Read tyap A̱ga̱la̱tiyawa 3 Bible Online

A̱ga̱la̱tiyawa 3 - tyap bible

A̱ga̱la̱tiyawa 3

¹Kwot, nyin A̱ga̱la̱tiyawa, á̱bwuon á̱niet! A̱nyan wa nyia̱ nyin nkut na, a̱ si̱ laai nyin? Mat, á̱ ku tyai kyang nang a̱khwu Kristi ka fa a̱ni da̱ a̱vwuo nyin kpa̱sai, á ngyei nyi wa ku li a̱khwu nggu ka da̱ a̱team a̱khwu wu ma̱ng á̱ghyi nyin.

²N chat n dyip nyin kyang nyiung: Nyi ku san A̱za̱za̱rak Ntswa wu mat khwi doka Musa jaa? Kee da̱nian nwuak a̱chuchuk da̱ A̱sham Nkhang nang nyi ku fa̱k wa a̱ni?

³Yihwa mbyia̱ nang nyi nyia̱ bwuon hu a̱nia? Nyi ku nwuo khwi Kristi hu mat chet A̱za̱za̱rak Ntswa. A̱wot di̱ yong huni, nyi ntyia̱ a̱lyia̱ chat yet á̱tsotswat á̱niet a̱zaghyi A̱gwaza ma̱ng chet vam a̱tyubishyi hwa kee?

⁴Swuo a̱bung hu nang nyi ka̱n swuo ba̱t a̱ni, ku yet a̱buk kyang waa? A̱tsak a̱lyiat, n ba̱ng fwuo nung hu; swuo a̱bung nyin hu ku yet a̱buk kyang wa da̱ a̱vwuo nyin bah.

⁵N bu na ndyip nyin, nang A̱gwaza ni̱ nnwuak nyin A̱za̱za̱rak Ntswa nggu wu, a̱wot a̱ si̱ nwuak nyin chet nyia̱ nkyang a̱ri̱bi̱di na a̱ni, mat nyi ni̱ khwi doka jaa? Kaai, ku ma̱ chunchwiit! A̱gwaza ni̱ ka̱u nyin A̱za̱za̱rak Ntswa wu, mat nyi ni̱ nwuak a̱chuchuk da̱ A̱sham Nkhang ka nang nyi ni̱ fa̱k tazwa Kristi kya a̱ni.

⁶Ma a̱nia wa, nang á̱ ndyuut nyia̱, “Ibrahim ku nwuak fwuo da̱ A̱gwaza, huhwa A̱gwaza si̱ kyiak gu nang a̱tsotswat a̱yin a̱ni.”[11]

⁷Huhwa mbyia̱, nyi na nfi̱k nang a̱tsatsak mman Ibrahim, bibya yet á̱niet ba̱ nwuak fwuo da̱ A̱gwaza a̱ni.

⁸A̱wot mbeang a̱nia, A̱lyiat A̱gwaza na ku mi̱ ntak jen nang A̱gwaza na ntak kpa̱sai nang gu nkyiak Nnwap na̱ nwai yet A̱yahudawa a̱ni á̱tsotswat ma̱ng sang a̱bun a̱zaghyi nggu, mat nang ba̱ nnwuak fwuo da̱ A̱gwaza a̱ni. A̱gwaza ku tak ma̱ng Ibrahim A̱sham Nkhang kani neet gbangbang di̱n jen nang gu ku nyia̱ a̱li̱ka̱uli ma̱ng a̱nggu, nyia̱, “A̱mgba̱m Nnwap na̱ nwai yet A̱yahudawa a̱ni, na shya̱ a̱li̱ba̱rka wu da̱nian ang kya.”[12]

⁹Mat a̱nia, a̱mgba̱m á̱niet ba̱ nwuak fwuo di̱ Kristi a̱ni, ba̱ na shya̱ a̱li̱ba̱rka ma̱ cha̱chaat ma̱ng á̱si̱ Ibrahim wu, mat nang gu nnwuak fwuo da̱ a̱li̱ka̱uli A̱gwaza wu a̱ni.

¹⁰A̱wot á̱niet ba ba̱ tyia̱ fwuo di̱ doka Musa ji, ji̱ tyia̱ mba ba̱ yet a̱tsotswat a̱zaghyi A̱gwaza a̱ni, A̱gwaza na shyi mbaa. Á̱ nyia̱ mba shi̱ri̱ya a̱khwu. Mat, á̱ lyuut ma̱ A̱lyiat A̱gwaza na nyia̱, “Konyan wa lak khwi a̱mgba̱m doká nang á̱ lyuut mami Ta̱ka̱da doká Musa hu kuzang jen a̱ni, á̱ na shyi nggu, á̱ nyia̱ nggu shi̱ri̱ya a̱khwu!”[13]

¹¹Mat a̱nia, ku tak kpa̱sai nang á̱ mbyia̱ a̱tyubishyi nang A̱gwaza na kyiak a̱ yet a̱tsotswat a̱ sang a̱bun a̱zaghyi nggu, mat khwi doka hu a̱ni bah. Ma̱nang á̱ ndyuut ma̱ A̱lyiat A̱gwaza na a̱ni, nyia̱, “Mat nwuak fwuo hwa nang A̱gwaza na nkyiak a̱yin a̱tsotswat ma̱ng sang a̱bun a̱zaghyi nggu a̱ni.”[14]

¹²Vak nwuak fwuo huni vwuon ma̱ zan ma̱ng vak khwi doka hu. Ma̱nang á̱ ndyuut mami doka Musa ji a̱ni, nyia̱, “Khwi doka hwa na tyia̱ a̱yin a̱ nshya̱ swuan.”[15]

¹³A̱wot Kristi wa tyia̱ zi̱ si̱ shot shyishyi a̱khwu nang doka ji shei a̱ni. Di̱n jen nang á̱ ku kpang Yesu á̱ si̱ lya̱u nggu da̱ a̱team a̱khwu wu a̱ni; a̱ si̱ kyiak shyishyi a̱khwu a̱ka̱tuk nyia̱ nzi̱t wu a̱ sak a̱pyia̱ nggu. Ma̱nang á̱ ndyuut ma̱ A̱lyiat A̱gwaza na a̱ni, nyia̱, “Konyan wa nang á̱ lya̱u ka̱tsak da̱ a̱kwon, ku tak nang shyishyi a̱khwu A̱gwaza ja ya nggu a̱ni.”[16]

¹⁴A̱gwaza ku nwuak Nnwap na̱ nwai yet A̱yahudawa a̱ni a̱li̱ba̱rka nang gu ku nyia̱ a̱li̱ka̱uli a̱ na nang Ibrahim a̱ni, mat a̱khwu Kristi Yesu ka. A̱ nyia̱ a̱nia wa, da̱nian nzi̱t zi̱ nwuak fwuo di̱ Kristi a̱ni, zi̱ ka san A̱za̱za̱rak Ntswa nang á̱ nyia̱ a̱li̱ka̱uli á̱ na nang zi̱t a̱ni.

¹⁵Nyin á̱niet khwi Yesu ba nang n chat a̱ni, nyi yok n tyan nyin swat a̱tyubishyi kuzang a̱tuk ma̱ng kidee ji nang n fa a̱ji a̱ni. Ka̱ á̱niet a̱feang la̱p a̱li̱ka̱uli ba̱ nyia̱ kyang, a̱wot ba̱ si̱ lyuut ba̱ si̱ ntyia̱ bwak nyia̱ ku na li a̱nia, á̱ mbyia̱ a̱tyu a̱ si̱ mi̱n tyat ku a̱ mbeang kyang di̱ la̱p a̱li̱ka̱uli a̱wa a̱ni bah. A̱nia wa ku ndi ma̱ng A̱gwaza, ka̱ a̱ la̱p a̱li̱ka̱uli wu.

¹⁶A̱wot A̱gwaza ku nyia̱ a̱li̱ka̱uli ma̱ng Ibrahim wa ma̱ng nggwon nggu ka. A̱wot da̱ mba, á̱ lyuut nyia̱ ma̱ng mman[17] Ibrahim nia, ku á̱ fa kwai ja ma̱ a̱di̱di̱t nang A̱gwaza nyia̱ a̱li̱ka̱uli wu ma̱ng a̱mba bah. Da̱ a̱kwonu a̱kya, A̱lyiat A̱gwaza na fa, “Mi̱ Nggwon[18] kya mi̱ kwai ang ji,” nang A̱gwaza nnyia̱ a̱li̱ka̱uli wu. Nggwon kani kya fa Kristi.

¹⁷Kyang hu nang n fa a̱ji a̱ni, huhwa yet: Doka ji si̱ mi̱n shyak ku ji̱ seang la̱p a̱li̱ka̱uli nang A̱gwaza ku nyia̱ ma̱ng Ibrahim mi̱ ndyia̱ chyi nyaai ma̱ng swak ntat (430) neet nang á̱ ka̱n nwuak Musa doka ji a̱ni bah. Ka̱ A̱gwaza wa nyia̱ a̱nia, si̱ a̱ tyat a̱li̱ka̱uli nang gu nyia̱ ma̱ng Ibrahim a̱ni.

¹⁸Ka̱ á̱ wa shyat gado hu mat khwi doka ja, si̱ á̱ shyat gado hu nang á̱ san mat a̱li̱ka̱uli A̱gwaza wa a̱ni bah; a̱wot mat nyia̱ a̱li̱ka̱uli hwa nang A̱gwaza nnwuak Ibrahim gado hu, mat shok nggu ji.

¹⁹Yihwa mbyia̱ nang á̱ ku nwuak doka ji di̱n jen a̱ja? Á̱ ku nwuak doka ji ndung ma̱ng a̱li̱ka̱uli wu, da̱nian á̱ ka tak á̱niet ba a̱ka̱tuk nyia̱ mba wu kpa̱sai. Á̱ bu ku chat tyok doka hu, ku ba̱ng a̱ tat jen nang nggwon[19] ka̱ neet mi̱ kwai Ibrahim ji na mbai a̱ni, ku sii tyak. A̱gwaza wa ku tyia̱ doka ji mbwak a̱yaata̱m tswá nggu ba. Ba̱ si̱ bai ndyo á̱ ba̱ nwuak Musa, a̱ ku yong ma̱ a̱ka̱wa̱tyia̱ A̱gwaza ma̱ng á̱niet nggu ba a̱ni.

²⁰A̱wot á̱ ni̱ chat a̱tyu yong ma̱ a̱ka̱wa̱tyia̱ bah, ka̱nang a̱tyo nyiung wa nshya̱ ma̱nyin gu. A̱wot A̱gwaza wu yet a̱nyiung wa. A̱ ku chat a̱tyu yong ma̱ a̱ka̱wa̱tyia̱ di̱n jen nang gu ku nyia̱ a̱li̱ka̱uli wu ma̱ng Ibrahim a̱ni bah.

²¹Si̱ huni fa kyang hu doka A̱gwaza ji hyia̱ a̱ni, vwuon ma̱ng kyang hu nang A̱gwaza nyia̱ a̱li̱ka̱uli wu a̱ na nyia̱ a̱ni a? Kaai, ku ma̱ chunchwiit! Ka̱ á̱ wa nyia̱ doka ji si̱ mi̱n nwuak a̱tyubishyi swuan; a̱tsak a̱lyiat, si̱ khwi doka Musa ji na tyia̱ A̱gwaza a̱ kyiak a̱tyubishyi nang a̱tsotswat a̱ni a̱zaghyi nggu.

²²Da̱ a̱kwonu a̱kya, A̱lyiat A̱gwaza na tak kpa̱sai nang zi̱ ngyet á̱khwo mbwak tyok a̱ka̱tuk nyia̱ mi̱ swanta hu. Mat a̱nia, zi̱ san a̱li̱ka̱uli shya̱ sa̱t da̱ a̱vwuo A̱gwaza mat nwuak fwuo di̱ Yesu Kristi hwa ma̱nyin hu.

²³Neet nang vak nwuak fwuo di̱ Yesu hu ka̱n bai bah, doka Musa ji si̱ cham zi̱t. Ji̱ si̱ chok zi̱t si̱ nat jen nang á̱ ntyai vak nwuak fwuo di̱ Kristi hu kpa̱sai a̱ni.

²⁴Mat a̱nia, doka ji ja nang á̱ ku tyia̱ ji̱ si̱ kwak nzi̱t a̱son, si̱ nang Kristi mbai. A̱wot ji̱ si̱ chok zi̱t si̱ nang A̱gwaza na nkyiak zi̱t zi̱ yet á̱tsotswat á̱niet ba̱ sang a̱bun a̱zaghyi nggu a̱ni, mat nang zi̱ nnwuak fwuo di̱ Yesu a̱ni.

²⁵A̱wot ma̱ninika, nang vak nwuak fwuo di̱ Kristi Yesu mbai a̱ni, zi̱ bu chat doka ji, ji̱ bu chok zi̱t bah.

²⁶Si̱sak nang nyi nnwuak fwuo di̱ Yesu a̱ni, tyia̱ nyi yet mman A̱gwaza. Mat nyi mun á̱pyia̱ ma̱ng Yesu Kristi.

²⁷A̱mgba̱m nyin nang á̱ ku nyia̱ nyin ba̱ptisman ji, ji̱ si̱ tyia̱ nyin mun á̱pyia̱ ma̱ng Kristi wu a̱ni; si̱ a̱hwa bu tyia̱ nyi si̱ kyiak za̱kwa gu nggu ji mi̱ swat nyin hu, ma̱nang á̱ ni̱ nkup a̱toot a̱ni.

²⁸Mat a̱nia, á̱ bu nkhap a̱tyu A̱yahudawa ma̱ng a̱tyu Nnwap a̱ nwai yet A̱yahudawa a̱ni zan bah. Da̱ mba, á̱ nkhap a̱khwo ma̱ng nggwon a̱li zan bah. Da̱ mba, á̱ nkhap a̱tyok ma̱ng a̱byii̱k zan bah. A̱mgba̱m nyin, nyi yet kyang nyiung hwa, mat mun á̱pyia̱ nyin hu ma̱ng Yesu Kristi.

²⁹Ka̱nang nyi yet á̱niet khwi Kristi bya, nyi yet a̱tsak kwai Ibrahim wa. A̱wot nyi na yet á̱niet ya gado nang A̱gwaza nyia̱ a̱li̱ka̱uli a̱ na nwuak nyin a̱ni.