Read tyap Tyai Á̱zanson 8 Bible Online

Tyai Á̱zanson 8 - tyap bible

Tyai Á̱zanson 8

¹Nang Fi̱ng A̱nfwuk[24] hu nghwok a̱timi a̱natat wu mi̱ ta̱ka̱da nang á̱ kut di̱n shan ji a̱ni, á̱ si̱ ya ntyia̱ nywang Ma A̱gwaza tswazwa ba̱ng si̱ nat minti swak ntat.

²N si̱ kin di a̱yaata̱m tswá A̱gwaza a̱natat ba̱ yong a̱zaghyi A̱gwaza, a̱wot á̱ si̱ nwuak konyan ma̱ a̱mba a̱gwa!

³A̱wot a̱ta̱m tswa A̱gwaza a̱ghyang si̱ ba̱ng chi̱chya̱ zi̱nariya nang á̱ nfwui turare a̱ni; a̱ si̱ neet a̱ ba̱ yong a̱zaghyi a̱tyii nwuat za̱nang A̱gwaza wu. Á̱ si̱ nwuak gu turare gba̱mgbam, gu kyiai ma̱ng naai á̱za̱za̱rak á̱niet A̱gwaza hu. A̱ si̱ neap da̱ a̱tyii zi̱nariya nwuat za̱nang A̱gwaza wu, a̱ shya̱ a̱zaghyi a̱gba̱ndang chuk tyok wu a̱ni.

⁴A̱chunchung turare na ma̱ng naai á̱za̱za̱rak á̱niet A̱gwaza hu, si̱ neet da̱ a̱tyii nwuat za̱nang wu nang a̱ta̱m tswa A̱gwaza wu nneap za̱nang ji a̱ni, na̱ si̱ nyeak á̱ nat a̱zaghyi A̱gwaza.

⁵A̱jawa a̱ta̱m tswa A̱gwaza wu si̱ nkyiak chi̱chya̱ turare hu da̱ a̱tyii nwuat za̱nang wu, a̱ si̱ ntyia̱ a̱chi̱chan ndong tyentyang, a̱ si̱ ghwop mi̱ swanta hu. A̱wot á̱ si̱ fa̱k a̱gbi̱ri̱ng nza, ma̱ng a̱gbai nza, ma̱ng a̱mya̱ra̱m nza a̱wot ma̱ng a̱ka̱tuk tyi̱ri̱m a̱byin!

⁶A̱wot a̱yaata̱m tswá A̱gwaza a̱natat a̱bya si̱ la̱p vam ba̱ tyiap gugwa a̱natat hu.

⁷A̱ta̱m tswa a̱ yet a̱son ka a̱ni, si̱ tyiap a̱gwa nggu ka, a̱wot á̱ si̱ kin ghwop taan ma̱ng long kyiai a̱sok a̱byin ka! Fam nyiung mami nfam tat a̱byin na, si̱ ta̱bat long. Fam nyiung mami nfam tat ma̱ a̱ka̱kwon na si̱ ya long. A̱wot a̱mgba̱m a̱shyim á̱kwop wu si̱ mun a̱ fwui!

⁸A̱ta̱m tswa a̱feang wu si̱ tyiap a̱gwa nggu ka, á̱ si̱ ta kyang ku li nang a̱gba̱ndang a̱fan a̱ ya long a̱ni mami kyai a̱sa̱khwot!

⁹A̱wot fam nyiung mami nfam tat mi̱ kyai a̱sa̱khwot hu si̱ bwuak a̱ tyia̱ a̱sok! Sot jhyung mami a̱mgba̱m susot tsat nkyang nswuan na̱ shya̱ mi̱ kyai a̱sa̱khwot hu a̱ni, si̱ kwi! A̱wot a̱kpa a̱nyiung mami a̱yaakpa a̱tat a̱mgba̱m a̱kukwon a̱wak ba, ba̱ shya̱ mi̱ kyai a̱sa̱khwot hu a̱ni, si̱ fwuoi!

¹⁰A̱wot a̱ta̱m tswa A̱gwaza a̱tat wu si̱ ma ntyiap a̱gwa nggu ka. A̱wot a̱gba̱ndang a̱ta̱ngwat a̱ ya long nang a̱fi̱t ndong a̱ni, si̱ kin neet mi̱ kyai tswazwa a̱ ba̱ kwa da̱ a̱kpa a̱nyiung mami a̱yaakpa a̱tat a̱ka̱ghyui ma̱ng nnang a̱sa̱khwot mi̱ swanta na!

¹¹A̱lyoot a̱ta̱ngwat ka, á̱ ngyei “A̱gba̱za̱zai” wa. Ka̱ si̱ tyia̱ a̱kpa a̱nyiung mami a̱yaakpa a̱tat a̱ka̱ghyui ma̱ng nnang a̱sa̱khwot na si̱ tyia̱ gba̱za̱zai! A̱wot á̱niet ma̱ a̱di̱di̱t ba̱ si̱ swuo a̱sa̱khwot na a̱ni, si̱ kwi mat swan gba̱za̱zai nna hu!

¹²A̱ta̱m tswa A̱gwaza a̱naai wu si̱ tyiap a̱gwa nggu ka. Á̱ si̱ nyim sai fam nyiung mi̱ nfam tat mam na; ma a̱nia wa fam nyiung mi̱ nfam tat zwat na; ma a̱nia wa fam nyiung mi̱ nfam tat á̱ta̱ngwat na, si̱ tyia̱ lyin ma̱ kyi̱ri̱p! Mat a̱nia, á̱ si̱ ka̱u a̱ta̱mam ka a̱ka̱tat; a̱tyong a̱nyiung mami a̱ka̱tyong a̱tat mam na si̱ tyia̱ lyin! A̱wot á̱ si̱ bu ka̱u a̱tyetuk ka a̱ka̱tat; a̱tyong a̱nyiung mami a̱ka̱tyong a̱tat a̱tyetuk na si̱ tyia̱ lyin!

¹³Nang n nwuan a̱ni, n si̱ kin di a̱gwong a̱da gu ji̱m mi̱ kyai tswazwa, a̱ lyiat mi̱ chet nyia̱, “Kyang a̱wun! Kyang a̱wun! Kyang a̱wun chobai tazwa nyin a̱mgba̱m á̱niet ba̱ yet á̱si̱ swanta bani; mat nkyang na na̱ na bai di̱n jen nang a̱yaata̱m tswá A̱gwaza a̱tat ba̱ ngaan na ntyiap gugwa mba hu a̱ni!”