Read tyap 1 A̱ta̱solonikawa 3 Bible Online

1 A̱ta̱solonikawa 3 - tyap bible

1 A̱ta̱solonikawa 3

¹Mat nang zi̱ si̱ mi̱n gbang a̱lyia̱ di̱ mi̱ li nyin a̱ni bah, zi̱ si̱ li ku yet a̱sham zi̱ swan ma̱nyin zi̱t ma̱ a̱keang Atina.

²Zi̱ si̱ ta̱m ma̱ng a̱nyin Timoti, a̱na̱nyiuk nzi̱t wu mi̱ khwi Yesu. A̱ bu yet a̱kpa̱ndang ta̱m nzi̱t mi̱ nta̱m A̱gwaza di̱ shei A̱sham nkhang Yesu Kristi, gu bai da̱ a̱kwonu nzi̱t, da̱nian gu ka kpaat nyin, gu bu tyia̱ nyin gba̱gbak di̱ nwuak fwuo nyin hu di̱ Yesu.

³Timoti nyia̱ a̱nia da̱nian ki̱ di̱ a̱yin gu di̱ fa̱k a̱wun di̱ si̱sak á̱ nya̱shuk nyin a̱ni. Mat nyin ma̱ á̱pyia̱ nyin lyen nang ya̱shuk hwa á̱ nkhai nzi̱t.

⁴Mat, neet di̱n jen nang zi̱ ku nshya̱ ndung ma̱ng a̱nyin a̱ni, zi̱ ku mi̱ ntak nyin nang á̱ na ya̱shuk nzi̱t. A̱wot ma̱nang nyi ndyen a̱ni, swuo a̱bung huni si̱ shya̱ nzi̱t.

⁵Mat nang gbang a̱lyia̱ hu ku nkaat nung a̱ni, n si̱ ta̱m Timoti da̱ a̱vwuo nyin n ka ndyen nwuak fwuo nyin hu di̱ Yesu. N ku nfa̱k a̱wun kee A̱ta̱nyeang ka, ka̱ yet a̱tyu mai á̱niet a̱ni, ka̱ mak nyin, nyi si̱ kwa, a̱wot a̱mgba̱m ta̱m zi̱ ka̱n nyia̱ da̱ nyin a̱ni, ku tyia̱ a̱buk kyang.

⁶A̱wot ma̱ninika, Timoti bwuok a̱ neet da̱ a̱vwuo nyin. A̱ si̱ bai ma̱ng a̱nzi̱t nkhang na̱ byia̱ nyinyang di̱ nwuak a̱chuchuk ma̱ng chat á̱ghyang nyin hu a̱ni. A̱ si̱ bu hyia̱ si̱sak ji nyi ni̱ njhyung nzi̱t ma̱ng shok kuzang njen a̱ni. A̱ si̱ tak zi̱t nang nyi mbyia̱ di̱dang li nzi̱t, ma̱nang nzi̱t mameang nfwuong di̱dang li nyin a̱ni.

⁷Mat a̱nia, á̱na̱nyiuk nzi̱t ba mi̱ khwi Yesu nang zi̱ chat a̱ni, nyi tyia̱ nzi̱t gba̱gbak, a̱mgba̱m ma̱ng swuo a̱bung nzi̱t hu ma̱ng si̱sak ji á̱ ku nya̱shuk zi̱t, mat nyi yong mi̱ chet di̱ nwuak fwuo nyin hu di̱ Yesu.

⁸Di̱ yong huni, zi̱ shya̱ ma̱ng swuan swai, mat zi̱ lyen nyi yong mi̱ chet mi̱ khwi A̱tyoli Yesu.

⁹Ma̱ninika, zang tangka̱i a̱gwai hwa zi̱ na tak A̱gwaza ku maai da̱nian nyin? Mat zi̱ shya̱ ma̱ng fwuo sai gba̱mgbam a̱zaghyi A̱gwaza da̱nian nyin.

¹⁰Zi̱ ni̱ naai A̱gwaza za̱m a̱ta̱mam ma̱ng a̱tyetuk da̱nian zi̱ ka li nyin a̱ghyi ma̱ng a̱ghyi, a̱wot zi̱ bu shya̱ a̱wat nang zi̱ na ntyiet nyin kyang nang nyi sang di̱ nwuak a̱chuchuk nyin hu a̱ni.

¹¹Ma̱ninika, yok A̱gwaza a̱ yet A̱tyia̱ nzi̱t wu a̱ni ma̱ a̱pyia̱ gu, ma̱ng A̱tyoli nzi̱t Yesu, gu khwuk zi̱t vak zi̱ bai ma̱ng a̱nyin.

¹²Yok A̱gwaza a̱ tyia̱ chat á̱ghyang nyin hu ma̱ng a̱mgba̱m á̱niet ba, ku mban ba̱t kuzang jen ma̱nang zi̱ nchat nyin a̱ni.

¹³Yok A̱gwaza a̱ bu tyia̱ nfwuo nyin na gba̱gbak, nyi yet á̱niet sang a̱bun, nyi bu yet á̱za̱za̱rak a̱zaghyi nggu, a̱tuk nang A̱tyoli nzi̱t wu Yesu Kristi na mbwuok ndung ma̱ng á̱za̱za̱rak á̱niet khwi, ba̱ yet á̱si̱ nggu ba a̱ni.