Read tyap A̱ga̱la̱tiyawa 5 Bible Online

A̱ga̱la̱tiyawa 5 - tyap bible

A̱ga̱la̱tiyawa 5

¹A̱tsak a̱lyiat, Kristi tyia̱ zi̱ yet á̱sa̱t á̱niet bya za̱m. Mat a̱nia, ma̱ninika, nyi yong mi̱ chet nang á̱sa̱t á̱niet a̱ni. Nyi yok shim nyi bu yet á̱khwo doka bah.

²Nyi myiai a̱fufwuo nyi fa̱a̱k! Nung Bulut, n chat n tak ma̱ nyin a̱lyiat nani. Ka̱ nyi kyiak tyei mi̱ chen nang huhwa na tyia̱ nyi yet á̱tsotswat a̱zaghyi A̱gwaza, ku na li á ngyei di̱ Kristi byia̱ kpangti̱n da̱ a̱vwuo nyin bah.

³N chat n bu ntak ma̱ng a̱nyin; konyan wa shim a̱ si̱ khwi doka tyei á̱niet mi̱ chen ji, ku yet ta hwa a̱tyu a̱wa a̱ khwi a̱mgba̱m doká Musa ji cha̱chaat.

⁴Nyin á̱niet nyi kwan nyi yet á̱tsotswat ma̱ng sang a̱bun a̱zaghyi A̱gwaza mat khwi doká Musa ji a̱ni, di̱n vak huni hwa nang nyi wa ka̱n gang á̱pyia̱ nyin ghwut ndyo di̱ khwi Kristi hu! A̱wot nyi si̱ teap. Nyi si̱ ghwon shok A̱gwaza ji!

⁵A̱wot nzi̱t, zi̱ swan swat A̱za̱za̱rak Ntswa a̱ni, zi̱ swan fwuong, zi̱ si̱ tyia̱ fwuo di̱ tsotswat nang A̱gwaza nyia̱ a̱li̱ka̱uli a̱ na nang nzi̱t mami nwuak fwuo di̱ Yesu a̱ni.

⁶Mat, jen nang zi̱ nnwuak fwuo di̱ Yesu Kristi a̱ni, tyia̱ mi̱ chen ku nwai tyia̱ mi̱ chen, ku byia̱ nzi̱t kpangti̱n bah. Kyang ku yet a̱ swak a̱ni, huhwa yet; nwuak fwuo nzi̱t hu di̱ Kristi. Ku tyei nzi̱t zi̱ chat A̱gwaza ma̱ng á̱ghyang á̱niet.

⁷Di̱n jen nang nyi ku nnwuo khwi Kristi hu a̱ni, nyi si̱ ya a̱son shansham ba̱t. A̱wot di̱ yong huni, a̱nyan wa vwuong nyin khwi a̱tsak a̱lyiat wu?

⁸A̱tsak a̱lyiat, A̱gwaza a̱ ku yorong nyin nyi shya̱ sa̱t hu a̱ni. Nggu wa laai nyin bah.

⁹Tyiet a̱ka̱laa huni li nang a̱bada̱dei nkyuo yit a̱ni. Kikya á̱ ni̱ tyia̱ ma̱ a̱nwai a̱lka̱ma ka̱ teak a̱ kai a̱mgba̱m a̱nwai na!

¹⁰A̱wot n ba̱ng fwuo, A̱tyoli nzi̱t wu Yesu Kristi na tyia̱ nyi nwuak a̱chuchuk di̱ tyiet a̱ka̱laa a̱hwa bah. A̱wot A̱gwaza na faat shi̱ri̱ya tazwa a̱tyu a̱ kwan a̱ tyia̱ nyin, nyi tyia̱ tai, nyi si̱ teap a̱ni.

¹¹Nyin á̱niet khwi Yesu ba nang n chat a̱ni, ka̱ n shei a̱lyiat A̱gwaza na nyia̱ ku yet ta hwa á̱ tyei nyin mi̱ chen, A̱gwaza a̱ ka san nyin, nang á̱ghyang á̱niet nhyia̱ nyia̱ n tyiet a̱ni; yihwa mbyia̱ nang á̱ ni̱ ngya̱shuk nung? Mi̱ kyang hu ku tyia̱ A̱yahudawa ba jat a̱kwa a̱ni, huhwa yet; ka̱ n shei san hu nang á̱ shyat da̱ a̱khwu Kristi da̱ a̱team a̱khwu wu a̱ni.[26]

¹²N fa, á̱niet a̱bya ba̱ fuut nyin ba̱ chat ba̱ tyei nyin mi̱ chen hu a̱ni, ba̱ ya nfak a̱zanson mba ka á̱ weam[27]!

¹³Nyin á̱niet khwi Yesu ba nang n chat a̱ni, á̱ yorong nyin nyi swan swat sa̱t. A̱mgba̱m ma̱ng a̱nia, nyi yok shim swat sa̱t nyin hu ma̱ng khwi doká ji, ku yet nyin jat fa̱k nyinyang za̱kwa nyia̱ a̱ka̱tuk nyia̱ bah. Da̱ a̱kwonu a̱kya, nyi yok sa̱t nyin hu ku tyia̱ nyi chat á̱ghyang, nyi nyia̱ á̱ghyang nyin nta̱m.

¹⁴Mat a̱mgba̱m doka Musa ji, á̱ tung jii á̱ tyia̱ mi̱ swang a̱lyiat jhyung, jija yet, “Chat a̱kpa̱ndang nswat ang wu nang a nchat a̱pyia̱ ang a̱ni.”[28]

¹⁵A̱wot ka̱ nyi nywai á̱ghyang bu tsa mbwoi á̱ghyang nyin kun nang a̱ka̱bwu a̱yit a̱ni, nyi ta̱bam! Kalak a̱mgba̱m nyin, nyi na tyak ma̱ng á̱ghyang nyin!

¹⁶Kyang hu n dyiat ma̱ng a̱nyin a̱ni, huhwa yet; nyi yok A̱za̱za̱rak Ntswa wu a̱ kwak nyin a̱son mi̱ swat nyin hu. Ka̱ nyi nyia̱ a̱nia, nyi si̱ mi̱n nyia̱ kyang nang za̱kwa a̱ka̱tuk nyia̱ nyin ji fwuong di̱dang a̱ni bah.

¹⁷Mat za̱kwa a̱ka̱tuk nyia̱ nyin ji fwuong di̱dang nyia̱ a̱ka̱tuk. A̱wot ji̱ si̱ nyia̱ na̱nvan ma̱ng kyang hu nang A̱za̱za̱rak Ntswa wu chat a̱ni. Ma a̱nia wa, A̱za̱za̱rak Ntswa wu tyei nzi̱t di̱dang kyang ku nyia̱ na̱nvan ma̱ng kyang nang za̱kwa a̱ka̱tuk nyia̱ nyin ji chat a̱ni. Za̱kwá sweang jini kwan á̱ nchi̱ri̱ng ma̱ng á̱ghyang. Huhwa mbyia̱ nyi byia̱ sa̱t nang nyi na nnyia̱ a̱tan nkyang nang nyi chat nyia̱ hu a̱ni bah.

¹⁸A̱wot ka̱nang A̱za̱za̱rak Ntswa wu wa kwak nyin a̱son ka, tyiet doka Musa hu ni̱ nyia̱ tyok tazwa nyin bah.

¹⁹Jen nang nyi nkhwi di̱dang za̱kwa a̱ka̱tuk nyia̱ nyin ji a̱ni, nta̱m nji na ni̱ ghwut kpa̱sai, ni̱nia yet: a̱shi̱shi̱k nyia̱ nang a̱ka̱la̱m a̱ tyei a̱yin a̱na̱ndyung a̱ni, ma̱ng shyuo nvam,

²⁰kwok ntong a̱zaghyi nghwughwu a̱yaagwaza sang swuan, la̱tong, na̱nvan, zook, kwi swam, vwuot lyen, chat a̱pyia̱, lak mun á̱pyia̱, á̱niet nyia̱ a̱chi̱nchi̱ri̱ng;

²¹kwi swam ma̱ng lak li á̱ghyang, hyeng a̱kan, tsot wun, ma̱ng á̱ka̱tuk nyia̱ á̱ghyang ma̱ a̱di̱di̱t nang á̱si̱ nani a̱ni. Yok n gba nyin, ma̱nang n ka̱n gba nyin di̱n jen jhyang a̱ni; konyan wa nyia̱ tangka̱i nkyang a̱hwa mi̱ swat nggu hu, a̱ na ya gado mi̱ Tyok A̱gwaza hu bah.

²²A̱wot ntangka̱i za̱kwá nang A̱za̱za̱rak Ntswa wu nnwuat a̱ni, jija yet, chat á̱ghyang, fwuo sai, swat nyinyang, nyap fwuo, fwuong kunak, yet a̱tan, yet a̱tsotswat,

²³nyia̱ shonshyon ma̱ng á̱ghyang, ma̱ng ta̱bat a̱pyia̱. A̱mgba̱m á̱niet ba̱ byia̱ ntangka̱i za̱kwá jini a̱ni, doka byia̱ a̱ka̱ta ma̱ng a̱mba bah.

²⁴A̱mgba̱m á̱niet ba̱ mun á̱pyia̱ ma̱ng Kristi Yesu a̱ni, ba̱ ka̱n kpang nta̱m za̱kwa a̱ka̱tuk nyia̱ mba na, ma̱ng a̱di̱di̱t a̱ka̱tuk fwuong di̱dang mba wu, da̱ a̱team a̱khwu Kristi wu.

²⁵Nang zi̱ nswan mami nchet A̱za̱za̱rak Ntswa a̱ni, yok zi̱ khwi A̱za̱za̱rak Ntswa wu cha̱chaat a̱ kwak zi̱t a̱son di̱ kuzang vak mi̱ swat nzi̱t hu.

²⁶Zi̱ yok yet á̱niet gba̱p a̱pyia̱, ku zi̱ tsaai jhya̱ ma̱ng kwi swam da̱ á̱ghyang nzi̱t bah.