Read tyap Yakubu 3 Bible Online

Yakubu 3 - tyap bible

Yakubu 3

¹Nyin á̱niet khwi Yesu ba nang n chat a̱ni, nyi yok la̱u á̱kpa di̱ chat yet á̱niet tyiet bah. Mat nyi lyen nzi̱t á̱niet tyiet, shi̱ri̱ya nzi̱t ji na swak si̱ á̱kum á̱niet ji.

²A̱tsak a̱lyiat, a̱mgba̱m nzi̱t, zi̱ ni̱ ghyuap. Ka̱ á̱ mbyia̱ a̱yin ma̱ nzi̱t a̱ ni̱ nwai ghyuap mami a̱lyiat nggu na a̱ni, a̱tyu a̱wa yet a̱tsatsak a̱yin wa, a̱ maai a̱ chok a̱pyia̱ gu a̱mgba̱m.

³Kidee, zi̱ ni̱ tyia̱ tsaai ji tswam a̱nu, zi̱ ka bwan ji nang zi̱ nchat a̱ni.

⁴Nyi bu nwuan kukwon a̱wak ma̱ a̱sa̱khwot na la. Ku yet a̱gba̱ndang. A̱wot wun ku byia̱ chet a̱ni, ku ni̱ hyap hu nang ku tyong. A̱mgba̱m ma̱ng a̱nia, a̱tyu luk wu bwan hu ma̱ng a̱bankwon luk kya, ku ka nat tyan nang gu chat a̱ni.

⁵A̱nia wa nang a̱lyem a̱tyubishyi ka ndi. Ka̱ yet a̱bada̱dei kyang kya mi̱ vam a̱tyubishyi hu. A̱wot ka̱ ni̱ tam da̱ a̱cha̱chet nkyang wa. A̱wot nyi nwuan si̱sak ji nang a̱gba̱ndang sop a̱yit nshi a̱ni. A̱wot a̱bada̱dei a̱chandong kya ni̱ ta̱fi̱t long, ka̱ fwui nji a̱mgba̱m!

⁶A̱lyem a̱tyubishyi ka li nang a̱lya̱ra̱p ndong a̱ni, ka̱ shya̱ mi̱ vam a̱tyubishyi. A̱wot ka̱ tyei a̱tyubishyi gu nyia̱ a̱ka̱kpa̱t. Ki̱ ka̱ doot ka̱ tyia̱ a̱mgba̱m swuan a̱tyubishyi ji, ji̱ ta̱bat long. A̱wot nka ma̱ a̱pyia̱ nka, á̱ na fwui nka ma̱ a̱nga̱ngak ndong sang sangba̱p.[11]

⁷Á̱nietbishyi ni̱ chok kuzang tangka̱i nyam a̱yit, a̱ka̱man, nkyang na̱ kwang a̱byin a̱ni, ma̱ng fa̱n. A̱wot ba̱ ni̱ nyia̱ a̱nia neet gbangbang.

⁸A̱wot á̱ mbyia̱ a̱tyu a̱ si̱ mi̱n chok a̱lyem a̱ni bah. Ka̱ byia̱ fwung di̱ nyia̱ a̱ka̱tuk bah, ka̱ si̱ li nang a̱sap ka̱ hyaai a̱ni.

⁹Kikya nang zi̱ ndyep A̱gwaza a̱ yet A̱tyoli nzi̱t wu a̱ni. Kikya zi̱ bu nfwoi á̱niet ba nang A̱gwaza mat ba̱ tai nggu a̱ni.

¹⁰Ma̱ a̱nu a̱nyiung kikya nang dyep ma̱ng fwoi nghwut. Nyin á̱niet khwi Yesu ba nang n chat a̱ni, a̱tsak a̱lyiat, ku myim a̱nia bah!

¹¹Ka̱ doot a̱nya̱nyiat ma̱ng a̱gba̱za̱zai a̱sa̱khwot ba̱ ghwut mi̱ nnang nyiung a?

¹²Á̱niet khwi Yesu ba, ka̱ doot a̱kwon a̱bwabwap ka̱ tyia̱ sum a̱lyiit a? A̱kwon a̱na̱p si̱ mi̱n tyia̱ sum a̱bwabwap a? Kaai, ma a̱nia wa, nang a̱memee a̱sa̱khwot si̱ mi̱n ghwut ndung ma̱ng a̱nya̱nyiat a̱sa̱khwot bah.

¹³A̱nyan wa mami nyin byia̱ mumwang ma̱ng lyen nggu hu? Ka̱ a̱nia wa, gu tak hu di̱ swan a̱tsotswat nswat, di̱ nyia̱ a̱tan nta̱m ma̱ng ghyuai a̱pyia̱ nang mumwang hu nnwuat a̱ni.

¹⁴A̱wot ka̱ nyi nyia̱ na̱nvan ma̱ng á̱ghyang, nyi si̱ kwi swam á̱ghyang, nyi si̱ byia̱ chat a̱pyia̱ di̱ kyiak nang nyi ndan á̱ghyang á̱niet a̱ni. Ka̱ a̱nia wa, nyi yok fwuo a̱chuchuk wu di̱ tam nyia̱ nyi byia̱ mumwang bah.

¹⁵Mat tangka̱i mumwang a̱hwa chorop a̱ neet da̱ a̱vwuo A̱gwaza kya bah. Ku yet si̱ swanta huni hwa. Ku yet si̱ A̱za̱za̱rak Ntswa hwa bah, ku yet si̱ A̱ta̱nyeang hwa.

¹⁶Kuzang a̱vwuo nang á̱ nkwi swam ma̱ng á̱ghyang, á̱ si̱ chat a̱pyia̱ di̱ kyiak nang á̱ ndan á̱ghyang á̱niet a̱ni, a̱ja wa nang á̱ nkwan, a̱ja wa nang kuzang tangka̱i a̱ka̱kpa̱t ma̱ng a̱ka̱tuk nshya̱.

¹⁷A̱wot mumwang hu ku neet Ma A̱gwaza tswazwa a̱ni; di̱n tsa hu, ku yet a̱za̱za̱rak wa. Ku si̱ bu tyei swat nyinyang, nyia̱ shonshyon ma̱ng gwai á̱ghyang, ghyuai a̱pyia̱, ma̱ng fwuong kunak á̱ghyang. A̱tyu a̱ byia̱ mumwang a̱hwa a̱ni, a̱ ni̱ yong mi̱ di̱ nyia̱ a̱tan nta̱m. Da̱ nggu, a̱ khai á̱niet da̱ á̱ghyi bah. A̱wot a̱ si̱ yong da̱ a̱chuchuk kuzang jen.

¹⁸A̱wot á̱niet ba̱ tyei swat nyinyang a̱ni, ba̱ chyui zwá swat nyinyang ja. A̱wot ba̱ bu na chak ba̱ shya̱ zang nyia̱ tsotswat.