Read tyap A̱filibiyawa 2 Bible Online

A̱filibiyawa 2 - tyap bible

A̱filibiyawa 2

¹Mun á̱pyia̱ nyin hu ma̱ng Kristi tyia̱ nyin gba̱gbak. A̱wot nyi byia̱ shyim fwuo nang Kristi nchat nyin a̱ni. Nyi byia̱ mun á̱pyia̱ ndung mami A̱za̱za̱rak Ntswa. A̱wot nyi chat á̱ghyang bu tsa fwuong kunak á̱ghyang.

²Ka̱ a̱nia wa, n naai nyin, nyi tyia̱ nung n shya̱ a̱tsatsak a̱gwai. Nyi yok a̱di̱dam nyin wu a̱ yet kyang nyiung, nyi chat á̱ghyang, a̱wot nyi bu mun á̱pyia̱ ma̱ng la̱p sak nyiung.

³Nyi yok chat á̱pyia̱ nyi kyiak nang nyi ndan á̱ghyang á̱niet bah. Nyi bu yok nyia̱ mi̱ ta̱m nang nyin ma̱ng á̱ghyang á̱niet na ntam wa a̱ni bah. Da̱ a̱kwonu a̱kya, nyi ni̱ nghyuai á̱pyia̱ nyin, a̱wot konyan a̱ kyiak nang á̱ghyang á̱niet ndan nggu.

⁴Konyan ma̱ nyin gu ni̱ ngyok chat mi̱ kyang ku na myim nggu ma̱ nyin gu wa a̱ni bah. A̱wot da̱ a̱kwonu a̱kya, a̱ bu chat kyang ku na myim á̱ghyang á̱niet a̱ni meang.

⁵Yok nyi byia̱ tangka̱i za̱kwa[5] nang Yesu Kristi ku byia̱ a̱ni.

⁶Ku nang Kristi ma̱ a̱pyia̱ nggu ngyet A̱gwaza a̱ni, a̱mgba̱m ma̱ng a̱nia, a̱ du kyiak a̱pyia̱ nggu cha̱chaat ma̱ng A̱gwaza bah. A̱ si̱ kyiak yet A̱gwaza nggu hu ku yet gu a̱wat nang gu na mba̱ng gi̱ngi̱ng a̱ni bah.

⁷Da̱ a̱kwonu a̱kya, a̱ si̱ kai a̱wat shi yet A̱gwaza nggu ka a̱ ghwon.[6] A̱ si̱ ghyuai a̱pyia̱ nggu. A̱ si̱ bwuak a̱ tyia̱ a̱khwo. A̱wot á̱ si̱ byin nggu di̱ si̱sak nang á̱ ntyei á̱nietbishyi a̱ni. [7]Nang gu mbai mi̱ vam a̱tyubishyi a̱ni,

⁸a̱ si̱ ghyuai a̱pyia̱ gu, a̱ si̱ khwi kyang hu nang A̱gwaza chat a̱ni. A̱wot a̱ si̱ khwu nang a̱tyu a̱tsaai ni̱ nkhwu da̱ a̱team a̱khwu a̱ni!

⁹Mat a̱nia, A̱gwaza si̱ mbeang gu shi, a̱ si̱ sak gu da̱ a̱vwuo ka̱ swak ma̱ng shi a̱ni. A̱wot A̱gwaza si̱ nwuak gu a̱lyoot tyok ka̱ swak kuzang a̱lyoot ma̱ng shi a̱ni;[8]

¹⁰da̱nian kuzang a̱yin a̱ shya̱ Ma A̱gwaza tswazwa ma̱ng swanta, ma̱ng tafa a̱byin swanta ka a̱ni; a̱ ka kpaat a̱khwukhwut a̱zaghyi nggu.

¹¹A̱wot kuzang a̱yin na tak kpa̱sai nang Yesu Kristi wa ngyet A̱tyoli wu; mat a̱nia[9], a̱mgba̱m á̱niet ba na dyep A̱gwaza a̱ yet A̱tyia̱ wu a̱ni.

¹²Mat a̱nia, nyin á̱niet khwi Yesu ba nang n chat a̱ni, nyi ku khwi tyiet nung hu nchi̱ri̱ng di̱n jen nang n ku nshya̱ ndung ma̱ng a̱nyin a̱ni. Ma a̱nia wa ma̱ninika, nang n nwai shya̱ ma̱ng nyin a̱ni, ku yet a̱sham a̱ swak ki̱ nyi khwi tyiet nung hu. Nyi kwan nyi nyia̱ ta̱m ku tak nang nyi nshya̱ a̱jhyem san a̱ni. A̱wot nyi khwi A̱gwaza ma̱ng a̱wun ma̱ng nwuak a̱pyia̱ ba̱t.

¹³Mat A̱gwaza wa nyia̱ nta̱m na mi̱ nfwuo nyin na. Nggu wa nwuat nyin di̱dang ma̱ng chet nyia̱ nta̱m ku myim a̱tan la̱p sak nggu wu a̱ni.

¹⁴Kuzang ta̱m hwa nang nyi na nyia̱, nyi ni̱ ngyok kwop a̱dyii̱ng ma̱ng ya fwuang bah.

¹⁵Da̱nian nyi ka yet á̱za̱za̱rak ma̱ng á̱tsatsak mman A̱gwaza na̱ sang a̱bun nyi swan ma̱ a̱ka̱tuk swanta wuni ma̱ng á̱ka̱tuk á̱niet[10] ba a̱ni. Ku yet ta hwa, nyi sai nang fí̱tila a̱ni mi̱ swanta hu.

¹⁶Nyi ba̱ng a̱lyiat[11] na̱ nwuat swuan a̱ni gi̱ngi̱ng, da̱nian a̱tuk ka nang Kristi na mbwuok a̱ bai a̱ni, n ka ntam n bu ndyen nang n tyong a̱buk chung da̱ a̱vwuo nyin bah. A̱wot n ka ntam nang ta̱m nung hu ngyet á̱buk nta̱m wa mami nyin bah.

¹⁷Ka̱ a̱nia wa, n na nfa̱k fwuo sai, ku nang n na ndyin swuan nung ji, nang á̱ ni̱ nkoot za̱nang ji yet a̱sok a̱zaghyi A̱gwaza a̱ni. Za̱nang jini bu tai á̱tsotswat nta̱m nyin wu na̱ yet kidee za̱nang a̱zaghyi A̱gwaza a̱ni. A̱mgba̱m ma̱ng a̱nia, n chat a̱mgba̱m nyin nyi beang nung a̱gwai a̱nia.

¹⁸A̱tsak a̱lyiat, nyin meang ku yet ta hwa nyi gwai. A̱wot nung, n na gwai dundung ma̱ng a̱nyin.

¹⁹Ki̱ A̱tyoli Yesu shim, n ba̱ng fwuo n na ta̱m ma̱ng a̱nyin Timoti a̱nfaan, gu ka bai a̱ byiat nyin. A̱wot ka̱ a̱ hyia̱ ma̱ng a̱nung nkhang nyin na, n na nfa̱k nyinyang di̱ si̱sak nang nyi nswan a̱ni.

²⁰Á̱ bu mbyia̱ a̱yin ndung ma̱ng a̱nung a̱ji nang Timoti a̱ni bah. Nggu wa byia̱ á̱tsatsak a̱di̱dam chat beang tazwa swat nyin hu.

²¹A̱wot á̱kum á̱niet ka, konyan ma̱ mba nyia̱ a̱di̱dam tazwa ya a̱son a̱pyia̱ nggu kya. Da̱ mba, ba̱ chat si̱sak nang ba̱ na nnyia̱ nkyang na nang Yesu Kristi chat a̱ni bah.

²²A̱wot nyin ma̱ á̱pyia̱ nyin, nyi wa ka̱n dyen nang Timoti wa ka̱n tak nang gu ngyet a̱tsotswat wa. A̱ li ma̱ng a̱nung nang nggwon ma̱ng a̱tyia̱ nka a̱ni. A̱ ka̱n nyia̱ ta̱m shei A̱sham Nkhang Yesu ka dundung ma̱ng a̱nung.

²³Huhwa mbyia̱, jen nang n dyen kyang ku na shya̱ nung a̱ji a̱ni, n ba̱ng fwuo n na ta̱m gu da̱ a̱vwuo nyin a̱nfaan.

²⁴A̱wot nung n nwuak a̱chuchuk nang A̱gwaza na nshim nung ma̱ a̱pyia̱ nung, n na mbai n byiat nyin a̱nfaan.

²⁵A̱wot ma̱ninika, n dam n di ku myim n bu nta̱m ma̱ng a̱nyin A̱bafa̱ratut a̱ bwuok a̱ bai da̱ a̱vwuo nyin. A̱ yet a̱tsatsak a̱na̱nyiuk nzi̱t wa mi̱ khwi Kristi hu. A̱ si̱ bu yet a̱kpa̱ndang ta̱m, a̱ li nang a̱tyu nzwang a̱ni di̱ shei A̱sham Nkhang Kristi ka dundung ma̱ng a̱nung. A̱wot a̱ ku yet a̱ta̱m nyin wa nang nyi ku ta̱m gu ka beang nung di̱ kyang nang n chat a̱ni.

²⁶N na ta̱m gu da̱ a̱vwuo nyin mat a̱ fwuong di̱dang li nyin a̱mgba̱m. A̱wot a̱ si̱ byia̱ a̱fi̱fa ba̱t, mat a̱ lyen nyi ka̱n fa̱k nkhang zwan nggu na.

²⁷A̱tsak a̱lyiat, a̱ ku nyia̱ ma̱ng zwan ba̱t á ngyei a̱ na khwu. A̱wot A̱gwaza si̱ fa̱k kunak gu, ma̱ng a̱nung meang, kalak swuo a̱bung nung hu ku swak si̱sak nang n swuo a̱bung ka ma̱nini a̱ni.

²⁸Mat a̱nia, n byia̱ di̱dang ba̱t, n bu nta̱m nggu gu bwuok a̱ bai da̱ a̱vwuo nyin, da̱nian nyi ka gwai di̱n jen ji nyi bu ndi nggu a̱ni. A̱wot n bu na nyia̱ a̱ka̱tuk a̱fi̱fa tazwa nyin bah.

²⁹Nyi san gu mbwak nfeang ma̱ng a̱gba̱ndang a̱gwai mami chat ku yet si̱ á̱niet khwi A̱tyoli Yesu a̱ni. A̱wot nyi bu nwuak tangka̱i á̱niet nang nggu a̱ni shi.

³⁰Mat a̱ ku nwuak swuan nggu ji a̱ si̱ shim a̱khwu da̱nian ta̱m Kristi. A̱wot a̱ si̱ beang nung a̱kwonu nyin nang nyin bya myim nyi beang nung a̱ni, ki̱ nyi wa shya̱ kpa̱mkpaan a̱ji.