Read tyap A̱fisawa 6 Bible Online

A̱fisawa 6 - tyap bible

A̱fisawa 6

¹Nyin mman, ku yet ta hwa nyi khwi a̱lyiat á̱niet mbyin nyin na[20], mat nyi yet á̱niet khwi Kristi bya, a̱wot mat ta̱m huni yet a̱tan wa.

²Ma̱nang á̱ ndyuut a̱ni nyia̱, “Nwuak a̱tyia̱ ma̱ng a̱yang ang wu shi.” Mat doka jini ja yet a̱son ka nang á̱ nwuak ndung ma̱ng a̱li̱ka̱uli a̱ni.

³A̱wot si̱ huni hwa yet a̱li̱ka̱uli wu: Ka̱ a nwuak a̱tyia̱ ma̱ng a̱yang ang wu shi mi̱ swanta hu, “A na shya̱ a̱li̱ba̱rka gba̱mgbam, a̱wot a bu shya̱ a̱junjung swuan.”[21]

⁴A̱wot nyin a̱yaatyia̱, nyi yok tyia̱ mman nyin na na̱ fa̱k a̱lyia̱ ya, na̱ mwai lyen bah. Da̱ a̱kwonu a̱kya, nyi go mba shansham, nyi bu tyiet, nyi nyep ba di̱n vak nang Kristi chat a̱ni.

⁵Nyin á̱khwo ba, nyi ni̱ nkhwi a̱lyiat a̱yaatyoli nyin na ba̱ shya̱ mi̱ swanta hu a̱ni. Nyi nwuak ba shi ba̱t. Nyi ni̱ nyia̱ mba ta̱m mi̱ fwuo nyiung, ma̱nang Kristi wa nyi nyia̱ gu ndyo a̱ni.

⁶Nyi ni̱ ngyok nyia̱ ta̱m da̱nian nyi chat a̱yaatyoli nyin ba, ba̱ ka li ba̱ chyin nyin wa bah. Nang nyi ngyet á̱khwo Kristi bya a̱ni, nyi ni̱ ntyia̱ a̱lyia̱, nyi nyia̱ kyang nang A̱gwaza chat wa a̱ni.

⁷Nyi ni̱ ntyia̱ a̱lyia̱ ba̱t di̱ nyia̱ nta̱m nyin na, nang Kristi wa nyi nyia̱ gu ndyo a̱ni. Mat a̱tyubishyi wa nyi nyia̱ nggu ndyo bah.

⁸Nyi yok bwung bah; kuzang a̱tan nta̱m nang zi̱ nyia̱ a̱ni, A̱gwaza na tan konyan ma̱ nzi̱t zang; ku zi̱ yet á̱khwo bya, ku zi̱ yet á̱sa̱t á̱niet bya.

⁹A̱wot ma a̱nia wa, nyin a̱yaatyoli ba meang, ku yet ta hwa, nyi ni̱ nyia̱ á̱khwo nyin ba a̱tan. Nyi yok tyei mba a̱wun bah. Nyi jhyung nang a̱mgba̱m nyin nyi byia̱ A̱tyoli a̱nyiung wa; a̱ shya̱ Ma A̱gwaza tswazwa. Da̱ nggu, a̱ khai a̱yin da̱ á̱ghyi bah.

¹⁰Di̱ ngaan hu, nyi yong mi̱ chet da̱ A̱gwaza ma̱ng a̱gba̱ndang chet nggu wu.

¹¹Nyi ni̱ nkup a̱mgba̱m nkyang zwang nang A̱gwaza nwuak nyin, nyi nchok á̱pyia̱ nyin a̱ni. Da̱nian nyi ka shya̱ chet nyi yong, nyi kwan ma̱ng á̱ka̱tuk a̱ka̱shuk nang A̱ta̱nyeang ka vwuoi a̱ni.

¹²Mat á̱nietbishyi bya nang zi̱ kwan zwang ji ma̱ng a̱mba bah. A̱wot da̱ a̱kwonu a̱kya, zi̱ kwan zwang ji ma̱ng á̱ka̱tuk a̱yaakwak a̱son ma̱ng ntyok swanta na nang á̱ nwai nwuan a̱ni; ma̱ng á̱gwam ba̱ nyia̱ tyok swanta huni ku byia̱ lyin a̱ni; ma̱ng á̱ka̱tuk ntswá ba̱ shya̱ ma̱ a̱ka̱vwuo mi̱ kyai tswazwa a̱ni.

¹³Mat a̱nia, nyi ni̱ nkyiak a̱mgba̱m nkyang zwang na nang A̱gwaza nwuak nyin a̱ni. Nyi nkup á̱pyia̱ nyin, da̱nian nyi ka yong mi̱ chet a̱tuk a̱ka̱tuk mam a̱kya. A̱jawa, jen nang nyi na ntyak zwáng ji a̱ni, á̱ na shya̱ nyin nang nyi ni̱ yong mi̱ chet.

¹⁴Nyi ni̱ ngyong mi̱ chet, a̱wot nyi yok a̱chuchuk nyin wu a̱ li nang a̱zwuan nang nyi na nvwoi ndyang a̱ni. A̱wot yok tsotswat nyin hu, ku li nang nkubi ntswam nang nyi na kup nyi nnyia̱ zwang ji a̱ni.

¹⁵Ma̱nang a̱tyu nzwang ni̱ ntyia̱ á̱kwatak a̱ nat zwang a̱ni; ma a̱nia wa, nyi ta̱yuk da̱ A̱sham Nkhang ka̱ nwuat nyin swat nyinyang A̱gwaza a̱ni, nyi ka la̱p vam nyi kwan shansham.[22]

¹⁶Kang mi̱ si̱ a̱hwa, yok nwuak fwuo nyin hu da̱ A̱gwaza ku li nang a̱lyet nang zi̱ na ba̱ng zi̱ nfwun á̱pyia̱ nzi̱t, di̱n jen nang A̱ta̱nyeang ka na ntang nzi̱t ma̱ng a̱ka̱tuk nhyet mumwang nka wu a̱ni.

¹⁷Nyi ni̱ nkup bung ntswam ji, jija yet kidee shya̱ san. Nyi bu kyiak tswat A̱za̱za̱rak Ntswa nyi ba̱ng. Jija yet A̱lyiat A̱gwaza na.

¹⁸Nyi ni̱ nnaai A̱gwaza kuzang jen mami chet A̱za̱za̱rak Ntswa ma̱ng kuzang tangka̱i naai nyi chat beang. Nyi ni̱ nswan cham. A̱wot nyi yong mi̱ di̱ naai A̱gwaza kuzang jen, da̱nian a̱mgba̱m a̱za̱za̱rak á̱niet khwi ba ba̱ shya̱ koji a̱ni.

¹⁹Nung meang, nyi ni̱ nnaai A̱gwaza da̱nian nung. Nyi naai A̱gwaza gu nang nung a̱tsatsak swáng á̱lyiat nang n na ngbang a̱lyia̱, n gwa̱i á̱niet ba la̱p sak A̱gwaza ku shya̱ di̱ niat a̱ni. Huhwa yet A̱sham Nkhang Yesu, ka̱ mun a̱ yet a̱si̱ A̱yahudawa ma̱ng Nnwap na̱ nwai yet A̱yahudawa a̱ni.

²⁰Da̱nian shei A̱sham Nkhang kani kya nang n gyet á̱ghyi Kristi, ku nang n shya̱ di̱ la̱p ma̱ng a̱nyanyang mi̱ jaru a̱ni! Nyi ni̱ naai A̱gwaza da̱nian nung kuzang jen, n ka shei A̱sham Nkhang Kristi ka ma̱ng gbang a̱lyia̱ ku myim a̱ni.

²¹Tikikut, a̱ yet a̱na̱nyiuk nzi̱t wu nang zi̱ chat ba̱t mi̱ khwi Kristi a̱ni; nggu wa bu yet a̱tsotswat a̱tyu nta̱m a̱ beang nzi̱t mi̱ ta̱m A̱gwaza hu a̱ni. Nggu wa na tak ma̱ng a̱nyin kuzang kyang. Da̱nian nyi ka lyen swat nung hu a̱ji, ma̱ng ta̱m hu nang n nyia̱ a̱ni.

²²Da̱ a̱lyiat nani nia, nang n nta̱m Tikikut da̱ a̱vwuo nyin, a̱ ka tak nyin nyi lyen si̱sak ji nang swat nzi̱t hu a̱ji ndi a̱ni, a̱wot a̱ bu tyia̱ nyin gba̱gbak.

²³Nyin á̱niet khwi Yesu ba nang n chat a̱ni, yok A̱gwaza a̱ yet A̱tyia̱ ma̱ng A̱tyoli nzi̱t wu, Yesu Kristi, ba̱ nang nyin swat nyinyang; ba̱ tyia̱ nyin chat á̱ghyang; ba̱ bu tyia̱ nyi ya a̱son di̱ nwuak fwuo nyin hu.

²⁴Yok A̱gwaza a̱ fa̱k shok a̱mgba̱m á̱niet ba̱ chat A̱tyoli nzi̱t wu Yesu Kristi a̱ni, ba̱ng si̱ nat sang sangba̱p.