Read tyap 2 A̱korontiyawa 5 Bible Online

2 A̱korontiyawa 5 - tyap bible

2 A̱korontiyawa 5

¹Mat a̱nia, zi̱ lyen ka̱ á̱ seang suswak huni nang zi̱ nswan mi̱ swanta hu a̱ni; (huhwa yet kidee nvam nzi̱t na, na̱ kwi mi̱ swanta hu a̱ni); zi̱ na shya̱ tangka̱i a̱li a̱ghyang Ma A̱gwaza tswazwa. Ka̱ yet vam sang sangba̱p nang A̱gwaza wa ma̱ a̱pyia̱ nggu nyia̱ nzi̱t ndyo a̱ni. A̱wot a̱tyubishyi wa nyia̱ nhu bah.

²Ma̱ninika zi̱ veang ma̱ng nvam nani. Zi̱ fwuong di̱dang zi̱ kup nvam Ma A̱gwaza tswazwa nang á̱ ni̱ nkup a̱yaatoot a̱fai a̱ni.

³Mat ka̱ á̱ kup zi̱t ma̱ng nvam Ma A̱gwaza tswazwa na, á̱ bu na ghwon tswá nzi̱t ji, ji̱ sang nvam bah.[11]

⁴Nang zi̱ nswan mami á̱suswak nvam swanta nani a̱ni, zi̱ tu a̱nwurung, zi̱ si̱ twei ma̱ng a̱khwu tsa bu nshya̱i swuan. A̱wot ku li á ngyei zi̱ chat a̱khwu kya, zi̱ bu ghwon nvam nani na̱ kup zi̱t a̱ni. Da̱ a̱kwonu a̱kya, zi̱ chat zi̱ kup nvam nfai nzi̱t na, da̱nian swuan ji na nwuan nvam nani na̱ kwi a̱ni, da̱ a̱ka̱nyiung.

⁵A̱gwaza wa ma̱ a̱pyia̱ nggu jhyi nzi̱t a̱ sak da̱nian swuan swai ji. A̱wot a̱ si̱ nang zi̱t A̱za̱za̱rak Ntswa nggu wu, da̱nian A̱za̱za̱rak Ntswa wu wa na yong nzi̱t zi̱ shya̱ swuan swai jini.

⁶Mat a̱nia, kuzang jen zi̱ ni̱ swan ma̱ng gbang a̱lyia̱. Ku nang zi̱ ndyen nang ki̱ zi̱ ni̱ swuan ma̱ng nvam swanta nani, zi̱ shya̱ a̱mali tswazwa dundung ma̱ng A̱gwaza bah.

⁷Mat, zi̱ swan di̱ nkyang nang á̱ghyi a̱tyubishyi nwuan mi̱ swanta huni hwa a̱ni bah. Da̱ a̱kwonu a̱kya, zi̱ swan di̱ nwuak fwuo hwa.[12]

⁸A̱tsak a̱lyiat, zi̱ byia̱ gbang a̱lyia̱ ba̱t. A̱wot zi̱ bu na chat zi̱ shya̱ zan ma̱ng nvam swanta nani, da̱nian zi̱ ka swan a̱mali dundung ma̱ng A̱tyoli nzi̱t wu Yesu.

⁹Mat a̱nia, ku zi̱ shya̱ mi̱ swanta hu mi̱ suswak vam huni, ku zi̱ ma shya̱ zan mi̱ vam huni, kyang hu zi̱ tyia̱ a̱zanson a̱ni, huhwa yet; A̱tyoli Yesu a̱ fa̱k nyinyang zi̱t.

¹⁰Mat a̱mgba̱m nzi̱t, ku yet ta hwa zi̱ yong a̱zaghyi a̱gba̱ndang chuk tyok Kristi wu, da̱nian gu ka nyia̱ nzi̱t shi̱ri̱ya. Konyan ma̱ nzi̱t, na san zang cha̱chaat ma̱ng kyang hu nang gu nyia̱ mi̱ vam swanta huni a̱ni, ku hu yet a̱tan, ku hu yet a̱ka̱tuk.

¹¹Mat nang zi̱ nfi̱k nta̱m fwuong a̱wun A̱gwaza nang zi̱ nyia̱ a̱ni, huhwa mbyia̱ nang zi̱ ni̱ nkwan zi̱ mwang á̱ghyang á̱niet zi̱ ka khwat baa. A̱gwaza lyen nang zi̱ ngyet á̱niet shei a̱tsatsak a̱lyiat bya. A̱wot n tyia̱ fwuo nang nyin meang, nyi lyen a̱nia.

¹²Zi̱ bu lyiat á̱lyiat nani zi̱ ka chyin á̱pyia̱ nzi̱t da̱ a̱vwuo nyin kyaa? Kaai, zi̱ nwuat nyin a̱wat kya nang nyi na ntam da̱ nzi̱t a̱ni. Da̱nian nyi ka nwuak a̱tan nkhang tazwa nzi̱t da̱ a̱vwuo á̱niet nta̱m ba̱ nwai byia̱ a̱tsatsak a̱lyiat mi̱ nfwuo mba na a̱ni. Ba̱ ni̱ tam tazwa nta̱m nang ba̱ nyia̱ á̱niet ba̱ ka nchyin mba wa a̱ni.

¹³Ka̱ a̱lyiat nani li á ngyei á̱si̱ tyong jhyiip nia, nyi kyiak naa nang á̱ lyiat na ma̱ng A̱gwaza wa a̱ni. A̱wot ka̱ zi̱ ma tyong jhyiip ja bah, nyi kyiak naa na̱ yet nyin kpangti̱n ja.

¹⁴Ku di̱ kuzang vak hwa, chat hu nang Kristi nchat zi̱t a̱ni, huhwa tyia̱ zi̱t gba̱gbak, zi̱ ya a̱son. Mat ma̱nang zi̱ nnwuak a̱chuchuk nang Kristi nkhwu da̱nian a̱mgba̱m á̱niet ba a̱ni; ma a̱nia wa, zi̱ si̱ bu nwuak a̱chuchuk nang a̱mgba̱m nzi̱t ka̱n kwi, zi̱ si̱ ghwon a̱khwukhwop za̱kwa a̱ka̱tuk nyia̱ nzi̱t wu.[13]

¹⁵Yesu ku khwu da̱nian a̱mgba̱m á̱niet ba, ba̱ ka san swuan swai nggu ji, a̱wot ba̱ bu na swan swat á̱pyia̱ mba bah. Da̱ a̱kwonu a̱kya, ba̱ na swan swat ku myim Kristi a̱ni. Da̱nian mba kya nang gu ku nkhwu, a̱wot á̱ si̱ bu ta̱ngam guu ma̱ng swuan ma̱ á̱niet ba̱ ka̱n kwi a̱ni.

¹⁶Mat a̱nia, zi̱ wa ka̱n ghwon kyiak á̱ghyang á̱niet nang á̱niet swanta ba nkyiak ba a̱ni. Di̱n jen jhyang zi̱ ku kyiak Kristi nang á̱niet swanta ba nkyiak gu a̱ni. A̱wot ma̱ninika si̱sak nang zi̱ nfi̱k gu a̱ni, ji̱ vwuon!

¹⁷Si̱ huni fa, kuzang a̱yin a̱ mun a̱pyia̱ ma̱ng Yesu Kristi a̱ni, a̱ yet á̱niet a̱fai wa nang A̱gwaza sii mat a̱ni. A̱khwukhwop nswat nggu wu swak, a̱wot a̱ si̱ nwuo swan swat fai.

¹⁸A̱mgba̱m si̱ huni, ku yet za̱nang ja nang A̱gwaza nang zi̱t a̱ni. Nggu wa jhyi nzi̱t zi̱ nyia̱ kpa̱ndang ma̱ng a̱nggu di̱ mun á̱pyia̱ ma̱ng Kristi. A̱wot A̱gwaza si̱ bu nwuak nzi̱t ta̱m jhyi á̱niet ba̱ ka nyia̱ kpa̱ndang ma̱ng a̱nggu.

¹⁹Si̱ huni fa, A̱gwaza wa ka̱n jhyi á̱niet swanta ba ba̱ nyia̱ kpa̱ndang ma̱ng a̱nggu di̱n vak Yesu Kristi. A̱ bu ba̱ng a̱ka̱tuk nyia̱ mba wu mi̱ fwuo bah. A̱wot a̱ si̱ nwuak nzi̱t ta̱m ji, nang zi̱ na njhyi á̱niet swanta ba, ba̱ ka nyia̱ kpa̱ndang ma̱ng nggu a̱ni.

²⁰Mat a̱nia, nzi̱t zi̱ yet á̱ghyi Kristi bya. Mat nzi̱t bya yet vak hu nang A̱gwaza ngyei á̱niet ba, ba̱ bai da̱ a̱vwuo nggu a̱ni. Zi̱ lyiat da̱ a̱kwonu Kristi, di̱n jen nang zi̱ nnaai nyin a̱ni nyia̱, “Nyi bai, nyi jhyi swat nyin hu, nyi ka nyia̱ kpa̱ndang ma̱ng A̱gwaza!”

²¹Mat A̱gwaza tyia̱ Kristi, a̱ ka̱ nwai nyia̱ a̱ka̱tuk nyia̱ a̱ni, gu yet za̱nang a̱ka̱tuk nyia̱ nzi̱t.[14] Da̱nian A̱gwaza a̱ ka tak kpa̱sai nang gu nkyiak nzi̱t á̱tsotswat á̱niet sang a̱bun a̱zaghyi nggu, di̱n vak Kristi.