Read tyap 2 Yoona 1 Bible Online

2 Yoona 1 - tyap bible

2 Yoona 1

¹Nung Yoona, n gyet a̱niet khwop a̱niet a̱ni, nung gwa n dyuut nyin wusika jini, n ta̱m ndyo da̱ a̱vwuo nyin, a̱yang a̱li[1] ma̱ng mman nggu na nang A̱gwaza khai a̱ni. Mami a̱chuchuk n chat nyin ba̱t; nung gwa ma̱nyin nung bah, a̱wot ma̱ng a̱mgba̱m á̱niet ba ba̱ lyen a̱chuchuk A̱gwaza wu a̱ni.

²N chat nyin mat a̱chuchuk wu nang a̱mgba̱m zi̱t lyen a̱ni. A̱wot zi̱ na lyen a̱chuchuk wuni si̱ nat sang sangba̱p.

³Yok A̱gwaza a̱ yet A̱tyia̱ a̱ni, ma̱ng Yesu Kristi a̱ yet Nggwon A̱tyia̱ ka a̱ni, gu fa̱k shok ma̱ng kunak zi̱t, a̱wot a̱ nang nzi̱t swat nyinyang; nzi̱t, zi̱ swan swat nwuak a̱chuchuk ma̱ng chat á̱ghyang a̱ni.

⁴N gwai za̱m nang n shya̱ mman ang na[2] na̱ khwi a̱chuchuk ma̱ cha̱chaat di̱ si̱sak ji nang A̱gwaza a̱ yet A̱tyia̱ nzi̱t wu ntak zi̱t zi̱ nyia̱ a̱ni.

⁵Ma̱ninika, n naai ang a̱yang a̱li[3], ku yet ta hwa zi̱ chat á̱ghyang. Doka jini nang n dyuut ang ndyo a̱ni, ji̱ yet swai ja bah. Doka jini ja nang zi̱ za byia̱ neet di̱ tsa nwuo khwi Kristi hu.

⁶A̱tsatsak chat wu fa, zi̱ khwi doka nang A̱gwaza tak ma̱ng a̱nzi̱t a̱ni. Ma̱nang a ka̱n fa̱k neet di̱ tsa nwuo khwi Kristi hu a̱ni; doka jini, jija yet zi̱ ya a̱son ma̱ng chat á̱ghyang.

⁷A̱tsak a̱lyiat, á̱niet laai á̱niet ma̱ a̱di̱di̱t chong á̱ kat[4] mi̱ swanta hu. Á̱niet tyiet a̱ka̱laa bani tyiet nyia̱ di̱ Yesu Kristi bai mi̱ swanta huni mi̱ vam nang a̱tyubishyi a̱ni bah. Tangka̱i a̱tyu tyiet a̱hwa yet a̱tyu laai á̱niet wa ma̱ng a̱tyu lak li Kristi.

⁸Nyi ta̱bam, kalak nyi du lyin zang ta̱m nang nyi nyia̱ ba̱t da̱nian A̱gwaza a̱ni. Nyi kwan ba̱t da̱nian konyan gu ka san a̱jhyem zang ta̱m nggu ji da̱ a̱vwuo A̱gwaza.

⁹Konyan wa mbeang a̱ si̱ shyak tyiet Kristi hu, a̱wot a̱ si̱ bwuok lilyim di̱ khwi tyiet a̱hwa, a̱tyu a̱wa byia̱ a̱meang ma̱ng A̱gwaza bah. A̱wot a̱tyu a̱ ya a̱son di̱ khwi tyiet Kristi hu a̱ni, a̱ byia̱ a̱meang ma̱ng A̱tyia̱ wu bi̱ri̱ng ma̱ng Nggwon nggu ka.

¹⁰Ka̱ a̱yin bai ma̱ a̱tung sot á̱niet khwi nyin ji, a̱wot tyiet nggu hu si̱ vwuon ma̱ng si̱ Kristi tyiet a̱ni, nyi yok san gu nang a̱nietchen a̱ni a̱gbang nyin ka, ku nyi byiat gu nang a̱na̱nyiuk a̱ yet a̱tyu khwi a̱ni bah.

¹¹Mat konyan wa byiat tangka̱i a̱tyu a̱wa nang a̱na̱nyiuk a̱ yet a̱tyu khwi a̱ni, ku fa a̱ mun a̱pyia̱ dundung ma̱ng a̱tyu tyiet a̱ka̱laa a̱wa, ma̱ng a̱ka̱tuk nta̱m nggu wu.

¹²N byia̱ nkyang ma̱ a̱di̱di̱t n na ntak ma̱ng a̱nyin a̱ni. A̱wot n na ndyuut nyin dyo mami wusika bah. Da̱ a̱kwonu a̱kya, n tyia̱ fwuo n na mbai n byiat nyin, n bu ndyiat ma̱ng a̱nyin a̱ghyi ma̱ng a̱ghyi, da̱nian a̱gwai nzi̱t na na̱ ka tyia̱ a̱jhyem.

¹³Mman á̱na̱nyiuk a̱nap[5] ang na nang A̱gwaza khai a̱ni, na̱ byat ang.