Read tyap 1 A̱ta̱solonikawa 1 Bible Online

1 A̱ta̱solonikawa 1 - tyap bible

1 A̱ta̱solonikawa 1

¹Nung Bulut, Sila[1] ma̱ng Timoti, zi̱ byiat á̱niet khwi ba ba̱ shya̱ a̱keang Ta̱solonika, ba̱ yet á̱si̱ A̱gwaza a̱ yet A̱tyia̱ ma̱ng A̱tyoli Yesu Kristi a̱ni. Yok A̱gwaza a̱ fa̱k shok nyin, a̱ bu nwuak nyin swat nyinyang.

²Zi̱ ni̱ gwai A̱gwaza kuzang jen da̱nian nyin a̱mgba̱m. A̱wot zi̱ ni̱ tyia̱ nyin mi̱ naai A̱gwaza nzi̱t hu kuzang jen.

³Kuzang jen zi̱ ni̱ jhyung nta̱m nang nyi nyia̱ mat nwuak a̱chuchuk a̱ni, ma̱ng chat á̱ghyang ku tyia̱ beang á̱ghyang a̱ni, ma̱ng gbang a̱lyia̱ mat tyia̱ fwuo mami Yesu Kristi a̱ yet A̱tyoli nzi̱t a̱ni.

⁴Á̱na̱nyiuk nung ba nyi yet á̱niet khwi Yesu a̱ni, zi̱ lyen nang A̱gwaza nchat nyin, a̱wot a̱ si̱ khai nyin.

⁵Mat zi̱ ku shei nyin A̱sham nkhang ka ma̱ng swáng a̱lyiat ja ma̱nyin ji bah; a̱wot ma̱ng chet A̱za̱za̱rak Ntswa hwa, ma̱ng nwuak fwuo za̱m, ma̱nang nyi ndyen si̱sak zi̱ ku nswan mami nyin da̱nian nyin a̱ni.

⁶Nyi si̱ bu maat zi̱t ma̱ng A̱tyoli Yesu, nang nyi nsan a̱lyiat A̱gwaza na ma̱ng a̱gwai nang A̱za̱za̱rak Ntswa wu nwuat a̱ni, a̱mgba̱m ma̱ng a̱dodo swuo a̱bung nyi nswuo a̱ni.

⁷Mat si̱ a̱hwa, nyi si̱ yet kidee da̱ a̱vwuo á̱niet khwi ba̱ shya̱ mi̱ nfam bibyin Ma̱kidoniya ma̱ng A̱ka̱ya a̱ni.

⁸A̱wot nyi shei a̱lyiat A̱gwaza na mi̱ chet na̱ si̱ kai koji, mi̱ nfam bibyin Ma̱kidoniya ma̱ng A̱ka̱ya nia ma̱nyin na bah. A̱wot nkhang nwuak a̱chuchuk nyin na da̱ A̱gwaza, wa ka̱n kai kuzang a̱vwuo. Mat a̱nia, zi̱ bu byia̱ kyang ghyang nang zi̱ na hyia̱ a̱ni bah.

⁹Mat mba ma̱ á̱pyia̱ mba ba̱ bwoi nzi̱t nkhang di̱ si̱sak ji nang nyi nsan nzi̱t di̱n jen nang zi̱ mbai da̱ a̱vwuo nyin a̱ni; ma̱ng si̱sak ji nang nyi nghwon kwok ntong a̱zaghyi nghwughwu a̱yaagwaza sang swuan, a̱wot nyi si̱ bwuak nyi si̱ khwi A̱gwaza tswazwa a̱ yet a̱tsatsak, a̱ si̱ bu byia̱ swuan a̱ni.

¹⁰A̱wot ba̱ bu hyia̱ ma̱ng a̱nzi̱t si̱sak ji nyi bu nfwuong bwuok bai Yesu hu, a̱ yet Nggwon A̱gwaza ka, ka̱ neet Ma A̱gwaza tswazwa ka a̱ni. Nggu wa yet Yesu, a̱tyu nang A̱gwaza ku ta̱ngam ma̱ng swuan ma̱ á̱niet ba̱ ka̱n kwi a̱ni. Nggu wa na san nzi̱t mi̱ mwai lyen A̱gwaza hu ku chobai a̱ni.