Read tyap Ibriniyawa 11 Bible Online

Ibriniyawa 11 - tyap bible

Ibriniyawa 11

¹Nwuak fwuo hwa yet gbang a̱lyia̱ di̱ kyang nang zi̱ ntyia̱ fwuo a̱ni, ku nwuak zi̱t a̱chuchuk di̱ kyang da̱nang zi̱ li a̱ni bah.[46]

²A̱tsak a̱lyiat, nwuak fwuo da̱ A̱gwaza hwa ku mbyia̱, á̱niet gbangbang ba si̱ mmaai, A̱gwaza si̱ chyin baa.

³Nwuak fwuo da̱ A̱gwaza hwa mbyia̱, nang zi̱ nfi̱k nang A̱gwaza wa nyia̱ swanta hu mi̱ di̱ kaat a̱lyiat nggu hu. Mat a̱nia wa, zi̱ fi̱k nkyang nang A̱gwaza nyia̱ mi̱ swanta nang á̱ nwuan ma̱nini a̱ni, na̱ neet ma̱ á̱si̱ na á̱ nwai nwuan a̱ni.

⁴Mat nang Abila ku nnwuak fwuo da̱ A̱gwaza a̱ni, a̱ si̱ neap za̱nang ji̱ myim A̱gwaza a̱ni, a̱ swak si̱ Kayinu ji. A̱gwaza ku kyiak Habila a̱ yet a̱tsotswat a̱yin wa. A̱ si̱ san za̱nang nggu ji. A̱nia wa, A̱gwaza si̱ ntak kpa̱sai nang gu nfa̱k nyinyang za̱nang nggu ji. Ku nang Abila nkhwu neet gbangbang a̱ni, kidee nwuak fwuo nggu ji ni̱ lyiat ma̱ng a̱nzi̱t ba̱ng ba̱ tat a̱fwun.

⁵Mat nang Enok ku nnwuak fwuo da̱ A̱gwaza a̱ni, a̱ si̱ khwu bah: Ma̱nang á̱ ndyuut ma̱ A̱lyiat A̱gwaza na a̱ni, nyia̱, “A̱gwaza si̱ kyiak gu, a̱ nat ndyo Tswazwa.” Neet nang á̱ ka̱n kyiak Enok á̱ nat ndyo Ma A̱gwaza tswazwa ka bah,[47] á̱ ku lyen nang A̱gwaza nfa̱k nyinyang nggu, mat nang gu nnwuak fwuo da̱ A̱gwaza a̱ni.

⁶A̱wot á̱ mbyia̱ a̱tyu nang A̱gwaza si̱ mi̱n fa̱k nyinyang nggu, di̱ mi̱n nwuak fwuo a̱ni bah. Kuzang a̱yin a̱ chat bai kpa̱mkpaan ma̱ng A̱gwaza a̱ni, ku yet ta hwa, gu nwuak a̱chuchuk nyia̱ A̱gwaza nshya̱, a̱wot a̱ ni̱ nang a̱mgba̱m á̱niet ba̱ chat gu ma̱ng fwuo nyiung a̱ni zang.

⁷Mat nang Nuhu ku nnwuak fwuo da̱ A̱gwaza a̱ni, a̱ si̱ shap a̱gba̱ndang kukwon a̱wak, gu ka nsan kyang bwak nggu hu ma̱ a̱gba̱ndang a̱sa̱khwot a̱ri̱giwa wu. Nuhu si̱ khwi a̱lyiat A̱gwaza a̱ ku gba nggu a̱ni, ku nang a̱ri̱giwa wu ka̱n bai a̱ni bah. Mat nang Nuhu ku nnwuak fwuo da̱ A̱gwaza a̱ni, ku si̱ tak nang shi̱ri̱ya A̱gwaza tazwa á̱niet swanta ba ngyet a̱tsotswat wa. Huhwa si̱ mbyia̱ A̱gwaza si̱ kyiak Nuhu a̱ yet a̱tsotswat a̱yin, mat nang gu nnwuak fwuo da̱ A̱gwaza a̱ni.

⁸Mat nang Ibrahim ku nnwuak fwuo da̱ A̱gwaza a̱ni, a̱ si̱ fa̱k yei A̱gwaza hu, a̱ si̱ nyia̱ ta̱m ma̱ng a̱lyiat nggu na. A̱ si̱ ghwon a̱li nggu ka, a̱ si̱ nat a̱byin a̱ghyang nang A̱gwaza ku nyia̱ a̱li̱ka̱uli a̱ na nang gu, ka̱ yet gado nggu a̱ni. Ibrahim ku ghwut, a̱ si̱ ghwon a̱keang nggu ka. Da̱ nggu, a̱ lyen a̱vwuo ka nang gu nnaat a̱ni bah.

⁹A̱wot ku nang gu ku si̱ ntat a̱byin ka nang A̱gwaza nyia̱ a̱li̱ka̱uli a̱ na nang nggu a̱ni, mat nwuak fwuo nggu hu, a̱ si̱ swan a̱ja ma̱ á̱suswak nang á̱nietchen a̱ni. A̱wot ma a̱nia wa, Ishaku ma̱ng Yakubu, mba meang ba̱ si̱ mun á̱ ya gado a̱byin nang A̱gwaza nyia̱ a̱li̱ka̱uli a̱ na nang mba a̱ni.

¹⁰Ibrahim ku swan ma̱ng tyia̱ fwuo a̱ nwuan á̱zanson. A̱ fwuong a̱gba̱ndang a̱keang nang A̱gwaza ku tyan a̱ si̱ tsa kuntyin sang sangba̱p nka hu, a̱wot a̱ si̱ nok ka ma̱ a̱pyia̱ nggu a̱ni.

¹¹Mat nang Sa̱ratu, a̱byii̱k Ibrahim wu, ku nnwuak fwuo da̱ A̱gwaza a̱ni, A̱gwaza si̱ tyia̱ a̱ si̱ shya̱ a̱fa, ku nang gu ku ngyet a̱na̱khwu, a̱ si̱ bu kwop ba̱t a̱ni. Sa̱ratu si̱ nwuak fwuo nang A̱gwaza na nyia̱ kyang hu nang gu nnyia̱ a̱li̱ka̱uli a̱ na nang mba a̱ni.[48]

¹²A̱wot huhwa mbyia̱, da̱ a̱vwuo Ibrahim kani kya, a̱tyu a̱ ku kwop a̱ si̱ bwat kpa̱mkpaan ma̱ng a̱khwu a̱ni, da̱ a̱vwuo nggu kya á̱ ku nshya̱ kwai ji si̱ saat. Ji̱ si̱ byia̱ á̱niet ba̱ shi á̱kpa ba̱t, ma̱nang á̱ ndyuut a̱ni, nyia̱, “Ba̱ shi á̱kpa nang á̱ta̱ngwat kyai tswazwa, ku a̱ji̱jak a̱beam kyai a̱sa̱khwot a̱ni.”[49]

¹³A̱mgba̱m á̱niet bani, ba̱ ku nwuak fwuo da̱ A̱gwaza a̱ni, ba̱ ku kwi nang ba̱ ni̱ shya̱ di̱ nwuak fwuo di̱ nkyang nang A̱gwaza nyia̱ a̱li̱ka̱uli a̱ na nyia̱ mba ndyo a̱ni. Ba̱ si̱ san nkyang nang A̱gwaza nyia̱ a̱li̱ka̱uli a̱ na nyia̱ mba ndyo a̱ni di̱n jen a̱ja bah. A̱mgba̱m ma̱ng a̱nia, mat nang ba̱ nnwuak fwuo da̱ A̱gwaza a̱ni, ba̱ si̱ li nkyang na̱ na bai á̱zanson a̱ni ma̱ gbang. A̱wot ba̱ si̱ san naa mbwak nfeang ma̱ng a̱lyia̱ sai. Ba̱ si̱ fi̱k nang ba̱ ngyet á̱nietchen bya ma̱ng á̱niet ba̱ chong á̱ sweap mi̱ swanta hu a̱ni.

¹⁴A̱tsak a̱lyiat, á̱niet ba ba̱ nyia̱ tangka̱i a̱di̱dam huni a̱ni, ba̱ tak kpa̱sai nang ba̱ nzop a̱byin ka ka̱ yet á̱si̱ mba a̱ni.

¹⁵Ka̱ ba̱ wa chat bwuok á̱ nat a̱byin ka nang ba̱ nneet a̱ni, si̱ ba̱ ku shya̱ a̱wat nang ba̱ na mbwuok á̱ nat a̱ja a̱ni.

¹⁶Da̱ a̱kwonu a̱kya, ba̱ ku tyia̱ fwuo da̱ a̱byin ka̱ swak mi̱ yet a̱ni. Kikya yet a̱byin Ma A̱gwaza tswazwa ka. Huhwa mbyia̱, A̱gwaza fa̱k nsum bah, a̱ yei mba á̱niet ngguu. A̱tsak a̱lyiat, a̱ wa ka̱n jhyi mba a̱keang swat.

¹⁷Mat nang Ibrahim nnwuak fwuo da̱ A̱gwaza a̱ni, a̱ si̱ neap Ishaku a̱ yet nggwon nggu ka nang za̱nang a̱ni da̱ a̱vwuo A̱gwaza, di̱n jen nang A̱gwaza ku mmak gu a̱ni. Ibrahim wa ku san a̱li̱ka̱uli nkwai nang A̱gwaza nyia̱ nggu ndyo a̱ni. A̱mgba̱m ma̱ng a̱nia, a̱ si̱ shim gu neap A̱gwaza nggwon nggu ka, nang gu byia̱ ma̱nyin ka a̱ni, ka̱ yet za̱nang,

¹⁸ku nang A̱gwaza ku nnyia̱ a̱li̱ka̱uli ma̱ng Ibrahim nyia̱, “Ishaku wa yet nggwon ang ka, mat nggu wa nang á̱ na ntyia̱ kwai ang ji, ji̱ nsaat,”[50]

¹⁹Ibrahim ku kyiak nyia̱ ki̱ Ishaku khwu, A̱gwaza byia̱ chet a̱ bu ta̱ngam guu ma̱ng swuan ma̱ á̱niet ba̱ ka̱n kwi a̱ni. A̱wot ma a̱nia wa ku si̱ ndi, á ngyei Ibrahim ma nsan Ishaku, nggwon nggu ka, ma̱ á̱niet ba̱ ka̱n kwi a̱ni.

²⁰Mat nang Ishaku ku nnwuak fwuo da̱ A̱gwaza a̱ni, a̱ si̱ nang mman nggu na, Yakubu ma̱ng Isuwa a̱nu, ba̱ ka shya̱ a̱li̱ba̱rka á̱zanson.

²¹Mat nang Yakubu nnwuak fwuo da̱ A̱gwaza a̱ni, di̱n jen nang gu ku nkwop, a̱ si̱ bwat kpa̱mkpaan ma̱ng a̱khwu a̱ni, a̱ si̱ nang kuzang nggwon Isuu a̱nu. A̱wot ma̱nang á̱ ndyuut a̱ni, nyia̱, “A̱ si̱ ta̱yuk di̱ shan a̱chyet nggu ji, a̱ si̱ kyuak ntong a̱zaghyi A̱gwaza.”[51]

²²Mat nang Isuu ku nnwuak fwuo da̱ A̱gwaza a̱ni, di̱n jen nang gu mbwat kpa̱mkpaan ma̱ng a̱khwu a̱ni, a̱ si̱ shei á̱zanson ma̱ng a̱lyia̱ nggu a̱nyiung nang á̱niet Isi̱rela ba na nghwut, ba̱ ghwon a̱byin Ma̱sa̱r ka. A̱wot a̱ si̱ tak ma̱ng mba ba̱ kwok nkunkup nggu na di̱n jen nang ba̱ na nghwon a̱byin Ma̱sa̱r ka a̱ni.

²³Mat nang á̱niet mbyin Musa ba ku nnwuak fwuo da̱ A̱gwaza a̱ni, ba̱ si̱ niat Musa di̱n jen byin nggu ji. A̱ si̱ nyia̱ zwát tsat nang gu shya̱ di̱ niat. Nang ba̱ ku ndi gu yet a̱tan nggwon, da̱ mba, ba̱ fa̱k a̱wun kam a̱gwam Fi̱ra̱una nyia̱ á̱ hyaai mman á̱sam Isi̱rela na bah.

²⁴Mat nang Musa ku nnwuak fwuo da̱ A̱gwaza di̱n jen nang gu ku nshi a̱ni, a̱ si̱ lak shim á̱ kyiak gu nang a̱tyu a̱ yet nggwon a̱nap a̱gwam Fi̱ra̱una kya a̱ni.

²⁵Musa ku khai a̱ nat da̱ a̱vwuo á̱niet A̱gwaza, mat a̱ ka swuo a̱bung dundung ma̱ng a̱mba; da̱ a̱kwonu ka nang gu na nswan Ma̱sa̱r gu fa̱k nyinyang a̱ka̱tuk nyia̱ da̱ a̱bada̱dei njen a̱ni.

²⁶Musa ku nyia̱ a̱di̱dam nang ku ngyet a̱ swak á̱ nyia̱ nggu lihyat da̱nian Kristi, nang gu na shya̱ zwá ma̱ a̱byin Ma̱sa̱r a̱ni; mat nang gu nnwuan a̱gba̱ndang zang nang gu na shya̱ á̱zanson a̱ni.

²⁷Mat nang Musa ku nnwuak fwuo da̱ A̱gwaza a̱ni, a̱ si̱ ghwon a̱byin Ma̱sa̱r ka. Da̱ nggu, a̱ ku fa̱k a̱wun mwai lyen nang a̱gwam Ma̱sa̱r wu na fa̱k a̱ni bah. A̱ si̱ gbang a̱lyia̱, a̱ si̱ lak bwuok lilyim hu. Mat a̱ ku tyia̱ á̱ghyi da̱ a̱tyu nang á̱ghyi a̱tyubishyi si̱ mi̱n di a̱ni bah.

²⁸Mat nang Musa ku nnwuak fwuo da̱ A̱gwaza a̱ni, a̱ si̱ tyia̱ á̱niet Isi̱rela ba si̱ song A̱yet Ghwut Mman Isi̱rela mi̱ Khwo hu. A̱wot a̱ si̱ bu tyia̱, ba̱ si̱ ya̱sang a̱sok a̱ kai nyinyiit na ma̱ a̱ka̱sa mba na; kalak a̱ta̱m tswa A̱gwaza wu gu hyaai mman á̱sam na̱ ku yet mman a̱ni̱nap Isi̱rela na a̱ni.

²⁹Mat nang á̱niet Isi̱rela ba ku nnwuak fwuo da̱ A̱gwaza a̱ni, ba̱ si̱ byia̱k A̱shong Kyai A̱sa̱khwot wu. Ba̱ si̱ chong ma̱nang gu wa yet a̱khwot a̱byin wa a̱ni. A̱wot nang á̱niet Ma̱sa̱r ba nkwan ba̱ fi̱n á̱niet Isi̱rela ba a̱ni, a̱sa̱khwot na si̱ kup mbaa. Ba̱ si̱ ya̱lyi̱ri̱p, ba̱ si̱ kwi.

³⁰Mat nang á̱niet Isi̱rela ba ku nnwuak fwuo da̱ A̱gwaza a̱ni, ba̱ si̱ nchong mami mam a̱natat á̱ kaat bat a̱keang Yeriko hu. A̱wot bat a̱keang hu si̱ kwa a̱byin ma̱ wurum!

³¹Mat nang Rahab, a̱byii̱k wu a̱ ku yet kham ji, ku nnwuak fwuo da̱ A̱gwaza a̱ni, a̱ si̱ nwai khwu ma̱ng á̱niet lak khwi A̱gwaza ba. Mat a̱ ku san á̱niet Isi̱rela ba mbwak nfeang, ba̱ ku bai zop a̱byin ka da̱ a̱bang a̱ni.[52]

³²Yihwa nang n mbyia̱ n bu na hyia̱? N byia̱ jen bah, si̱ n na ndyiat tazwa si̱sak nang Gidiyon, Ba̱rak, Samsin, Jefta, Da̱wuda, Sa̱mwila, mbeang a̱mgba̱m á̱kum a̱yaata̱m a̱kwonu A̱gwaza ba, ba̱ ku nwuak fwuo ba̱t da̱ A̱gwaza a̱ni.

³³Mat nang á̱niet bani ku nnwuak fwuo da̱ A̱gwaza a̱ni, ba̱ si̱ nswuo chet ntyok ma̱ a̱di̱di̱t. Ba̱ si̱ nyia̱ tyok tsotswat. A̱wot ba̱ si̱ san nkyang nang A̱gwaza ku nyia̱ a̱li̱ka̱uli, a̱ si̱ la̱p a̱ sak a̱ na nang mba a̱ni. Kang ma̱ng si̱ a̱hwa, ba̱ si̱ bu nyii nunu a̱yaazaki.

³⁴Ba̱ si̱ bu nyi̱ri̱p a̱ka̱lyera̱p ndong, a̱wot ba̱ si̱ shot a̱khwu ntswat. A̱gwaza si̱ tyia̱ sang chet vam mba hu, si̱ bwuak á̱ tyia̱ chet. Ba̱ si̱ byia̱ nchet da̱ a̱vwuo zwang. Ba̱ si̱ fi̱n á̱niet nzwang bibyin á̱ghyang, á̱niet nzwang a̱bya si̱ tyong á̱ nat ma̱ a̱ka̱vwuo ma̱ a̱di̱di̱t.

³⁵Mat nang á̱nyiuk á̱ghyang ku nnwuak fwuo da̱ A̱gwaza a̱ni, ba̱ si̱ san á̱niet nang ba̱ chat a̱ni ma̱ng swuan ma̱ á̱niet ba̱ ka̱n kwi a̱ni.[53] A̱wot á̱ghyang á̱niet nang á̱ ku nyiak a̱ni, ba̱ si̱ lak ghwon khwi A̱gwaza hu, da̱nian á̱ ka kai mba á̱ ghwon, ba̱ shot. Ba̱ ku tyia̱ fwuo di̱ swuan ji yet a̱ swak a̱ni, di̱n jen nang ba̱ bye ndoot ma̱ng swuan ma̱ á̱niet ba̱ ka̱n kwi a̱ni.

³⁶Á̱ghyang á̱niet ma̱ mba, á̱ ku mai mba di̱ lihyat. Á̱ si̱ tsot ba ma̱ng a̱ya̱u a̱ byia̱ pyipyia̱ ntswam a̱ni. Á̱ si̱ bwoi mba a̱fi̱fa̱t a̱zama. Á̱ghyang á̱niet ma̱ mba, á̱ ku vwuoi mbaa ma̱ng a̱nyanyang, á̱ si̱ tyia̱ mba mi̱ jaru.

³⁷Á̱ghyang á̱niet, á̱ si̱ mang mba ma̱ng nfang, ba̱ si̱ kwi. Á̱ghyang á̱niet, á̱ si̱ fak ba a̱ka̱fafaan, a̱wot á̱ghyang á̱ si̱ hyaai mba ma̱ng tswat. Á̱ghyang á̱niet ma̱ mba ku khwi á̱kukwa zón seap ma̱ng á̱si̱ nzón á̱ta̱m bya, á̱ tyong á̱ kat. Ba̱ si̱ yet á̱kunak nia ba̱t. Á̱ si̱ ya̱shuk mbaa, ba̱ si̱ swuo a̱bung ba̱t.

³⁸(Á̱niet khwi bani ku yet a̱tan bya ba̱t. Ba̱ si̱ myim ba̱ swan ma̱ a̱ka̱tuk swanta wuni bah!) Ba̱ ku tyong á̱ kat mi̱ tswa a̱yit. Ba̱ si̱ ban tsutsok á̱ nswuat. Ba̱ si̱ nwuai á̱ ya̱khwi mi̱ nkuu ma̱ng a̱bubwong a̱byin.

³⁹A̱mgba̱m á̱niet khwi bani, á̱ ku chyin ba ba̱t, mat si̱sak ji nang ba̱ nnwuak fwuo da̱ A̱gwaza a̱ni. A̱mgba̱m ma̱ng a̱nia, ba̱ si̱ san kyang hu nang A̱gwaza ku nyia̱ a̱li̱ka̱uli a̱ na nang ba a̱ni bah.

⁴⁰Mat A̱gwaza byia̱ a̱tsatsak kyang ma̱ a̱di̱dam nggu wu nang gu ku la̱p a̱ sak nzi̱t ndyo a̱ni. Da̱nian á̱niet khwi a̱bya, ba̱ ka yet á̱tsatsak á̱niet khwi nang A̱gwaza nchat ba̱ yet a̱ni ma̱nyin mba bah, si̱ dundung ma̱ng a̱nzi̱t.