Read tyap 1 Yoona 1 Bible Online

1 Yoona 1 - tyap bible

1 Yoona 1

¹Zi̱ shei nyin nkhang tazwa A̱tyu a̱ yet A̱lyiat Nswuan a̱ nshya̱ neet gbangbang a̱ni. Nggu wa nang zi̱ fa̱k, zi̱ si̱ bu li nggu ma̱ng a̱ghyi nzi̱t ba. Zi̱ si̱ bu byiam nggu ma̱ng mbwak nzi̱t na a̱ni.

²A̱tyu wuni a̱ yet a̱tsak Nswuan a̱ni, á̱ ku tyai nzi̱t nggu kpa̱sai. Zi̱ si̱ li ngguu, zi̱ si̱ lyiat tazwa nggu. Zi̱ si̱ shei ma̱ng a̱nyin nang nggu wa ngyet swuan sang sangba̱p ji, a̱ ni̱ shya̱ ma̱ng A̱tyia̱ wu a̱ni. Nggu wa nang á̱ ba̱ tyai nzi̱t ndyo.

³A̱lyiat Nswuan a̱nia, nang zi̱ ka̱n di zi̱ si̱ bu fa̱k a̱ni, ni̱nia nang zi̱ shei nyin, da̱nian nyi ka mun á̱pyia̱ ma̱ng a̱nzi̱t. A̱wot zi̱ mun á̱pyia̱ dundung ma̱ng A̱tyia̱ nzi̱t wu a̱ yet A̱gwaza a̱ni, mbeang Nggwon nggu ka, Yesu Kristi.

⁴Zi̱ lyuut nyin a̱lyiat nani, da̱nian zi̱ ka fa̱k a̱tsatsak a̱lyia̱ sai gba̱mgbam dundung[1] ma̱ng a̱nyin.

⁵A̱lyiat na nang zi̱ fa̱k da̱ a̱vwuo Nggwon nggu ka a̱ni, ni̱nia nang zi̱ shei nyin: A̱gwaza yet sai hwa. A̱wot da̱ a̱vwuo nggu lyin nshya̱ bah, ku ma̱ chunchwiit!

⁶Mat a̱nia, ki̱ zi̱ tyiet nyia̱ zi̱ byia̱ mun á̱pyia̱ ma̱ng a̱nggu, nang zi̱ ni̱ swan mi̱ ndyin, zi̱ bwoi la hwa. Zi̱ si̱ bu khwi a̱chuchuk wu bah.

⁷A̱wot ki̱ zi̱ swan mami sai hu, ma̱nang A̱gwaza ngyet sai hu a̱ni, zi̱ si̱ byia̱ mun á̱pyia̱ ma̱ng á̱ghyang. A̱wot a̱sok Yesu a̱ yet Nggwon nggu ka a̱ni, si̱ kwi na̱ si̱ jaat nzi̱t a̱mgba̱m a̱ka̱tuk nyia̱ nzi̱t wu.

⁸Ki̱ zi̱ tak nyia̱ zi̱ nyia̱ a̱ka̱tuk nyia̱ bah, zi̱ laai pyipyia̱ nzi̱t hwa. A̱wot zi̱ byia̱ a̱chuchuk bah.

⁹A̱wot ki̱ zi̱ shim, zi̱ si̱ tak a̱ka̱tuk nyia̱ nzi̱t wu kpa̱sai a̱zaghyi A̱gwaza, a̱ yet a̱tsotswat ma̱ng a̱chuchuk nang gu na nchi a̱ka̱tuk nyia̱ nzi̱t wu a̱ni. A̱wot a̱ bu jaat a̱mgba̱m á̱kpa̱kpa̱t nzi̱t na.

¹⁰Ki̱ zi̱ nyia̱ da̱ zi̱ ka̱n nyia̱ a̱ka̱tuk nyia̱ bah, ku fa nang zi̱ mbwuak A̱gwaza ntyia̱ a̱tyu bwoi a̱ka̱laa wa, a̱wot zi̱ lak khwi a̱lyiat nggu na mi̱ nfwuo nzi̱t na.