Read tyap Ibriniyawa 3 Bible Online

Ibriniyawa 3 - tyap bible

Ibriniyawa 3

¹Mat a̱nia, nyin á̱na̱nyiuk nung ba nyi yet á̱za̱za̱rak á̱niet khwi Yesu, a̱wot nyi si̱ bu yet á̱kpa̱ndang ta̱m nang A̱gwaza yorong nyi nwuo tyok tswazwa hu a̱ni; nyi nyia̱ a̱di̱dam shansham tazwa Yesu, a̱tyu nang zi̱ shei a̱ yet a̱ta̱m A̱gwaza. A̱ si̱ bu yet A̱gba̱ndang Pris a̱ni.

²Mat Yesu ku yet a̱tsotswat di̱ nta̱m nang A̱gwaza khai nggu gu nyia̱ a̱ni; ma̱nang Musa ku ngyet a̱tsotswat di̱ nta̱m, di̱n jen nang A̱gwaza ku ntyia̱ a̱li Isi̱rela ka mbwak nggu a̱ni.[14]

³A̱wot Yesu maai á̱ nwuak nggu shi a̱ swak si̱ Musa hu, ma̱nang a̱yin ni̱ nok a̱li á̱ chyin nggu a̱ swak a̱li ka nang gu nok a̱ni.

⁴Mat kuzang a̱li byia̱ a̱tyu a̱ ni̱ nok ka a̱ni. A̱wot A̱gwaza wa ni̱ nok kuzang kyang.

⁵Mami a̱chuchuk, Musa ku yet a̱tsotswat a̱khwo wa a̱mali A̱gwaza ka. Ta̱m nggu hu ku tak kidee a̱tsatsak nkyang nang A̱gwaza na tyai di̱n jen jhyang á̱zanson a̱ni.

⁶A̱wot Kristi si̱ nyia̱ tsotswat mat a̱ yet Nggwon kya nang á̱ tyia̱ nggu a̱li A̱gwaza ka mbwak a̱ni. A̱wot zi̱ bya li nang a̱li A̱gwaza ka a̱ni, ka̱ zi̱ gbang a̱lyia̱, zi̱ si̱ nwuak a̱chuchuk di̱ tyia̱ fwuo nzi̱t hu di̱ Kristi.

⁷Mat a̱nia, ma̱nang A̱za̱za̱rak Ntswa wu nhyia̱ a̱ni, “A̱fwun, ka̱ nyi fa̱k a̱nwuat A̱gwaza ka,

⁸nyi yok nyia̱ fufwuo nchet bah, ma̱nang á̱niet Isi̱rela ba ku nnyia̱, ba̱ si̱ tyia̱ zat, di̱n jen nang ba̱ ku mmak nung mi̱ tswa a̱yit ji a̱ni.

⁹A̱ja wa a̱yaatyia̱ a̱khwop nyin ba ku kwan ba̱ mak ba̱ li nyap fwuo nung hu da̱ mba a̱ni; ku nang ba̱ ku ndi nta̱m a̱ri̱bi̱di nang n nyia̱ mba ndyo mi̱ ndyia̱ nswak naai na a̱ni.

¹⁰Huhwa si̱ mbyia̱, n si̱ mwai lyen ma̱ng che a̱ja. A̱wot n si̱ nyia̱, ‘Kuzang jen nfwuo mba na bwan á̱ tyei zan á̱ ghwon nung. Ba̱ lak khwi doka nang n tak ba ba̱ khwi a̱ni.’

¹¹Mat a̱nia, mwai lyen nung hu si̱ tyia̱, n si̱ kyiak shyishyi, nyia̱, ‘Ba̱ si̱ mi̱n mak nwuo da̱ a̱vwuo fwung nung ka bah!’ ”[15]

¹²Ma a̱nia wa, nyin á̱niet khwi Yesu ba nang n chat a̱ni, nyi ta̱bam nyi li nang nfwuo nyin na byia̱ a̱ka̱tuk ma̱ng nwai nwuak fwuo da̱ A̱gwaza bah; kalak na̱ bwan nyin á̱ tyia̱ zan nyi ghwon khwi A̱gwaza nswuan wu.

¹³Da̱ a̱kwonu a̱kya, ku yet ta hwa, nyi ni̱ ntyia̱ á̱ghyang nyin gba̱gbak kuzang a̱tuk, neet nang nyi byia̱ jen “a̱fwun.” Kalak di̱ si̱sak nang nyi nnyia̱ a̱ka̱tuk a̱ni, gu laai nyin a̱ tyia̱ nyi nyia̱ A̱gwaza fufwuo nchet.

¹⁴Mat ki̱ zi̱ nyia̱ tsotswat si̱ nat sangba̱p swuan nzi̱t ji, zi̱ si̱ yong mi̱ chet di̱ nwuak fwuo da̱ A̱gwaza, ma̱nang zi̱ ku ntsa nwuak fwuo hu a̱ni; a̱mgba̱m nzi̱t, zi̱ na yet á̱kpa̱ndang ta̱m zi̱ ya gado dundung ma̱ng Kristi.

¹⁵Nyi bu jhyung kyang nang A̱lyiat A̱gwaza na hyia̱ a̱ni: “A̱fwun, ka̱ nyi fa̱k a̱nwuat A̱gwaza ka, nyi yok nyia̱ fufwuo nchet bah; ma̱nang á̱niet Isi̱rela ba ku nnyia̱, di̱n jen nang ba̱ ku ntyia̱ zat a̱ni.”[16]

¹⁶Ka̱ a̱nia wa, a̱nyanyan bya ku tyia̱ A̱gwaza wu zat ji, ku nang ba̱ ku nfa̱k a̱nwuat nggu ka a̱ni? N wa ngyei mi̱ bibya yet á̱niet ba nang Musa ku kwak ba a̱son ka, a̱ ghwut ndyo ma̱ a̱byin Ma̱sa̱r ka a̱ni a?

¹⁷A̱wot a̱nyanyan bya nang A̱gwaza ku mwai lyen hu ma̱ng a̱mba, si̱ nat a̱lyia̱ swak naai ka? N wa ngyei ma̱ á̱niet ba ba̱ ku nyia̱ a̱ka̱tuk nyia̱ wu, ba̱ si̱ kwi, á̱ si̱ ghwon nkwom mba na mi̱ tswa a̱yit ji a̱ni a?

¹⁸A̱wot a̱nyanyan bya nang A̱gwaza ku lyiat di̱n jen nang gu ku nkyiak shyishyi nyia̱, di̱ ba̱ na nwuo ma̱ a̱byin ka nang gu na nnang mba jen fwung ji a̱ni bah? N wa ngyei mi̱ bibya yet á̱niet ba, ba̱ ku tyia̱ zat ji a̱ni a?

¹⁹Mat a̱nia, zi̱ li nang ba̱ lyin nwuo ma̱ a̱byin fwung ka, mat nwai nwuak nfwuo mba ni̱nia da̱ A̱gwaza.