Read tyap 2 A̱korontiyawa 7 Bible Online

2 A̱korontiyawa 7 - tyap bible

2 A̱korontiyawa 7

¹Nyin á̱niet khwi Yesu ba nang n chat a̱ni, mat nang A̱gwaza ka̱n nda̱p nkyang nani a̱ sak a̱ni, si̱ zi̱ ghwon a̱ka̱tuk nyia̱ a̱ tyei nzi̱t a̱na̱ndyung mi̱ nvam nzi̱t na ma̱ng tswá nzi̱t ji a̱ni. A̱wot yok zi̱ ntyia̱ a̱lyia̱, zi̱ yet á̱za̱za̱rak á̱niet, mat zi̱ fwuong a̱wun A̱gwaza.

²Ma̱sa̱kut, nyi yok ba̱ng nzi̱t mi̱ nfwuo nyin na bah. Mat zi̱ ka̱n bwuo a̱yin a̱bun, ku zi̱ tyia̱ a̱yin teap di̱ khwi hu, ku zi̱ shyok a̱yin bah.

³N dyiat a̱ni da̱nian n ka tyia̱ nyin a̱bun wa bah. Ma̱nang n ka̱n hyia̱ ma̱ng a̱nyin a̱ni, zi̱ chat nyin mi̱ nfwuo nzi̱t na. A̱wot zi̱ na swan zi̱ kwi dundung ma̱ng a̱nyin.

⁴N ba̱ng fwuo da̱ nyin ba̱t, n si̱ bu ntam ba̱t da̱ nyin. Nyi tyia̱ nung gba̱gbak ba̱t. A̱wot a̱mgba̱m ma̱ng swuo a̱bung nang zi̱ swuo a̱ni, nyi si̱ tyia̱ nung fwuo sai.

⁵Jen nang zi̱ ku mbai fam a̱byin Ma̱kidoniya a̱ni, zi̱ ku byia̱ fwung bah. Zi̱ ku swuo a̱bung ma̱ng jhya̱ di̱ kuzang fam. Zwang si̱ shya̱ nta. A̱wot mami nfwuo nzi̱t na, zi̱ si̱ fwuong a̱wun.

⁶A̱wot A̱gwaza wu a̱ yet a̱tyu a̱ ni̱ tyei á̱niet ba̱ but mi̱ fwuo a̱ni gba̱gbak, a̱ si̱ tyia̱ nfwuo nzi̱t na gba̱gbak di̱ bai Titut hu.

⁷Bai Titut hu tyia̱ nzi̱t a̱gwai; ma a̱nia wa nkhang nang gu bwuo nzi̱t ndyo tazwa si̱sak ji nang nyi ntyia̱ nggu shyim fwuo a̱ni. A̱ si̱ bu hyia̱ ma̱ng a̱nzi̱t si̱sak ji nang nyi mbyia̱ di̱dang ba̱t, nyi chat nyi li nung a̱ni. A̱ si̱ bu hyia̱ si̱sak ji nang nyi mbyia̱ byian fwuo di̱ lyiat nyep a̱tyu khwi, ma̱ng si̱sak ji nang nyi nfa̱k da̱ nung a̱ni. Ni̱nia tyia̱ nung fa̱k nyinyang hu ba̱t.

⁸Ki̱ wusika ji nang n ku dyuut nyin dyo a̱ni, byian nyin nfwuo, n si̱ mi̱n twei zwá ndyen bah. Di̱ ntsa hu, n ku shya̱ byian fwuo di̱ si̱sak ji nang n byian nyin nfwuo a̱ni. A̱mgba̱m ma̱ng a̱nia, n ku mbyian nyin fwuo da̱ a̱bada̱dei njen kya.

⁹Ma̱ninika, n gwai nang n ku ndyuut nyin wusika a̱ja a̱ni,[20] mat nang ji̱ ku ntyia̱ nyin twei zwá ndyen, nyi si̱ ghwon a̱ka̱tuk swat nyin wu a̱ni. Ma̱ng a̱nia, n gwai nang wusika ji ku ntyia̱ nyin twei zwá ndyen a̱ni bah. A̱wot tangka̱i twei zwá ndyen huni hwa nang A̱gwaza chat á̱niet nggu ba ba̱ twei. A̱mgba̱m ma̱ng a̱nia, a̱yin ma̱ nzi̱t nyia̱ nyin a̱ka̱tuk bah.

¹⁰Tangka̱i twei zwá ndyen nang A̱gwaza ni̱ tyia̱ zi̱ twei a̱ni, ku ni̱ tyia̱ zi̱ ghwon a̱ka̱tuk nyia̱ nzi̱t wu, a̱wot zi̱ bu shya̱ san. Mat a̱nia, zi̱ si̱ mi̱n byian fwuo di̱ tangka̱i twei zwá dyen a̱hwa bah. Da̱ a̱kwonu a̱kya, twei zwá dyen a̱tyubishyi da̱ ku ni̱ tyia̱ ghwon a̱ka̱tuk nyia̱ á̱ khwi A̱gwaza a̱ni bah; ku ni̱ bai ma̱ng a̱khwu ntswa a̱tyubishyi kya.

¹¹Nyi nwuan nyi li tangka̱i twei zwa ndyen nang A̱gwaza tyia̱ mi̱ nfwuo nyin na, si̱ khwat nyin dyo a̱ni! Na̱ si̱ tyia̱ nyin di̱dang jhyi swat nyin hu. Na̱ si̱ bu tak nang nyi nchat nyi kwi á̱pyia̱ nyin. Na̱ si̱ tyia̱ nyin nyi si̱ mwai lyen nyi si̱ fa̱k a̱wun. Na̱ si̱ tyia̱ nyi byia̱ di̱dang li nung. Na̱ si̱ tyia̱ nyi kwan nyi li nang á̱ nyep a̱tyu a̱ka̱tuk nyia̱ a̱wa. Na̱ si̱ tak nang nyi nkai kuzang vak, nyi li nang nyi njhyi kuzang kyang ku nat cha̱chaat.

¹²Nang n ku ndyuut nyin wusika a̱ja a̱ni, n ku nfa a̱tyu a̱ nyia̱ a̱ka̱tuk ku a̱tyu nang a̱ nyia̱ gu dyo wa a̱ni bah. Da̱ a̱kwonu a̱kya, n dyuut wa A̱gwaza a̱ ka tak nyin kpa̱sai nang nyi nfa̱k da̱ nzi̱t za̱m.

¹³Mat a̱nia, si̱ huni tyia̱ nzi̱t gba̱gbak. Kyang ku mbeang nfwuo nzi̱t na tyia̱ gba̱gbak hu a̱ni, zi̱ ku shya̱ fwuo sai ba̱t nang zi̱ ndi si̱sak nang Titut mbyia̱ a̱gwai a̱ni. A̱ ku gwai di̱ si̱sak nang a̱mgba̱m nyin ku nsan nggu mbwak feang, a̱wot nyi si̱ tyia̱ fwuo nggu hu si̱ myia̱ a̱ni.

¹⁴A̱tsak a̱lyiat, n ku hyia̱ ma̱ng Titut, nang n tam da̱ nyin ba̱t. A̱wot nyi ku tyia̱ n si̱ nfa̱k nsum bah. Kuzang jen, n ni̱ hyia̱ ma̱ng a̱nyin a̱tsatsak a̱lyiat. A̱wot ma̱ninika, nkyang nang n tam da̱ a̱vwuo Titut tazwa nyin a̱ni meang, na̱ bai da̱ a̱nu ka.

¹⁵Ma̱ninika, ka̱ Titut jhyung si̱sak ji nang a̱mgba̱m nyin nkhwi a̱lyiat nggu na, a̱wot nyi si̱ san gu ma̱ng tyi̱ri̱m vam, nyi si̱ nwuak gu shi a̱ni, a̱ chat nyin ba̱t a̱ swak nang gu ku nchat nyin di̱n jen ji ji̱ swak a̱ni.

¹⁶N shya̱ ma̱ng a̱gwai ma̱nini, mat di̱ kuzang kyang n ba̱ng fwuo da̱ nyin ba̱t.