Read tyap Tyai Á̱zanson 22 Bible Online

Tyai Á̱zanson 22 - tyap bible

Tyai Á̱zanson 22

¹A̱jawa a̱ta̱m tswa A̱gwaza wu si̱ tak ma̱ng a̱nung a̱ghyui ka̱ byia̱ a̱sa̱khwot nswuan a̱ni. A̱sa̱khwot na li ma̱ wowot nang ma̱dubi a̱ni, na̱ tyong á̱ neet da̱ a̱gba̱ndang chuk Tyok A̱gwaza ma̱ng a̱si̱ Fi̱ng A̱nfwuk[81] hu!

²A̱sa̱khwot a̱ghyui na si̱ tyong a̱ nat ma̱ a̱ka̱wa̱tyia̱ a̱gba̱ndang a̱gaat a̱keang wu. Mi̱ kuzang khwong a̱ghyui hu, á̱ mbyia̱ a̱kwon nswuan, ka̱ tyei sum swak ma̱ a̱feang kuzang a̱lyia̱; kuzang zwat á̱ si̱ kpa̱i sum fai da̱ nka. A̱kyikyo ba si̱ yet kan choot a̱mgba̱m á̱niet nnwap mi̱ bibyin swanta na.

³Á̱ na mbyia̱ kyang nang A̱gwaza ka̱n shyi a̱ni ma̱ a̱keang ka bah. Mat a̱gba̱ndang chuk Tyok A̱gwaza hu, ma̱ng a̱si̱ Fi̱ng A̱nfwuk hu, na shya̱ ma̱ a̱keang ka. A̱wot á̱khwo A̱gwaza ba na kwok gu ntong.

⁴A̱wot ba̱ na li a̱ghyi nggu ba. A̱wot á̱ na lyuut a̱lyoot nggu ka nang zwunzwuo a̱ni, di̱ kpi̱kpeang mba hu.

⁵Á̱ na mbyia̱ a̱tyetuk a̱ja bah. Da̱ mba, á̱ na mbyia̱ long fi̱tila ku mam bah. Mat A̱gwaza a̱ yet A̱tyoli a̱ni, nggu wa na sai a̱vwuo ka! Ba̱ na nyia̱ tyok ndung ma̱ng A̱gwaza si̱ nat sang sangba̱p.

⁶A̱wot a̱ta̱m tswa A̱gwaza wu si̱ nyia̱ ma̱ng a̱nung, “A̱lyiat nani nang a fa̱k a̱ni yet a̱tsak a̱lyiat, na̱ si̱ bu yet a̱chuchuk wa. A̱gwaza a̱ yet A̱tyoli a̱ nwuat a̱yaata̱m a̱kwonu nggu ba chet A̱za̱za̱rak Ntswa a̱ni. Nggu wa si̱ bu ta̱m a̱ta̱m tswa nggu wu, gu tak ma̱ng á̱khwo nggu ba kyang ku na bai di̱ mi̱n byian jen a̱ni.”

⁷(Á̱ si̱ fa̱k a̱nwuat ka̱ nyia̱,)[82] “Di! N chobai di̱ mi̱n byian jen! Á̱niet a̱li̱ba̱rka bya yet á̱niet ba̱ khwi á̱lyiat a̱yaata̱m a̱kwonu A̱gwaza na nang á̱ lyuut mi̱ ta̱ka̱da huni a̱ni.”

⁸Nung Yoona, n ku nfa̱k, n si̱ bu ndi a̱mgba̱m nkyang nani! Nang n ku nfa̱k, n si̱ bu ndi na a̱ni, n si̱ ta̱bwak n chat n kyuak ntong a̱zaghyi a̱ta̱m tswa A̱gwaza wu a̱ tak nung nkyang nani a̱ni.

⁹A̱ta̱m tswa A̱gwaza wu si̱ nyia̱ ma̱ng a̱nung, “Kaai, yok kyuak nung ntong bah! Nung meang, n gyet a̱khwo A̱gwaza wa ma̱nang a̱nwan ma̱ng á̱na̱nyiuk ang ba, ba̱ yet a̱yaata̱m a̱kwonu A̱gwaza a̱ni; ma̱ng a̱mgba̱m á̱niet ba̱ khwi á̱lyiat nang á̱ lyuut mi̱ ta̱ka̱da huni a̱ni. A̱gwaza wa ma̱nyin nggu maai á̱ kwok gu ntong!”

¹⁰A̱wot a̱ si̱ bu nyia̱ ma̱ng a̱nung, “Yok niat tá̱m ta̱ka̱da jini ji̱ na bai á̱zanson nang A̱gwaza tyai a̱ni bah. Mat jen ji bai kpa̱mkpaan!

¹¹Nang jen ji ni̱ mbwat a̱ni,[83] konyan wa yet a̱tyu a̱ka̱kpa̱t, gu ya a̱son ma̱ng a̱ka̱kpa̱t nggu na. A̱tyu a̱ nyia̱ a̱ka̱tuk nkyang nsum a̱ni, gu ya a̱son ma̱ng nyia̱ a̱ka̱tuk nkyang nsum nggu na. A̱wot a̱tyu a̱ ma nyia̱ tsotswat a̱ni, gu ya a̱son mi̱ nyia̱ tsotswat nggu hu. A̱tyu a̱ yet a̱za̱za̱rak a̱yin a̱ni, a̱ ya a̱son ma̱ng swat a̱za̱za̱rak nggu hu.”

¹²(Á̱ si̱ fa̱k a̱nwuat ka̱ nyia̱,)[84] “Di, n chobai di̱ mi̱n byian jen! N na bai ma̱ng zang, n na nwuak konyan cha̱chaat ma̱ng nta̱m nang gu nyia̱ a̱ni.

¹³Nung gwa ngyet A̱lfa ma̱ng Omega, A̱son ma̱ng A̱ngaan ka, A̱tsan ka ma̱ng A̱mgba̱m wu!”

¹⁴“Á̱niet a̱li̱ba̱rka bya yet á̱niet ba̱ kwi a̱yaatoot mba ba a̱ni! Á̱ na shim mba ndyo ba̱ nwuo á̱zanunwuai a̱keang a̱fai ka, a̱wot ba̱ ya sum a̱kwon swuan hu!

¹⁵“Á̱niet ba̱ shya̱ a̱ma̱nta a̱keang ka a̱ni, bya yet a̱ka̱bwu; á̱niet byia̱ nkut, á̱niet a̱shi̱shi̱k nyia̱, á̱niet hyaai á̱niet, á̱niet khwi nghwughwu a̱yaagwaza sang swuan, ma̱ng a̱mgba̱m á̱niet ba̱ chat bwoi a̱ka̱laa a̱ni.

¹⁶“Nung Yesu, n ta̱m a̱ta̱m tswa nung wu, gu nwuak nyin ta̱m jini da̱nian susot á̱niet khwi nung ji. Nung gwa ngyet a̱tyin kwai a̱gwam Da̱wuda ka, ma̱ng a̱tyu a̱ na ya gado chuk tyok nggu hu a̱ni! Nung gwa bu ngyet a̱na̱ndan a̱ta̱ngwat[85], ka̱ sai ma̱ kyenkyai a̱ni!”

¹⁷A̱za̱za̱rak Ntswa wu ma̱ng Nggwon neam naat nyeang ka si̱ nyia̱, “Yesu bai!” Konyan wa fa̱k a̱ni, yok gu nyia̱, “Yesu bai!” Yok a̱mgba̱m á̱niet ba̱ fwuong mashyi a̱sa̱khwot a̱ni, ba̱ bai! Yok á̱niet ba̱ chat swuo a̱sa̱khwot nswuan a̱ni, ba̱ bai ba̱ swuo di̱ mi̱n tan zang!

¹⁸A̱wot nung Yoona, n gba n si̱ bu nkhwat nyin a̱fufwuo! Konyan wa fa̱k a̱lyiat A̱gwaza nang á̱ lyuut mi̱ ta̱ka̱da huni na̱ na bai á̱zanson a̱ni: Ka̱ a̱yin mbeang tyiet ghyang di̱ kyang nang lyuut huni fa a̱ni, A̱gwaza na mbeang a̱tyu a̱wa mbyep nang á̱ wa̱i mi̱ ta̱ka̱da huni a̱ni!

¹⁹Ma a̱nia wa, ka̱ a̱yin ma nghyuai tyiet nang a̱lyiat A̱gwaza mi̱ ta̱ka̱da huni fa, na̱ na bai á̱zanson a̱ni; A̱gwaza meang, na ti̱n kyang ku yet a̱kwonu a̱tyu a̱wa ma̱ a̱kwon nswuan ka, ma̱ng a̱za̱za̱rak a̱keang wu, nang á̱ ngwa̱i na mami ta̱ka̱da huni a̱ni!

²⁰Yesu, a̱tyu a̱ tak a̱chuchuk kpa̱sai tazwa a̱mgba̱m nkyang nani a̱ni, nyia̱, “A̱tsak a̱lyiat wa za̱m, n chobai di̱ mi̱n byian jen!” Samba̱rka! Bai A̱tyoli Yesu, bai!

²¹Yok shok A̱tyoli Yesu ji̱ shya̱ dundung ma̱ng á̱za̱za̱rak á̱niet A̱gwaza! Samba̱rka!