Read tyap 2 A̱korontiyawa 3 Bible Online

2 A̱korontiyawa 3 - tyap bible

2 A̱korontiyawa 3

¹Zi̱ bu na nwuo dyep á̱pyia̱ nzi̱t kyaa? Kee zi̱ bu li nang á̱ghyang á̱niet ba̱ chat ba̱ bai ma̱ng a̱nyin wusiká chyin á̱pyia̱ mba a̱ni; ku á̱si̱ ba̱ chat nyi lyuut wusiká chyin da̱nian mba a̱ni a? A̱tsak a̱lyiat, a̱nia wa ku ndi bah.

²Mi̱ wusika chyin jhyung nang zi̱ chat a̱ni, jija yet nyin ma̱ á̱pyia̱ nyin. Swat nyin hu li nang wusika nang á̱ lyuut mi̱ fwuo nzi̱t na a̱ni. Da̱nian konyan wa doot a̱ fang jii, gu ka fi̱k a̱tan nta̱m nang zi̱ nyia̱ mami nyin a̱ni.

³Ku tak kpa̱sai nang nyin bya ngyet kidee wusika ji̱ neet da̱ a̱vwuo Kristi a̱ni, jija tak ntangka̱i nta̱m nang zi̱ nyia̱ mami nyin a̱ni. “Wusika” jini, á̱ lyuut jii ma̱ng ga̱faat lyuut ma̱ng gba̱ndaat bah. Da̱ a̱kwonu a̱kya, á̱ lyuut ji ma̱ng A̱za̱za̱rak Ntswa A̱gwaza swuan wa. Á̱ lyuut ji da̱ a̱kpa̱kpai a̱fang wa bah. Á̱ lyuut ji mi̱ nfwuo á̱nietbishyi nia.

⁴Zi̱ gbang a̱lyia̱ da̱ á̱lyiat nani mat si̱sak ji nang zi̱ nnwuak fwuo da̱ A̱gwaza di̱ mun á̱pyia̱ ma̱ng Kristi a̱ni.

⁵Zi̱ nyia̱ a̱di̱dam zi̱ tak kpa̱sai nang zi̱ mmaai zi̱ nyia̱ kyang ma̱ng á̱pyia̱ nzi̱t bah. A̱gwaza wa tyia̱ nzi̱t maai hu.

⁶A̱gwaza wa nwuak zi̱t chet zi̱ yet a̱yaata̱m la̱p a̱li̱ka̱uli a̱fai nggu ba. La̱p a̱li̱ka̱uli wuni yet doká ja nang á̱ lyuut a̱ni bah. Da̱ a̱kwonu a̱kya, a̱ yet á̱si̱ A̱za̱za̱rak Ntswa A̱gwaza wa. A̱khwukhwop la̱p a̱li̱ka̱uli nang á̱ lyuut a̱ni, ni̱ ngaan ma̱ng a̱khwu. A̱wot mi̱ la̱p a̱li̱ka̱uli a̱fai wu, A̱za̱za̱rak Ntswa A̱gwaza wu wa nwuat swuan ji.

⁷Ma̱ninika, nta̱m a̱khwukhwop doká Musa nang á̱ lyuut da̱ a̱kpa̱kpai a̱fang a̱ni, ni̱ ngaan ma̱ng a̱khwu. A̱mgba̱m ma̱ng a̱nia, á̱ nwuak Musa njii di̱n vak a̱kyenkyai shi nang á̱niet Isi̱rela ba si̱ mi̱n nwuan a̱ghyi Musa ba a̱ni bah. Mat a̱ghyi nggu ba ku ya á̱ghyi ma̱ mya̱myat a̱myat ma̱ng a̱kyenkyai shi A̱gwaza wu; ku nang ya a̱ghyi hu ku ntyak sai da̱ a̱bada̱dei njen a̱ni.[5]

⁸Ma a̱nia wa nang A̱za̱za̱rak Ntswa wu nnwuat swuan a̱ni, ku myim zi̱ tyia̱ fwuo da̱ a̱kyenkyai shi A̱gwaza a̱ yet a̱gba̱ndang a̱ swak nang á̱ shyat mi̱ nta̱m a̱li̱ka̱uli a̱fai wu a̱ni baa?

⁹A̱wot ki̱ nta̱m a̱khwukhwop doka na na̱ shi a̱ni, ni̱ nngaan ma̱ng faat shi̱ri̱ya a̱khwu; ma a̱nia wa, ku fa nta̱m A̱sham Nkhang na na̱ swak a̱khwukhwop doka wu ma̱ng a̱kyenkyai shi a̱ni, A̱gwaza ni̱ nngaan ma̱ng faat shi̱ri̱ya, a̱ kyiak zi̱t, zi̱ yet á̱niet sang a̱bun!

¹⁰A̱tsak a̱lyiat, nta̱m a̱khwukhwop doka na shi. A̱mgba̱m ma̱ng a̱nia, á̱ si̱ mi̱n tyan na ma̱ng a̱kyenkyai shi nta̱m A̱sham Nkhang ma̱nini wu bah, ku ma̱ chunchwiit.

¹¹Mat a̱nia, ki̱ a̱kyenkyai shi nta̱m a̱khwukhwop doka a̱wa ku tyak, ma a̱nia wa ku fa a̱kyenkyai shi nta̱m A̱sham Nkhang wu nswak si̱ a̱khwukhwop doka hu ma̱ng shi, ni̱nia ni̱ kyiak a̱junjung jen wu, si̱ nat sang sangba̱p.

¹²Mat a̱nia, nang zi̱ mbyia̱ tangka̱i tyia̱ fwuo di̱ nta̱m nfai huni a̱ni, huhwa mbyia̱ nang zi̱ mbyia̱ gbang a̱lyia̱ hu za̱m.

¹³Zi̱ li nang Musa a̱ni bah, nggu wa ku kup a̱ghyi nggu ba ma̱ng a̱toot. Kalak á̱niet Isi̱rela ba ba̱ du li shi A̱gwaza hu, ku nang ku ntyiai a̱ni.

¹⁴A̱wot nfwuo á̱niet Isi̱rela na ku tyia̱ gba̱pdok. A̱wot ba̱ng ba̱ tat a̱fwun, kuzang jen nang á̱ ni̱ nfang doka a̱khwukhwop la̱p a̱li̱ka̱uli ji, ku li nang a̱toot a̱wa wa kup nfwuo mba na, kalak ba̱ fi̱k a̱tsatsak a̱lyiat wu. A̱wot mat nwuak fwuo di̱ Kristi hwa ma̱nyin nggu, na tyia̱ á̱ nkhwuk a̱toot a̱wa, ba̱ ka li.

¹⁵A̱tsak a̱lyiat, ku a̱fwun, nang ba̱ ni̱ nfang doka nang Musa lyuut a̱ni, ku li nang á̱ ni̱ nkup nfwuo mba na ma̱ng a̱toot a̱wa. A̱wot da̱ mba, ba̱ ni̱ fi̱k a̱ni bah.

¹⁶A̱wot ki̱ a̱yin bwuok a̱ si̱ nwuak fwuo di̱ Yesu, ku li nang á̱ khwuk a̱toot a̱wa a̱ni.

¹⁷Mat, A̱za̱za̱rak Ntswa wu yet A̱gwaza wa. A̱wot a̱vwuo ka nang A̱za̱za̱rak Ntswa A̱gwaza wu nshya̱ a̱ni, a̱ na nang zi̱t a̱wat zi̱ nwuak a̱chuchuk.

¹⁸Mat a̱nia, a̱mgba̱m nzi̱t nang á̱ ka̱n khwuk nzi̱t a̱toot a̱wa ma̱ a̱ghyi nzi̱t ba a̱ni, zi̱ byia̱ a̱wat zi̱ li zi̱ bu tak shi A̱gwaza hu kpa̱sai. A̱wot A̱gwaza wu, a̱ yet A̱za̱za̱rak Ntswa wu a̱ni, a̱ ni̱ tyia̱ zi̱ li nang nggu a̱ni kuzang jen. Mat nang nggu nshai za̱kwa nzi̱t ji zi̱ ka tai nggu ma̱ng a̱kyenkyai shi nggu wu a̱ni.