Read tyap 1 Yoona 4 Bible Online

1 Yoona 4 - tyap bible

1 Yoona 4

¹Nyin á̱kpa̱ndang nung ba nang n chat a̱ni, nyi yok nwuak a̱chuchuk di̱ kuzang a̱yin a̱ tyiet nyia̱ A̱za̱za̱rak Ntswa lyiat ma̱ng a̱nggu a̱ni bah. Ku yet ta hwa nyi mak a̱tyu tyiet wu[8], nyi ka li ke A̱za̱za̱rak Ntswa wa tyia̱ nggu chet gu ka lyiat da̱ a̱kwonu A̱gwaza ka. Mat a̱yaata̱m ba̱ kyiak pyipyia̱ mba, ba̱ yet á̱tsak a̱yaata̱m a̱kwonu A̱gwaza ma̱ a̱di̱di̱t a̱ni, ka̱n bai mi̱ swanta hu.

²A̱ni wa nang zi̱ na nfi̱k ka̱ ba̱ lyiat da̱ a̱kwonu A̱za̱za̱rak Ntswa A̱gwaza wu wa: Konyan wa kyiak a̱pyia̱ nggu nang a̱ta̱m a̱kwonu A̱gwaza a̱ni[9], a̱ si̱ shim nang Yesu Kristi mbai ma̱ng vam nang a̱tyubishyi a̱ni mi̱ swanta hu, a̱tyu a̱wa byia̱ A̱za̱za̱rak tswa A̱gwaza wa.

³A̱wot kuzang a̱yin wa fwuo nang Yesu Kristi mbai nang a̱tyubishyi a̱ni, a̱tyu a̱wa lyiat da̱ a̱kwonu A̱gwaza kya bah. Da̱ a̱kwonu a̱kya, a̱tyu a̱wa lyiat da̱ a̱kwonu ntswa ji̱ neet da̱ a̱vwuo A̱tyu lak li Kristi[10] wa, nang nyi ku fa̱k nyia̱ a̱ na bai a̱ni, ku ma̱ninika a̱ wa ka̱n bai mi̱ swanta hu.

⁴A̱wot nyin mman nung na nang n chat a̱ni, nyi yet mman A̱gwaza nia. Nyi wa ka̱n swuo chet a̱yaata̱m á̱niet tyiet a̱ka̱laa a̱bya. Mat A̱za̱za̱rak tswa wu a̱ shya̱ ma̱ nyin a̱ni, a̱ byia̱ chet a̱ lan tswa ji ji̱ shya̱ mi̱ swanta hu a̱ni.

⁵A̱yaata̱m bwoi a̱ka̱laa a̱bya yet á̱si̱ swanta bya, ba̱ yet á̱si̱ A̱gwaza bya bah. Huhwa mbyia̱ nang ba̱ ni̱ ndyiat kyang ku myim á̱nietbishyi mi̱ swanta a̱ni. A̱wot á̱niet mi̱ swanta ba meang, si̱ ma fwuong mbaa.

⁶A̱wot nzi̱t, zi̱ yet á̱niet A̱gwaza bya. Á̱niet ba̱ lyen A̱gwaza a̱ni, ni̱ myiai a̱fufwuo ba̱ fa̱k kyang nang zi̱ lyiat a̱ni. Ma a̱nia wa, á̱niet da̱ ba̱ lyen A̱gwaza a̱ni bah, ba̱ ni̱ fa̱k kyang nang zi̱ lyiat a̱ni bah. A̱nia wa nang zi̱ na ndyen ka̱ a̱yin ni̱ lyiat a̱ si̱ tyiet cha̱chaat da̱ a̱kwonu A̱za̱za̱rak Ntswa a̱ tyai a̱chuchuk a̱ni, ma̱ng si̱ ji ji̱ yet si̱ laai á̱niet a̱ni.[11]

⁷Nyin á̱kpa̱ndang nung ba nang n chat a̱ni, yok zi̱ ya a̱son ma̱ng chat á̱ghyang, mat A̱gwaza wa nang zi̱t chet zi̱ chat á̱ghyang. Konyan wa chat á̱ghyang á̱niet, a̱tyu a̱wa tak nang gu ngyet a̱tsak nggwon A̱gwaza kya, a̱ si̱ bu lyen A̱gwaza.

⁸Ma a̱nia wa, a̱tyu da̱ a chat á̱ghyang á̱niet a̱ni bah, a̱ lyen A̱gwaza bah. Mat A̱gwaza wu yet a̱tyu chat á̱niet wa.

⁹A̱wot A̱gwaza tak kpa̱sai nang gu nchat zi̱t ba̱t, di̱ si̱sak nang gu nta̱m ma̱ng Nggwon nggu ka nang gu byia̱ ma̱nyin ka a̱ni, ka̱ si̱ bai mi̱ swanta hu, da̱nian zi̱ ka shya̱ swuan sang sangba̱p ji da̱ a̱vwuo nka kya.

¹⁰A̱ni wa nang a̱tsatsak chat wu ndi: Nzi̱t bya chat A̱gwaza wu bah. A̱wot nggu wa chat zi̱t a̱ si̱ ta̱m ma̱ng Nggwon nggu ka nang za̱nang a̱ni, ka̱ ka chi a̱ka̱tuk nyia̱ nzi̱t wu.

¹¹Nyin á̱kpa̱ndang nung ba nang n chat a̱ni, mat nang A̱gwaza nchat zi̱t ba̱t a̱ni, ma a̱nia wa ku yet ta hwa nzi̱t meang zi̱ ma nchat á̱ghyang nzi̱t.

¹²Á̱ mbyia̱ a̱tyu a̱ ka̱n mak li A̱gwaza wu a̱ni bah. A̱wot ki̱ zi̱ chat á̱ghyang, A̱gwaza shya̱ di̱ mun á̱pyia̱ ma̱ng a̱nzi̱t, a̱wot chat nggu hu nyia̱ a̱tsatsak nta̱m da̱ a̱vwuo nzi̱t.

¹³Si̱sak ji nang zi̱ na nfi̱k nang zi̱ mun á̱pyia̱ ma̱ng A̱gwaza a̱ni, jija ji: A̱gwaza tak kpa̱sai nang gu mun a̱pyia̱ ma̱ng a̱nzi̱t. A̱wot nzi̱t meang, zi̱ mun á̱pyia̱ ma̱ng a̱nggu di̱ si̱sak ji nang gu ka̱n nnang nzi̱t A̱za̱za̱rak Ntswa nggu wu a̱ni.

¹⁴Mbeang a̱nia, nzi̱t a̱yaata̱m nggu ba, zi̱ ka̱n di ma̱ng á̱ghyi nzi̱t. A̱wot zi̱ si̱ shei ma̱ng á̱niet ba nang A̱gwaza a̱ yet A̱tyia̱ nzi̱t wu a̱ni, nta̱m ma̱ng Nggwon nggu ka, ka̱ ka yet A̱tyusan á̱niet mi̱ swanta ba.

¹⁵Konyan wa khwuk a̱nu a̱ si̱ tak kpa̱sai nang Yesu wa ngyet Nggwon A̱gwaza ka, a̱tyu a̱wa swan di̱ mun á̱pyia̱ ma̱ng A̱gwaza. A̱gwaza si̱ ma mun a̱pyia̱ ma̱ng a̱nggu.

¹⁶Nzi̱t, zi̱ lyen si̱sak ji nang A̱gwaza nchat zi̱t ba̱t a̱ni. A̱wot zi̱ si̱ nwuak fwuo da̱ nggu ma̱ng si̱sak ji nang gu nchat nzi̱t a̱ni. A̱gwaza yet chat hwa. A̱wot a̱tyu a̱ chat á̱niet a̱ni, a̱ swan di̱ mun á̱pyia̱ ma̱ng A̱gwaza. A̱gwaza si̱ ma mun a̱pyia̱ ma̱ng a̱nggu.

¹⁷A̱wot nang zi̱ nswan di̱ mun á̱pyia̱ ma̱ng A̱gwaza a̱ni, zi̱ mban a̱tsatsak chat á̱ghyang. A̱jawa zi̱ na fa̱k a̱wun a̱tuk shi̱ri̱ya A̱gwaza ka bah. A̱wot zi̱ na yong a̱zaghyi A̱gwaza mi̱ gbang a̱lyia̱, mat zi̱ swan swat mun á̱pyia̱ ma̱ng a̱nggu mi̱ swanta hu ma̱nang Yesu ku nswan a̱ni.[12]

¹⁸Konyan wa chat A̱gwaza a̱nia, a̱ na fa̱k a̱wun nggu bah.[13] Mat di̱ si̱sak ji nang A̱gwaza nchat zi̱t a̱tsatsak chat a̱ni, tyia̱ nzi̱t zi̱ fa̱k a̱wun nggu bah. Ka̱ zi̱ fa̱k a̱wun, zi̱ fa̱k a̱wun na mat zi̱ tyong A̱gwaza na nyia̱ nzi̱t shi̱ri̱ya. A̱wot ka̱ zi̱ swan ma̱ng a̱wun, ku tak nang chat A̱gwaza hu nnyia̱ a̱tsatsak nta̱m ma̱ nzi̱t bah.

¹⁹Zi̱ chat á̱ghyang,[14] mat A̱gwaza wa tsa chat zi̱t hu.

²⁰Konyan wa tak nyia̱, “N chat A̱gwaza,” a̱wot a̱ si̱ lak li á̱niet khwi á̱ghyang, a̱tyu a̱wa bwoi a̱ka̱laa nia. Mat ka̱ zi̱ lak chat á̱niet nang zi̱ nwuan a̱ni, zi̱ na nyia̱ ni zi̱ nchat A̱gwaza da̱nang zi̱ ka̱n di a̱ni bah?

²¹Doka jini ja nang Yesu[15] mi̱ nnwuak zi̱t nyia̱: A̱tyu a̱ chat A̱gwaza a̱ni, ku yet ta hwa, gu chat á̱niet khwi á̱ghyang[16].