Read tyap 1 Yoona 2 Bible Online

1 Yoona 2 - tyap bible

1 Yoona 2

¹Mman nung na na̱ yet á̱niet khwi Yesu nang n chat a̱ni, n dyuut nyin a̱lyiat nani da̱nian nyi ka nyia̱ a̱ka̱tuk bah. A̱wot ka̱ a̱yin nyia̱ a̱ka̱tuk nyia̱, zi̱ byia̱ a̱tsotswat a̱tyu beang a̱ yong da̱ a̱kwonu nzi̱t da̱ a̱vwuo A̱tyia̱ a̱ni. Nggu wa yet Yesu Kristi.

²Nggu wa yet za̱nang chi a̱ka̱tuk nyia̱ nzi̱t ji; a̱wot a̱ka̱tuk nyia̱ nzi̱t wu wa ma̱nyin nzi̱t bah, a̱wot a̱mgba̱m ma̱ng a̱ka̱tuk nyia̱ á̱niet mi̱ swanta wu wa.

³Ki̱ zi̱ khwi doka A̱gwaza ji, a̱ni wa zi̱ na nnwuak a̱chuchuk nang zi̱ ndyen nggu.

⁴Ka̱ a̱yin tak nyia̱, “N dyen A̱gwaza,” a̱wot a̱ si̱ lak khwi doka A̱gwaza ji, a̱tyu a̱wa yet a̱tyu bwoi a̱ka̱laa wa. A̱wot a̱ swan swat lyen a̱chuchuk A̱gwaza wu bah.

⁵A̱wot á̱niet ba ba̱ khwi a̱lyiat A̱gwaza na a̱ni, chat A̱gwaza mba hu tak kpa̱sai si̱sak nang ba̱ nchat gu a̱tsatsak chat a̱ni. Si̱sak ji nang zi̱ na ndyen nang zi̱ nshya̱ ndung ma̱ng A̱gwaza a̱ni, jija yet:

⁶Á̱niet ba ba̱ tak nyia̱ ba̱ shya̱ ndung ma̱ng A̱gwaza a̱ni, ku yet ta hwa ba̱ swan ma̱nang Yesu nswan a̱ni.

⁷Á̱niet khwi Yesu ba nang n chat a̱ni, n dyuut nyin doka swai ja bah. Da̱ a̱kwonu a̱kya, a̱khwukhwop doka wu nang nyi ku mi̱ nfa̱k neet gbangbang a̱ni, nggu wa yet, “Nyi chat á̱ghyang.” A̱lyiat nang nyi ku fa̱k gbangbang a̱ni, ni̱nia na.

⁸A̱mgba̱m ma̱ng a̱nia, Yesu tak doka swai kpa̱sai di̱ si̱sak nang gu nswan swat nggu hu a̱ni. A̱wot nyin meang, nyi ni̱ ntak ji kpa̱sai di̱ si̱sak ji nang nyi nswan swat nyin hu a̱ni. Mat lyin hu sweap, a̱wot a̱chuchuk sai wu wa si̱ sai.

⁹Ka̱ a̱yin tak nyia̱, “N shya̱ mami sai,” a̱wot a̱ si̱ lak li á̱na̱nyiuk nggu ba ba̱ yet á̱niet khwi a̱ni, a̱tyu a̱wa ni̱ shya̱ mi̱ ndyin hwa.

¹⁰A̱tyu a̱ chat á̱na̱nyiuk nggu ba ba̱ yet á̱niet khwi Yesu a̱ni, a̱ swan mami sai hu hwa. Da̱ nggu, a̱ na yet jat a̱kwa a̱yin bah.

¹¹A̱wot a̱tyu a̱ lak li a̱na̱nyiuk nggu wu a̱ yet a̱tyu khwi Yesu a̱ni, mami ndyin kya nang gu ni̱ nshya̱. A̱ si̱ bu swan mi̱ ndyin. Tangka̱i a̱tyu a̱hwa lyen vak nang gu na nkai a̱ni bah, mat lyin hu tyia̱ a̱ si̱ kwa a̱fi̱fan.

¹²N dyuut nyin ndyo, nyin nyi yet mman A̱gwaza na a̱ni, mat á̱ wa ka̱n chi a̱ka̱tuk nyia̱ nyin wu mami a̱lyoot Yesu.

¹³N dyuut nyin dyo, nyin nyi yet a̱yaatyia̱ nyi tat a̱ghyi di̱ nwuak fwuo di̱ Yesu a̱ni, mat nyi lyen Kristi, a̱tyu a̱ nshya̱ neet di̱n tsa swanta hu a̱ni. N dyuut nyin dyo, nyin á̱niet nyi yet nfi̱ng di̱ nwuak fwuo di̱ Yesu a̱ni, mat nyi wa ka̱n swuo chet A̱ta̱nyeang ka.

¹⁴N dyuut nyin dyo, nyin mman na, mat nyi lyen A̱tyia̱ wu. N dyuut nyin ndyo, nyin nyi yet a̱yaatat a̱ghyi a̱ni, mat nyi lyen nggu a̱tyu a̱ nshya̱ neet di̱n tsa swanta hu a̱ni. N dyuut nyin dyo, mat nyi byia̱ chet, a̱wot a̱lyiat A̱gwaza na shya̱ mi̱ fwuo nyin na. Nyi si̱ bu swuo chet A̱ta̱nyeang ka.

¹⁵Mat a̱nia, nyi yok chat nkyang na na̱ shya̱ mi̱ swanta huni a̱ni bah.[2] Ka̱ a̱yin chat swanta hu, ku fa a̱ chat A̱tyia̱ wu bah.

¹⁶Mat a̱ka̱tuk nkyang nshya̱ ma̱ a̱di̱di̱t a̱di̱t mi̱ swanta hu, nang shyuo vam, tang a̱li di̱ kyang a̱yin, ma̱ng tam di̱ nkyang nang zi̱ byia̱ a̱ni. A̱wot a̱mgba̱m nkyang nani, na̱ yet á̱si̱ A̱tyia̱ nia bah. Na̱ yet á̱si̱ mi̱ swanta nia.

¹⁷A̱wot swanta hu ma̱ng a̱mgba̱m shyuo nvam ji na tyak. A̱wot konyan wa nyia̱ kyang nang A̱gwaza chat a̱ni, a̱ na swuan ba̱ng si̱ nat sang sangba̱p.

¹⁸Nyin mman nung nyi yet á̱niet khwi Yesu nang n chat a̱ni, ngaan jen wu nyia̱. Nyi wa ka̱n fa̱k nang A̱tyu lak li Kristi wu nchobai. A̱wot á̱niet lak li Kristi ma̱ a̱di̱di̱t wa ka̱n bai za̱m. Huhwa mbyia̱ nang zi̱ ndyen nang nngaan jen wu wa nang zi̱ nshya̱.

¹⁹Á̱niet lak li Kristi bani ghwut mi̱ susot á̱niet khwi nzi̱t ji ja. A̱wot ba̱ ku shya̱ ndung ma̱ng a̱nzi̱t bah. Ka̱ á̱ wa nyia̱ ba̱ ku shya̱ ndung ma̱ng a̱nzi̱t, si̱ ba̱ na ya a̱son dundung ma̱ng a̱nzi̱t. Nang ba̱ nghwut, ba̱ si̱ ghwon nzi̱t a̱ni, si̱ huni tak kpa̱sai da̱nang ba̱ za ku nshya̱ ndung ma̱ng a̱nzi̱t bah.

²⁰A̱wot nyin, Kristi wa ka̱n nang nyin A̱za̱za̱rak Ntswa nggu wu. Mat a̱nia, a̱mgba̱m nyin nyi lyen a̱chuchuk wu.

²¹N dyuut nyin dyo, mat nyi lyen za̱m nang a̱chuchuk wu nvwuon ma̱ng a̱ka̱laa na. N dyuut nyin ndyo mat nyi chyi chuchuk wu wa bah.

²²A̱nyan wa yet a̱tyu bwoi a̱ka̱laa wu? Nggu wa yet a̱tyu a̱ nyia̱ di̱ Yesu yet a̱tsatsak Kristi a̱tyu nang A̱gwaza kup gu tyok a̱ni bah. A̱tyu a̱ fwuo A̱tyia̱ wu ma̱ng Nggwon ka a̱ni, nggu wa yet a̱tyu lak li Kristi wu.

²³Konyan wa fwuo Nggwon ka, a̱ fwuo A̱tyia̱ wu wa. A̱wot konyan wa san Nggwon ka, a̱ mun a̱ san A̱tyia̱ wu wa a̱wa.

²⁴Ku yet ta hwa, nyi yong tsotswat di̱ tyiet hu nang nyi fa̱k neet di̱n tsa hu a̱ni. Ki̱ nyi sak tyiet hu nang nyi fa̱k neet di̱n tsa hu a̱ni mi̱ fwuo nyin na, a̱nia wa kuzang jen nang nyi na mbyia̱ a̱meang di̱ mun á̱pyia̱ nyin hu dundung ma̱ng Nggwon ka ma̱ng A̱tyia̱ wu.

²⁵Di̱ mun á̱pyia̱ huni hwa nang Kristi nnyia̱ nzi̱t a̱li̱ka̱uli swuan sang sangba̱p ji.

²⁶N dyuut nyin a̱lyiat nani n ka ngba nyin, nyi ta̱bam ma̱ng á̱niet ba̱ kwan ba̱ laai nyin nyi teap tyia̱ zan a̱ni.

²⁷A̱wot Kristi nang nyin A̱za̱za̱rak Ntswa wu. Mat a̱nia, nyi bu chat á̱ghyang á̱niet ba̱ tyiet nyin bah. Da̱ a̱kwonu a̱kya, A̱za̱za̱rak Ntswa nggu wu wa ni̱ tyiet nyin kuzang kyang. A̱wot kyang hu nang gu tyiet nyin a̱ni yet a̱chuchuk wa. Ku yet a̱ka̱laa nia bah. Mat a̱nia, si̱ nyi ya a̱son ma̱ng byia̱ a̱meang di̱ mun á̱pyia̱ nyin hu ndung ma̱ng Kristi, ma̱nang A̱za̱za̱rak Ntswa wu ntyiet nyin a̱ni.

²⁸Ma̱ninika, mman nung na na̱ yet á̱niet khwi Yesu nang n chat a̱ni, nyi ya a̱son ma̱ng byia̱ a̱meang di̱ mun á̱pyia̱ nyin hu ndung ma̱ng Kristi. Da̱nian jen ji nang gu na mbwuok a̱ bai a̱ni, nyi ka gbang a̱lyia̱, a̱wot nyi bu fa̱k nsum yong a̱zaghyi nggu bah.

²⁹Mat nang zi̱ ndyen nang Kristi ngyet a̱tsotswat wa a̱ni, zi̱ bu lyen konyan wa nyia̱ tsotswat, a̱ yet a̱tsatsak nggwon A̱gwaza wa.