Read tyap 1 Bitut 4 Bible Online

1 Bitut 4 - tyap bible

1 Bitut 4

¹Mat a̱nia, nang Yesu nswuo a̱bung mi̱ vam a̱ni, ku yet ta hwa nyi yong mi̱ chet ma̱nang a̱nggu a̱ni. A̱wot nyi swan ma̱ng la̱p vam fwuong swuo a̱bung meang. Mat ka̱ nyi swuo a̱bung da̱nian Kristi, ku tak nang a̱ka̱tuk nyia̱ bu byia̱ tyok tazwa nyin bah.

²Nang ku ndi a̱nia a̱ni, nyi yok khwi shyuo vam ma̱ á̱kum swuan nyin ka mi̱ swanta hu bah. Da̱ a̱kwonu a̱kya, nyi fa̱k di̱dang nyia̱ ta̱m hwa nang A̱gwaza chat a̱ni.

³Nyi ka̱n byian jen ba̱t mi̱ jen ji̱ swak, di̱ nyia̱ a̱ka̱tuk nang nnwap na̱ chyi A̱gwaza ku nnyia̱ a̱ni. Nkyang nani nia yet; a̱shi̱shi̱k nyia̱ nang a̱ka̱la̱m a̱ni, shyuo vam, ya tsa nswuo nkyang hyeng, tsot wun, ma̱ng a̱ka̱tuk khwi nghwughwu a̱yaagwaza sang swuan.

⁴Mami a̱chuchuk, á̱kpa̱ndang nyin ba mi̱ njen nang nyi nshya̱ mi̱ ndyin a̱ni, ma̱ninika ba̱ fwuong a̱ga̱de nang nyi ndak nyia̱ a̱dodo a̱shi̱shi̱k nyia̱ nang ba̱ nnyia̱ a̱ni. Mat a̱nia, ba̱ lyiat nyin lihyat.

⁵A̱wot nyi yok bwung bah, ku yet ta hwa á̱kpa̱ndang a̱bya, ba̱ yong a̱zaghyi A̱gwaza. Nggu wa na faat ba shi̱ri̱ya ji. Konyan a̱ hyia̱ kyang hu nang gu nyia̱ a̱ni, a̱mgba̱m á̱niet swuan ma̱ng á̱si̱ ba̱ ka̱n kwi a̱ni.

⁶Huhwa mbyia̱ á̱ ku nshei A̱sham Nkhang ka da̱ a̱vwuo á̱niet ba̱ ka̱n kwi ma̱nini a̱ni[7], ku nang ku ngyet a̱daat wa ba̱ kwi nang á̱ nyia̱ mba shi̱ri̱ya nang á̱kum á̱niet ka a̱ni. Ma̱ninika, ba̱ swan mami tswa dundung ma̱ng A̱gwaza si̱ nat sang sangba̱p.

⁷Sangba̱p swanta ji shim bai. Mat a̱nia, mi̱ nfwuo nyin na, si̱ nyi tung a̱nka̱li, nyi gba á̱pyia̱ nyin di̱ naai A̱gwaza.

⁸Kyang ku swak a̱mgba̱m a̱ni, huhwa yet; nyi ya a̱son ma̱ng chat á̱ghyang nyin ba̱t. Mat chat hu ni̱ chi a̱ka̱tuk nyia̱ ma̱ a̱di̱di̱t.[8]

⁹Nyi ni̱ nsan á̱nietchen mbwak feang ma̱ a̱ka̱sa nyin na di̱ mi̱ kwop a̱dyii̱ng. Nyi nang ba kyayak ma̱ng a̱vwuo kwai.

¹⁰Konyan byia̱ za̱nang chet gba̱mgbam nang a̱za̱za̱rak Ntswa A̱gwaza nang nggu mat shok gu ji a̱ni. Mat a̱nia, nyi nyia̱ a̱tan ta̱m ma̱ng za̱nang chet nyin ji, nyi mbeang á̱ghyang nyin.

¹¹A byia̱ za̱nang chet shei a̱lyiat A̱gwaza jaa? Shei na shansham, nang A̱gwaza wa lyiat mami ang a̱ni. A byia̱ za̱nang chet beang á̱niet jaa? Beang ba ma̱ng a̱mgba̱m chet nang A̱gwaza nang ang a̱ni. A̱jawa kuzang ta̱m nang a nyia̱ a̱ni na nwuak A̱gwaza shi mami a̱lyoot Yesu Kristi. A̱mgba̱m a̱kyenkyai shi ma̱ng chet, yet si̱ nggu hwa, si̱ nat sang sangba̱p. Samba̱rka!

¹²Nyin á̱niet khwi Yesu ba nang n chat a̱ni, nyi yok fa̱k a̱ga̱de da̱ a̱nya̱nyai ya̱shuk a̱ shyat nyin a̱ni bah, á ngyei kyang fai hwa shya̱ nyin.

¹³Da̱ a̱kwonu a̱kya, si̱ nyi gwai nang nyi nshya̱ dundung ma̱ng Yesu di̱ ya̱shuk huni a̱ni, da̱nian nyi si̱ ba̱ gwai ba̱t a̱tuk nang á̱ na ntyai a̱kyenkyai shi Yesu wu kpa̱sai di̱ bwuok bai nggu hu mi̱ swanta hu a̱ni.

¹⁴Nyi yet á̱niet a̱li̱ba̱rka bya ka̱ á̱ fwoi nyin da̱nian nyi yet á̱niet khwi Yesu. Mat ku tak nang a̱kyenkyai shi A̱za̱za̱rak Ntswa A̱gwaza wu nshya̱ dundung ma̱ng a̱nyin.

¹⁵A̱mgba̱m ma̱ng a̱nia, ka̱ nyi swuo a̱bung ku yok li nang shi̱ri̱ya a̱tyu a̱ hyat a̱yin, a̱tang, bwoi jhya̱, ku nwuai ma̱ a̱lyiat nang nyi byia̱ a̱ka̱ta a̱ni bah.

¹⁶A̱wot ka̱ nyi swuo a̱bung da̱nian nyi yet á̱niet khwi Yesu bya, nyi yok fa̱k nsum bah. Nyi dyep A̱gwaza mat a̱wat nang nyi shya̱ á̱ yei nyin da̱ a̱lyoot Yesu a̱ni!

¹⁷Mat jen nyia̱ nang á̱ na nnyia̱ shi̱ri̱ya ji a̱ni, a̱wot á̱niet khwi A̱gwaza bya á̱ na ntsa. A̱wot ka̱nang á̱ tsa shi̱ri̱ya ji da̱ nzi̱t, yihwa na shya̱ á̱niet ba ba̱ lak khwi A̱sham Nkhang A̱gwaza ka a̱ni?

¹⁸Ma̱nang á̱ ndyuut ma̱ A̱lyiat A̱gwaza na a̱ni nyia̱, “Ka̱ ku na vwuo a̱khwu á̱ san á̱tsotswat á̱niet ba, yihwa na shya̱ á̱niet lak khwi A̱gwaza, ba̱ yet á̱niet a̱ka̱tuk nyia̱ a̱ni?”

¹⁹Huhwa mbyia̱, ka̱ nyi swuo a̱bung di̱n vak ku myim A̱gwaza a̱ni, nyi ya a̱son ma̱ng nyia̱ kyang ku yet a̱tan a̱ni. A̱wot nyi bu tyia̱ á̱pyia̱ nyin mbwak a̱tsotswat A̱gwaza a̱ mat nyin mi̱ swanta hu a̱ni. Mat a̱ si̱ mi̱n ghwon nyin, nyi swuo nsum bah.