Read tyap A̱fisawa 4 Bible Online

A̱fisawa 4 - tyap bible

A̱fisawa 4

¹Mat a̱nia, nung a̱tyu nang á̱ tyia̱ mi̱ jaru, mat n nyia̱ ta̱m A̱tyoli Yesu a̱ni, n naai nyin ma̱sa̱kut, nyi swan tangka̱i swat ku myim ma̱ng si̱sak nang A̱gwaza ngyorong nyin a̱ni.

²Kuzang jen, nyi ni̱ ghyuai á̱pyia̱ nyin. Nyi yet á̱niet nyia̱ shonshyon, nyi bu yet á̱niet nyap nfwuo ma̱ng á̱ghyang. Nyi yok ba̱ng á̱ghyang mi̱ nfwuo mat a̱bun nang nyi bwuo á̱ghyang nyin dyo a̱ni bah, mat nyi chat á̱ghyang nyin bya.

³Nyi ni̱ nkwan ba̱t ma̱ng a̱mgba̱m chet nyin hu, nyi yong di̱ mun á̱pyia̱ nyin hu nang A̱za̱za̱rak Ntswa wu nwuat nyin a̱ni, mat swat nyinyang ma̱ng á̱ghyang.

⁴Mat zi̱ yet vam nyiung hwa, zi̱ si̱ byia̱ A̱za̱za̱rak Ntswa a̱nyiung. Ma a̱nia wa, a̱mgba̱m zi̱t, zi̱ byia̱ tyia̱ fwuo nyiung nang A̱gwaza nyia̱ nzi̱t a̱li̱ka̱uli di̱n jen nang gu ku ngyorong nzi̱t a̱ni.

⁵Á̱ byia̱ A̱tyoli Yesu Kristi a̱nyiung, nwuak a̱chuchuk nyiung, ba̱ptisman jhyung,

⁶ma̱ng A̱gwaza a̱nyiung a̱ yet A̱tyia̱ a̱mgba̱m á̱nietbishyi ba a̱ni. Nggu wa yet A̱tyoli a̱mgba̱m á̱nietbishyi, a̱ si̱ bu nyia̱ ta̱m ma̱ a̱mgba̱m á̱nietbishyi, a̱ si̱ bu shya̱ mami a̱mgba̱m á̱nietbishyi.

⁷A̱wot konyan ma̱ nzi̱t, A̱za̱za̱rak Ntswa wu wa nang nggu za̱nang chet ma̱ cha̱chaat ma̱ng shok nang Kristi nang nggu a̱ni.

⁸Ma̱nang A̱lyiat A̱gwaza na nhyia̱ a̱ni, nyia̱, “Jen gu nnyeak a̱ nat da̱ a̱ka̱vwuo tswazwa a̱ni, a̱ si̱ yet a̱gwam nzwang a̱ khwat a̱son lang á̱kpa á̱niet nang gu ya̱baat a̱ni. A̱ si̱ bu ka̱u á̱niet nggu ba za̱náng chet.”[12]

⁹Yihwa nang á̱ fa, nang á̱ hyia̱ tazwa Kristi, “A̱ nyeak” a̱ni? Á̱ shei wa nyia̱, Kristi bu chyok a̱ bai mi̱ swanta nzi̱t hu![13]

¹⁰Ma a̱nia wa, Kristi a̱ chyok a̱ bai mi̱ swanta hu a̱ni, mi̱ nggu wa bu nyeak a̱ nat tswazwa ji swak kyai tswazwa hu a̱ni, da̱nian gu ka shya̱ koji, kyai tswazwa ma̱ng a̱byin.

¹¹Ma̱ninika, za̱náng chet jini ja nang Kristi nang á̱niet khwi nggu ba: Á̱ghyang a̱ nang mba za̱náng chet yet a̱yaata̱m, á̱ghyang a̱ si̱ nang mba yet a̱yaata̱m a̱kwonu A̱gwaza, á̱ghyang si̱ yet á̱niet shei A̱sham Nkhang ka da̱ a̱vwuo á̱niet nwai khwi Yesu, á̱ghyang si̱ yet á̱niet chok á̱niet khwi, a̱wot á̱ghyang si̱ yet á̱niet tyiet bya.[14]

¹²Kristi nyia̱ a̱nia, da̱nian a̱ ka jhyi á̱niet A̱gwaza ba, ba̱ nyia̱ gu ta̱m da̱nian á̱ ka nok á̱niet khwi ba̱ yet kidee vam nggu ji a̱ni.

¹³Da̱nian a̱mgba̱m nzi̱t, zi̱ ya a̱son zi̱ shya̱ mun á̱pyia̱ di̱ nwuak a̱chuchuk nzi̱t hu. Zi̱ mbeang lyen Yesu a̱ yet Nggwon A̱gwaza ka a̱ni. A̱jawa zi̱ na ngyet a̱yaatat á̱ghyi á̱niet khwi di̱ mun á̱pyia̱ ma̱ng Kristi. A̱wot zi̱ na tai za̱kwa Kristi a̱ yet a̱jhyem ma̱ng a̱tsatsak a̱ni.

¹⁴Ka̱ a̱nia wa, zi̱ bu yok nyia̱ nang a̱bachyuang mman na̱ nwai tat á̱ghyi a̱ni bah. Da̱ á̱niet tyiet bwoi a̱ka̱laa ba̱ na bwan nzi̱t ma̱ng kuzang tangka̱i tyiet fai bwoi a̱ka̱laa mba hu, nang wun ni̱ nhyap ja̱fi̱k a̱sa̱khwot ji a̱kibwan ndyo a̱ni bah. A̱wot di̱ tyiet á̱niet bwoi a̱ka̱laa hu si̱ mi̱n daai nzi̱t; zi̱ ghwon a̱tsatsak a̱lyiat wu, mat a̱ka̱laa ma̱ng mumwang mba hu, ku tai a̱tsatsak a̱lyiat a̱ni bah.

¹⁵Da̱ a̱kwonu a̱kya, zi̱ na shei a̱tsatsak a̱lyiat wu di̱ chat á̱ghyang, zi̱ laai mban di̱ kuzang vak, zi̱ tai za̱kwa Kristi ji, mat nggu wa yet a̱pyia̱ vam nggu ka, ku yet á̱niet khwi nggu ba a̱ni.

¹⁶Nggu wa mun a̱mgba̱m nkap nvam na, na̱ si̱ ngyet vam nyiung cha̱chaat. Mat beang kuzang a̱chi̱p hwa, tyia̱ a̱mgba̱m vam hu nswan ka̱nka̱ra̱ng. A̱wot kuzang kap si̱ nyia̱ a̱tsatsak ta̱m hu, vam hu si̱ laai á̱ mban di̱ chat á̱ghyang gba̱mgbam.

¹⁷N shei nyin, n si̱ ngyong chi̱k da̱ a̱lyiat nani, mami tyok a̱lyoot Kristi nyia̱: Nyi yok swan nang nnwap na̱ chyi A̱gwaza a̱ni bah, mat ba̱ yet á̱tai á̱niet ba̱ sang a̱di̱dam tswa a̱ni.

¹⁸Nfwuo mba na ni̱ byia̱ lyin. Ba̱ si̱ teap á̱ tyia̱ zan ba̱ si̱ ghwon swuan swai nang A̱gwaza nwuat a̱ni. Mat ba̱ yet á̱niet lak fwuong bya, a̱wot ba̱ si̱ byia̱ gba̱p a̱pyia̱.

¹⁹Ba̱ sang nsum, ba̱ si̱ swan swat shyuo nvam, ba̱ fwuong mi̱ di̱dang nyian kuzang tangka̱i a̱shi̱shi̱k nyia̱ nang a̱ka̱la̱m a̱ni. Si̱ a̱hwa tyei mba a̱na̱ndyung, a̱wot kuzang jen ba̱ ni̱ chat ba̱ ya a̱son mi̱ tangka̱i swat a̱hwa.

²⁰A̱wot tangka̱i nswat nang á̱ ku tyiet nyin tazwa Yesu Kristi a̱ni, huhwa a̱hwa bah.

²¹A̱tsak a̱lyiat, nyi ka̱n fa̱k nkhang Kristi na. A̱wot nyi si̱ myiam a̱chuchuk wu tazwa nggu.

²²Mat a̱chuchuk tyiet nang nyi shya̱ tazwa Kristi a̱ni, ku myim nyi ghwon a̱khwukhwop a̱ka̱tuk za̱kwa, ma̱ng a̱ka̱tuk swat nyin wu di̱n jen ji ji̱ swak a̱ni, ma̱ng a̱ka̱tuk nshyuo a̱ ku laai nyin a̱wot a̱ si̱ byian swat nyin hu a̱ni.

²³Da̱ a̱kwonu a̱kya, nyi yok A̱za̱za̱rak Ntswa wu a̱ shyak a̱di̱dam nyin wu ma̱ng swat nyin hu, ku tyia̱ fai.

²⁴Nyi nwuo swat za̱kwa swai nang A̱gwaza nyia̱ ji̱ si̱ tai nggu a̱ni. Nyi yet á̱tsatsak, á̱tsotswat ma̱ng á̱za̱za̱rak á̱niet.

²⁵Mat a̱nia, si̱ nyi yok bwoi a̱ka̱laa! Konyan ni̱ nhyia̱ ma̱ng a̱kpa̱ndang swat gu a̱tsak a̱lyiat, mat a̱mgba̱m nzi̱t, zi̱ yet nkap nvam nyiung nia.

²⁶A̱wot ma̱nang á̱ ndyuut a̱ni, “Ka̱ nyi mwai lyen, nyi yok ghwon ku tyia̱ nyin nyia̱ a̱ka̱tuk nyia̱ bah.”[15] Nyi yok ghwon mam ku kwa nang nyi ya a̱son ma̱ng mwai lyen bah.

²⁷Mat mwai lyen ni̱ nwuak A̱ta̱nyeang ka a̱wat, ka̱ tyia̱ nyin nyia̱ a̱ka̱tuk nyia̱.

²⁸A̱tyu a̱ yet a̱tang a̱ni, a̱ yok tsang ji. Da̱ a̱kwonu a̱kya, gu nyia̱ a̱tan nta̱m ma̱ng mbwak nggu na, gu ka shya̱ kyang nang gu na mbeang á̱niet ba̱ sang kyang a̱ni.

²⁹Nyi yok ghwon a̱lyiat a̱ka̱tuk a̱lyiat ma̱ng a̱ngai na̱ ghwut mi̱ nunu nyin hu bah, si̱ ma̱ a̱lyiat na̱ yet a̱tan na̱ na beang, a̱wot na̱ tyia̱ á̱niet ba̱ fwuong na a̱ni gba̱gbak.

³⁰Nyi ta̱bam kalak nyi du byian A̱za̱za̱rak Ntswa wu fwuo, mat swat nyin hu. Mat A̱za̱za̱rak Ntswa wu a̱ shya̱ ma̱ nyin a̱ni, nggu wa yet a̱timi a̱ tak nang nyi ngyet á̱niet A̱gwaza bya a̱ni. Nggu wa bu na tak nang nyi na nshya̱ san nyi yet á̱sa̱t á̱niet a̱tuk mam shi̱ri̱ya A̱gwaza ka.

³¹Nyi yok ba̱ng á̱ghyang mi̱ nfwuo, vwuot lyen, mwai lyen, a̱ngai, tyam á̱ghyang, ma̱ng kuzang tangka̱i a̱ka̱tuk nyia̱.

³²Da̱ a̱kwonu a̱kya, nyi nyia̱ á̱ghyang shok, nyi fwuong kunak á̱ghyang, nyi chi a̱bun á̱ghyang, ma̱nang A̱gwaza mami mun á̱pyia̱ ma̱ng Kristi nchi a̱ka̱tuk nyia̱ nyin wu a̱ni.