Read tyap A̱filibiyawa 3 Bible Online

A̱filibiyawa 3 - tyap bible

A̱filibiyawa 3

¹Di̱ ngaan hu[12], nyin á̱niet khwi Yesu ba nang n chat a̱ni, n chat nyi gwai A̱gwaza wu! N si̱ mi̱n mak van di̱ lyuut nyin a̱lyiat nang n ku nshei nyin di̱n jen jhyang a̱ni bah. N ku nyia̱ a̱nia, da̱nian n ka chok nyin kalak nyi kwa di̱ nwuak a̱chuchuk nyin hu.

²Nyi ta̱bam ma̱ng á̱ka̱tuk á̱niet a̱bya ba̱ li nang a̱ka̱bwu a̱yit a̱ni. Bibya yet á̱niet fak nvam. Ba̱ yong nyia̱, ku yet ta hwa á̱ tyei nyin mi̱ chen nyi ka shya̱ san a̱ni.

³Mat nzi̱t á̱niet zi̱ dyep A̱gwaza mami A̱za̱za̱rak Ntswa a̱ni, nzi̱t bya yet á̱tsatsak á̱niet A̱gwaza nang á̱ tyei mi̱ chen mami fwuo a̱ni. Zi̱ ta̱yuk di̱ nta̱m nang Kristi Yesu nyia̱ nzi̱t ndyo wa a̱ni. Da̱ nzi̱t, zi̱ tyia̱ fwuo di̱ nta̱m vam a̱tyubishyi bah.

⁴Ka̱ a̱yin fa nyia̱ a̱ ta̱yuk di̱ nta̱m nvam a̱tyubishyi nia, nung meang ki̱ n doot n ta̱yuk di̱ ntangka̱i nta̱m a̱nia. A̱tsak a̱lyiat, ka̱ a̱yin fa a̱ byia̱ nta̱m vam a̱tyubishyi nang gu ntam a̱ni, nung n byia̱ na ndan nggu.

⁵Kidee, jija yet, á̱ ku tyia̱ nung mi̱ chen a̱tuk mam a̱ni̱nai di̱ mbyin. N gyet a̱tsatsak nggwon a̱byin Isi̱rela wa neet mi̱ kwai Benyamin. Ka̱ á̱ mbyia̱ á̱niet ba̱ yet á̱tsatsak á̱niet Ibriniyawa a̱ni, nung n ngyet a̱tyo nyiung wa! N ku ngyet a̱tyo nyiung mi̱ sot A̱fa̱risawa ji, ba̱ ni̱ tyiet ba̱ khwi doka A̱yahudawa ji cha̱chaat a̱ni.

⁶N ku ntyia̱ a̱lyia̱ ba̱t di̱ khwi doka ma̱ng taada A̱yahudawa ji cha̱chaat. Mat a̱nia, n sii ya̱shuk susot á̱niet khwi Kristi ji da̱ a̱ka̱kpa̱t. A̱wot tazwa khwi doka ji tsotswat, n si̱ mbyia̱ a̱bun bah.

⁷N ku nfa di̱n jen a̱ja, n na shya̱ kpangti̱n di̱ nkyang nani. A̱wot ma̱ninika, n kyiak na na̱ yet á̱buk nkyang wa, mat nta̱m nang Kristi nyia̱ nung ndyo a̱ni.

⁸A̱tsak a̱lyiat, n kyiak kuzang kyang nang n dyin a̱ni, ku yet a̱buk kyang wa; ka̱ n tyan nhu ma̱ng a̱gba̱ndang kpangti̱n nang n shya̱ di̱ lyen Yesu Kristi, A̱tyoli nung wu a̱ni. Da̱nian khwi Kristi hwa, nang n ji̱p kuzang kyang. N si̱ kyiak kuzang kyang nang a̱tong a̱ni, da̱nian n ka nkhwi Kristi mi̱ swat nung hu,

⁹a̱wot n ka shya̱ mun a̱pyia̱ ma̱ng a̱nggu. N ta̱yuk di̱ khwi doka ji, ji̱ ka tyia̱ nung yet a̱tsotswat a̱zaghyi A̱gwaza bah. Da̱ a̱kwonu a̱kya, A̱gwaza kyiak nung n gyet a̱tsotswat a̱zaghyi nggu, mat n nwuak fwuo di̱ Yesu Kristi wa. Mat vak hu nang A̱gwaza na ntyia̱ zi̱ ngyet á̱tsotswat a̱zaghyi nggu a̱ni, huhwa yet nwuak fwuo di̱ Yesu.

¹⁰Kyang nang n chat n dyen swak a̱ni, huhwa yet; n dyen Kristi ma̱ a̱pyia̱ nggu ma̱ng chet nang gu ndoot ma̱ng swuan ma̱ á̱niet ba̱ ka̱n kwi a̱ni. N chat n dyen nggu; n bu mun a̱pyia̱ ma̱ng a̱nggu mami swuo a̱bung nggu hu; n bu ntai nggu di̱ si̱sak ji nang gu nkhwu a̱ni.

¹¹Da̱nian ku di̱ ku li ni wa, n ka tai nggu n bu ndoot ma̱ng swuan ma̱ á̱niet ba̱ ka̱n kwi a̱ni!

¹²N fa n wa ka̱n shya̱ nkyang nani nang n chat wa a̱ni bah,[13] ku á̱ ka̱n tyia̱ n gyet a̱tsatsak a̱yin da̱ a̱ lyin kyang a̱ni bah. Da̱ a̱kwonu a̱kya, n kwan wa ba̱t n gya a̱son n ka ntai Kristi Yesu; huhwa yet jat nang gu nkhai nung a̱ni.

¹³Nyin á̱niet khwi Yesu ba nang n chat a̱ni, a̱tsak a̱lyiat, n ka̱n tat gak hu bah. A̱wot kyang nyiung hwa nang n tyia̱ á̱ghyi ba a̱zanson: N bwung kyang ku ka̱n swak a̱ni. A̱wot n kwan ba̱t n tyia̱ á̱ghyi n tat gak hu ku shya̱ a̱zanson nung a̱ni,

¹⁴huhwa yet; n kwan wa ba̱t n gya a̱son n ka ntat gak hu, n ka shya̱ a̱gba̱ndang zang. Jija yet yorong hu nang A̱gwaza yorong nung tswazwa, mat Kristi Yesu a̱ni.

¹⁵A̱mgba̱m nzi̱t zi̱ ka̱n tat a̱ghyi mi̱ khwi Kristi hu a̱ni, si̱ zi̱ shim nkyang nani ma̱ng fwuo nyiung. A̱wot ka̱ a̱yin ma̱ nyin ma byia̱ kyang ku vwuon ma̱ng si̱ huni a̱ni, n nwuak a̱chuchuk A̱gwaza na tyai nggu hu kpa̱sai.

¹⁶A̱wot ku yet ta hwa, zi̱ yong chi̱k di̱ kyang nang A̱gwaza ka̱n tak nzi̱t a̱ni.

¹⁷Nyin á̱niet khwi Yesu ba nang n chat a̱ni, nyi maat swat nung hu. A̱wot nyi myiam da̱ a̱vwuo á̱niet ba̱ khwi kidee swat nzi̱t ji a̱ni.

¹⁸Mat n ku mi̱ nshei nyin a̱lyiat nani di̱n jen jhyang. A̱wot n bu shei nyin naa ma̱ng ndang a̱ghyi, nang á̱ghyang á̱niet ba̱ swan tangka̱i nswat ku tak nang ba̱ ngyet á̱ka̱tuk á̱niet lak li a̱team a̱khwu Kristi bya a̱ni.

¹⁹Di̱ ngaan hu, A̱gwaza na bwuk ma̱ng a̱mba. Mat a̱gwaza mba wu yet shyuo nvam ja. Ba̱ tam di̱ nyian nkyang nsum. Kuzang a̱di̱dam nang ba̱ nyia̱ a̱ni, yet a̱si̱ fwuong di̱dang nkyang swanta nani nia.

²⁰A̱wot nzi̱t, da̱ a̱kwonu a̱kya, zi̱ yet mman a̱byin Ma A̱gwaza tswazwa nia; a̱vwuo ka nang A̱tyoli nzi̱t wu Yesu Kristi nshya̱ a̱ni. A̱wot zi̱ fwuong di̱dang bwuok bai nggu hu; nggu a̱ yet A̱tyusan nzi̱t wu a̱ni.

²¹Kristi na shyak á̱bobwot nvam nzi̱t nani na̱ tyiai a̱ni, a̱ tyia̱ na na̱ tai vam a̱kyenkyai shi nggu hu. A̱ na nyia̱ si̱ huni mat chet nang gu byia̱ a̱ nnyia̱ tyok tazwa a̱mgba̱m kuzang kyang a̱ni.