Read tyap A̱kolosiyawa 4 Bible Online

A̱kolosiyawa 4 - tyap bible

A̱kolosiyawa 4

¹Nyin a̱yaatyoli nyi byia̱ á̱khwo a̱ni, nyi ni̱ nnyia̱ mba tsotswat. A̱wot nyi tan mba zang ji myim a̱ni. Nyin a̱yaatyoli meang, nyi yok bwung bah; nyi byia̱ A̱tyoli a̱ shya̱ Ma A̱gwaza tswazwa a̱ni.

²Nyi ntyia̱ a̱lyia̱ di̱ naai A̱gwaza, nyi yok but mi̱ fwuo bah. A̱wot nyi ni̱ ntyia̱ fwuo di̱ kyang nang nyi naai a̱ni. A̱wot nyi gwai A̱gwaza mi̱ nfwuo nyin na.

³Nyi ni̱ nnaai A̱gwaza da̱nian nzi̱t meang, da̱nian gu ka nwuak nzi̱t a̱ka̱wat nang zi̱ na nshei la̱p sak nggu hu ku shya̱ di̱ niat tazwa Kristi a̱ni. Mat shei a̱lyiat huni hwa mbyia̱, nang n ni̱ shya̱ a̱ji di̱ la̱p ma̱ng a̱nyanyang mi̱ jaru ji.

⁴Nyi bu ni̱ nnaai A̱gwaza da̱nian nung, n ka shei A̱sham Nkhang kani ka̱ ghwut shansham di̱ si̱sak nang ku mmyim n shei nka a̱ni.

⁵Nyi ni̱ swan swat mumwang dundung ma̱ng á̱niet ba̱ nwai yet á̱niet khwi Kristi ba a̱ni. A̱wot nyi nyia̱ ta̱m ma̱ng a̱wat nang nyi shya̱ a̱ni, nyi mbeang baa.

⁶Nyi yok a̱lyiat nyin na na̱ byia̱ á̱niet nwai khwi Yesu a̱bya nyinyang, na̱ khwat ba á̱ bai ndyo kpa̱mkpaan ma̱ng a̱nyin. A̱nia wa nyi na ndyen si̱sak ji nyi na nnwuak kuzang a̱yin ma̱ mba shim ku myim a̱ni.

⁷Tikikut yet a̱na̱nyiuk nzi̱t wa nang zi̱ chat a̱ni mi̱ khwi Kristi hu. A̱ yet a̱tsotswat a̱yin wa. Nggu wa beang nung mi̱ nta̱m shei a̱lyiat A̱gwaza hu. Nggu wa na bwoi nyin a̱mgba̱m nkhang tazwa nung ma̱ng si̱sak nang nswan a̱ni.

⁸Huhwa mbyia̱ nang n ta̱m nggu da̱ a̱vwuo nyin, gu ka tak ma̱ng a̱nyin ta̱m hu nang zi̱ nyia̱ a̱ni, a̱wot a̱ bu tyia̱ nyin gba̱gbak.

⁹N bu na ta̱m ma̱ng Oni̱simut da̱ a̱vwuo nyin, a̱ yet a̱tsotswat a̱na̱nyiuk nang zi̱ chat a̱ni. A̱ yet a̱yin nyin wa, a̱ neet ma̱ a̱keang nyin ka a̱ni. Nggu ma̱ng Tikikut, ba̱ na tak ma̱ng a̱nyin a̱mgba̱m kuzang ta̱m nang zi̱ nyia̱ a̱ji a̱ni.

¹⁰Ari̱sta̱kut, a̱tyu nang á̱ la̱p mi̱ jaru ji dundung ma̱ng a̱nung a̱ni, byat nyin. Ma a̱nia wa Ma̱rkut, a̱tyu a̱ kwon byin ma̱ng Ba̱nabat a̱ni, byat nyin. (Ma̱nang á̱ ku ntak nyin di̱n jen ji ji̱ swak a̱ni, ka̱ Ma̱rkut bai da̱ a̱vwuo nyin, nyi san nggu mbwak nfeang).

¹¹Jeshuwa, a̱tyu nang á̱ bu ngyei Yustut a̱ni, mun a̱ byat nyin. Á̱niet a̱tat bani bya yet A̱yahudawa ma̱nyin mba ba̱ nyia̱ ta̱m dundung ma̱ng a̱nung a̱ji da̱nian Tyok A̱gwaza hu a̱ni. A̱wot ba̱ ka̱n shyim nung fwuo ba̱t.

¹²A̱bafa̱rat yet a̱tyo nyiung wa mi̱ sot á̱niet khwi nyin ji, a̱wot a̱ bu yet a̱khwo Kristi Yesu a̱ni, byat nyin. A̱ ni̱ ntyia̱ a̱lyia̱ di̱ naai A̱gwaza kuzang jen da̱nian nyin, gu ka tyia̱ nyin nyi yet á̱niet tat á̱ghyi, nyi bu yet á̱tsatsak á̱niet. A̱bafa̱rat bu nwuak a̱chuchuk nang nyi nkhwi a̱mgba̱m kyang nang A̱gwaza chat a̱ni.

¹³N chat n tak nyin a̱tsak a̱lyiat, nang A̱bafa̱rat nkwan a̱ nyia̱ ta̱m ba̱t, a̱ si̱ naai A̱gwaza ba̱t ma̱ng fwuo nyiung da̱nian nyin, ma̱ng a̱mgba̱m susot á̱niet khwi Kristi ba̱ shya̱ ma̱ a̱ka̱keang La̱wudikiya ma̱ng Hirafolit a̱ni.

¹⁴Luka, a̱ yet a̱tyu kan nang zi̱ chat a̱ni, ma̱ng Dimat, ba̱ mun á̱ byat nyin.

¹⁵Ma̱sa̱kut, nyi byat nung á̱na̱nyiuk nzi̱t ba, á̱niet khwi Yesu ba̱ shya̱ La̱wudikiya a̱ni. Nyi bu byat Nimfa a̱ yet a̱nap nang sot á̱niet khwi ji ni̱ tung a̱mali nggu ka a̱ni.

¹⁶Ki̱ nyi tyak fang wusika jini mi̱ chet a̱zaghyi sot á̱niet khwi konyan si̱ fa̱k, nyi ma ta̱m ndyo da̱ a̱vwuo sot á̱niet khwi ji̱ shya̱ La̱wudikiya a̱ni, da̱nian mba meang ba̱ ka fang njii. A̱wot nyin meang, nyi ma ni̱ nfang wusika ji nang n dyuut mba ndyo a̱ni.

¹⁷A̱wot nyi tak ma̱ng A̱kibut nyia̱, “Ntyia̱ a̱lyia̱ a lii a tyak ta̱m nang A̱gwaza nwuak ang a̱ni.”

¹⁸Nung Bulut, nung gwa n dyuut nyin byat huni ma̱ng bwak nung. Nyi yok bwung nang n shya̱ di̱ la̱p ma̱ng a̱nyanyang mi̱ jaru ji a̱ni bah. Yok A̱gwaza a̱ fa̱k shok nyin!