Read tyap Ibriniyawa 2 Bible Online

Ibriniyawa 2 - tyap bible

Ibriniyawa 2

¹Mat a̱nia, nzi̱t ku yet ta hwa zi̱ ya a̱son ma̱ng ba̱ng a̱chuchuk nang á̱ ka̱n tyiet zi̱t a̱ni. A̱wot zi̱ nyia̱ ta̱m ma̱ng a̱nggu, kalak zi̱ ba̱ teap zi̱ ghwon vak a̱chuchuk hu.

²Mat ta̱m ji nang A̱gwaza ku nwuak a̱yaata̱m tswá nggu ba ba̱ shei a̱ni, yet a̱tsatsak wa. A̱wot kuzang a̱yin a̱ tyat doka, ku a̱ lak khwi nji a̱ni, á̱ si̱ ba̱ tyia̱ nggu swuo a̱bung ku myim nggu a̱ni.

³Mat a̱nia, zi̱ na nyia̱ ni, zi̱ nshot swuo a̱bung hu, ka̱nang zi̱ lak khwi nkhang a̱gba̱ndang san sang sangba̱p wu nang A̱tyoli Yesu ma̱ a̱pyia̱ nggu ku tsa shei hu a̱ni, a̱wot á̱niet ba̱ ku fa̱k a̱lyiat Yesu na a̱ni, ba̱ si̱ bu ta̱m ma̱ng a̱nzi̱t a̱tsatsak nta̱m a̱wa.

⁴A̱wot A̱gwaza ku tak nang ta̱m ji ngyet a̱tsatsak wa mat nkyang a̱ri̱bi̱di, nkyang a̱ga̱de, ma̱ng a̱lama a̱ tak a̱chuchuk A̱gwaza wu, ma̱ng ka̱u za̱náng chet A̱za̱za̱rak Ntswa da̱ á̱niet kuzang jen nang gu khai a̱ni.

⁵Mbeang a̱nia, a̱yaata̱m tswá A̱gwaza ba, bibya na nyia̱ tyok swanta chobai hu nang zi̱ lyiat a̱ni bah.

⁶A̱wot da̱ a̱vwuo á̱ghyang ma̱ A̱lyiat A̱gwaza na, á̱ tak nyia̱, “A̱gwaza, yihwa a̱tyubishyi yet nang a ndam tazwa nggu; ku nggwon a̱tyubishyi nang a chok a̱ni?

⁷A̱mgba̱m ma̱ng a̱nia, a si̱ nwuak gu shi ku tat kpa̱mkpaan ma̱ng si̱ a̱yaata̱m tswá a̱ni. A si̱ bu kup gu tyok, a si̱ nwuak gu shi.

⁸A si̱ tyia̱ kuzang kyang nang a mat a̱ni mbwak a̱tyubishyi.”[10] Nang ku ndi a̱nia a̱ni, á̱ si̱ bu nang a̱tyubishyi chet gu nyia̱ tyok tazwa kuzang kyang. Nang á̱ nyia̱ “kuzang kyang” a̱ni, á̱ byia̱ kyang nang á̱ bwat nang a̱tyubishyi nwai nyia̱ tyok a̱ni bah. A̱mgba̱m ma̱ng a̱nia, ba̱ng ba̱ tat a̱fwun, zi̱ ka̱n di á̱ tyia̱ a̱mgba̱m kuzang kyang mbwak a̱tyubishyi nang gu nnyia̱ tyok a̱ni bah.

⁹A̱wot a̱tyu nang zi̱ lyen a̱ni, Yesu wa, da̱ ba chak a̱ghyang, a̱ si̱ ghyuai a̱kyenkyai shi nggu wu ma̱nang á̱ ku nhyia̱ nyia̱, “A na nwuak gu shi ku tat kpa̱mkpaan ma̱ng á̱si̱ a̱yaata̱m tswá a̱ni.” Di̱ yong huni, Yesu wa nang, “Á̱ kup gu tyok, a̱ si̱ nwuak gu shi,” mat a̱ ku swuo a̱bung, a̱ si̱ khwu da̱nian zi̱t. A̱tsak a̱lyiat, mat shok A̱gwaza ja, ntyia̱ Yesu si̱ nkhwu da̱nian konyan.

¹⁰A̱tsak a̱lyiat, ku yet a̱sham ba̱t A̱gwaza a̱ mat a̱ si̱ chok kuzang kyang ku li nang gu nchat a̱ni; nggu wa khai a̱ si̱ tyia̱ á̱niet khwi ma̱ a̱di̱di̱t ba̱ shya̱ a̱kyenkyai shi nggu wu. A̱wot A̱gwaza si̱ li ku myim gu tyia̱ Yesu a̱ yet a̱tsatsak a̱kwak a̱son, a̱ maai a̱ san a̱mgba̱m á̱niet ba, mat swuo a̱bung nggu hu.

¹¹Mat a̱nia, ma̱ninika, Yesu ma̱ng á̱niet nang gu chi a̱ka̱tuk nyia̱ mba wu, a̱ si̱ tyia̱ ba̱ yet á̱za̱za̱rak a̱ni; ba̱ byia̱ A̱gwaza a̱nyiung wa, a̱ yet A̱tyia̱ a̱ni. Huhwa mbyia̱ Yesu si̱ ngyorong mba á̱na̱nyiuk nggu, di̱ mi̱n fa̱k nsum.

¹²Mat a̱nia, Yesu si̱ nyia̱ ma̱ng A̱gwaza a̱ni, “N na shei a̱lyoot ang ka da̱ a̱vwuo á̱na̱nyiuk nung ba. N na dyep ang mami á̱kpa á̱niet ang ba ba̱ tung a̱ni.”[11]

¹³Yesu si̱ bu nyia̱, “N na nwuak fwuo nung hu da̱ A̱gwaza.” Á̱ fa, “Nung ma̱ng mman nung na[12] nang A̱gwaza tyia̱ nung dyo mbwak a̱ni.”[13]

¹⁴Mat a̱nia, nang mman A̱gwaza na ngyet á̱nietbishyi bya ba̱ byia̱ vam ma̱ng a̱sok a̱ni, ma a̱nia wa nang Nggwon A̱gwaza ka mbai a̱ni, ka̱ byia̱ vam ma̱ng a̱sok. Mat di̱ yet a̱tyubishyi hwa ma̱nyin nhu nang ka̱ nkhwu. A̱wot mat a̱khwu Nggwon kikya ma̱nyin ka nang ka̱ na nswuo chet A̱ta̱nyeang, ka̱ byia̱ chet tyei á̱nietbishyi ba̱ kwi a̱ni.

¹⁵Di̱ nvak huni hwa ma̱nyin hu nang Nggwon ka na nti̱n a̱mgba̱m á̱niet ba ba̱ ku swan swat mba hu nang á̱khwo a̱ni, mat ba̱ fwuong a̱wun a̱khwu.

¹⁶A̱tsak a̱lyiat, zi̱ lyen nang Nggwon A̱gwaza ka ku mbai ka̱ ka beang a̱yaata̱m tswá A̱gwaza bya bah. Da̱ a̱kwonu a̱kya, ka̱ ku bai ka̱ beang á̱ka̱mbwon Ibrahim nia.

¹⁷Mat a̱nia, A̱gwaza si̱ li ku myim gu bwuak Nggwon nggu ka ka̱ tyia̱ cha̱chaat ma̱ng za̱kwa nzi̱t, zi̱ yet á̱na̱nyiuk nka a̱ni. Da̱nian gu ka yet zi̱t a̱tsotswat a̱gba̱ndang pris a̱ fwuong kunak zi̱t a̱ yong a̱zaghyi A̱gwaza a̱ni. Huhwa mbyia̱ gu mmaai a̱ neap za̱nang ji na chi ji̱ ti̱n a̱ka̱tuk nyia̱ á̱niet nggu wu a̱ni.

¹⁸Mat nang á̱ ku mmak Yesu ma̱ a̱pyia̱ nggu, a̱ si̱ swuo a̱bung a̱ni; ma a̱nia wa nang nggu mbyia̱ chet nang gu na mbeang nzi̱t, di̱n jen nang á̱ mmai nzi̱t a̱ni.