Read tyap 1 Timoti 5 Bible Online

1 Timoti 5 - tyap bible

1 Timoti 5

¹Yok ngai ma̱ng a̱niet khwop a̱niet bah. A̱wot mwang gu nang nggu wa yet a̱tyia̱ ang wa a̱ni. A ni̱ kyiak nfi̱ng á̱tyok na nang á̱na̱nyiuk ang bya a̱ni.

²A̱khwukhwop á̱nyiuk ba meang, a kyiak ba nang a̱yaayang ang a̱ni. A̱wot a̱ka̱neam á̱nyiuk na, a kyiak mba nang á̱na̱nyiuk ang a̱ni, ma̱ng a̱mgba̱m a̱za̱za̱rak nfwuo.

³Beang[7] á̱nyiuk nang á̱tyok mba ba ka̱n kwi a̱ni, á̱si̱ ba mami a̱chuchuk ba̱ sang á̱niet beang a̱ni.

⁴A̱wot ki̱ a̱byii̱k nang a̱tyok nggu ka̱n khwu a̱ni byia̱ mman ku á̱ka̱mbwon, ba̱ ya ntsa myiam nyia̱ shok da̱ a̱vwuo kyang bwak mba hu. Da̱ a̱nia wa, ba̱ na ntan á̱niet mbyin mba ba. Si̱ huni hwa yet tangka̱i shok nang A̱gwaza wu chat a̱ni.

⁵A̱byii̱k nang a̱tyok nggu wu khwu a̱ si̱ sang a̱tyu beang a̱ni, a̱ ni̱ tyia̱ fwuo nggu hu da̱ A̱gwaza. A̱wot a̱ ya a̱son mi̱ naai A̱gwaza wu di̱ chat gu beang guu, a̱tyetuk ma̱ng a̱ta̱mam.

⁶A̱wot a̱byii̱k nang a̱tyok nggu wu ka̱n khwu a̱ si̱ tyia̱ a̱pyia̱ nggu di̱ chat fa̱k nyinyang hwa ma̱nyin hu a̱ni, a̱ li nang kwom a̱ni mi̱ tswa nggu ji, ku nang gu ni̱ swuan.

⁷Tyiet sot á̱niet khwi ji a̱lyiat nani, kalak a̱yin a̱ du shya̱ kyang nang gu na nfwoi mba a̱ni.

⁸A̱wot ka̱ a̱yin lak nyia̱ á̱na̱nyiuk nggu ba shok, a̱wot a̱ si̱ nyia̱ kyang mbwak nggu hu ndyo a̱ swak baa, a̱ fwuo nwuak a̱chuchuk nggu hu. A̱wot a̱ swak a̱tyu nwai khwi A̱gwaza ma̱ng yet a̱ka̱tuk.

⁹Yok fang a̱byii̱k nang a̱tyok nggu ka̱n khwu a̱ni, tyei mami á̱nyiuk nang á̱tyok mba ba ka̱n kwi nang a̱niet khwi ba ni̱ beang a̱ni bah, si̱ nang gu tat a̱lyia̱ nswak a̱taa, a̱wot a̱ si̱ swan swat shansham ma̱ng a̱tyok a̱nyiung.

¹⁰A̱ si̱ bu yet a̱byii̱k nang á̱ dyep di̱ nyia̱ a̱tan nkyang a̱ni. A̱wot a̱ si̱ go mman nggu na shansham, a̱ si̱ saai á̱nietchen a̱mali nggu ka, a̱ si̱ bu nyia̱ á̱niet nta̱m A̱gwaza ba a̱tan nta̱m ma̱ng ghyuai a̱pyia̱[8]. A̱ si̱ beang á̱niet ba̱ swuo a̱bung a̱ni, a̱wot a̱ bu nwuak a̱pyia̱ nggu a̱mgba̱m di̱ nyia̱ kuzang tangka̱i kyang ku yet a̱tan a̱ni.

¹¹A̱wot yok fang a̱ka̱neam á̱nyiuk nang á̱tyok mba ba ka̱n khwi a̱ni, tyei ma̱ á̱nyiuk nang á̱tyok mba ba ka̱n kwi a̱ni bah. Mat jen nang shyuo nvam mba ji ndoot a̱ni, ba̱ ni̱ bwuak a̱ma á̱ nang Yesu Kristi ba̱ chat nat nyeang.

¹²A̱jawa ba̱ khwat á̱pyia̱ mba shi̱ri̱ya di̱ tyat a̱li̱ka̱uli nang ba̱ nyia̱ di̱ ba̱ na nyeang a̱ni bah.[9]

¹³Kang mi̱ si̱ a̱hwa, ba̱ na myiam swat ma̱ tai ba̱ byian jen mba ji di̱ nwuai a̱ka̱sa á̱niet. Ba̱ la̱u a̱chyuang ma̱ng nwuai mi̱ zwua̱i. Ba̱ chwaat a̱lyiat di̱ nkyang di̱ na̱ myim a̱ni bah.

¹⁴Mat a̱nia, n di ku myim a̱ka̱neam á̱nyiuk nang á̱tyok mba ba ka̱n kwi a̱ni, ba̱ nat nyeang ba̱ tyei mman. A̱wot ba̱ ba̱ng a̱ka̱sa mba na; mat ki̱ di̱ ba̱ du nwuak á̱niet lak li nzi̱t ba a̱wat nang ba̱ na mmang nzi̱t a̱lyem a̱ni.

¹⁵Á̱nyiuk á̱ghyang nang á̱tyok mba ba ka̱n kwi a̱ni, wa ka̱n bwuak ba̱ si̱ khwi A̱ta̱nyeang ka.

¹⁶A̱wot ki̱ á̱ byia̱ a̱byii̱k a̱ yet a̱tyu khwi nang gu byia̱ á̱na̱nyiuk ba nang á̱tyok mba ba ka̱n kwi mami á̱na̱nyiuk nggu ba a̱ni, ku yet ta hwa gu beang mbaa. A̱wot gu yok ghwon á̱niet khwi ba kpa̱t bah, da̱nian ba̱ ka beang á̱si̱ ba̱ sang á̱niet beang a̱ni.

¹⁷A̱cha̱chet á̱niet khwi ba̱ nyia̱ ta̱m shansham a̱ni, ku myim á̱ nwuak ba shi. A̱wot á̱ bu tan mba shansham. A̱wot á̱si̱ ba ba̱ nyia̱ nta̱m shei a̱lyiat A̱gwaza ma̱ng tyiet hu a̱ni, bibya á̱ na beang á̱ swak.

¹⁸Mat A̱lyiat A̱gwaza na nyia̱, “Nyak ji zi̱ swuai yak a̱ni, á̱ yok tyia̱ nji swom bah.” A̱wot á̱ bu lyuut nyia̱, “A̱tyu nta̱m maai á̱ tan nggu zang nggu ji!”[10]

¹⁹Yok san a̱hyiak tazwa a̱kwak a̱son a̱niet khwi bah, si̱ nang a shya̱ sheda da̱ a̱vwuo á̱niet a̱feang ku a̱tat.

²⁰Tazwa á̱niet kwak a̱son ba, ba̱ nyia̱ a̱ka̱tuk nyia̱ a̱ni, a gba mba kpa̱sai, da̱nian a̱mgba̱m á̱niet khwi ba̱ ka li, ba̱ nfa̱k a̱wun.

²¹N kam ang a̱zaghyi A̱gwaza, ma̱ng Yesu Kristi, ma̱ng a̱yaata̱m tswá A̱gwaza nang á̱ khai a̱ni. N kam ang a khwi tyiet hu n tyiet ang a̱ni. Yok khai á̱niet da̱ á̱ghyi ku a tak nang a nchat a̱yin lan á̱ghyang di̱ kyang nang a nyia̱ a̱ni bah.

²²Yok ghan khai a̱yin, ku a sak nggu mbwak gu yet a̱kwak a̱son sot á̱niet khwi bah. Kalak a byia̱ bwak ma̱ a̱ka̱tuk nyia̱ nggu wu. Khap a̱pyia̱ ang zan, a yet a̱za̱za̱rak.

²³Yok yong di̱ swuo a̱sa̱khwot ma̱ nyin na bah. A ni̱ nswuo a̱sa̱khwot sum a̱na̱p na ma̱ a̱da̱dei, mat zwan a̱fa ma̱ng vam ku ni̱ nyia̱ ang a̱ni.

²⁴A̱ka̱tuk nyia̱ á̱ghyang á̱niet ni̱ ghwut kpa̱sai neet nang á̱ ka̱n nat da̱ a̱vwuo shi̱ri̱ya bah. A̱wot a̱ka̱tuk nyia̱ á̱ghyang á̱niet, á̱ ni̱ ba̱ li ngguu lilyim kya.

²⁵Ma̱ a̱nia wa, a̱tan nta̱m á̱ghyang á̱niet, á̱ ni̱ li nggu kpa̱sai. A̱wot a̱tan nta̱m nang á̱ghyang á̱niet nyia̱ da̱ bang a̱ni, á̱ghyang á̱tuk a̱ na ghwut kpa̱sai.