Read tyap 1 Bitut 5 Bible Online

1 Bitut 5 - tyap bible

1 Bitut 5

¹Mat a̱nia, n gba nyin, nyin nyi yet á̱niet khwop á̱niet ma̱ á̱niet khwi ba a̱ni. Nung meang n gyet a̱niet khwop a̱niet wa, a̱ ku li swuo a̱bung Kristi hu a̱ni. A̱wot n na mun shya̱ a̱kyenkyai shi nggu wu di̱n jen nang gu na mbai a̱ tyai a̱pyia̱ nggu kpa̱sai mi̱ swanta hu a̱ni.

²N gba nyin, nyi chok sot á̱niet khwi nang A̱gwaza tyia̱ nyin dyo mbwak a̱ni. Nyi chok ba ma̱ng fwuo nyiung. Nyi yok shim ku li nang khwo hwa á̱ tyei nyin a̱ni, ku a̱ka̱tuk wuwok chat kurum bah. Da̱ a̱kwonu a̱kya, nyi byia̱ di̱dang nyi nyia̱ ta̱m A̱gwaza hwa.

³Nyi yok chat nyia̱ á̱niet ba nang á̱ tyei nyin ndyo mbwak a̱ni tyok mi̱ chet bah. A̱wot yok swat nyin hu nang a̱tyu kwak a̱son ku yet a̱tsatsak kidee nang ba̱ na khwi a̱ni.

⁴A̱wot mam hu nang á̱ na ntyai A̱tyu chok a̱ swak á̱kum á̱niet chok ka a̱ni, nyi na san bung tyok a̱kyenkyai shi ma̱ng chyin sang sangba̱p hu.

⁵Ma a̱nia wa, nyin nfi̱ng á̱niet na, ku yet ta hwa nyi khwi tyok á̱niet khwop á̱niet hu. A̱wot a̱mgba̱m nyin, nyi beang á̱ghyang kuzang jen. Nyi yok nyia̱ gba̱p a̱pyia̱ bah, ma̱nang á̱ ndyuut ma̱ A̱lyiat A̱gwaza na a̱ni, nyia̱, “A̱gwaza lak gba̱p a̱pyia̱ á̱nietbishyi. A̱wot a̱ si̱ fa̱k shok á̱niet ba̱ ghyuai pyipyia̱ mba da̱ a̱vwuo nggu a̱ni.”

⁶Mat a̱nia, nyi ghyuai á̱pyia̱ nyin a̱zaghyi A̱gwaza a̱ byia̱ a̱gba̱ndang chet a̱ni, da̱nian A̱gwaza si̱ ba̱ ta̱ngam nyin, a̱ nwuak nyin shi da̱ a̱tsatsak njen.

⁷Nyi neap A̱gwaza a̱mgba̱m a̱fi̱fa nyin wu, mat nggu wa chok nyin.

⁸Nyi ta̱bam, nyi cham pyipyia̱ nyin, mat a̱tyu lak li nyin wu, a̱ yet A̱ta̱nyeang ka a̱ni, bang a̱ kat a̱ tu a̱nwurung nang zaki a̱ni. Ka̱ chat a̱tyu ka̱ na ta̱bat ka̱ ya di̱ wuwok a̱ni.

⁹Nyi yong mi̱ chet di̱ nwuak a̱chuchuk nyin hu. Nyi lak A̱ta̱nyeang ka ndyo. Nyi yok bwung bah. Á̱niet khwi ba ba̱ yet á̱na̱nyiuk nyin ba mi̱ swanta hu a̱ni, ba̱ shyat ntangka̱i ya̱shuk nang nyi shyat a̱ni.

¹⁰A̱wot A̱gwaza a̱ byia̱ a̱mgba̱m shok a̱ni, nggu wa yorong nyin nyi ya gado mi̱ a̱kyenkyai shi sang sangba̱p nggu wu mami a̱lyoot Kristi. Mat a̱nia, ka̱ nyi swuo a̱bung da̱ a̱banjen ma̱ a̱da̱dei, a̱ na bwuok ma̱ng a̱nyin kuzang kyang, a̱ beang nyin, a̱ byia̱k nyin, a̱ tyia̱ nyin chet. A̱wot a̱ kpaat nyin di̱ kuntyin ku byia̱ chet a̱ni.

¹¹Yok a̱mgba̱m chet ku yet si̱ nggu si̱ nat sang sangba̱p! Samba̱rka!

¹²N dyuut n si̱ ta̱m ma̱ng a̱nyin a̱bakum wusika kani, mat beang Sila[9] hwa. Nggu wa n shei ma̱ng a̱nyin a̱ yet a̱tsotswat a̱na̱nyiuk wa. Kyang ku mbyia̱ n dyuut nyin wusika jini a̱ni, huhwa yet n tyia̱ nyin gba̱gbak, n bu tak ma̱ng a̱nyin nang ku swuo a̱bung nyin huni yet a̱tsatsak shok A̱gwaza ja da̱nian nyin. Mat a̱nia, nyi yong mi̱ chet di̱ shok A̱gwaza jini.

¹³Á̱niet khwi ba ba̱ yet á̱na̱nyiuk nyin ba nang A̱gwaza khai ba̱ shya̱ Babila[10] a̱ni, mbeang Ma̱rkut, nggwon nung ka mami nwuak a̱chuchuk, ba̱ byat nyin.

¹⁴Nyi vwuk á̱ghyang nyin mami chat ku yet si̱ á̱niet khwi a̱ni. Yok swat nyinyang ku shya̱ dundung ma̱ng a̱mgba̱m nyin, nyi yet á̱niet khwi Kristi ba a̱ni.