Read tyap Tyai Á̱zanson 1 Bible Online

Tyai Á̱zanson 1 - tyap bible

Tyai Á̱zanson 1

¹Ta̱m jini ja nang A̱gwaza nwuak Yesu Kristi, gu ka tyai á̱khwo nggu ba nkyang na̱ na bai di̱ mi̱n byian jen a̱ni. Yesu Kristi meang si̱ ta̱m a̱ta̱m tswa A̱gwaza gu tyai nung Yoona, a̱khwo nggu wu ndyo, ma̱ a̱ma̱bwoi.

²A̱wot Yoona si̱ tak kuzang kyang nang gu li a̱ni, ma̱ cha̱chaat. Ta̱m jini ja yet a̱lyiat A̱gwaza na ma̱ng sheda di̱ nkyang nang Yesu Kristi hyia̱, a̱ si̱ nyia̱ a̱ni.

³A̱gwaza na nwuak a̱tyu a̱ fang á̱niet khwi á̱lyiat nani na̱ na bai á̱zanson a̱ni a̱li̱ba̱rka. A̱wot a̱mgba̱m á̱niet ba̱ fwuong, ba̱ si̱ nyia̱ ta̱m ma̱ng á̱lyiat na nang á̱ hyia̱ a̱ni, A̱gwaza na nang ba a̱li̱ba̱rka meang, mat jen ji bai kpa̱mkpaan!

⁴Nung Yoona, Nung gwa n dyuut nyin wusika jini; nyin susot á̱niet khwi a̱natat, nyi shya̱ mi̱ fam a̱byin A̱siya a̱ni. Yok A̱gwaza a̱ fa̱k shok nyin, a̱ bu nwuak nyin swat nyinyang, ku neet da̱ a̱vwuo nggu; a̱tyu a̱ nshya̱ kuzang jen; a̱ nshya̱ ma̱nini, nggu wa ku nshya̱ gbangbang. Byat huni bu neet da̱ a̱vwuo Tswá a̱natat A̱za̱za̱rak Ntswa a̱ja, ji̱ shya̱ a̱zaghyi a̱gba̱ndang chuk Tyok A̱gwaza a̱ni.

⁵Byat hu si̱ bu neet da̱ a̱vwuo Yesu Kristi. Nggu wa yet a̱tsotswat a̱tyu a̱ nwuak sheda tazwa nkyang nani a̱ni. Nggu wa si̱ bu yet a̱tyu nang A̱gwaza tsa ta̱ngam ma̱ng swuan ma̱ á̱niet ba̱ ka̱n kwi a̱ni. Nggu wa bu nyia̱ tyok tazwa a̱mgba̱m á̱gwam swanta ba. Yok a̱mgba̱m a̱kyenkyai shi a̱ yet si̱ ngguu. Mat a̱ chat zi̱t, a̱ si̱ ti̱n zi̱t ma̱ a̱ka̱tuk nyia̱ nzi̱t wu, di̱ nwuak a̱sok nggu na da̱nian zi̱t.

⁶Nggu wa tyia̱ nzi̱t, zi̱ ngyet a̱yaapris ma̱ng mman Tyok da̱nian A̱gwaza a̱ yet A̱tyia̱ nggu wu a̱ni. Yok a̱mgba̱m shi ma̱ng chet ku yet si̱ nggu si̱ nat sang sangba̱p, Samba̱rka!

⁷Nyi li! A̱ chorop ma̱ng á̱ni̱nian shi neet mi̱ kyai tswazwa a̱ chobai! A̱wot konyan na li nggu ma̱ng á̱ghyi, bi̱ri̱ng ma̱ng á̱niet ba̱ ku chyui ngguu ma̱ng zwang a̱ni. A̱wot a̱mgba̱m á̱niet swanta ba, ba̱ na twei ma̱ng byian fwuo da̱nian shi̱ri̱ya nggu ji[1]. A̱tsak a̱lyiat, a̱nia wa ku na ndi! Samba̱rka!

⁸A̱gwaza a̱ yet A̱tyoli a̱ni nyia̱, “Nung gwa gyet A̱lfa ma̱ng Omega[2], A̱son ka ma̱ng A̱ngaan ka. N shya̱ ma̱ninika, n ku nshya̱ gbangbang, a̱wot n bu nchobai. Nung gwa ngyet A̱tyu a̱ byia̱ a̱mgba̱m Tyok a̱ni!”

⁹Nung Yoona, a̱na̱nyiuk nyin mi̱ khwi Kristi Yesu ma̱ng a̱kpa̱ndang nyin wu mi̱ ya̱shuk, a̱wot mi̱ Tyok A̱gwaza, mi̱ gbang a̱lyia̱ ma̱ng nyap fwuo nang Yesu ngyorong nzi̱t a̱ni. Á̱ ku ta̱bat nung á̱ nat ndyo ma̱nyin nung ma̱ a̱byin a̱ka̱wa̱tyia̱ a̱sa̱khwot nang á̱ ngyei Batmot a̱ni; mat shei a̱lyiat A̱gwaza ma̱ng sheda nang n nwuak tazwa Yesu a̱ni.

¹⁰A̱tuk Ladi nang n shya̱ di̱ kwok A̱gwaza ntong mami A̱za̱za̱rak Ntswa; mi̱ di̱ yong a̱hwa, n si̱ fa̱k a̱nwuat a̱ghyang a̱ma̱nta nung ma̱ jenjai nang a̱gwa kya á̱ tyiap a̱ni!

¹¹A̱nwuat ka si̱ nyia̱, “Lyuut a̱mgba̱m kyang nang a na li a̱ni mami ta̱ka̱da, a ta̱m ndyo ma̱ susot á̱niet khwi a̱natat ba̱ shya̱ ma̱ a̱ka̱keang A̱fisut, Sa̱mi̱runa, Bi̱rgamum, Tiyata̱ra, Sa̱disu, Fila̱defiya, ma̱ng La̱wudikiya!”

¹²Jen nang n bwuak n di a̱tyu a̱ lyiat ma̱ng a̱nung a̱ni, n si̱ ndi á̱ga̱nga̱ng chuchuk zi̱nariya saai fí̱tila a̱natat.

¹³A̱wot ma̱ a̱ka̱wa̱tyia̱ á̱ga̱nga̱ng chuchuk saai fí̱tila ji, n si̱ ndi a̱yin gu yong a̱ li nang Nggwon A̱tyubishyi[3] a̱ni; nang gu kup a̱junjung a̱toot, a̱ si̱ la̱p a̱zwuan zi̱nariya di̱n fi̱ri̱ng nggu hu.

¹⁴A̱pyia̱ nggu ka ma̱ng pyia̱ nggu hu sai ma̱ kyenkyai a̱nkyai nang a̱lulo, ku taan a̱ni! A̱wot á̱ghyi nggu ba li mya̱ra̱m nang a̱lya̱ra̱p ndong a̱ni!

¹⁵Kpai a̱ti̱tak gu ji si̱ ya á̱ghyi mya̱myat nang a̱shong ntswam nang á̱ ti̱n mi̱ ndong fwu á̱ si̱ shok a̱ni! A̱wot a̱nwuat nggu ka si̱ khwom nang a̱gbi̱gba̱k a̱sa̱khwot a̱ni!

¹⁶A̱ si̱ ba̱ng á̱ta̱ngwat a̱natat di̱ mbwak yak gu hu. A̱wot a̱junjung tswat a̱ byia̱ nunu feang ku ya ba̱t a̱ni, si̱ ghwut a̱bwonu nggu ka! A̱wot a̱ghyi nggu ba si̱ sai ma̱ kyenkyai a̱nkyai nang mam ni̱ nsai a̱ta̱mam a̱ni!

¹⁷Nang n di gu a̱ni, n si̱ nkwa a̱zaghyi nggu ma̱nang kwom a̱ni. A̱wot a̱ si̱ sak bwak yak gu hu da̱ nung, a̱ si̱ nyia̱, “Yok fa̱k a̱wun bah! Nung gwa ngyet A̱son ka, ma̱ng A̱ngaan ka.

¹⁸Nung gwa ngyet a̱tyu a̱ swuan a̱ni. N ka̱n khwu, a̱wot ma̱ninika, n shya̱ ma̱ng swuan, si̱ nat sang sangba̱p! N byia̱ tyok tazwa A̱khwu ma̱ng A̱bi, ka̱ yet a̱vwuo nswat á̱niet ba̱ ka̱n kwi a̱ni.

¹⁹“Mat a̱nia, ma̱ninika, lyuut nkyang nang a ka̱n di a̱ni, mbeang a̱mgba̱m nkyang na̱ shya̱ ma̱nini a̱ni, ma̱ng á̱si̱ na̱ na bai á̱zanson a̱ni.

²⁰Kyang ku shya̱ di̱ niat nang á̱ta̱ngwat a̱natat nang a li di̱ mbwak yak nung hu fa a̱ni, ma̱ng á̱ga̱nga̱ng chuchuk zi̱nariya saai fí̱tila a̱natat a̱ja, huhwa hu nang á̱ tyai: Á̱ta̱ngwat a̱natat a̱nia, ni̱nia yet kidee a̱yaata̱m tswá A̱gwaza susot á̱niet khwi a̱natat ji. A̱wot á̱ga̱nga̱ng chuchuk zi̱nariya saai fí̱tila a̱natat ji mameang, si̱ yet kidee susot á̱niet khwi a̱natat ja.”