Read tyap A̱fisawa 3 Bible Online

A̱fisawa 3 - tyap bible

A̱fisawa 3

¹Mat a̱nia, nung Bulut, kuzang jen nang n nyia̱ a̱di̱dam tazwa nkyang nani a̱ni,[7] nung nang á̱ ku tyia̱ mi̱ jaru mat Kristi Yesu, da̱nian n ka beang nyin, nyin nyi yet Nnwap na̱ nwai yet A̱yahudawa a̱ni.

²Nyi ya ngyok oo, n dyen nyi wa ka̱n fa̱k nkhang nang A̱gwaza nnwuak nung a̱tsatsak nta̱m n tyia̱ nyi shya̱ shok nggu ji; nyin nyi yet Nnwap na̱ nwai yet A̱yahudawa a̱ni.

³Ma̱nang n ku ntsa lyuut n si̱ nta̱gyit nyin dyo a̱ni, A̱gwaza ma̱ a̱pyia̱ nggu ku tyai nung kyang nang gu la̱p a̱ sak ku shya̱ di̱ niat a̱ni.

⁴Jen nang nyi nfang wusika jini nang n dyuut a̱ni, nyi na fi̱k mumwang nung hu di̱ la̱p sak ku shya̱ di̱ niat tazwa Kristi a̱ni.

⁵A̱gwaza ku tyai la̱p sak a̱hwa ku shya̱ di̱ niat a̱ni da̱ a̱vwuo á̱niet mi̱ nche na̱ ka̱n swak a̱ni bah. A̱wot ma̱ninika, di̱n vak A̱za̱za̱rak Ntswa nggu wu wa, nang gu ntyai nhu da̱ a̱vwuo á̱za̱za̱rak a̱yaata̱m Yesu ba ma̱ng a̱yaata̱m a̱kwonu A̱gwaza ba.

⁶La̱p sak ku shya̱ di̱ niat hu a̱ni, huhwa yet; Nnwap na̱ nwai yet A̱yahudawa a̱ni ma̱ng A̱yahudawa ba̱ nwuak a̱chuchuk da̱ A̱sham Nkhang Yesu Kristi ka a̱ni; ba̱ na ya zwá ji yet gado mman A̱gwaza a̱ni dundung. A̱mgba̱m mba, ba̱ yet nkap nia mi̱ vam Kristi Yesu hu. A̱wot a̱mgba̱m ba na shya̱ a̱li̱ba̱rka nang A̱gwaza ku nyia̱ a̱li̱ka̱uli a̱ na nang mba a̱ni, mat ba̱ mun á̱pyia̱ ma̱ng Kristi Yesu.

⁷A̱gwaza nyia̱ nung shok, a̱ si̱ nang nung a̱gba̱ndang chet nggu wu, a̱ si̱ nwuak nung a̱wat n gyet a̱khwo shei A̱sham Nkhang nggu ka.

⁸Ku nang n tyak kyang ma̱ á̱niet khwi A̱gwaza ba a̱ni bah, nung gwa A̱gwaza si̱ khai a̱ si̱ nyia̱ nung shok jini, n ka shei A̱sham Nkhang ma̱ng Nnwap na̱ nwai yet A̱yahudawa a̱ni, nang ba̱ na nshya̱ zwá gba̱mgbam ji̱ nwai tyiai da̱ a̱vwuo Kristi a̱ni.

⁹Á̱ ku khai nung n gwa̱i konyan ndyo, a̱ ka fi̱k la̱p sak ku shya̱ di̱ niat, nang A̱gwaza a̱ nyia̱ kuzang kyang la̱p a̱ sak neet mi̱ di̱ nyia̱ swanta hu a̱ni.

¹⁰A̱wot A̱gwaza la̱p a̱ sak a̱ nyia̱ ta̱m ma̱ng á̱niet khwi nggu bibya. A̱ ntak kpa̱sai mumwang nggu hu di̱ nvak ma̱ a̱di̱di̱t da̱ a̱vwuo a̱yaakwak a̱son a̱yaata̱m tswá, ma̱ng á̱ka̱tuk ntswá, ma̱ng ntyok na̱ shya̱ ma̱ a̱ka̱vwuo Ma A̱gwaza tswazwa nang á̱ nwai nwuan a̱ni.

¹¹A̱gwaza ku nyia̱ si̱ huni cha̱chaat ma̱ng kyang nang gu ku mi̱ nda̱p a̱ sak a̱ni. A̱wot huhwa sii bai da̱ a̱nu ka, mat Kristi Yesu A̱tyoli nzi̱t wu.

¹²Mun á̱pyia̱ nzi̱t hu ma̱ng Kristi, ma̱ng nwuak fwuo nzi̱t hu da̱ nggu, tyia̱ zi̱ byia̱ a̱wat ma̱ng gbang a̱lyia̱ zi̱ nat a̱zaghyi A̱gwaza ka ma̱ sa̱t ma̱ng fwuo nyiung.

¹³Mat a̱nia, n naai nyin nyi yok but mi̱ fwuo mat kuzang tangka̱i swuo a̱bung nang n swuo da̱nian nyin a̱ji a̱ni bah. Swuo a̱bung nung hu yet kyang ku na beang nyin wa a̱ni.[8]

¹⁴Mat a̱nia, kuzang jen nang n nyia̱ a̱di̱dam tazwa nkyang nani, n ni̱ kpaat a̱khwukhwut n naai A̱gwaza, a̱ yet A̱tyia̱ nzi̱t wu a̱ni[9];

¹⁵a̱tyu a̱ mat kuzang kyang ku shya̱ tswazwa ma̱ng swanta a̱ni.[10]

¹⁶N naai A̱gwaza gu nang nyin a̱li̱ba̱rka mami zwá a̱kyenkyai shi nggu ji, ji̱ nwai tyiai a̱ni; gu shim nyi shya̱ chet mi̱ nfwuo nyin na ku neet da̱ a̱vwuo A̱za̱za̱rak Ntswa a̱ni.

¹⁷Da̱nian Kristi gu ka shya̱ a̱vwuo nswat mi̱ fwuo nyin na, mat nwuak fwuo nyin hu da̱ nggu. N bu naai A̱gwaza gu tyia̱ nyi mbeang chet di̱ chat gu hu ma̱ng á̱ghyang nyin, nang a̱kwon ka̱ byia̱ á̱ni̱nan ba̱ nwuo ma̱ tsuung mi̱ chet a̱byin a̱ni, ku nang a̱li nang á̱ nok di̱ kuntyin ku byia̱ chet a̱ni.[11]

¹⁸Da̱nian a̱mgba̱m nyin á̱niet khwi A̱gwaza ba, nyi ka shya̱ chet nyi fi̱k si̱sak ji nang Kristi nchat nzi̱t a̱ni; a̱wot nyi bu fi̱k si̱sak nang chat gu hu nshi á̱kpai, shi a̱swap, shi a̱za, ma̱ng shi tsuung a̱ni.

¹⁹N naai nyi lyen si̱sak nang Kristi nchat zi̱t a̱ni, ku nang chat nggu hu nswuo chet a̱tyubishyi gu fi̱k hu shansham a̱ni. A̱jawa nyi na nshya̱ a̱jhyem za̱kwa A̱gwaza gba̱mgbam, ma̱ng chet ku neet da̱ a̱vwuo nggu a̱ni.

²⁰Ma̱ninika, yok a̱mgba̱m a̱kyenkyai shi a̱ yet si̱ A̱gwaza nzi̱t, nggu wa maai a̱ tyia̱ chet nggu hu ku nyia̱ ta̱m ma̱ nzi̱t. A̱ nyia̱ nkyang ma̱ a̱di̱di̱t na̱ swak si̱ na zi̱ naai nggu a̱ni, ku nkyang nang zi̱ nyia̱ a̱di̱dam a̱ na nyia̱ da̱nian zi̱t a̱ni.

²¹Yok a̱mgba̱m á̱niet khwi ba̱ nwuak A̱gwaza shi, ma̱ng Kristi Yesu, si̱ nat a̱mgba̱m kuzang che, ba̱ng si̱ nat sang sangba̱p! Samba̱rka!