Read tyap Tyai Á̱zanson 2 Bible Online

Tyai Á̱zanson 2 - tyap bible

Tyai Á̱zanson 2

¹“Lyuut a̱ta̱m tswa A̱gwaza wusika jini, gu nwuak sot á̱niet khwi ba̱ shya̱ A̱fisut a̱ni. Ta̱m jini neet da̱ a̱vwuo a̱tyu a̱ ba̱ng á̱ta̱ngwat a̱natat na di̱ mbwak yak gu hu; a̱wot a̱ bu chong ma̱ a̱ka̱wa̱tyia̱ á̱ga̱nga̱ng chuchuk zi̱nariya saai fí̱tila a̱natat ji a̱ni.

²N dyen a̱mgba̱m nta̱m nang nyi nyia̱ a̱ni. N di kwan ma̱ á̱pyia̱ nyin hu, ma̱ng si̱sak nang nyi ngbang a̱lyia̱ ma̱ng nyap fwuo a̱ni. N dyen nang nyi nnyap fwuo ma̱ng á̱ka̱tuk á̱niet bah. Nyi si̱ mak á̱niet ba̱ kyiak á̱pyia̱ mba nang a̱yaata̱m Yesu a̱ni; a̱wot da̱ mba ba̱ yet a̱nia wa bah. Nyi si̱ shya̱ nang ba̱ yet á̱niet bwoi a̱ka̱laa bya.

³N dyen nang nyi ngbang a̱lyia̱, nyi si̱ nyap fwuo, nyi si̱ swuo a̱bung da̱nian nung. Nyi si̱ yong mi̱ chet di̱ nwuak a̱chuchuk nyin hu.

⁴A̱mgba̱m ma̱ng a̱nia, n byia̱ a̱dyii̱ng da̱ nyin. Nyi bu chat nung ku á̱ghyang nyin nang nyi ku ntsa a̱ni bah.

⁵Nyi nyia̱ a̱di̱dam tyan nang nyi nkwa a̱ni. Nyi ghwon a̱ka̱tuk nyia̱ nyin wu. Nyi nyia̱ nta̱m nung na di̱ si̱sak nang nyi ku ntsa a̱ni. Kalak, n na mbai n ba̱ nkyiak a̱ga̱nga̱ng chuk saai fi̱tila nyin wu da̱ a̱vwuo nswat nji ka ma̱ á̱niet khwi ba.

⁶A̱wot nyi shya̱ shok di̱ kyang nyiung. Mat nang nyi ndak á̱ka̱tuk nta̱m A̱ni̱kolatawa[4], ma̱nang n dak na a̱ni.

⁷Konyan wa chat lyen a̱ni, ku yet ta hwa gu myiai a̱fufwuo gu fa̱a̱k a̱ bu fi̱k a̱lyiat nang A̱za̱za̱rak Ntswa A̱gwaza wu shei susot á̱niet khwi ji a̱ni! Konyan wa swuo chet swanta hu a̱ni, a̱ na ya sum a̱kwon nswuan ka̱ shya̱ ma̱ a̱byin A̱gwaza ka a̱ni!

⁸“Lyuut a̱ta̱m tswa A̱gwaza wusika jini, gu nwuak sot á̱niet khwi ba̱ shya̱ Sa̱mi̱runa a̱ni. Ta̱m jini neet da̱ a̱vwuo a̱tyu a̱ yet A̱son ka, a̱ si̱ bu yet A̱ngaan ka a̱ni; a̱tyu a̱ ku khwu, a̱wot ma̱nini a̱ shyip, a̱ si̱ doot ma̱ng swuan ma̱ á̱niet ba̱ ka̱n kwi a̱ni!

⁹N dyen swuo a̱bung nyin hu ma̱ng kunak nyin hu. A̱mgba̱m ma̱ng a̱nia, nyi byia̱ zwá! N dyen tyam nang á̱niet ba lak li nyin tyam nyin a̱ni. Ba̱ kyiak pyipyia̱ mba nang á̱tsatsak A̱yahudawa bya a̱ni. A̱wot A̱yahudawa bya ba̱ yet bah; ba̱ yet sot tutu a̱tung A̱ta̱nyeang[5] ja.

¹⁰Nyi yok fa̱k a̱wun a̱bung nyi na swuo a̱ni bah. A̱ta̱nyeang ka na tyia̱ á̱ghyang nyin mi̱ jaru, da̱nian á̱ ka mak nyin. Nyi na bwuo mam swak nang nyi swuo a̱bung. A̱wot ka̱ nyi yong chi̱k di̱ nwuak a̱chuchuk nyin hu, ku nang á̱ hyaai nyin wa; n na nkup nyin bung tyok ji̱ yet zang nswuan a̱ni.

¹¹Konyan wa chat lyen a̱ni, ku yet ta hwa gu myiai a̱fufwuo gu fa̱a̱k, a̱ bu fi̱k a̱lyiat nang A̱za̱za̱rak Ntswa A̱gwaza wu shei susot á̱niet khwi ji a̱ni! A̱tyu a̱ swuo chet swanta hu a̱ni, a̱khwu a̱ka̱feang ma̱ a̱nga̱ngak tswa ndong sang sangba̱p na shya̱ nggu bah; ku ma̱ chunchwiit!

¹²“Lyuut a̱ta̱m tswa A̱gwaza wusika jini, gu nwuak sot á̱niet khwi ji shya̱ Bi̱rgamum a̱ni. Ta̱m jini neet da̱ a̱vwuo a̱tyu a̱ ba̱ng tswat ji̱ byia̱ nunu feang ku ya ba̱t a̱ni:

¹³N dyen nyi shya̱ da̱ a̱vwuo nang A̱ta̱nyeang[6] nnyia̱ tyok a̱ni. A̱mgba̱m ma̱ng a̱nia, nyi si̱ yong chi̱k di̱ nwuak a̱chuchuk da̱ a̱lyoot nung. Da̱ nyin, nyi bwuok lilyim di̱ nwuak a̱chuchuk nyin hu da̱ nung bah; ku nang á̱ ku nhyat Antibat a̱tsotswat a̱tyu shei a̱lyiat nung wu mami nyin, da̱ a̱vwuo nang A̱ta̱nyeang[7] nshya̱ a̱ni.

¹⁴A̱mgba̱m ma̱ng a̱nia, n byia̱ a̱dyii̱ng ma̱ chunchwiit nang n kwop tazwa nyin a̱ni. Nyi byia̱ á̱ghyang á̱niet ma̱ nyin ba̱ tyiet tyiet Ba̱lam. Nggu wa yet a̱tyu a̱ ku tyiet Ba̱lak si̱sak gu na ndaai á̱niet Isi̱rela ba, ba̱ kwa a̱ni. A̱ si̱ tyiet ba ba̱ nyia̱ a̱ka̱tuk nyia̱ mat ya kyayak nang á̱ ku neap nghwughwu a̱yaagwaza sang swuan nang za̱nang a̱ni, ma̱ng nyia̱ a̱shi̱shi̱k nyia̱.

¹⁵Ma a̱nia wa, nyi bu byia̱ á̱ghyang á̱niet ba̱ tyiet tyiet A̱ni̱kolatawa a̱ni.

¹⁶Nyi ghwon a̱ka̱tuk nyia̱ nyin wu; kalak n na mbai da̱ a̱vwuo nyin ma a̱nggang, n nyia̱ zwang ma̱ng á̱niet ba̱ tyiet tyiet a̱ka̱laa a̱hwa, ma̱ng swáng á̱lyiat a̱bwonu nung ji, ji̱ tyam nang tswat a̱ni.

¹⁷Konyan wa chat lyen a̱ni, ku yet ta hwa gu myiai a̱fufwuo gu fa̱a̱k, a̱ bu fi̱k a̱lyiat nang A̱za̱za̱rak Ntswa A̱gwaza wu shei susot á̱niet khwi ji a̱ni! Konyan wa swuo chet swanta hu a̱ni, n na nang gu a̱za̱za̱rak ‘mana[8]’ nang á̱ niat Ma A̱gwaza tswazwa a̱ni. N bu na nang gu a̱sai a̱fang nang á̱ ndyuut a̱lyoot a̱fai tazwa a̱ni[9]. Á̱ mbyia̱ a̱tyu a̱ na fi̱k a̱lyoot ka a̱ni bah; si̱ a̱tyu a̱ san a̱fang ka a̱ni.

¹⁸“Lyuut a̱ta̱m tswa A̱gwaza wusika jini, gu nwuak sot á̱niet khwi ji shya̱ Tiyata̱ra a̱ni: Ta̱m jini neet da̱ a̱vwuo Nggwon A̱gwaza, a̱ byia̱ tswá á̱ghyi ji̱ ya á̱ghyi ma̱ mya̱myat nang a̱lya̱ra̱p ndong a̱ni. A̱wot kpai a̱ti̱tak nggu ji ya á̱ghyi nang a̱ka̱nka̱ra̱ng a̱shong ntswam nang á̱ shok a̱ni!

¹⁹N dyen a̱mgba̱m nkyang nang nyi nyia̱ a̱ni. N di si̱sak nyi nchat á̱ghyang a̱ni, nwuak a̱chuchuk nyin hu, nyia̱ nta̱m nyin hu, ma̱ng gbang a̱lyia̱ ma̱ng nyap fwuo nyin hu. A̱wot n di nyi ya a̱son nchi̱ri̱ng di̱ nyia̱ a̱mgba̱m nkyang nani.

²⁰A̱wot n byia̱ a̱dyii̱ng ma̱ng a̱nyin, nang nyi nshim a̱byii̱k a̱wa nang á̱ ngyei ‘Jezibel’ a̱ni, a̱ yei a̱pyia̱ nggu a̱ta̱m a̱kwonu A̱gwaza. Mami tyiet gu hu, a̱ tyei á̱khwo nung ba ba̱ teap! A̱ si̱ tyiet ba ba̱ nyia̱ a̱shi̱shi̱k nyia̱, ba̱ bu ya kyayak ku yet za̱nang nang á̱ neap nghwughwu a̱yaagwaza sang swuan a̱ni.

²¹N ku nwuak gu jen, gu ghwon a̱shi̱shi̱k nyia̱ nggu wu. A̱wot a̱ si̱ lak.

²²Mat a̱nia, n na ntyia̱ a̱ka̱tuk nzwan a̱ ta̱bat Jezibel ma̱ng á̱niet ba̱ katnaan ma̱ng a̱nggu a̱ni; ba̱ swuo a̱bung ba̱t, si̱ nang ba̱ ghwon khwi vak a̱ka̱tuk nyia̱ Jezibel hu.

²³N na hyaai á̱niet ba̱ khwi tyiet gu hu a̱ni. A̱wot a̱mgba̱m á̱niet khwi ba na lyen, nang nung gwa ngyet a̱tyu a̱ zop fwuo ma̱ng a̱di̱dam konyan a̱ni! Mat a̱nia, n na ntan konyan zang ma̱ cha̱chaat ma̱ng ta̱m hu nang gu nyia̱ a̱ni.

²⁴A̱wot nyin á̱kum á̱niet khwi ka nyi shya̱ mi̱ Tiyata̱ra, nyi lak khwi tyiet a̱ka̱laa Jezibel hu (A̱ka̱laa nang á̱niet khwi Jezibel ba ngyei, ‘a̱chuchuk a̱ shya̱ gbang di̱ niat’; tyiet nggu hu ku yet si̱ A̱ta̱nyeang[10] a̱ni). N bu na nchat n nwuak nyin doka jhyang bah.

²⁵A̱wot nyi khwi a̱tsatsak tyiet nang nyi shya̱ a̱ni shansham, si̱ nang n bai.

²⁶A̱mgba̱m á̱niet ba̱ swuo chet swanta hu, ba̱ si̱ bu nyia̱ nta̱m ma̱ng á̱lyiat nung na si̱ nat sangba̱p swuan mba ji a̱ni; bibya n na ntyia̱ mba ba̱ nyia̱ tyok tazwa a̱mgba̱m nnwap mi̱ bibyin swanta hu dundung ma̱ng a̱nung!

²⁷Ba̱ na nyia̱ tyok tazwa a̱mgba̱m nnwap swanta na ma̱ng shan ntswam. A̱wot ba̱ tsot ba á̱ fwuoi nang á̱ ni̱ nfwuoi a̱la̱n nang á̱ nok ma̱ng lyem a̱ni.

²⁸Ba̱ na byia̱ tyok ma̱ cha̱chaat ma̱nang A̱tyia̱ nung wu nnang nung a̱ni. N bu na nang mba a̱na̱ndan, a̱ yet a̱ta̱ngwat ka̱ ni̱ ghwut mi̱ shong a̱tson a̱ni!

²⁹Konyan wa chat lyen a̱ni, ku yet ta hwa gu myiai a̱fufwuo gu fa̱a̱k, a̱ bu fi̱k a̱lyiat nang A̱za̱za̱rak Ntswa A̱gwaza wu shei susot á̱niet khwi ji a̱ni!”