Read tyap A̱kolosiyawa 1 Bible Online

A̱kolosiyawa 1 - tyap bible

A̱kolosiyawa 1

¹Nung Bulut, nung gwa n dyuut nyin wusika jini. Nung, nang á̱ khai mami shim A̱gwaza n gyet a̱ta̱m Yesu Kristi; n shya̱ ndung ma̱ng Timoti, a̱ yet a̱na̱nyiuk nzi̱t mi̱ khwi Kristi a̱ni.

²Zi̱ lyuut wusika jini naat ndyo da̱ a̱vwuo nyin á̱za̱za̱rak á̱niet khwi A̱gwaza bya; ba̱ yet á̱tsotswat á̱na̱nyiuk di̱ mun á̱pyia̱ ma̱ng Kristi, ba̱ shya̱ ma̱ a̱keang Kolosi a̱ni. Yok A̱gwaza a̱ yet A̱tyia̱ nzi̱t wu a̱ni, a̱ fa̱k shok nyin, a̱wot a̱ nang nyin swat nyinyang.

³Ku zang jen zi̱ ni̱ naai da̱nian nyin, zi̱ bu gwai A̱gwaza a̱ yet A̱tyia̱ A̱tyoli Yesu Kristi a̱ni.

⁴Mat zi̱ ka̱n fa̱k si̱sak nang nyi nnwuak fwuo di̱ Kristi Yesu; ma̱ng si̱sak nang nyi nchat a̱mgba̱m á̱niet khwi A̱gwaza ba a̱ni.

⁵Nwuak fwuo nyin hu ma̱ng chat á̱ghyang nyin hu tak nang nyi ntyia̱ fwuo di̱n zwá nang A̱gwaza sak nyin dyo a̱mali nggu ka tswazwa a̱ni. Nyi ku mi̱ ntyia̱ fwuo di̱ si̱ huni neet di̱n jen nang nyi ku ntsa fa̱k a̱chuchuk a̱lyiat wu, a̱ yet A̱sham Nkhang ka a̱ni.

⁶A̱sham Nkhang kani nang á̱ shei nyin a̱ni, á̱niet ma̱ a̱di̱di̱t mi̱ swanta hu ka̱n fa̱k, ba̱ si̱ nwuak a̱chuchuk da̱ nka. A̱sham Nkhang kani laai á̱ mban mi̱ nfwuo á̱niet na koji. Ka̱ ni̱ shai swat mba hu nang a̱kwon ni̱ ntyei sum ka̱ laai á̱ mban, mat chet nang ka̱ byia̱ a̱ni. Ma a̱nia wa, nang ka̱ ku nshai a̱ka̱tuk nswat nyin wu di̱n jen nang nyi ku ntsa fa̱k, nyi si̱ fi̱k a̱tsatsak a̱lyiat tazwa a̱gba̱ndang shok A̱gwaza wu a̱ni[1].

⁷Nyi wa ka̱n myiam A̱sham Nkhang ka da̱ a̱vwuo A̱bafa̱rat, a̱ yet a̱tsatsak a̱kpa̱ndang ta̱m nzi̱t nang zi̱ chat a̱ni. Nggu wa yet a̱tsotswat a̱khwo Kristi wu. A̱wot a̱ shei nyin A̱sham Nkhang ka da̱ a̱kwonu nzi̱t.

⁸A̱bafa̱rat ka̱n hyia̱ ma̱ng a̱nzi̱t si̱sak nang A̱za̱za̱rak Ntswa wu ntyei nyin chat á̱niet khwi A̱gwaza ba a̱ni.

⁹Mat a̱nia, neet a̱tuk nang zi̱ ku ntsa fa̱k nkhang nani tazwa nyin a̱ni, zi̱ ni̱ naai A̱gwaza da̱nian nyin kuzang jen. Zi̱ naai A̱gwaza gu tyia̱ nyi lyen kyang hu nang gu chat a̱ni shansham. A̱wot gu nang nyin mumwang A̱za̱za̱rak Ntswa ma̱ng si̱sak ji nang nyi na nfi̱k kuzang kyang ku yet si̱ A̱gwaza a̱ni.

¹⁰A̱nia wa, nyi na nswan swat ku na nwuak A̱gwaza shi, a̱wot ku myim nggu kuzang jen a̱ni. Nyi bu nyia̱ kuzang tangka̱i a̱tan nta̱m. Nyi bu mban lyen A̱gwaza hu shansham ba̱t, kuzang jen.

¹¹Zi̱ bu naai A̱gwaza gu ka nang nyin chet gba̱mgbam ku neet mi̱ a̱gba̱ndang chet nggu wu a̱ni; da̱nian nyi ka gbang a̱lyia̱ mami swuo a̱bung, nyi ni̱ nyeap nfwuo nyin na ma̱ng a̱lyia̱ a̱sai gba̱mgbam.

¹²Nyi bu ni̱ ngyong mi̱ di̱ gwai A̱gwaza a̱ yet A̱tyia̱ a̱ni. Mat, nggu wa tyia̱ nyi si̱ maai nyi mun ya gado ku yet a̱kwonu á̱niet khwi A̱gwaza, ba̱ swan ma̱ a̱sai tyok wu a̱ni.

¹³Mat nggu wa san nzi̱t mbwak tyok A̱ta̱nyeang ku yet lyin a̱ni. A̱wot a̱ si̱ shyak nzi̱t a̱ tyia̱ mi̱ Tyok ku yet si̱ Nggwon nggu, nang gu chat a̱ni.

¹⁴Nggwon kikya nwuak a̱pyia̱ nka ka̱ si̱ nsan nzi̱t, zi̱ ka yet á̱sa̱t á̱niet,[2] a̱wot ka̱ si̱ chi a̱ka̱tuk nyia̱ nzi̱t wu.

¹⁵Kristi tyia̱ a̱tyubishyi nang á̱ nwuan a̱ni. A̱ si̱ tyai A̱gwaza nang á̱ nwai nwuan ma̱ng á̱ghyi a̱ni kpa̱sai. A̱ ku nshya̱ neet nang á̱ ka̱n mat kyang mi̱ swanta hu bah. A̱wot a̱ byia̱ a̱tsatsak a̱gba̱ndang tyok tazwa a̱mgba̱m kuzang kyang nang á̱ mat mi̱ swanta hu a̱ni[3].

¹⁶Mat nggu wa yet vak hu nang A̱gwaza mmat kuzang kyang ku shya̱ tswazwa ma̱ng a̱byin a̱ni. Nggu wa nyia̱ nkyang nang zi̱ nwuan a̱ni, ma̱ng si̱ nang zi̱ nwai nwuan a̱ni; kidee: a̱cha̱chet chuchuk tyok, lyulyoot ntyok, a̱yaakwak a̱son, ma̱ng ntyok; bibya yet a̱yaata̱m tswá nang á̱ nwai nwuan a̱ni. A̱mgba̱m nkyang nang á̱ mat mi̱ swanta hu a̱ni, A̱gwaza wa tyia̱ Kristi si̱ nyia̱ na; a̱wot kuzang kyang nshya̱, da̱nian ku ka nwuak gu shi.

¹⁷A̱ nshya̱ neet nang á̱ ka̱n nyia̱ kuzang kyang bah. A̱wot nggu wa ba̱ng a̱mgba̱m nkyang na dundung nang á̱ mat mi̱ swanta hu a̱ni.

¹⁸Kristi wa bu yet a̱pyia̱ á̱niet khwi ka; á̱niet khwi bibya si̱ yet vam nggu hu. Nggu wa yet a̱tyin ka̱ nwuat ba swuan,[4] a̱ byia̱ tyok a̱ swak a̱mgba̱m á̱niet ba̱ doot ma̱ng swuan ma̱ á̱niet ba̱ ka̱n kwi a̱ni.[5] Da̱nian A̱gwaza a̱ ka tyia̱ Kristi a̱ yet a̱tsatsak a̱gba̱ndang a̱kwak a̱son tazwa kuzang kyang.

¹⁹Mat a̱mgba̱m shim A̱gwaza hwa nang gu ntyai a̱mgba̱m za̱kwa nggu ji mami vam Kristi.

²⁰A̱wot A̱gwaza si̱ jhyi a̱mgba̱m nkyang mi̱ swanta na na̱ bwuok na̱ nyia̱ kpa̱ndang ma̱ng a̱nggu. A̱gwaza wu si̱ tyia̱ kuzang kyang si̱ shya̱ swat nyinyang tswazwa ma̱ng a̱byin, mat nang Kristi nnwuak a̱sok nggu na da̱ a̱team a̱khwu a̱ni.

²¹Di̱n jen ji ji̱ swak a̱ni, nyin Nnwap na̱ nwai yet A̱yahudawa a̱ni, nyi ku shya̱ gbang ma̱ng A̱gwaza. Nyi si̱ yet á̱niet lak li nggu bya. A̱wot nyi si̱ shya̱ kankang ma̱ng a̱nggu, mat a̱ka̱tuk a̱di̱dam ma̱ng a̱ka̱tuk nta̱m nyin wu.

²²A̱wot ma̱ninika, A̱gwaza jhyi swat nyin hu nyi si̱ tyia̱ á̱kpa̱ndang nggu. Mat, Kristi ku khwu nang a̱tyubishyi a̱ni da̱ a̱team a̱khwu. A̱gwaza ku nyia̱ a̱nia, da̱nian a̱ ka bai ma̱ng a̱nyin nyi yong a̱zaghyi nggu nang á̱za̱za̱rak á̱niet ba̱ sang a̱bun, nang á̱ si̱ mi̱n mbat mba a̱bun a̱ni bah.

²³A̱wot ku yet ta hwa, nyi ya a̱son di̱ nwuak a̱chuchuk nyin hu nang á̱ kpaat di̱ kuntyin ku yet a̱tsatsak a̱lyiat wu a̱ni. A̱wot nyi ba̱ng nggu gi̱ngi̱ng. Nyi yok shim a̱yin a̱ tyia̱ nyi teap nyi ghwon tyia̱ fwuo hu nang A̱gwaza nyia̱ a̱li̱ka̱uli ma̱ A̱sham Nkhang ka a̱ni bah. Da̱ A̱sham Nkhang kani kya nang á̱ nkhai nung Bulut n gyet a̱khwo A̱gwaza wu. A̱wot n shei nka da̱ a̱vwuo á̱niet ma̱ a̱di̱di̱t, mi̱ kuzang a̱vwuo mi̱ swanta hu. A̱sham Nkhang kani kya nang nyi wa ka̱n fa̱k.

²⁴A̱wot ma̱ninika, n gwai n swuo a̱bung da̱ a̱mgba̱m nkyang nang Kristi chat n swuo a̱bung da̱nian nggu a̱ni. A̱wot n gya a̱son ma̱ng swuo a̱bung huni mi̱ vam nung hu, da̱nian n ka beang vam nggu hu; huhwa yet á̱niet khwi nggu ba.

²⁵A̱gwaza wa ku khai nung n nyia̱ á̱niet khwi nggu ba ta̱m, mat n ka ngwa̱i a̱jhyem A̱sham Nkhang wu da̱ a̱vwuo nyin.

²⁶La̱p sak nang A̱sham Nkhang kani byia̱ a̱ni, ku shya̱ di̱ niat neet mi̱ ndyia̱ chyi ma̱ng nche ma̱ a̱di̱di̱t na̱ swak a̱ni. A̱wot ma̱ninika, á̱ tyai nhu kpa̱sai da̱ a̱vwuo a̱za̱za̱rak á̱niet khwi A̱gwaza.

²⁷Mat A̱gwaza tyai á̱niet nggu ba si̱sak nang gu mbyia̱ a̱tsatsak la̱p sak da̱nian a̱mgba̱m nnwap mi̱ bibyin swanta hu a̱ni. A̱wot a̱ tyai á̱niet nggu ba ba̱ lyen la̱p sak ku shya̱ di̱ niat a̱ni. Huhwa yet; tangka̱i zwá ma̱ng a̱kyenkyai shi nang Kristi byia̱ a̱ni, mun a̱ yet si̱ a̱mgba̱m nnwap mi̱ bibyin swanta hu hwa. A̱wot la̱p sak hu ku shya̱ di̱ niat a̱ni, huhwa hu; Kristi mun a̱pyia̱ ma̱ng a̱nyin Nnwap na̱ nwai yet A̱yahudawa a̱ni. A̱wot si̱ huni tyia̱ nyin, nyi tyia̱ fwuo nyi shya̱ a̱kwonu nyin ma̱ a̱kyenkyai shi nggu wu.

²⁸Mat a̱nia, zi̱ shei konyan A̱sham Nkhang Kristi ka. Zi̱ si̱ gba, zi̱ si̱ bu tyiet konyan, ma̱ng a̱mgba̱m mumwang hu nang A̱gwaza nang nzi̱t a̱ni. Da̱nian zi̱ ka neap konyan nang a̱ tat á̱ghyi[6] a̱tyu khwi a̱ni da̱ a̱vwuo A̱gwaza, di̱ mun á̱pyia̱ nggu hu ndung ma̱ng Kristi Yesu.

²⁹Huhwa mbyia̱, n si̱ nta̱yuk da̱ a̱gba̱ndang chet Kristi wu, a̱ nyia̱ ta̱m ma̱ nung a̱ni. N si̱ nkwan n si̱ nyia̱ ta̱m shei A̱sham Nkhang hu ba̱t.