Read tyap Yakubu 2 Bible Online

Yakubu 2 - tyap bible

Yakubu 2

¹Nyin á̱niet khwi Yesu ba nang n chat a̱ni! Ki̱ nyi khai á̱niet da̱ á̱ghyi ghwon á̱ghyang, nyi na nyia̱ ni nyi ntak nwuak fwuo nyin hu da̱ A̱tyoli Yesu Kristi a̱ byia̱ a̱kyenkyai shi wu a̱ni?

²Kidee, ki̱ nyi shya̱ ma̱ a̱tung[5] sot á̱niet khwi, a̱yin si̱ bai nang gu kup a̱tsatsak a̱yaatoot, a̱ si̱ tyia̱ nyuák ji̱ yet a̱mya̱myat ji̱ byia̱ kurum a̱ni mi̱ ga̱swuong; a̱wot a̱ghyang a̱niet si̱ ma mbai a̱ yet a̱kunak kya, a̱ si̱ kup a̱kyakyak a̱yaatoot.

³Ki̱ nyi byiat a̱tyu nzwa wu shansham, a̱wot nyi si̱ nyia̱, “Swan ma̱ a̱tsatsak kyang swat wuni!” A̱wot nyi si̱ nyia̱ ma̱ a̱tyu kunak wu, “Yong a̱jaau!” Ku “A swan a̱byin!”

⁴Tangka̱i khai á̱niet da̱ á̱ghyi huni tak nang nyi ntai á̱ka̱tuk á̱niet nyia̱ shi̱ri̱ya mi̱ swanta hu, ba̱ ni̱ khai á̱niet da̱ á̱ghyi a̱ni.

⁵Nyin á̱niet khwi Yesu ba nang n chat a̱ni, nyi myiai a̱fufwuo nyi fa̱a̱k! A̱gwaza wu khai á̱kunak na mi̱ swanta huni, ba̱ yet á̱niet a̱tsak nzwa mat nwuak fwuo hwa da̱ nggu baa? Bibya yet á̱niet ba̱ na ya gado tyok nang A̱gwaza nyia̱ a̱li̱ka̱uli a̱ na nang á̱niet ba̱ chat gu a̱ni baa?

⁶A̱wot nyi jhyuai á̱kunak na! Mee á̱niet nzwá bibya shyui nyin, ba̱ si̱ kwak nyin á̱ chong ndyo mi̱ tutu shi̱ri̱ya hu baa?

⁷Á̱niet nzwá bibya bu lyiat a̱ka̱tuk tazwa a̱chuchuk a̱lyoot Yesu Kristi, nang á̱ yei nyin da̱ nka a̱ni baa?

⁸A̱tsak a̱lyiat, ka̱ nyi khwi doka Tyok A̱gwaza ji, nang á̱ lyuut ma̱ A̱lyiat A̱gwaza na a̱ni, nyia̱, “Chat a̱kpa̱ndang swat ang wu, ma̱nang a nchat a̱pyia̱ ang a̱ni.”[6] Si̱ a̱hwa myim a̱nia.

⁹A̱wot ka̱ nyi khai á̱ghyang á̱niet da̱ á̱ghyi, nyi si̱ nyia̱ mba a̱tan nta̱m, a̱wot nyi si̱ ghwon á̱ghyang, nyi nyia̱ a̱ka̱tuk nyia̱ wa a̱wa. Nyi bwuo a̱bun nang nyi ntyat doka A̱gwaza ji a̱ni.

¹⁰A̱tyu a̱ khwi a̱mgba̱m doká A̱gwaza ji, a̱wot a̱ si̱ ba̱ ghwon jhyung a̱ni, ku fa a̱ bwuo a̱bun a̱zaghyi A̱gwaza ma̱nang a̱tyu a̱ nwai khwi a̱mgba̱m doká ji a̱ni.

¹¹A̱gwaza wu a̱ tak nyia̱, “A yok katnaan” a̱ni, nggu wa bu tak nyia̱, “A yok hyat a̱yin bah.” Ku da̱nang a katnaan bah, a̱wot a si̱ hyat a̱yin, ku fa nang a ngyet a̱tyu tyat doka A̱gwaza wa.

¹²Mat a̱nia, nyi yok bwung bah, kuzang kyang nang nyi lyiat, ku nyi nyia̱ a̱ni, á̱ na nyia̱ nyin shi̱ri̱ya ma̱ng doka ji, ji̱ nwuat nyin sa̱t hu a̱ni.

¹³A̱tyu da̱ a̱ fwuong kunak á̱ghyang á̱niet a̱ni bah, A̱gwaza ma na fa̱k kunak gu bah. A̱wot a̱tyu a̱ fwuong kunak á̱ghyang á̱niet a̱ni, A̱gwaza ma na fa̱k kunak gu di̱n jen nang gu na nnyia̱ nggu shi̱ri̱ya a̱ni.[7]

¹⁴Nyin á̱niet khwi Yesu ba nang n chat a̱ni, zang kpangti̱n ja nang a̱yin na shya̱ ka̱ a̱ kyiak nyia̱ a̱ nwuak a̱chuchuk, a̱wot da̱nang gu tak hu di̱ nyia̱ a̱tan nta̱m bah? Ka̱ doot tangka̱i nwuak a̱chuchuk a̱hwa ku san a̱yin a?

¹⁵Kidee, ka a li a̱na̱nyiuk ang gu sang kyayak, ku a̱toot kup,

¹⁶a̱wot a si̱ nyia̱ ma̱ng a̱nggu, “A si̱ kwai shansham, yok A̱gwaza a̱ nang ang kyayak ma̱ng a̱toot kup,” a̱wot da̱ nwan, a nang a̱tyu a̱wa kyayak ma̱ng a̱toot kup bah. Si̱ a̱hwa yet a̱tan ta̱m wa ku na beang gu a̱ni a?

¹⁷Ma a̱nia wa, nwuak a̱chuchuk hu ma̱nyin hu di̱ mi̱n nyia̱ a̱tan ta̱m ku maai bah. Ku yet mi̱ kwom hwa ma̱ng a̱buk kyang.

¹⁸A̱wot ka̱ a̱yin ya fwuang nyia̱, “Á̱ghyang á̱niet tyia̱ fwuo di̱ nwuak a̱chuchuk. Á̱ghyang á̱niet si̱ ma ntyia̱ fwuo di̱ nyia̱ a̱tan nta̱m.”[8] A̱wot n si̱ ndyip, nyia̱, “A na nyia̱ ni wa a ntak nung nwuak a̱chuchuk ang hu, ka̱nang a nyia̱ a̱tan nta̱m bah? Nung, n na tak ang nwuak a̱chuchuk nung hu, mat a̱tan nta̱m nung wu.”

¹⁹A kyiak nyia̱ a nwuak a̱chuchuk, mat a nwuak a̱chuchuk nang A̱gwaza a̱nyiung wa nshya̱. Ka a shim nyia̱ a̱nia wa, ku yet a̱sham! Ku á̱ka̱tuk ntswá ba meang, nwuak a̱chuchuk nang A̱gwaza nshya̱. A̱wot ba̱ si̱ tyi̱ri̱m vam a̱zaghyi nggu ma̱ng a̱gba̱ndang a̱wun.

²⁰Nwan a̱bwuon a̱yin! A chat si̱ á̱ tak ma̱ng a̱nwan nang nwuak a̱chuchuk di̱ mi̱ nyia̱ a̱tan nta̱m ngyet a̱buk kyang waa?

²¹Jhyung a̱tyia̱ a̱khwop nzi̱t wu Ibrahim; mat nang gu ku nneap a̱fai nggu wu Ishaku da̱ a̱tyii nwuat za̱nang A̱gwaza wu a̱ni, a̱tan ta̱m gu a̱wa si̱ tak nang A̱gwaza ntak kpa̱sai nang gu nkyiak gu nang a̱tsotswat a̱yin a̱ sang a̱bun a̱zaghyi gu a̱ni.

²²A li si̱sak nang nwuak a̱chuchuk ma̱ng a̱tan nta̱m Ibrahim wu nchong ndung a̱ni. A̱tan nta̱m nggu wu si̱ tyia̱ a̱ si̱ tak nang nwuak a̱chuchuk nggu hu ngyet a̱jhyem.

²³A̱wot a̱ni wa nang á̱ ndyuut ma̱ A̱lyiat A̱gwaza na, nyia̱, “Ibrahim nwuak fwuo da̱ A̱gwaza. A̱wot A̱gwaza si̱ kyiak gu a̱ yet a̱tsotswat a̱yin a̱zaghyi nggu, mat nwuak fwuo nggu hu.”[9] Á̱ si̱ bu ngyei Ibrahim, “A̱kpa̱ndang A̱gwaza.”[10]

²⁴Da̱ nyi li, A̱gwaza bu na kyiak a̱tyubishyi nang a̱tsotswat a̱yin a̱ni da̱ a̱vwuo nggu, mat a̱tan nta̱m ku tak nwuak a̱chuchuk nggu hu a̱ni, a̱wot mat nwuak a̱chuchuk hwa ma̱nyin hu bah.

²⁵Ma a̱nia wa Rahab a̱ ku yet kham ji a̱ni, ku ngyet kidee jhyang. Á̱ ku tak nang gu ngyet a̱tsotswat a̱zaghyi A̱gwaza di̱ nyia̱ a̱tan nta̱m nggu wu, di̱n jen nang gu ku nniat a̱yaata̱m Isi̱rela a̱bya, a̱wot a̱ si̱ ghwut ma̱ng a̱mba di̱n vak ghyang ka̱nka̱ra̱ng a̱ni.

²⁶Ma̱nang vam ku sang swuan ngyet kwom a̱ni, ma a̱nia wa nwuak a̱chuchuk ku sang a̱tan nta̱m a̱ni, ndi nang kwom a̱ni.