Read tyap Tyai Á̱zanson 18 Bible Online

Tyai Á̱zanson 18 - tyap bible

Tyai Á̱zanson 18

¹Nang nkyang nani nswak a̱ni, n si̱ bu ndi a̱ta̱m tswa A̱gwaza a̱ghyang gu chorop a̱ neet Ma A̱gwaza tswazwa a̱ chobai a̱byin! A̱ si̱ byia̱ a̱gba̱ndang tyok. A̱wot a̱kyenkyai shi nggu wu si̱ teak sai a̱ kai a̱mgba̱m swanta hu!

²A̱ta̱m tswa A̱gwaza wu si̱ kaat mi̱ chet nyia̱, “Babila kwa, a̱gba̱ndang a̱keang a̱wa kwa! A̱ bwuak a̱ tyia̱ a̱li á̱ka̱tuk ntswá A̱ta̱nyeang! A̱ bwuak a̱ tyia̱ a̱vwuo ta̱kup kuzang a̱ka̱tuk ntswa a̱ byia̱ a̱na̱ndyung a̱ni; ma̱ng a̱vwuo ta̱kup kuzang a̱nggulu a̱ ya shushyuk[65] a̱ni; ma̱ng kuzang a̱ka̱tuk nyam a̱yit a̱ byia̱ a̱na̱ndyung a̱ni!

³Mat a̱mgba̱m nnwap mi̱ bibyin mi̱ swanta na wa ka̱n kwa, mat a̱sa̱khwot a̱na̱p a̱shi̱shi̱k nyia̱ a̱byii̱k a̱wa a̱ yet kham a̱ni! A̱mgba̱m á̱gwam mi̱ swanta ba ka̱n katnaan ma̱ng a̱nggu! Á̱niet a̱bwuang mi̱ swanta si̱ tyia̱ á̱niet nzwá, mat a̱ka̱tuk wuwok chat nyinyang nang gu ntyia̱ mba a̱ni!”

⁴A̱jawa n si̱ nfa̱k a̱nwuat a̱ghyang ka̱ yei a̱ neet Ma A̱gwaza tswazwa nyia̱, “Nyin á̱niet nung, nyi ghwut nyi ghwon guu! Nyi yok feap a̱ka̱tuk nyia̱ nggu wu bah; kalak nyi du swuo a̱bung mbyep ndung ma̱ng a̱nggu!

⁵Mat a̱ka̱tuk nyia̱ nggu wu tung a̱ tyia̱ a̱kuu a̱ si̱ tat Ma A̱gwaza tswazwa. A̱wot A̱gwaza bu jhyung a̱ka̱kpa̱t nang gu nyia̱ a̱ni.

⁶Nyia̱ nggu ndyo ma̱nang gu nyia̱ á̱ghyang á̱niet ndyo a̱ni! Tan a̱mgba̱m a̱ka̱tuk nyia̱ nggu wu a̱ka̱feang! Kyang nang gu su ma̱ a̱kashyi nggu wu a̱ni; ma a̱nia wa, su nggu ndyo a̱ka̱feang cha̱chaat ma̱ng kyang nang gu su a̱ni!

⁷Ma̱nang a̱byii̱k wu ntam da̱ a̱pyia̱ nggu ma̱ng swat fa̱k nyinyang a̱ni; mat a̱nia, mak hu ma̱ cha̱chaat ma̱ng swuo a̱bung ma̱ng a̱lyia̱ byian! A̱ tam mi̱ fwuo nggu hu nyia̱, ‘N gyet a̱byii̱k a̱gwam di̱n chuk tyok nung ji! N sang a̱tyu beang nang a̱byii̱k nang a̱tyok gu khwu a̱ni bah! A̱wot n byia̱ kyang ku na tyia̱ nung a̱nak a̱ni bah!’

⁸Mat a̱nia, mami mam nyiung, mbyep nani na bai nggu; a̱khwu, a̱lyia̱ byian ma̱ng a̱gba̱ndang zong! Long na fwui nggu a̱mgba̱m gu tyia̱ ntong! Mat A̱gwaza, a̱ yet A̱tyoli a̱ swak ma̱ng a̱kyenkyai shi a̱ni, na nyia̱ nggu shi̱ri̱ya!”

⁹A̱wot á̱gwam swanta ba, ba̱ ku nyia̱ shi̱shi̱k nyia̱ ma̱ng a̱nggu, ba̱ si̱ bu swuo a̱gba̱ndang nyinyang nggu wu a̱ni; ba̱ na twei ba̱ koot á̱ghyi mbeang byian fwuo da̱nian guu di̱n jen nang ba̱ ndi a̱chunchung na̱ ghwut ma̱ a̱chi̱chan ndong nggu ba a̱ni.

¹⁰Ba̱ na khwop á̱ yong ma̱ gbang ba̱ fa̱k a̱wun, mat a̱gba̱ndang swuo a̱bung nggu wu! Ba̱ na koot nkun nyia̱, “Ku swan ang, ku swan ang! Ka̱a̱t Babila, nwan a̱gba̱ndang a̱keang! Da̱ a̱banjen ma̱ chunchwiit, shi̱ri̱ya A̱gwaza chyok da̱ nwan!”

¹¹Á̱niet a̱bwuang swanta bani na twei ma̱ng byian fwuo da̱nian ngguu. Mat a̱yin nshya̱ a̱ bu na kwai nkyang nang ba̱ lyiai a̱ni bah.

¹²Á̱niet Babila ba, ka̱n kwai nkyang ma̱ a̱di̱di̱t na̱ yet; zi̱nariya, a̱zurfa, a̱yaalala, a̱sham nfang, a̱yaawulu, a̱sham wulyin, a̱shong a̱ga̱faat, saki ma̱ng a̱yaatoot ba̱ bwoi shong a̱ni, nkyang nang á̱ shap ma̱ng nkwon na̱ byia̱ swam turare nyinyang a̱ni, nkyang nang á̱ nyia̱ ma̱ng a̱nyunyung zwuom a̱ni, nkyang nang á̱ shap ma̱ng nkwon na̱ byia̱ kurum a̱ni, a̱shong ntswam, tswam, ma̱ng nkyang nang á̱ nyia̱ ma̱ng a̱sha̱shet nfang a̱ni.

¹³Ba̱ ku mun á̱ kwai; sina̱mon, nkyang yaji, turare ndong, mur, luban, a̱sa̱khwot a̱na̱p, hya̱u za̱itun, a̱lilyiit nkyuo a̱lka̱ma, tswa a̱lka̱ma, nyák, zón seap, tsaaí, kéké ntsaaí, ma̱ng á̱nietbishyi, bibya yet á̱khwo.

¹⁴A̱wot á̱niet a̱bwuang ba si̱ nyia̱ ma̱ng a̱nggu, “A̱mgba̱m nkyang shisham nang a ntyia̱ fwuo hu a̱ni tyak! A̱mgba̱m nkyang a̱gwai na̱ tyei ang shisham a̱ni, na̱ tyak si̱ nat sang sangba̱p! Nkyang nani bu na yet á̱si̱ nwan bah!”

¹⁵Á̱niet a̱bwuang ba, ba̱ nyia̱ zwá mat a̱bwuang na ma̱ng a̱nggu a̱ni, ba̱ na khwop á̱ yong gbang. Ba̱ fa̱k a̱wun mat a̱gba̱ndang swuo a̱bung nggu wu. Ba̱ na twei, ba̱ swan ma̱ng byian fwuo.

¹⁶Ba̱ nyia̱, “Ku swan ang, ku swan ang, a̱gba̱ndang a̱keang, Babila! Nwan a ni̱ kup a̱sham a̱toot ka yet janka̱ra ma̱ng a̱shong wulyin a̱ni; nkyang a̱gwai ang na si̱ yet zi̱nariya ma̱ng nfang na̱ yet a̱sham a̱ni, ma̱ng a̱yaawulu;

¹⁷mami a̱banjen ma̱ chunchwiit a̱mgba̱m zwá a̱keang ji si̱ tyak!” A̱wot a̱mgba̱m a̱yaakwak a̱son luk a̱kukwon a̱wak ba, á̱niet chyet mi̱ a̱kukwon a̱wak ba, á̱niet nyia̱ ta̱m mi̱ a̱kukwon a̱wak ba, ma̱ng á̱niet a̱bwuang ma̱ a̱kukwon a̱wak ba, na khwop á̱ yong ma̱ gbang.

¹⁸Ba̱ na tyei nkun a̱ka̱tsak di̱n jen ba̱ na ndi a̱chunchung ndong a̱keang na nvwuot a̱ni. A̱wot ba̱ na lyi̱ri̱m nyia̱, “A̱ji wa á̱ bu na nshya̱ a̱gba̱ndang a̱keang a̱ghyang nang a̱si̱ wuni a̱ni?!”

¹⁹A̱wot ba̱ na twei, ba̱ wop mbwuk a̱pyia̱, da̱nian ba̱ ka tak a̱lyia̱ ya mba ka. A̱wot ba̱ twei mi̱ chet, á̱ nyia̱, “Ku swan ang, ku swan ang, a̱gba̱ndang a̱keang Babila! Á̱niet byia̱ a̱kukwon a̱wak ba̱ ka̱n tyia̱ á̱niet nzwá, mat ba̱ pyia̱t a̱gba̱ndang zwá a̱keang a̱wa mi̱ nkyai a̱sa̱khwot na. A̱mgba̱m zwá ji tyak, nang but á̱ghyi a̱ni!

²⁰Nyin á̱niet nyi shya̱ Ma A̱gwaza tswazwa ka a̱ni, nyin á̱niet khwi A̱gwaza ba, ma̱ng a̱yaata̱m Yesu ba, ma̱ng a̱yaata̱m a̱kwonu A̱gwaza ba, nyi gwai mat kyang ku shya̱ a̱keang kani a̱ni! Di̱ ngaan hu, A̱gwaza nyia̱ a̱keang kani shi̱ri̱ya da̱nian nyin!”

²¹A̱gba̱ndang a̱ta̱m tswa A̱gwaza a̱ byia̱ chet a̱ni, si̱ kyiak a̱gba̱ndang a̱fang ka̱ shi nang a̱gba̱ndang naan kwang a̱ni. A̱ si̱ ta nka mami kyai a̱sa̱khwot. A̱ si̱ kaat mi̱ chet nyia̱, “A̱nia wa á̱ na nta a̱gba̱ndang a̱keang Babila wu, á̱ na ta nggu ma̱ kpa̱t gu kwa a̱byin! A̱wot da̱ mba, á̱ bu na li nggu lili bah!

²²A̱nak zunzom, a̱nwuat á̱niet bubwom, á̱niet tyiap zwunzwu, ma̱ng á̱niet tyiap gugwa; á̱ bu na fa̱k ba ma̱ a̱keang ka bah! Da̱ mba, á̱ bu na li á̱niet nyia̱ nta̱m mbwak, ma̱ng á̱niet a̱bwuang ma̱ a̱keang ka bah! Da̱ mba, á̱ bu na fa̱k a̱khwom naan kwang ma̱ a̱keang ka bah!

²³Da̱ mba, á̱ bu na li long fí̱tila ku sai mami a̱keang ka bah! Da̱ mba, á̱ bu na fa̱k nwunwuat a̱gwai á̱niet nyia̱ a̱ka̱nyeang ma̱ a̱keang ka bah! Huhwa mbyia̱, á̱niet a̱bwuang ang ba, bibya swak ma̱ng yet a̱cha̱chet mi̱ swanta hu. A̱wot a bu laai a̱mgba̱m nnwap swanta na ma̱ng nkut ang na.

²⁴A̱wot a̱sok a̱yaata̱m a̱kwonu A̱gwaza, ma̱ng á̱za̱za̱rak á̱niet A̱gwaza ba, si̱ tyong nang a̱sa̱khwot a̱ni di̱ nvak a̱keang Babila na; ma̱ng a̱sok á̱niet nang á̱ hyaai mi̱ a̱mgba̱m swanta hu a̱ni!”