Read tyap A̱filibiyawa 1 Bible Online

A̱filibiyawa 1 - tyap bible

A̱filibiyawa 1

¹Nung Bulut, nung gwa n dyuut nyin wusika jini, n shya̱ ndung ma̱ng Timoti, zi̱ yet á̱khwo Kristi Yesu a̱ni. N dyuut wusika jini da̱nian n ka byiat a̱mgba̱m a̱za̱za̱rak sot á̱niet khwi A̱gwaza ba, ba̱ shya̱ ma̱ a̱keang Filibi, ba̱ mun á̱pyia̱ ma̱ng Kristi Yesu a̱ni; ma̱ng a̱yaakwak a̱son á̱niet khwi ba, mbeang á̱niet ba̱ beang nta̱m sot á̱niet khwi na a̱ni.

²Yok A̱gwaza a̱ yet A̱tyia̱ nzi̱t a̱ni, ma̱ng Yesu Kristi A̱tyoli nzi̱t wu, ba̱ fa̱k shok nyin, a̱wot ba̱ nang nyin swat nyinyang.

³Kuzang jen ki̱ n nyia̱ a̱di̱dam da̱ nyin, n ni̱ gwai A̱gwaza nung wu da̱nian nyin.

⁴Kuzang jen ki̱ n naai A̱gwaza, n ni̱ naai da̱nian a̱mgba̱m nyin, ma̱ng a̱lyia̱ sai.

⁵Mat nyi yet á̱kpa̱ndang ta̱m ndung ma̱ng a̱nung di̱ shei A̱sham Nkhang tazwa Kristi, neet di̱n jen nang nyi ku ntsa fa̱k A̱sham Nkhang ka a̱ni, ba̱ng ba̱ tat a̱fwun.

⁶A̱wot n nwuak a̱chuchuk, A̱gwaza a̱ tsa a̱ta̱n ta̱m mami nfwuo nyin na a̱ni, a̱ na ya a̱son ma̱ng ta̱m nggu hu, si̱ nang gu tyak hu a̱tuk nang Kristi Yesu na mbwuok a̱ bai a̱ni.

⁷Mat a̱nia, da̱ a̱vwuo nung, ku myim ba̱t nang n nyia̱ a̱di̱dam a̱nia tazwa nyin a̱ni, mat a̱mgba̱m nyin nyi shya̱ nung mi̱ fwuo. Nyi yet á̱kpa̱ndang nung bya di̱ shya̱ shok A̱gwaza, di̱n jen nang á̱ nda̱p nung ma̱ng a̱nyanyang á̱ si̱ tyia̱ nung mi̱ jaru; a̱wot di̱n jen nang n tyiet á̱niet ba a̱chuchuk tazwa A̱sham Nkhang Yesu ka, n bu ntak nang ka̱ ngyet a̱tsatsak wa a̱ni.

⁸A̱gwaza lyen si̱sak nang n chat nyin n si̱ bu nfa̱k da̱ nyin a̱ni ba̱t, ma̱nang Kristi Yesu nchat nyin a̱ni.

⁹N naai A̱gwaza gu tyia̱ nyi mban di̱ chat á̱ghyang nyin hu, a̱wot nyi mbeang ya a̱son ma̱ng mumwang lyen A̱gwaza hu.

¹⁰Mat a̱nia, n chat nyi fi̱k kyang hu ku swak mi̱ yet a̱tan a̱ni, da̱nian nyi ka swan a̱za̱za̱rak nswat ma̱ng sang a̱bun si̱ nat a̱tuk bwuok bai Kristi Yesu ka.

¹¹Ma̱nang a̱kwon ni̱ ntyia̱ sum a̱ni, ma a̱nia wa, yok shya̱ san nyin hu ku tyei nyi shya̱ a̱tsotswat za̱kwa, a̱ neet da̱ a̱vwuo Yesu Kristi a̱ni, da̱nian á̱ ka dyep A̱gwaza á̱ nwuak gu shi.

¹²Nyin á̱niet khwi Yesu ba nang n chat a̱ni, n chat nyi lyen swuo a̱bung ku shya̱ nung a̱ji a̱ni. A̱tsak a̱lyiat, ku tyia̱ á̱niet ma̱ a̱di̱di̱t si̱ fa̱k A̱sham Nkhang ka.

¹³Mat a̱mgba̱m á̱niet nzwang ba ba̱ chok a̱li a̱gwam shan A̱romawa ka a̱ni, ma̱ng á̱ghyang á̱niet a̱ji, ba̱ lyen nang n shya̱ mi̱ la̱p ma̱ a̱nyanyang mi̱ jaru ji, da̱nian shei A̱sham Nkhang Kristi kya.

¹⁴A̱wot nang á̱ nnyim nung mi̱ jaru ji a̱ni, ku tyia̱ á̱niet khwi A̱tyoli Kristi ma̱ a̱di̱di̱t a̱ji si̱ mbeang gbang a̱lyia̱ hu[1]. Ba̱ si̱ shei a̱lyiat A̱gwaza na ma̱ sa̱t, di̱ mi̱n fa̱k a̱wun.

¹⁵Ku yet a̱tsak a̱lyiat wa nang á̱ghyang á̱niet nshei A̱sham Nkhang Kristi ka ma̱ng kwi swam da̱ nung. A̱wot ba̱ si̱ nyia̱ na̱nvan ma̱ng a̱nung. A̱wot á̱ghyang á̱niet si̱ shei nkaa ma̱ng a̱tan a̱di̱dam wa.

¹⁶Á̱niet ba ba̱ shei a̱lyiat A̱gwaza na ma̱ng a̱tan a̱di̱dam a̱ni, ba̱ shei na wa mat ba̱ chat nung. Ba̱ lyen nang A̱gwaza wa nshim á̱ nyim nung mi̱ jaru ji, da̱nian n ka shya̱ a̱wat n tyiet á̱niet a̱chuchuk tazwa A̱sham Nkhang Kristi ka.

¹⁷Mba á̱niet a̱bya ba̱ shei A̱sham Nkhang Kristi ka di̱ ma̱ a̱tan a̱di̱dam a̱ni; ba̱ shei nka wa mat nang ba̱ nchat á̱pyia̱ mba a̱ni. Da̱ mba, ba̱ shei nkaa ma̱ng fwuo nyiung bah. A̱wot ba̱ byia̱ a̱di̱dam nang ba̱ na mbeang nung swuo a̱bung hu nang n swuo mi̱ jaru ji a̱ni.

¹⁸A̱mgba̱m ma̱ng a̱nia, ku shyak kyang bah! Ku a̱di̱dam mba wu yet a̱ka̱laa nia, ku a̱ ma ngyet a̱tsatsak wa, a̱gba̱ndang kyang wu wa yet; di̱ kuzang vak, á̱ shei A̱sham Nkhang Kristi ka. Mat a̱nia, n na gwai, n bu ngya a̱son ma̱ng a̱gwai.

¹⁹Mat n dyen ma̱nang nyi nnaai A̱gwaza da̱nian nung a̱ni, A̱za̱za̱rak Ntswa Yesu Kristi wu na beang nung, a̱ san nung[2] á̱ ti̱n nung mi̱ jaru ji[3].

²⁰Mat n tyia̱ fwuo ma̱ng di̱dang, n si̱ mba̱ng fwuo ba̱t, nang n si̱ mi̱n mak fa̱k nsum bah. A̱wot n na chat n gya a̱son ma̱ng gbang a̱lyia̱ di̱ shei A̱sham Nkhang tazwa Kristi, ma̱nang n ku nnyia̱ di̱n jen ji ji̱ swak a̱ni. A̱wot n nwuak a̱chuchuk tangka̱i swat nang n swan a̱ni, na nwuak Kristi shi, ku nang n shya̱ a̱chet, ku nang n ka̱n khwu.

²¹Da̱ a̱vwuo nung, ki̱ n shya̱ a̱chet, n shya̱ a̱chet da̱nian Yesu kya. A̱wot ki̱ n khwu, kikya na yet kpangti̱n nung ji a̱ swak.

²²A̱wot ki̱ n shya̱ a̱chet mi̱ vam huni, n na ngya a̱son mi̱ nyia̱ Kristi a̱tan nta̱m mi̱ swanta hu. Ma̱ng a̱nia, yihwa n na khai, a̱khwu kya kee, shya̱ a̱chet hwa? N dyen bah!

²³Ku vwuo nung a̱khwu n khai mi̱ nkyang nfeang nang n byia̱ di̱dang a̱ni: Nyiung hu, huhwa yet; n chat nat da̱ a̱vwuo Kristi. Huhwa lan nung ma̱ za̱nzan.

²⁴A̱wot feang hu, n bu chat n gya a̱son ma̱ng shya̱ a̱chet, da̱nian n ka beang nyin.

²⁵Nang ku ndi a̱nia a̱ni, n nwuak a̱chuchuk n na ngya a̱son ma̱ng shya̱ a̱chet, da̱nian n ka beang nyin nyi mbeang nwuak fwuo da̱ A̱gwaza; a̱wot nyi bu lyen tangka̱i a̱gwai nang nyi byia̱ di̱ nwuak fwuo da̱ nggu a̱ni.

²⁶A̱wot di̱dang nung huhwa yet; nyi na dyep Kristi Yesu ba̱t, di̱n jen nang nyi ndi gu bu mbwuok ma̱ng nung a̱ bai ndyo da̱ a̱vwuo nyin a̱ni.

²⁷Kyang ku yet a̱ swak a̱ni, ku yet ta hwa nyi swan nang á̱tsatsak mman a̱byin Ma A̱gwaza tswazwa a̱ni. Nyi swan swat ku myim A̱sham Nkhang Kristi ka a̱ni. A̱wot ka̱ nyi nyia̱ a̱nia, ki̱ n ba̱ mbai n di nyin, ku n ma nfa̱k nkhang nyin nia, n na ndyen nang nyi ngyong mi̱ chet dundung ma̱ng á̱ghyang, di̱ mun á̱pyia̱ ma̱ng la̱p sak nyiung. Nyi bu kwan, nyi ya a̱son ma̱ng tyiet a̱chuchuk tazwa A̱sham Nkhang ka.

²⁸Nyi yok fa̱k a̱wun á̱niet lak li nyin ba bah. Di̱ nwai fa̱k a̱wun hwa na tak ma̱ng a̱mba nang á̱ na mbwuk ma̱ng a̱mba, a̱wot nyin, nyi na shya̱ san. A̱gwaza wa na tyia̱ nkyang nani na̱ mbai da̱ a̱nu ka.

²⁹Mat A̱gwaza nyia̱ nyin shok di̱ nang nyin a̱wat nyi nwuak fwuo di̱ Yesu Kristi wa ma̱nyin gu bah; a̱wot nyi bu shya̱ a̱wat swuo a̱bung kya da̱nian gu meang.

³⁰Zi̱ shya̱ mi̱ hyai tangka̱i a̱yaat huni ndung. Nyi ku li nang n hyai tangka̱i a̱yaat huni di̱n jen ji ji̱ swak a̱ni. A̱wot nyi lyen nang n ni̱ shya̱ mami nka ba̱ng ba̱ tat a̱fwun.[4]