Read tyap Tyai Á̱zanson 4 Bible Online

Tyai Á̱zanson 4 - tyap bible

Tyai Á̱zanson 4

¹Nang si̱ huni nswak a̱ni, a̱jawa n si̱ kin di nyinyiit Ma A̱gwaza tswazwa nang á̱ nyiip a̱ni! A̱wot a̱nwuat ka nang n mi̱ nfa̱k a̱ni, ka̱ si̱ kaat ma̱ng a̱nung nang á̱ ni̱ ntyiap a̱gwa mi̱ chet a̱ni! A̱nwuat ka si̱ nyia̱, “Nyeak bai a̱ji! A̱wot n na ntak ang nkyang na̱ shya̱ á̱zanson nang ku yet ta hwa na̱ bai, ka̱ si̱ huni swak.”

²A̱wot mi̱ di̱ yong a̱hwa, A̱za̱za̱rak Ntswa A̱gwaza si̱ nwuak nung chet, a̱wot n si̱ kin di a̱gba̱ndang chuk Tyok Ma A̱gwaza tswazwa nang a̱yin nswan da̱ nhu!

³A̱tyu a̱ swan da̱ a̱gba̱ndang chuk tyok wu a̱ni, si̱ ya á̱ghyi mya̱myat nang a̱za̱za̱rak nfang nang á̱ ngyei jaspa ma̱ng ka̱naliyen a̱ni! A̱wot sai a̱fang a̱ghyang nang á̱ ngyei a̱mila a̱ni, si̱ ya á̱ghyi mya̱myat; ku si̱ tyong a̱gba̱ndang chuk tyok wu a̱ keang nang ma̱gaji malei a̱ni!

⁴Chuchuk tyok swak nfeang ma̱ naai si̱ tyong a̱gba̱ndang chuk tyok a̱wa á̱ keang. A̱wot á̱niet khwop á̱niet ba̱ kup á̱sai a̱yaatoot ma̱ng bung tyok ji yet zi̱nariya a̱ni; konyan si̱ swan tazwa kuzang chuk tyok.

⁵A̱mya̱ra̱m nza, ma̱ng a̱gbi̱ri̱ng nza, ma̱ng a̱gbai nza si̱ neet da̱ a̱gba̱ndang chuk tyok a̱ shya̱ ma̱ a̱ka̱wa̱tyia̱ nang chuchuk tyok swak nfeang ma̱ a̱naai ba tyong á̱ keang a̱ni! A̱wot a̱zaghyi a̱gba̱ndang chuk tyok wu, a̱ka̱ndong sang a̱natat si̱ nshya̱ a̱ ya a̱lya̱ra̱p! A̱ka̱ndong sang a̱natat nani nia yet; A̱za̱za̱rak Ntswa A̱gwaza a̱natat ba.

⁶A̱zaghyi a̱gba̱ndang chuk tyok wu, kyang ghyang ku nshya̱ ku si̱ tai jok a̱sa̱khwot ku li wowot nang ma̱dubi a̱ni. Ku si̱ ya á̱ghyi ma̱ mya̱myat a̱myat nang á̱taan a̱ni! Nkyang nswuan naai si̱ keang a̱gba̱ndang chuk tyok wu a̱ shya̱ ma̱ a̱ka̱wa̱tyia̱ a̱ni, kuzang nhu si̱ byia̱ tswá á̱ghyi, a̱zanson ma̱ng a̱ma̱lyim!

⁷Kyang nswuan nyiung hu si̱ tai zaki. Feang hu si̱ tai nyak. Tat hu si̱ byia̱ a̱ghyi nang a̱tyubishyi a̱ni. Naai hu si̱ tai a̱gwong a̱da a̱ tyong mi̱ kyai tswazwa a̱ni!

⁸Nkyang nswuan naai a̱nia, kuzang hu si̱ byia̱ nfeap a̱taa. Nfeap mba na si̱ byia̱ tswá á̱ghyi, á̱ tyong á̱ kaat a̱tafa ma̱ng tazwa! Kuzang a̱tuk, a̱ta̱mam ma̱ng a̱tyetuk, ba̱ ni̱ yong di̱ bubwom dyep A̱gwaza nyia̱, “A̱gwaza a̱ yet A̱tyoli a̱ byia̱ A̱mgba̱m Tyok a̱ni; a̱ yet a̱za̱za̱rak, a̱za̱za̱rak, a̱za̱za̱rak! Nggu wa ku nshya̱ kuzang jen! Nggu wa bu nshya̱ ma̱nini! A̱wot nggu wa bu na bai!”

⁹Kuzang jen ma̱nang nkyang nswuan naai a̱nia ndyep, á̱ nwuat shi ma̱ng a̱gwai da̱ a̱tyu a̱ swan da̱ a̱gba̱ndang chuk tyok wu a̱ni, (nggu wa yet A̱gwaza a̱ byia̱ swuan sang sangba̱p a̱ni);

¹⁰di̱n jen a̱ja á̱niet khwop á̱niet swak nfeang ma̱ naai a̱bya, ni̱ ta̱bwak a̱byin ba̱ kwok ntong a̱zaghyi A̱gwaza a̱ swan da̱ a̱gba̱ndang chuk tyok wu, a̱ shya̱ a̱chet si̱ nat sang sangba̱p a̱ni! A̱wot ba̱ ni̱ khwut bung tyok mba ji, ba̱ saai a̱zaghyi nggu ba̱ nyia̱,

¹¹“A̱gwaza, A̱tyoli nzi̱t wu, nwan wa maai á̱ chyin ang, á̱ nwuak ang shi, ma̱ng tyok! Mat nwan wa mat kuzang kyang mi̱ swanta hu! A̱wot shim ang hwa nang kuzang kyang nshya̱ ma̱nang a mat hu a̱ni!”