Read tyap Tyai Á̱zanson 20 Bible Online

Tyai Á̱zanson 20 - tyap bible

Tyai Á̱zanson 20

¹A̱wot n si̱ ndi a̱ta̱m tswa A̱gwaza a̱ghyang gu chorop a̱ neet Ma A̱gwaza tswazwa, nang gu ba̱ng yaya a̱tsuung bwong sang sangba̱p a̱wa ma̱ng a̱kpi̱di̱dyi̱k a̱nyanyang mbwak nggu ka![69]

²A̱ si̱ ta̱bat a̱ka̱tuk a̱shong zwuo a̱ byia̱ nfeap na a̱ni; nggu wa bu yet a̱ka̱tuk nzwak ji shya̱ neet gbangbang, ji̱ bu yet A̱ta̱nyeang, nang á̱ bu ngyei “Sha̱tan” a̱ni. Á̱ si̱ la̱p ji ma̱ng a̱nyanyang ji nyia̱ a̱lyia̱ chyikwop jhyung.

³A̱ta̱m tswa A̱gwaza wu si̱ ta nggu mami a̱tsuung bwong sang sangba̱p wu, a̱ si̱ nyim a̱ si̱ bat bwong hu. Da̱nian ki̱ di̱ A̱ta̱nyeang[70] ka, ka̱ di̱ bu laai a̱mgba̱m nnwap mi̱ bibyin swanta hu, si̱ nang a̱lyia̱ chyikwop a̱kya swak. Ka̱ jen a̱ja swak, ku yet ta hwa á̱ kai nka á̱ ghwon di̱ a̱banjen ma̱ chunchwiit.

⁴A̱jawa n si̱ ndi a̱cha̱chet chuchuk tyok ma̱ a̱di̱di̱t! A̱wot á̱ si̱ nwuak á̱niet ba̱ swan da̱ nji a̱ni tyok, ba̱ ka nyia̱ shi̱ri̱ya. Bibya yet tswá á̱niet nang á̱ hyaai mba[71] mat tak kpa̱sai mba hu tazwa Yesu ma̱ng a̱lyiat A̱gwaza na a̱ni. A̱wot da̱ mba, ba̱ ku kwok ntong a̱zaghyi a̱ka̱tuk nyam a̱yit a̱wa ku ghwughwu nji hu bah. Da̱ mba ba̱ ku shim ba̱ san zwunzwuo a̱ka̱tuk nyam a̱yit ji di̱ kpi̱kpeang mba hu ku mi̱ mbwak mba na bah. A̱mgba̱m mba, ba̱ bu ku shyip ma̱ng swuan. A̱wot ba̱ si̱ nyia̱ tyok ndyia̱ chyikwop jhyung[72] dundung ma̱ng Kristi.[73]

⁵Jen jini ja yet a̱son doot á̱niet ba̱ ka̱n kwi a̱ni. (Á̱kum á̱niet ba̱ kwi a̱ni, na shyip ma̱ng swuan bah; si̱ nang ndyia̱ chyikwop a̱nia nswak).

⁶Á̱niet ba̱ yet a̱son doot ma̱ á̱niet ba̱ ka̱n kwi a̱ni; yet á̱niet a̱li̱ba̱rka ma̱ng á̱za̱za̱rak bya! A̱khwu a̱ka̱feang ka na shya̱ mba bah. Ba̱ na yet a̱yaapris A̱gwaza ma̱ng Kristi. A̱wot ba̱ bu nyia̱ tyok dundung ma̱ng a̱nggu si̱ nat ndyia̱ chyikwop jhyung.

⁷Ka̱ ndyia̱ chyikwop a̱nia tyak, á̱ na ti̱n A̱ta̱nyeang ka̱ yet Sha̱tan[74] a̱ni ma̱ a̱tsuung bwong sang sangba̱p wu nang á̱ nyim, á̱ si̱ bat a̱ni.

⁸Ka̱ bu na ghwut ka̱ laai a̱mgba̱m nnwap mi̱ bibyin swanta hu, na̱ seang á̱ kai nfam naai mi̱ swanta na a̱ni. Nnwap nani nia á̱ ngyei Gog ma̱ng Ma̱gog[75]. A̱ta̱nyeang ka na tung mbaa dundung, ba̱ nyia̱ zwang. Á̱niet nzwang ba na shi á̱kpa ba̱t nang a̱ji̱jak a̱beam kyai a̱sa̱khwot a̱ni.

⁹A̱wot n si̱ ndi mbaa nang ba̱ kup tat á̱ chong á̱ ban á̱ naat á̱ kai a̱mgba̱m swanta hu! Ba̱ si̱ keang a̱vwuo nang á̱za̱za̱rak á̱niet A̱gwaza ba nkpaat a̱ni, ma̱ng a̱gba̱ndang a̱keang nang A̱gwaza wu chat a̱ni. Ma̱ng a̱nia, long si̱ ghwut neet Ma A̱gwaza tswazwa a̱ ba̱ fwui susot á̱niet nzwang ji̱ bai zwang ji ma̱ng mba a̱ni!

¹⁰A̱wot A̱ta̱nyeang ka̱ laai mba a̱ni, á̱ si̱ ta̱bat kaa, á̱ ta mami a̱gba̱ndang a̱nga̱ngak tswa ndong sang sangba̱p ku ya nang long sa̱lfa a̱ni; a̱vwuo ka nang á̱ ka̱n nta a̱ka̱tuk nyam a̱yit ji ma̱ng a̱ta̱m bwoi a̱ka̱laa a̱kwonu nggu a̱ni. A̱jawa ba̱ na nswuo a̱bung ba̱t a̱ta̱mam ma̱ng a̱tyetuk, si̱ nat sang sangba̱p.

¹¹A̱wot n si̱ kin di a̱gba̱ndang a̱sai chuk tyok ma̱ng a̱tyu a̱ swan da̱ nhu a̱ni! Kyai tswazwa ma̱ng a̱byin si̱ ta̱yuut, a̱ ghwon a̱tyu swan di̱ a̱gba̱ndang chuk tyok wu. A̱wot da̱ mba, á̱ bu li mba bah.

¹²N si̱ ndi á̱niet ba̱ ka̱n kwi a̱ni; a̱cha̱chet ma̱ng a̱chyuang nang ba̱ yong a̱zaghyi a̱gba̱ndang chuk Tyok A̱gwaza! Á̱ si̱ khwuk nta̱ka̱da na, mbeang Ta̱ka̱da Nswuan hu. A̱wot á̱ si̱ faat á̱niet ba̱ ka̱n kwi a̱ni shi̱ri̱ya ma̱ cha̱chaat ma̱ng nta̱m ba̱ nyia̱ a̱ni, ma̱nang á̱ ndyuut mami ta̱ka̱da na a̱ni.

¹³A̱wot a̱sa̱khwot na si̱ ghwut ma̱ng á̱niet ba̱ ka̱n kwi ma̱ a̱sa̱khwot na a̱ni. A̱khwu ma̱ng A̱bi[76] mameang si̱ ma nnwuak á̱niet ba̱ ka̱n kwi a̱ni. A̱wot á̱ si̱ faat a̱mgba̱m mba shi̱ri̱ya ma̱ cha̱chaat ma̱ng nta̱m nang ba̱ nyia̱ a̱ni.

¹⁴A̱jawa á̱ si̱ ta A̱khwu ma̱ng A̱bi ma̱ a̱gba̱ndang a̱nga̱ngak tswa ndong. A̱gba̱ndang a̱nga̱ngak tswa ndong jini ja yet a̱khwu a̱ka̱feang ka.

¹⁵Konyan wa da̱nang á̱ lyuut a̱lyoot nggu ka mami Ta̱ka̱da Nswuan hu a̱ni bah; á̱ na ta gu mami a̱gba̱ndang tswa a̱nga̱ngak ndong sang sangba̱p.