Read tyap Ibriniyawa 4 Bible Online

Ibriniyawa 4 - tyap bible

Ibriniyawa 4

¹Mat a̱nia, ma̱nang a̱li̱ka̱uli nwuo mi̱ fwung A̱gwaza hu ni̱ nshya̱ a̱ni, ku myim nyi swan cham ma̱ng a̱wun. Kalak á̱ghyang á̱niet ma̱ nyin ba̱ ba̱ lyin nwuo mi̱ fwung A̱gwaza hu.

²Zi̱ ka̱n fa̱k A̱sham Nkhang ka tazwa fwung huni, a̱wot á̱ si̱ shei nzi̱t kaa ma̱nang á̱ ku nshei a̱yaatyia̱ a̱khwop nyin ba a̱ni. A̱wot nang ba̱ nfa̱k nkhang na a̱ni, na̱ si̱ beang mba bah. Mat, ba̱ ku lak nwuak a̱chuchuk da̱ na. Ba̱ si̱ lak mun á̱pyia̱ ma̱ng á̱niet ba̱ ku khwi a̱lyiat A̱gwaza na a̱ni[17].

³Ma̱ninika, ma̱ nzi̱t zi̱ nwuak fwuo da̱ A̱gwaza a̱ni, nzi̱t bya na nwuo fwung A̱gwaza hu. Ma̱nang A̱gwaza nhyia̱ ma̱ng á̱kum á̱niet ka ba̱ nwai nwuak fwuo hu a̱ni, nyia̱, “Mami mwai lyen, n si̱ nkyiak shyishyi nyia̱, ‘Ba̱ na nwuo da̱ a̱vwuo fwung nung ka bah!’ ”[18] A̱gwaza nyia̱ a̱nia, ku nang gu ku mi̱ ntyak nta̱m jhyi a̱vwuo fwung na neet mi̱ di̱ nyia̱ swanta hu a̱ni.

⁴Mat á̱ lyuut ma̱ A̱lyiat A̱gwaza na nyia̱, “A̱tuk mam a̱natat ka, A̱gwaza si̱ fwung nyia̱ a̱mgba̱m nta̱m nggu na.”[19]

⁵A̱wot á̱ bu lyuut, nyia̱, “Ba̱ na mak nwuo da̱ a̱vwuo fwung nung ka bah!”[20]

⁶Mat a̱nia, fwung A̱gwaza hu ni̱ shya̱ da̱nian á̱niet ba̱ nnwuo. A̱wot a̱yaatyia̱ a̱khwop ba̱ ku mi̱ ntsa fa̱k A̱sham Nkhang fwung ka a̱ni, ba̱ ku nwuo bah. Mat, ba̱ ku lak khwi a̱lyiat A̱gwaza na.

⁷Mat a̱nia, A̱gwaza si̱ bu sak jen jhyang da̱nian á̱niet ba̱ ka nnwuo mi̱ fwung nggu hu. A̱wot jen jini á̱ ngyei, “A̱fwun” kya. Á̱ si̱ kyiak a̱junjung jen, A̱gwaza si̱ bu tak a̱lyiat nani a̱bwonu Da̱wuda, ma̱nang á̱ ku nhyia̱ a̱ni, nyia̱, “A̱fwun, ka̱ nyi fa̱k a̱nwuat nggu ka, nyi yok nyia̱ fufwuo nchet bah.”[21]

⁸Ka̱ Joshuwa wa ku maai a̱ tyia̱ á̱niet Isi̱rela ba fwung nang A̱gwaza ku nyia̱ a̱li̱ka̱uli wu a̱ni, si̱ A̱gwaza bu ku lyiat tazwa a̱tuk Mam Fwung a̱ghyang ka̱ chobai á̱zanson a̱ni bah.

⁹Mat a̱nia, á̱ sak tangka̱i a̱tsatsak fwung a̱ghyang nang á̱niet A̱gwaza ba fwuong a̱ni.

¹⁰Mat konyan wa shya̱ fwung A̱gwaza a̱hwa a̱ni, a̱ fwung nta̱m nggu ni̱nia; ma̱nang A̱gwaza ku ntyak nyia̱ swanta hu, a̱ si̱ fwung a̱ni.

¹¹Mat a̱nia, si̱ zi̱ kwan ba̱t zi̱ ka nwuo fwung a̱hwa! A̱wot ki̱ zi̱ lak khwi a̱lyiat A̱gwaza na, ma̱nang á̱niet Isi̱rela ba ku nnyia̱ a̱ni, zi̱ na kwa mut!

¹²Mat A̱lyiat A̱gwaza na yet a̱chet. A̱wot na̱ si̱ byia̱ chet ba̱t. Na̱ ya á̱ lan tswat ji̱ byia̱ nunu feang ji̱ si̱ ya ba̱t a̱ni, na̱ ni̱ kai á̱ nwuo a̱ka̱wa̱tyia̱ swuan ma̱ng tswa, ma̱ng nkap vam, ma̱ng fwu hu. Na̱ zop a̱di̱dam mi̱ fwuo nzi̱t wu, ma̱ng kyang hu zi̱ chat a̱ni, na̱ ghwut ndyo kpa̱sai.

¹³Mami a̱mgba̱m nkyang nang A̱gwaza mat a̱ni, á̱ mbyia̱ kyang nyiung ku shya̱ di̱ niat da̱ a̱vwuo nggu a̱ni bah. Kuzang kyang shya̱ ka̱gbang, a̱wot ku si̱ shya̱ kpa̱sai a̱zaghyi nggu. A̱wot nggu wa yet a̱tyu nang konyan na nfang kuzang kyang gu nyia̱ a̱ni a̱zaghyi nggu.

¹⁴Mat a̱nia, nang zi̱ mbyia̱ a̱gba̱ndang pris a̱ swak ma̱ng shi a̱ni, nggu wa ka̱n nwuo Ma A̱gwaza tswazwa, nggu wa yet Yesu, Nggwon A̱gwaza ka; yok zi̱ yong mi̱ chet di̱ nwuak fwuo nzi̱t hu da̱ nggu.

¹⁵Mat zi̱ byia̱ A̱gba̱ndang Pris, a̱ fi̱k lat nzi̱t hu a̱ni za̱m. Mat á̱ ku mak gu ma̱nang á̱ mmai nzi̱t a̱ni. A̱mgba̱m ma̱ng a̱nia, á̱ si̱ shya̱ nggu ma̱ng a̱ka̱tuk nyia̱ bah.

¹⁶Mat a̱nia, si̱ zi̱ gbang a̱lyia̱ zi̱ bai a̱zaghyi a̱gba̱ndang chuk Tyok A̱gwaza a̱ byia̱ shok a̱ni ma̱ sa̱t, gu ka fa̱k kunak zi̱t, zi̱ shya̱ shok nggu ji, ji̱ beang zi̱t di̱n jen ji nang zi̱ nchat ji a̱ni.