Read tyap 2 Timoti 4 Bible Online

2 Timoti 4 - tyap bible

2 Timoti 4

¹N kam ang a̱zaghyi A̱gwaza ma̱ng Kristi Yesu, a̱tyu a̱ na faat shi̱ri̱ya tazwa á̱niet nswuan ma̱ng á̱si̱ ba̱ ka nkwi a̱ni, di̱n jen nang gu na mbwuok a̱ ba̱ kpaat tyok nggu hu a̱ni.

²Ya a̱son di̱ shei a̱lyiat A̱gwaza na. A shya̱ di̱ la̱p vam shei na mi̱ jen ji̱ myim a̱ni, ku mi̱ jen ji̱ nwai myim a̱ni. A jhyi swat mba hu kpa̱sai. A khwat nfwuo á̱niet na. A bu tyia̱ mba gba̱gbak. A nyap fwuo ba̱t. A tyiet mbaa ma̱ng a̱tan tyiet.

³Mat jen na bai nang á̱niet na ndak fa̱k a̱tsatsak tyiet a̱ni. Da̱ a̱kwonu a̱kya, ba̱ khwi shyuo nfwuo mba na. Ma̱nang a̱fufwuo mba ba nsweang a̱ni, ba̱ na khwi á̱niet tyiet nang ba̱ chat a̱ni.

⁴Ba̱ na lak fwuong a̱tsatsak tyiet wu. A̱wot ba̱ tyia̱ nfwuo mba na di̱ khwi a̱tai tashikum.

⁵A̱wot nwan, Timoti, chok a̱pyia̱ ang shansham mami kuzang kyang. Gbang a̱lyia̱ di̱ swuo a̱bung. Nyia̱ nta̱m a̱tyu shei A̱sham Nkhang da̱ a̱vwuo á̱niet ba̱ ka̱n nwai fa̱k a̱ni. A̱wot a nyia̱ ta̱m a̱khwo A̱gwaza nang gu nwuak ang a̱ni cha̱chaat.

⁶Da̱ a̱vwuo nung, ku li á ngyei jen nyia̱ nang á̱ na neap nung nang za̱nang a̱ni, mat jen nang n na nkat a̱ni, nyia̱.

⁷N kwan a̱tan a̱yaat. N si̱ ntyak chung nung ji. N si̱ nyia̱ tsotswat.

⁸A̱wot ma̱ninika, á̱ sak zang á̱ nfwuong nung. Ji̱ yet a̱tsotswat nbung tyok nang A̱tyoli Yesu a̱ yet a̱tsotswat ma̱ng a̱tan a̱tyu nyia̱ shi̱ri̱ya wu a̱ni, bye nwuak nung a̱tuk nyia̱ shi̱ri̱ya ka a̱ni. A̱wot zang jini ji yet si̱ nung ja ma̱nyin nung bah. Ji̱ bu yet si̱ a̱mgba̱m á̱niet ba̱ swan mi̱ di̱dang á̱ fwuong bwuok nggu hu, da̱nian ba̱ ka li bai nggu hu a̱ni.

⁹Kwan ba̱t a li nang a bai da̱ a̱vwuo nung ma a̱nggang.

¹⁰Dimat, a̱ lak nung a̱ ghwon, mat nang gu nchat nkyang swanta nani, a̱ si̱ nat Ta̱solonika a̱ni. Kiri̱zant meang si̱ nat Ga̱la̱tiya. A̱wot Titut mamang si̱ nat Da̱lma̱tiya.

¹¹Mi̱ Luka wa ma̱ nyin nggu shya̱ dundung ma̱ng a̱nung a̱ji. Ma̱sa̱kut, shya̱ Ma̱rkut a chong ndung ma̱ng a̱nggu nyi bai. Mat a̱ na beang nung shansham mi̱ ta̱m A̱gwaza nung huni.

¹²N ta̱m Tikikut gu nat A̱fisut.

¹³Ki̱ a na bai, a ba̱ng nung a̱toot khwi shyishyim wu nang n ku nghwon mbwak Ka̱rbut mi̱ Ta̱rowasa a̱ni. A bu bai ma̱ng a̱nung nta̱ka̱da a̱nia, a̱wot kwa lyuut huhwa n chat swak.

¹⁴A̱liza̱nda a̱tyu a̱ yet a̱fwu a̱kpeap a̱wa a̱ni, nyia̱ nung a̱ka̱kpa̱t ba̱t. A̱ ma na san zang kyang nang gu nyia̱ nung ndyo a̱ni da̱ a̱vwuo A̱gwaza.

¹⁵Nwan ma̱ a̱pyia̱ ang, cham nggu shansham, mat a̱ ku nyia̱ na̱nvan ma̱ng a̱lyiat nzi̱t na ba̱t ma̱ng a̱kpak a̱ghyi.

¹⁶A̱tuk tsa shi̱ri̱ya nung ka a̱zaghyi a̱tyu shi̱ri̱ya wu, n ku ngyong ma̱nyin nung. A̱yin ku li̱n nung a̱ma bah. Da̱ a̱kwonu a̱kya, konyan ku tyong zan a̱ si̱ ghwon nung. A̱gwaza gu yok ba̱ng mba da̱ a̱bun a̱wa bah.

¹⁷A̱mgba̱m ma̱ng a̱nia, A̱gwaza ku shya̱ dundung ma̱ng a̱nung. A̱ si̱ nang nung chet, da̱nian n ka nshya̱ vak shei a̱mgba̱m A̱sham Nkhang ka da̱ a̱vwuo a̱mgba̱m nnwap mi̱ bibyin swanta na. A̱wot a̱ si̱ san nung, a̱ ghwut ndyo a̱bwonu zaki.

¹⁸A̱tsak a̱lyiat, A̱gwaza wu na ti̱n nung di̱ kuzang a̱ka̱tuk mak A̱ta̱nyeang. A̱wot a̱ na chok nung shansham a̱ nat ndyo tswazwa mi̱ Tyok nggu hu. Da̱ a̱vwuo nggu kya nang a̱kyenkyai shi nshya̱, si̱ nat sang sangba̱p. Samba̱rka!

¹⁹N byiat Biriskila ma̱ng A̱kila, mbeang kyang bwak a̱mali Oni̱siforut hu.

²⁰Ba̱ng ba̱ tat a̱fwun, A̱rastut ni̱ shya̱ Korinti, a̱wot n ghwon Ta̱rofimut mi̱ Mi̱li̱tut, mat zwan nyia̱ gu.

²¹Kwan ba̱t a li nang a bai á̱ sii du nwuo a̱kwa̱i ka. Yubulut ma̱ng Fudet, Lainut, Ka̱la̱udiya mbeang a̱mgba̱m á̱kum á̱niet khwi ka, ba̱ mun á̱ byat ang.

²²Yok A̱gwaza wu a̱ shya̱ dundung ma̱ng nyin! Shok nggu ji mameang, ji̱ shya̱ dundung ma̱ng a̱nyin!