱wot a̱ si̱ ya a̱son ma̱ng fwuai nung, n ka ngyok tam hu.

⁸N si̱ mbwuo a̱ka̱tat nang n naai A̱tyoli Yesu gu ka ti̱n nung sa̱kan ji tyei nung swuo a̱bung a̱hwa mi̱ vam hu a̱ni.

⁹Kuzang jen ki̱ n naai ngguu, gu nyia̱ ma̱ng a̱nung, “N nyia̱ ang shok gba̱mgbam ji̱ maai ang a̱ni. Mat chet nung hu ni̱ mbeang ba̱t, ku tak kpa̱sai di̱n jen lat ang ji.” Mat a̱nia, ma̱ninika, n gwai, n si̱ ntam tazwa lat nung hu, da̱nian chet Kristi hu ku ka nyia̱ nta̱m mami nung.

¹⁰Huhwa mbyia̱, n shya̱ ma̱ng a̱gwai mami lat nung hu; ma̱ng lihyat nang á̱niet nyia̱ nung ndyo a̱ni; ma̱ng a̱lahyia̱ nang n kan a̱ni; ma̱ng ya̱shuk nang á̱niet ya̱shuk nung a̱ni; ma̱ng swuo a̱bung nang n swuo da̱nian Kristi a̱ni. Mat ki̱ n shya̱ ma̱ng lat, jen a̱ja ja nang chet A̱gwaza hu nshya̱ ndung ma̱ng a̱nung.

¹¹Nyi tyia̱ nung n tam[38] nang a̱bwuon a̱ni. A̱wot nyin bya byia̱ a̱bun wu. Nyin bya myim nyi lyuut wusiká nyi nchyin nung. Mat nung meang, n gyet a̱tsatsak a̱ta̱m wa swak a̱yaata̱m bani nang á̱ kyiak ba nang a̱cha̱chet a̱yaata̱m Yesu bya a̱ni. A̱mgba̱m ma̱ng a̱nia, n bu ngyet kyang bah.

¹²Jen nang n ku nshya̱ ma̱ng a̱nyin a̱ni, n ku ntak nyin za̱m nang n gyet a̱tsatsak a̱ta̱m Yesu wa. N si̱ nyap fwuo di̱n jen nang n ku nshya̱ ma̱ nyin, n si̱ nyia̱ nta̱m a̱lama na̱ tak chet A̱gwaza hu. N si̱ nyia̱ nkyang a̱ga̱de ma̱ng nta̱m a̱ri̱bi̱di jhyang da̱ a̱vwuo nyin.

¹³Mi̱ kyang nyiung nang n ku nwai nyia̱ nyin ndyo a̱wot n si̱ nyia̱ susot á̱niet khwi jhyáng ndyo a̱ni, huhwa yet; n ku gyet nyin kpa̱t nyi nwuat nung kurum bah. Ma̱sa̱kut, nyi chi nung mat a̱bun nang n bwuo nyin ndyo di̱ nyia̱ a̱tsatsak kyang wuni a̱ni!

¹⁴A̱wot ma̱ninika, n shya̱ di̱ la̱p vam n bai da̱ a̱vwuo nyin da̱ a̱ka̱tat ka. A̱wot n chat n gyet nyin kpa̱t nyi nwuat nung kurum bah. N chat zwá nyin jija bah. Nyin bya nang n chat. Mat a̱bachyuang mman nia myim na̱ beang á̱niet mbyin ba bah. Da̱ a̱kwonu a̱kya, á̱niet mbyin bya myim ba̱ beang a̱bachyuang mman mba na.

¹⁵N na fa̱k nyinyang n hyat a̱pyia̱ nung ma̱ng a̱mgba̱m kyang nang n byia̱ a̱ni, da̱nian n ka beang nyin; ku nang ku ndi á ngyei n chat nyin ba̱t, a̱wot nyin, nyi chat nung ma̱ chunchwiit.

¹⁶Á̱ghyang nyin shim nang n ku ngyet nyin kpa̱t bah. A̱wot á̱ghyang nyin fa n nyia̱ nyin a̱ghyughyui wa, n si̱ shyok nyin.

¹⁷N nyia̱ nini wa n si̱ nshyok nyin? Ke a̱yin ma̱ á̱niet ba nang n ku nta̱m ndyo da̱ a̱vwuo nyin a̱ni, ku shyok nyin?

¹⁸Jen nang n ku nnaai Titut gu bai a̱ byiat nyin a̱ni, a̱wot n si̱ bu nta̱m á̱kpa̱ndang ta̱m nzi̱t á̱ghyang dundung ma̱ng a̱nggu; Titut ku shyok a̱yin ma̱ nyin a? Kaai! Mat, nung ma̱ng a̱nggu, zi̱ ni̱ byia̱ a̱di̱dam a̱nyiung wa. Zi̱ ni̱ chong dundung, a̱wot zi̱ ni̱ nyia̱ kuzang a̱tan nkyang di̱n vak nyiung.

¹⁹Shimba nyi fa zi̱ shei a̱lyiat nani, zi̱ ka kwan zi̱ kwi á̱pyia̱ nzi̱t kya da̱ a̱vwuo nyin. Kaai, a̱nia wa bah. Zi̱ shei nyin á̱si̱ nani nang zi̱ ngyet á̱tsatsak á̱khwo Yesu Kristi bya, ma̱ng A̱gwaza a̱ yet sheda nzi̱t a̱ni. Á̱kpa̱ndang nung ba nang n chat a̱ni, n chat nyi lyen kuzang kyang nang zi̱ nyia̱ a̱ni, zi̱ chat zi̱ tyia̱ nyin gba̱gbak zi̱ mbeang nyin chet hu.

²⁰Mat n fwuong a̱wun, shimba ki̱ n bu mbai, n na nchat nkyang na nyi nyia̱ a̱ni bah. A̱wot nyin, nyi na fa̱k nyinyang nung di̱ si̱sak ji nang n na nnwuak nyin shim a̱ni bah. N fwuong a̱wun, ki̱ n mbai, n na shya̱ nang nyi fwuon zook ma̱ng á̱ghyang nyin, kwi swam, mwuat ndyen, chat a̱pyia̱, tyam á̱ghyang, a̱chyuang, gba̱p a̱pyia̱, mbeang nwai swat nyinyang.

²¹A̱tsak a̱lyiat, n bu nfwuong a̱wun, mat ki̱ n bu mbai da̱ a̱vwuo nyin, A̱gwaza nung wu na ghyuai nung a̱zaghyi nyin, n fa̱k nsum di̱ kyang nang nyi nyia̱ a̱ni. A̱wot n na nfa̱k a̱lyia̱ ya ba̱t, mat á̱ghyang á̱niet ma̱ a̱di̱di̱t ma̱ nyin ka̱n ghwon a̱khwukhwop a̱ka̱tuk za̱kwa mba wu bah. Nyi ka̱n ghwon a̱na̱ndyung nyin wu, nyi si̱ nwuo khwi A̱gwaza bah. A̱na̱ndyung nyin wu wa yet; a̱shi̱shi̱k nyia̱ sang nsum nyin wu nang a̱ka̱la̱m a̱ni.