Read tyap Titut 2 Bible Online

Titut 2 - tyap bible

Titut 2

¹A̱wot nwan, Titut, ku yet ta hwa a tyiet a̱tsatsak tyiet ma̱ng kyang ku myim a̱ni.

²Tyiet á̱khwukhwop á̱tyok ba̱ ta̱bat pyipyia̱ mba, ba̱ swan swat ku myim nang á̱niet na nnwuak ba shi a̱ni. Bu tyiet baa, ba̱ byia̱ a̱chuchuk a̱di̱dam, ba̱ yong shansham di̱ nwuak a̱chuchuk, ba̱ chat á̱ghyang, ba̱ bu nyap nfwuo ma̱ng á̱ghyang ba̱t. Ma a̱nia wa a̱khwukhwop á̱nyiuk ba, ku myim a tyiet baa, ba̱ swan swat shansham nang á̱niet khwi a̱ni, ba̱ yok jang a̱lyiat bah, ba̱ yok la̱u hyeng a̱kan bah. Da̱ a̱kwonu a̱kya, ba̱ tyiet nkyang na̱ yet a̱tsatsak a̱ni,

⁴da̱nian ba̱ ka tyia̱ a̱ka̱neam á̱nyiuk na gba̱gbak, ba̱ ka chat á̱tyok mba ba, ma̱ng mman mba na, ba̱ bu byia̱ a̱chuchuk a̱di̱dam, ba̱ byia̱ a̱za̱za̱rak nfwuo, ba̱ yet a̱tan á̱nyiuk ba̱ng a̱ka̱sa, ba̱ ni̱ ntyia̱ pyipyia̱ mba mbwak tyok á̱tyok mba hu, kalak á̱ du jhyuai A̱lyiat A̱gwaza na.

⁶Ma a̱nia wa nang a na ntyia̱ zám ji gba̱gbak, ba̱ byia̱ a̱chuchuk a̱di̱dam.

⁷Nwan ma̱ a̱pyia̱ ang, mami kuzang kyang di̱ kuzang vak a nyia̱ a̱tan ta̱m. Ku yet ta hwa a yet kidee ma̱ng tyiet ang hu. A nyia̱ tsotswat ma̱ng nwuak a̱pyia̱ ang.

⁸Ku myim a lyiat a̱tsatsak a̱lyiat nang á̱ na nwai tok ang a̱ni. Si̱ huni na tyia̱ á̱niet ba̱ nyia̱ fi̱p ma̱ng a̱nzi̱t a̱ni, ba̱ fa̱k nsum. Ba̱ bu lyin vak nang ba̱ na nfwoi nzi̱t a̱ni.

⁹Tyiet á̱khwo ba, ba̱ khwi a̱lyiat a̱yaatyoli a̱ka̱sa mba ba mami kuzang kyang da̱nian á̱niet a̱ka̱sa ba, ba̱ ka fa̱k nyinyang mba. Ba̱ bu yok chat ya fwuang ma̱ng a̱mba bah.

¹⁰Ba̱ bu yok kpa bwak. Da̱ a̱kwonu a̱kya, ba̱ nyia̱ tsotswat, ba̱ ka tak á̱niet ba shisham A̱lyiat A̱gwaza A̱tyusan nzi̱t wu kpa̱sai mami kuzang kyang.

¹¹Mat A̱gwaza wa ka̱n tyai shok nggu ji kpa̱sai, da̱nian ji̱ ka san a̱mgba̱m á̱niet ba.

¹²A̱gwaza mami shok nggu ji tyiet zi̱t, zi̱ yok ghwon khwi nggu bah; zi̱ bu yok byia̱ a̱shushok nkyang swanta bah. Da̱ a̱kwonu a̱kya, ku myim zi̱ byia̱ a̱chuchuk a̱di̱dam, zi̱ nyia̱ tsotswat. Zi̱ khwi A̱gwaza nang zi̱ ni̱ shya̱ mi̱ swanta huni ma̱ng fwuo nyiung.

¹³Zi̱ ya nswan fwuong a̱tsatsak mam a̱gwai a̱hwa nang zi̱ ntyia̱ fwuo a̱ni, nang Yesu Kristi a̱ yet a̱gba̱ndang A̱gwaza ma̱ng A̱tyusan nzi̱t wu na mbwuok a̱ bai ma̱ng a̱kyenkyai shi nggu wu kpa̱sai a̱ni.

¹⁴Nggu wa yet a̱tyu a̱ neap a̱pyia̱ nggu nang za̱nang a̱ni, da̱nian a̱ ka ti̱n zi̱t mami tyok a̱ka̱tuk nyia̱ hu. A̱ si̱ ja̱u zi̱t da̱nian zi̱ ka yet á̱niet guu nang gu nyia̱ tyok a̱ni; á̱niet ba̱ byia̱ a̱gba̱ndang di̱dang nyia̱ a̱tan nta̱m a̱ni.

¹⁵Ku yet ta hwa a tyiet nkyang nani. A̱wot a tyia̱ á̱niet ba̱ fwuong ang a̱ni gba̱gbak. A bu gba mba ma̱ng a̱mgba̱m tyok ang hu. Yok shim a̱yin a̱ jhyuai a̱lyiat ang na bah.