Read tyap 2 A̱ta̱solonikawa 1 Bible Online

2 A̱ta̱solonikawa 1 - tyap bible

2 A̱ta̱solonikawa 1

¹Nung Bulut, Sila, ma̱ng Timoti nzi̱t bya lyuut nyin wusika jini. Zi̱ byiat nyin á̱niet khwi ma̱ a̱keang Ta̱solonika ba, ba̱ yet á̱si̱ A̱gwaza a̱tyia̱ nzi̱t wu ma̱ng A̱tyoli Yesu Kristi a̱ni.

²Yok A̱gwaza a̱ yet A̱tyia̱ a̱ni ma̱ng A̱tyoli Yesu Kristi, ba̱ fa̱k shok nyin, ba̱ bu nang nyin swat nyinyang[1].

³Á̱niet khwi Yesu ba nang n chat a̱ni, ku yet ta hwa, ku myim zi̱ gwai A̱gwaza kuzang jen da̱nian nyin, mat nang nyi mban di̱ nwuak fwuo di̱ Yesu, nyi si̱ bu mban di̱ chat á̱ghyang hu a̱ni.

⁴Huhwa mbyia̱ nang nzi̱t ma̱ á̱pyia̱ nzi̱t ntam da̱ nyin mami susot á̱niet khwi A̱gwaza ji kuzang jen. Mat nyi gbang a̱lyia̱ nyi si̱ nyia̱ tsotswat, a̱mgba̱m ma̱ng a̱di̱di̱t ya̱fa̱k nang á̱ ya̱fa̱k nyin, ma̱ng a̱bung ka nang nyi swuo a̱ni.

⁵Si̱ huni hwa tak zi̱t nang a̱tsotswat shi̱ri̱ya A̱gwaza wu nat cha̱chaat. A̱wot ku bu tak chi̱k nang nyi maai swat mi̱ Tyok A̱gwaza hu, da̱nian da̱ nhu hwa nang nyi nswuo a̱bung ka.

⁶A̱gwaza yet a̱chuchuk wa. Mat a̱nia, á̱niet ba ba̱ ya̱shuk nyin a̱ni, A̱gwaza ma na ya̱shuk baa.

⁷A̱wot nyin á̱niet ba nang á̱ ya̱fa̱k nyin di̱ yong huni a̱ni, A̱gwaza na nang nyin ma̱ng a̱nzi̱t a̱vwuo fwung di̱n jen nang A̱tyoli nzi̱t wu Yesu bye mbwuok neet Ma A̱gwaza tswazwa, gu ka tyai a̱pyia̱ nggu kpa̱sai a̱ni. A̱ na bwuok a̱ bai ma̱ng a̱cha̱chet a̱yaata̱m tswá A̱gwaza mami a̱gba̱ndang a̱lya̱ra̱p ndong, ka̱ na tak chet nggu hu a̱ni.

⁸Di̱n jen bwuok bai nggu ji, á̱niet ba ba̱ lak lyen nggu hu a̱ni, ma̱ng á̱si̱ ba ba̱ lak khwi A̱sham Nkhang A̱tyoli Yesu nzi̱t ka a̱ni, A̱gwaza na nyia̱ mba shi̱ri̱ya.

⁹Á̱ bye khap ba a̱zaghyi A̱gwaza á̱ sak zan. Á̱ na nyiak mbaa si̱ nat sang sangba̱p. Da̱ mba, ba̱ bye li a̱gba̱ndang a̱kyenkyai shi ma̱ng chet A̱gwaza hu ma̱ng á̱ghyi bah.

¹⁰A̱tuk ka A̱tyoli Yesu na mbwuok a̱ bai á̱ nwuak gu a̱kyenkyai shi nggu wu a̱ni, a̱mgba̱m á̱za̱za̱rak á̱niet khwi ba ba̱ nwuak fwuo da̱ nggu a̱ni, ba̱ bye fa̱k a̱ga̱de. Ba̱ sak mbwak a̱bwonu. Nyin meang, nyi bye fa̱k a̱ga̱de, mat nyi ku nwuak a̱chuchuk da̱ a̱lyiat nang zi̱ ku tak ma̱ng a̱nyin a̱ni.

¹¹Si̱ huni hwa mbyia̱ nang kuzang jen zi̱ ngya a̱son di̱ naai A̱gwaza nzi̱t wu, da̱nian a̱ ka tyia̱ nyi swan tangka̱i swat hu ku myim di̱ si̱sak ji gu ngyorong nyin a̱ni. Zi̱ bu naai gu bu nang nyin chet nyi nyia̱ a̱mgba̱m a̱tan nkyang nang nyi nyia̱, mat nang nyi nnwuak fwuo da̱ nggu a̱ni.

¹²Zi̱ bu naai A̱gwaza, á̱ ka dyep a̱lyoot A̱tyoli Yesu da̱nian tangka̱i swat nyin hu, a̱wot nyin meang A̱gwaza bu na dyep nyin, mat shok nggu ji da̱ nzi̱t ma̱ng a̱si̱ A̱tyoli nzi̱t wu Yesu Kristi.