Read tyap Ibriniyawa 6 Bible Online

Ibriniyawa 6 - tyap bible

Ibriniyawa 6

¹Mat a̱nia, zi̱ yok ya a̱son ma̱ng a̱tyin tyiet tazwa Kristi kuzang jen bah. Da̱ a̱kwonu a̱kya, yok zi̱ kwan zi̱ yet á̱niet tat á̱ghyi di̱ fi̱k A̱lyiat A̱gwaza na. A̱tsak a̱lyiat, zi̱ chat zi̱ bu tsa ma̱ng a̱tsatsak a̱tyin tyiet bah. Tyiet huni yet si̱ ku myim á̱niet ba̱ nghwon nta̱m a̱ka̱tuk nyia̱, ba̱ sii nwuak fwuo da̱ A̱gwaza a̱ni.

²Nyi bu chat tyiet ghyáng tazwa taada kwi vam, saai mbwak[23], doot ma̱ng swuan ma̱ á̱niet ba̱ ka̱n kwi a̱ni, ku shi̱ri̱ya sang sangba̱p bah.

³Ka̱ A̱gwaza shim, zi̱ na ya a̱son ma̱ng khwi tyiet ku myim á̱niet tat á̱ghyi a̱ni.

⁴Tangka̱i á̱niet ba̱ ka̱n shya̱ sai A̱gwaza hu mi̱ nfwuo mba na, ba̱ si̱ san a̱tan za̱nang ji̱ neet Ma A̱gwaza tswazwa, a̱wot A̱za̱za̱rak Ntswa wu si̱ nyia̱ ta̱m ma̱ng a̱mba,

⁵ba̱ si̱ bu shya̱ a̱tsatsak tyiet a̱lyiat A̱gwaza wu, á̱si̱ ba nang chet jen chobai ka̱n nyia̱ nta̱m ma̱ng a̱mba a̱ni;

⁶ntangka̱i á̱niet nani, ba̱ ka̱n shya̱ á̱tsatsak nkyang nani a̱ni, ka̱ ba̱ teap á̱ ghwon vak khwi A̱gwaza hu, ku si̱ mi̱n tyia̱ á̱ bwuok ma̱ng ntangka̱i á̱niet nani, ba̱ bu ghwon a̱ka̱tuk mba wu bah. Kyang ku mbyia̱ a̱ni, huhwa yet; ba̱ lak Nggwon A̱gwaza ka. A̱wot ku si̱ li nang a̱mba ma̱ á̱pyia̱ mba, ba̱ bu nkpang nka da̱ a̱team a̱khwu wu a̱ka̱feang kya a̱ni. A̱wot ba̱ bu tyei nka nsum kpa̱sai mami á̱niet.

⁷Nyi fa̱k, a̱byin ka̱ kwak a̱sa̱khwot nza na̱ kwa̱i da̱ nka a̱ni, ka̱ ni̱ byang ka̱ nwuak a̱tyu khap wu a̱tan yak. Ku ni̱ tak nang A̱gwaza wa ntyia̱ a̱li̱ba̱rka wu.

⁸A̱wot ka̱ a̱byin ka ma nta sa̱kan ja ma̱ng long a̱byin, ka̱ yet a̱buk a̱byin wa. Ka̱ bwat ma̱ chunchwiit A̱gwaza a̱ shyi nkaa. A̱wot á̱ fwui nka.

⁹Nyin á̱niet khwi Yesu ba nang n chat a̱ni, ku nang zi̱ ndyiat a̱nia a̱ni, zi̱ nwuak a̱chuchuk zi̱ li a̱tan nta̱m da̱ a̱vwuo nyin. Na̱ na tyia̱ nyi nshya̱ san di̱ ngaan hu a̱ni.

¹⁰A̱tsak a̱lyiat, A̱gwaza nyia̱ shi̱ri̱ya nggu ji tsotswat. Mat a̱nia, a̱ na jhyung ba̱t si̱sak nang nyi ka̱n nyia̱ nggu nta̱m a̱ni; ma̱ng si̱sak nang nyi nchat gu, nyi si̱ beang á̱niet khwi nggu ba a̱ni. A̱wot nyi ni̱ ya a̱son ma̱ng beang mba hu.

¹¹Zi̱ chat ba̱t nyi ntyia̱ a̱lyia̱, nyi ya a̱son ma̱ng chat á̱ghyang nyin hu, si̱ nat jen nang Yesu na mbwuok a̱ni. Mat nyi ka lyen za̱m nang nkyang nang nyi ntyia̱ fwuo hu a̱ni, na̱ na yet a̱tsatsak a̱lyiat wa.

¹²A̱jawa nyi na ngyet a̱gba̱pdok ma̱ng á̱niet sang a̱ka̱ta di̱ nyia̱ nta̱m A̱za̱za̱rak Ntswa na bah. Da̱ a̱kwonu a̱kya, nyi na khwi kidee á̱niet ba̱ san gado nang A̱gwaza nyia̱ a̱li̱ka̱uli a̱ na nang mba, mat nwuak fwuo mba ma̱ng gbang a̱lyia̱ mba hu da̱ nggu a̱ni.

¹³Jen nang A̱gwaza ku nyia̱ Ibrahim a̱li̱ka̱uli wu a̱ni, nang á̱ mbyia̱ a̱tyu a̱ swak A̱gwaza ma̱ng tyok nang A̱gwaza na nshyi da̱ a̱lyoot nggu a̱ni bah. A̱ si̱ kyiak shyishyi da̱ a̱lyoot a̱pyia̱ nggu, nyia̱,

¹⁴“A̱tsak a̱lyiat, n na tyia̱ ang a̱li̱ba̱rka ba̱t. A̱wot n na tyia̱ kwai ang ji, ji̱ saat nang a̱yin si̱ mi̱n fang ji a̱ni bah.”[24]

¹⁵Mat a̱nia, Ibrahim si̱ nyap fwuo, a̱ si̱ fwuong. A̱wot a̱ si̱ san kyang nang A̱gwaza nyia̱ a̱li̱ka̱uli a̱ na nang nggu a̱ni.

¹⁶A̱wot ma̱ninika, ka̱ á̱nietbishyi kyiak shyishyi, ba̱ ni̱ kyiak shyishyi ji da̱ a̱lyoot a̱tyu a̱ swak ba ma̱ng tyok a̱ni. Da̱nian shyishyi a̱ja, ji̱ ka yong chi̱k di̱ kyang nang ba̱ nshyi a̱ni. A̱wot a̱yin bu na mbyia̱ ya fwuang bah, mat shyishyi ji wa ka̱n ngyong.

¹⁷Ma a̱nia wa, A̱gwaza ku chat a̱ tak la̱p sak nggu hu kpa̱sai da̱ a̱vwuo á̱niet ba̱ na ya gado a̱li̱ka̱uli hu a̱ni. Mat a̱nia, a̱ si̱ kyiak shyishyi da̱ a̱lyoot a̱pyia̱ nggu, nyia̱ da̱ a̱ na shyak fwuo nggu hu bah.

¹⁸A̱gwaza ka̱n dyiat tazwa nkyang nfeang nani; ni̱nia yet a̱li̱ka̱uli ma̱ng shyishyi nggu ji. Na̱ si̱ mi̱n shyak bah, mat ku si̱ mi̱n tyia̱ A̱gwaza a̱ bwuo la bah. A̱ nyia̱ a̱li̱ka̱uli ma̱ng shyishyi, da̱nian a̱ ka tyia̱ nzi̱t gba̱gbak zi̱ ntyia̱ fwuo ba̱t ma̱ng gbang a̱lyia̱ di̱ san ku shya̱ á̱zanson nzi̱t a̱ni, nzi̱t á̱niet zi̱ tyong naat da̱ a̱vwuo A̱gwaza di̱ chat a̱vwuo ta̱kup a̱ni.

¹⁹Nang zi̱ ntyia̱ fwuo da̱ nggu a̱ni, a̱ si̱ tyia̱ nfwuo nzi̱t na na̱ byia̱ chet. A̱wot á̱ si̱ mi̱n shyei na bah. Tyia̱ fwuo nzi̱t hu swan kpa̱p nang tswam ji̱ ba̱ng kukwon a̱wak ku yong da̱ a̱vwuo a̱nyiung a̱ni. Tyia̱ fwuo nzi̱t hu, bu nwuak zi̱t chet zi̱ nwuo mi̱ a̱gba̱ndang a̱kpi̱mi̱mi̱t a̱teap wu nang á̱ lya̱u á̱ fwun A̱swang ka̱ Swak Ma̱ng yet A̱za̱za̱rak A̱mali Nwuat Za̱nang ka̱ shya̱ Ma A̱gwaza tswazwa ka a̱ni.

²⁰Yesu wa ka̱n khwat a̱son zi̱t. A̱ si̱ nwuo ma̱ A̱za̱za̱rak A̱swang wu da̱nian nzi̱t. Mat nggu wa ka̱n gyet A̱gba̱ndang Pris sang sangba̱p, ma̱nang tangka̱i pris ku neet mi̱ sot a̱yaapris Ma̱lkiza̱dek a̱ni.