Read tyap A̱ga̱la̱tiyawa 6 Bible Online

A̱ga̱la̱tiyawa 6 - tyap bible

A̱ga̱la̱tiyawa 6

¹Nyin á̱niet khwi Yesu ba nang n chat a̱ni, ka̱ a̱tyu khwi Kristi a̱ghyang mi̱ sot á̱niet khwi nyin ji ghyuap, a̱ si̱ kwa ma̱ a̱ka̱tuk nyia̱; nyin nyi byia̱ tat á̱ghyi nyi yong mi̱ chet di̱ khwi Kristi a̱ni, ku myim nyi ta̱bam ma̱ shonshyon ma̱ng ghyuai a̱pyia̱, nyi beang, nyi bwuok ma̱ng a̱tyu a̱wa tyia̱ da̱ a̱tsatsak nvak wu. A̱wot ka̱ nyi na bwuok ma̱ng a̱tyu a̱wa, ku myim nyi ta̱bam, kalak nyin meang, nyi kwa di̱ tangka̱i mak ku shya̱ nggu a̱ni.

²Nyi ni̱ mbeang á̱niet ba̱ swuo a̱bung ma̱ng a̱fi̱fa a̱ li nang a̱kpi̱di̱dyi̱k nkpa̱t a̱ni. Di̱ nvak huni hwa nyi na nkhwi doka ji cha̱chaat nang Kristi nwuak nyin a̱ni.

³Ka̱ a dam nyia̱ a yet a̱tsatsak a̱yin swak a beang a̱ghyang ang, a laai a̱pyia̱ ang kya. A yet a̱tsatsak a̱yin nang a dam a yet a̱ni bah.

⁴Ku myim konyan ma̱ nyin gu mak ta̱m hu nang gu nyia̱ a̱ni. Mat a̱nia wa gu na nfa̱k nyinyang ka̱ a̱ nyia̱ ta̱m hu shansham. A̱wot gu yok tyan ta̱m a̱pyia̱ nggu ma̱ng si̱ á̱ghyang á̱niet bah.

⁵A̱wot ku yet ta hwa, konyan ma̱ nzi̱t gu kyiak kyang nang gu nyia̱ a̱ni, a̱ kpa̱a̱t.

⁶A̱mgba̱m á̱niet nang á̱ tyiet ba A̱lyiat A̱gwaza na a̱ni, ku myim mba meang ba̱ beang á̱niet ba ba̱ tyiet ba a̱ni. Ba̱ ka̱u a̱mgba̱m á̱tsatsak nkyang mba wu dundung ma̱ng á̱niet ba̱ tyiet mba a̱ni.

⁷Nyi yok laai á̱pyia̱ nyin bah, á̱ mbyia̱ a̱tyu a̱ si̱ mi̱n shyok tsotswat A̱gwaza hu a̱ni bah. A̱tyu khap ni̱ chak yak nang gu chyui wa a̱ni.

⁸Ma̱nang a̱tyu khap ni̱ nchyui yak ma̱ a̱byin a̱ chak a̱ni, ma a̱nia wa á̱nietbishyi ba. A̱wot a̱tyu a̱ chyui da̱nian a̱ ka fa̱k nyinyang a̱ka̱tuk za̱kwa a̱ni, a̱ na chak a̱ bwui. Nggu wa yet a̱khwu ka. A̱wot a̱tyu a̱ chyui da̱nian A̱za̱za̱rak Ntswa a̱ ka fa̱k nyinyang gu a̱ni, a̱ na shya̱ swuan sang sangba̱p ji neet da̱ a̱vwuo A̱za̱za̱rak Ntswa a̱ni.

⁹Mat a̱nia, zi̱ yok van ma̱ng nyian á̱ghyang a̱tan nta̱m bah. Mat ka̱ zi̱ nti̱n fwuo bah, da̱ a̱cha̱chaat jen chak yak wu, zi̱ na shya̱ kpangti̱n gba̱mgbam.

¹⁰Mat a̱nia, kuzang jen ki̱ zi̱ shya̱ a̱wat, ku myim zi̱ nyia̱ a̱mgba̱m á̱niet ba a̱tan nta̱m. Á̱niet ba nang zi̱ na beang swak a̱ni, bibya yet á̱niet khwi Kristi ba[29].

¹¹Nyi nwuan, nyi li ntangka̱i a̱cha̱chet zwunzwuo nang n dyuut nyin a̱lyiat ngaan nani a̱ni. N dyuut nyin dyo ma̱ng bwak nung hwa.

¹²Sot á̱niet khwi A̱yahudawa a̱ja ba̱ chat á̱ tyei nyin mi̱ chen di̱ khwo hu a̱ni, ba̱ chat ba̱ tam ba̱ bu tak ma̱ng á̱ghyang á̱niet nang ba̱ ngyet a̱tan á̱niet bya. A̱wot ba̱ tyong á̱ du ya̱shuk baa, mat nang ba̱ ntyiet tazwa a̱team a̱khwu Yesu Kristi wu wa ma̱nyin gu, nang á̱ na nshya̱ san hu.

¹³A̱wot ku mba á̱niet ba nang á̱ ka̱n tyia̱ mi̱ chen hu. A̱wot ba̱ yong chi̱k á̱ tyiet huu, nyia̱ ku yet ta hwa á̱ tyia̱ konyan mi̱ chen a̱ni. Mba ma̱ á̱pyia̱ mba, ba̱ khwi a̱mgba̱m doká Musa ji bah. Mba, ba̱ chat wa á̱ tyei nyin mi̱ chen hu, da̱nian ba̱ ka tam nang nyi mmun á̱pyia̱ ma̱ng sot tyei mi̱ chen mba ji. A̱wot ba̱ chat kyiak nyin nang mman ta̱m mba a̱ni.[30]

¹⁴Nang a̱nung a̱ni, n si̱ mi̱ mak mi̱ mak n tam di̱ nkyang bah, ku ma̱ chunchwiit. Ki̱ n na tam, n na tam da̱ a̱team a̱khwu A̱tyoli nzi̱t wu Yesu Kristi wa ma̱ nyin gu. Mat a̱khwu Yesu kikya da̱ a̱team a̱khwu wu tyia̱ n si̱ nkhwu di̱ fwuong di̱dang nkyang swanta na. A̱wot swanta hu meang, si̱ kyiak nung nang kyang a̱ni bah.

¹⁵A̱lyiat doka tyia̱ mi̱ chen, ku nwai tyia̱ mi̱ chen, ku shyak kyang da̱ a̱vwuo nzi̱t bah. A̱tsatsak kyang wu wa yet, ka̱ á̱ ka̱n shyak a̱yin, ku li nang A̱gwaza mat gu a̱ka̱feang a̱ shya̱ swuan swai a̱ni.

¹⁶Yok A̱gwaza a̱ fa̱k kunak, a̱wot a̱ nwuak a̱mgba̱m á̱niet ba̱ khwi tyiet huni a̱ni swat nyinyang. N fa á̱niet ba̱ yet a̱tsatsak á̱niet khwi nang A̱gwaza khai a̱ni[31].

¹⁷Doot ma̱nini si̱ nat á̱zanson, a̱yin gu yok tyia̱ nung swuo a̱bung da̱ a̱lyiat nani bah. Mat nung gwa byia̱ nyinyan a̱fi̱fa̱t swuo a̱bung mi̱ vam nung hu. Jija tak kpa̱sai nang n gyet a̱tsak a̱khwo Yesu wa.[32]

¹⁸Nyin á̱niet khwi Yesu ba nang n chat a̱ni, yok A̱tyoli Yesu Kristi nzi̱t wu, a̱ nyia̱ nyin shok mi̱ fwuo nyin na. Samba̱rka!