Read tyap 1 Yoona 3 Bible Online

1 Yoona 3 - tyap bible

1 Yoona 3

¹Nyi dam si̱sak ji nang A̱tyia̱ nzi̱t wu nchat zi̱t a̱tsatsak chat a̱ni, mat a̱ kyiak zi̱t nang mman nggu a̱ni. A̱tsak a̱lyiat mman nggu ni̱nia nang zi̱ yet. A̱mgba̱m ma̱ng yet mman A̱gwaza nzi̱t hu, á̱niet mi̱ swanta ba fi̱k nang zi̱ ngyet mman nggu nia bah, mat si̱sak nang ba̱ ndyen nggu a̱ni bah.

²Á̱kpa̱ndang nung ba nang n chat a̱ni, nang zi̱ ngyet mman A̱gwaza nia ma̱nini a̱ni, ma̱ng a̱nia á̱ ka̱n tyai tangka̱i á̱niet nang zi̱ na yet a̱ni bah. A̱wot zi̱ lyen za̱m nang ka̱ Kristi ba̱ bwuok a̱ bai, zi̱ na tai nggu. Mat zi̱ na li nggu ma̱ cha̱chaat ma̱nang gu ndi a̱ni.

³A̱wot konyan wa tyia̱ fwuo di̱ Kristi, a̱ ni̱ ja̱u a̱pyia̱ nggu, ma̱nang Kristi nja̱u a̱pyia̱ nggu a̱ni.

⁴Konyan wa nyia̱ a̱ka̱tuk nyia̱ a̱ni, a̱ tyat doka A̱gwaza ja. Mat a̱mgba̱m á̱ka̱tuk nyia̱ yet tyat doka A̱gwaza hwa.

⁵A̱wot nyi lyen nang Yesu mbai da̱nian gu ka chi a̱ka̱tuk nyia̱ nzi̱t wu wa. Mat nggu ma̱ a̱pyia̱ nggu, a̱ byia̱ a̱ka̱tuk nyia̱ bah.

⁶Konyan wa swan ndung ma̱ng Kristi, a̱ na ya a̱son ma̱ng nyia̱ a̱ka̱tuk nyia̱ a̱ nchi̱ri̱ng bah. A̱wot konyan wa ya a̱son ma̱ng nyia̱ a̱ka̱tuk nyia̱ a̱ nchi̱ri̱ng, a̱ ka̱n fi̱k Kristi wu bah; di̱ tangka̱i a̱yin a̱hwa a̱ lyen a̱tyu Kristi yet a̱ni bah.

⁷Nyin mman nung, nyi yok shim a̱yin a̱ laai nyin bah. A̱tyu a̱ nyia̱ a̱tan a̱ni, ku tak nang gu ngyet a̱tsotswat wa, ma̱nang Kristi ngyet a̱tsotswat a̱ni.

⁸Ma a̱nia wa, konyan wa ya a̱son ma̱ng nyia̱ a̱ka̱tuk nyia̱ a̱ nchi̱ri̱ng, ku tak nang gu ngyet a̱si̱ A̱ta̱nyeang wa. Mat A̱ta̱nyeang ka mi̱ nnyia̱ a̱ka̱tuk nyia̱ neet gbangbang. Kyang ku mbyia̱ bai Yesu hu a̱ni huhwa hu; da̱nian gu ka bi̱ri̱m nta̱m A̱ta̱nyeang na.

⁹Á̱niet ba̱ yet á̱tsatsak mman A̱gwaza a̱ni, ba̱ ni̱ ya a̱son ma̱ng nyia̱ a̱ka̱tuk nyia̱ nchi̱ri̱ng bah, mat za̱kwa mba ji tai si̱ A̱gwaza. Mat a̱nia, ba̱ si̱ mi̱n gya a̱son mi̱ nyia̱ a̱ka̱tuk nyia̱ bah. Mat á̱ byin mba neet Ma A̱gwaza tswazwa, ba̱ yet á̱tsatsak mman A̱gwaza nia.

¹⁰Ma̱ninika, zi̱ lyen si̱sak nang á̱ na nfi̱k á̱tsatsak mman A̱gwaza na a̱ni, ma̱ng á̱si̱ ba ba̱ yet mman A̱ta̱nyeang na a̱ni: Kuzang a̱yin da̱ a̱ nyia̱ tsotswat a̱ni bah, a̱wot a̱ si̱ lak chat á̱niet khwi á̱ghyang a̱ni[3], a̱tyu a̱wa yet a̱si̱ A̱gwaza wa bah.

¹¹A̱lyiat nang nyi ku fa̱k neet di̱n tsa hu a̱ni ni̱nia yet: Ku yet ta hwa zi̱ chat á̱ghyang nzi̱t.

¹²Ku myim zi̱ yok tai Kayinu a̱ yet a̱si̱ A̱ta̱nyeang a̱ni bah. Nggu wa ku hyat a̱na̱nyiuk nggu wu, Abila. Yihwa mbyia̱ Kayinu ku nhyat a̱na̱nyiuk nggu wu? Mat nta̱m Kayinu na ku yet a̱ka̱tuk, a̱wot si̱ Abila na si̱ yet a̱tsotswat wa.

¹³Mat a̱nia, nyin á̱na̱nyiuk nung ba, nyi yet á̱niet khwi Kristi a̱ni, ka̱ á̱niet swanta ba lak li nyin, nyi yok fa̱k a̱ga̱de di̱ si̱ a̱hwa bah.

¹⁴Ki̱ zi̱ chat á̱niet khwi á̱ghyang[4], ku tak nang zi̱ wa ka̱n shot a̱khwu, zi̱ si̱ shya̱ swuan. A̱wot a̱tyu da̱ a̱ chat a̱tyu khwi a̱ghyang a̱ni bah, a̱ ni̱ swan swat a̱khwu hwa.

¹⁵Konyan wa lak li a̱tyu khwi a̱ghyang[5], ku fa nang gu ngyet a̱tyu hyaai á̱niet wa mi̱ fwuo nggu hu. A̱wot nyi lyen nang á̱niet hyaai á̱niet mbyia̱ swuan sang sangba̱p bah.

¹⁶Si̱sak nang zi̱ ndyen kyang nang a̱tsak chat wu yet a̱ni, jija ji: Yesu tak zi̱t chat nggu hu di̱ si̱sak nang gu nnwuak swuan nggu ji da̱nian nzi̱t a̱ni. Ma a̱nia wa, ku myim nzi̱t meang zi̱ ma nwuak swuan nzi̱t ji da̱nian á̱niet khwi á̱ghyang[6].

¹⁷Ka̱ a̱yin byia̱ zwá a̱pyia̱ nggu, a̱ si̱ li a̱ghyang a̱niet nang gu shya̱ mi̱ kunak, a̱wot a̱ si̱ lak fa̱k kunak gu; á̱ na nyia̱ ni á̱ ndyen nang chat A̱gwaza hu nshya̱ ma̱ a̱nggu?[7]

¹⁸Da̱ a̱kwonu a̱kya, nyin mman nung, nyi yok shei chat á̱ghyang nyin hu ma̱ng a̱nu kya bah. Nyi tak chat á̱ghyang nyin hu di̱ nyia̱ á̱tsatsak nta̱m wa ma̱ng a̱chuchuk.

¹⁹Ki̱ zi̱ chat á̱ghyang nzi̱t, ku tak nang zi̱ nkhwi a̱chuchuk A̱gwaza wa. A̱wot ku si̱ bu tak nang zi̱ na ngyong a̱zaghyi A̱gwaza ma̱ng gbang a̱lyia̱, zi̱ naai nggu di̱ mi̱n tyi̱ri̱m vam.

²⁰Ku nang nfwuo nzi̱t na nkpaat zi̱t, na̱ si̱ bat zi̱t a̱bun, zi̱ lyen nang A̱gwaza nshi a̱ swak si̱sak nang zi̱ nfwuong mi̱ nfwuo nzi̱t na a̱ni. A̱wot a̱ si̱ lyen kuzang kyang.

²¹Nyin á̱kpa̱ndang nung ba nang n chat a̱ni, ki̱ nfwuo nzi̱t na kpaat zi̱t na̱ si̱ bat zi̱t a̱bun bah, zi̱ byia̱ a̱wat zi̱ gbang a̱lyia̱ zi̱ bai a̱zaghyi A̱gwaza.

²²Zi̱ ni̱ shya̱ kuzang kyang nang zi̱ naai da̱ a̱vwuo A̱gwaza a̱ni, mat ka̱ zi̱ khwi doka nggu ji, zi̱ si̱ bu nyia̱ nkyang na̱ myim gu a̱ni.

²³A̱wot doka A̱gwaza jija ji: Ku yet ta hwa, zi̱ nwuak fwuo da̱ a̱lyoot Nggwon nggu ka, Yesu Kristi, a̱wot zi̱ bu chat á̱ghyang nzi̱t, ma̱nang gu ka̱n nwuak zi̱t doka ji a̱ni.

²⁴A̱mgba̱m á̱niet ba ba̱ khwi doka nggu ji a̱ni, ba̱ ni̱ byia̱ a̱meang di̱ mun á̱pyia̱ ma̱ng Yesu. Nggu meang, a̱ si̱ byia̱ a̱meang di̱ mun á̱pyia̱ ma̱ng a̱mba. A̱wot si̱sak ji nang zi̱ ndyen nang gu nswan swat mun a̱pyia̱ ma̱ng a̱nzi̱t a̱ni, huhwa yet: A̱za̱za̱rak Ntswa nggu wu nang gu ka̱n nang nzi̱t a̱ni, swan mi̱ nfwuo nzi̱t na.